Direkta sa Punto

Unsa man ang balaod sa pagpahinungod? Sa unsa nga paagi kini makaapekto kanako?

kabatan-onan nga naghimo og proyekto sa pagserbisyo

Ang balaod sa pagpahinungod usa ka baruganan nga gihatag sa Ginoo ngadto sa Iyang katawhan sa pakigsaad. Sa pagsunod niini nga baruganan, ang mga lalaki ug mga babaye hingpit nga mohalad sa ilang kaugalingon aron sa pagtukod sa gingharian sa Dios ug sa pagsiguro nga “walay kabus taliwala kanila” (Moises 7:18). Mohatag sila sa ilang panahon, mga talento, ug materyal nga mga kapanguhaan aron sa pagserbisyo sa Ginoo, sa Iyang Simbahan, ug sa Iyang mga anak.

Sa unang mga adlaw sa gipahiuli nga Simbahan, ang Ginoo misugo ni Joseph Smith sa piho nga paagi nga ang mga Santos kinahanglang mosunod niini nga balaod (tan-awa sa Doktrina ug mga Pakigsaad 42:30–42). Ang mga Santos “mopahinungod” (mosakripisyo o modonar) sa ilang mga kabtangan ngadto sa Simbahan pinaagi sa paghatag niini ngadto sa bishop. Siya dayon mohatag kanila og balik kon unsay ilang gikinahanglan (ilang “pagkatinugyanan”). Ang nahibilin gigamit sa pagtabang sa kabos.

Karon, nagsunod kita niini nga balaod sa lain-laing mga paagi. Sama pananglit, moserbisyo kita sa uban, modawat og mga calling ug mga buluhaton sa Simbahan ug mohimo sa atong labing maayo niini, ug mobayad og hingpit nga ikapulo ug ubay-ubay nga halad sa puasa. Kon kita mobuhat sa unsay gisugo kanato sa mga propeta ug sa Espiritu Santo aron sa pagtukod sa gingharian sa Dios ug sa pagtabang sa nanginahanglan, nagpuyo kita sa balaod sa pagpahinungod.