“Usa ka Hulagway sa Panaghiusa,” Alang sa Kalig-on sa mga Kabatan-onan, Abr. 2021, 6–8.
Dali, Sunod Kanako
Usa ka Hulagway sa Panaghiusa
Sama sa mga tulbok sa kolor sa usa ka canvas, kitang tanan managlahi. Apan kini usa ka maanindot kaayo nga butang kon kitang tanan nagkahiusa diha sa gingharian sa Dios.
Talan-awon sa Crotoy, ni Georges Seurat
Kon inyong madungog ang pulong nga panaghiusa unsay inyong mahunahunaan? Tingali ang usa ka choir nga magdungan sa pagkanta o ang imong paboritong koponan sa sport nga magdungan sa pagdula isip usa ka yunit. Kamo makakita og panaghiusa diha sa mga pamilya, mga komunidad, bisan sa kinaiyahan!
Ang panaghiusa mao ang panag-uban ug panagtambayayong isip kinatibuk-an. Bisan og managlahi ang atong mga kagikan, managlahi og mga kultura, ug adunay managlahing mga abilidad, ang Langitnong Amahan gusto nga maghigugmaay kita sa usag usa ug “maghiusa” (Doktrina ug mga Pakigsaad 38: 27). Apan unsaon nato nga mahiusa kon kitang tanan managlahi kaayo?
Panaghiusa diha sa Art
Maghisgot kita mahitungod sa panaghiusa diha sa musika ug mga sport, apan nasayod ba kamo nga kita makakat-on usab mahitungod sa panaghiusa gikan sa art? Adunay usa ka estilo sa pagpintura nga gitawag og pointillism diin ang mga artist mogamit og gagmayng dekolor nga mga tulbok sa tibuok nga pinturahanan aron makamugna og usa ka imahe imbis sagulon ang mga kolor diha sa paleta ug mogamit sa dagkong mga agi sa brush. Kon mobarug kamo duol niining mga painting, ang tanan ninyong makita mao ang tagsa-tagsa ka mga tulbok sa kolor.
Hinoon, kon moatras kamo, ang mga tulbok magsagol nga makita ang usa ka hulagway.
Ang tagsa-tagsa ka dekolor nga mga tulbok mahiusa aron mahimong usa ka matahom nga butang. Sama sa mga tulbok, kitang tanan managlahi nga mga indibidwal. Ang Langitnong Amahan nakakita sa “tibuok hulagway.” Siya nagtan-aw kanatong tanan isip Iyang mga anak nga mga lalaki ug mga babaye, “mga manununod sa gingharian sa Dios” (4 Nephi 1:17). Kon kita makakat-on usab sa pag-atras ug motan-aw sa mas dakong hulagway, atong makat-unan kon unsaon sa paghigugma ug makigtambayayong sa mga tawo kinsa lahi kanato. Ania ang pipila ka butang nga atong mabuhat aron magkahiusa.
Mohinumdom sa mga Pakigsaad
Ang paghinumdom sa atong mga pakigsaad sa bunyag makatabang nato nga mapaningkamotan ang mahiusa ngadto sa uban. Sa Mosiah 18:10 atong mabasa nga kabahin sa pagpabunyag mao ang pag-uyon nga moserbisyo sa Dios ug motuman sa Iyang mga sugo. Usa ka paagi nga kita makahimo niini mao ang “[m]agtambayayong sa usag usa nga mga alantuson, … [m]agbangutan uban niadto nga nagbangutan; … ug [m]aghupay niadtong nagkinahanglan sa kahupayan” (Mosiah 18:8–9).
Kon kita motabang sa usa ka higala kinsa naguol, motabang sa atong mga ginikanan sa mga gimbuhaton sa balay, o motabang sa usa ka bag-o nga tawo sa eskwelahan, naghimo kita og mga paningkamot sa pag-abli sa atong mga kasingkasing ngadto kanila ug ang atong “mga kasingkasing nabugkos diha sa pagkahiusa ug diha sa gugma sa usag-usa” (Mosiah 18:21). Unsa ang pipila ka paagi nga kamo makatuman sa inyong pakigsaad sa bunyag sa pag-alagad sa Dios? Tingali inyo gani nga mapangutana ang inyong kaugalingon niining pangutanaha sa sunod higayon nga moambit kamo sa sakramento. Samtang kamo mangita og laing mga paagi nga makatukod og panaghiusa sa uban, ang Langitnong Amahan motabang kaninyo.
Likayi ang Paggamit sa mga “-ite”
Diha sa Basahon ni Mormon, ang mga tawo migamit sa ngalan isip paagi sa pagbahin ug pagkabulag sa ilang kaugalingon. Sila mitawag sa ilang kaugalingon nga mga Nephite, mga Lamanite, mga Zoramite, ug mga Amalekite—sa paghingalan lang og pipila. Usahay sila gani adunay espesyal nga mga marka sa pisikal nga paagi aron sa pagpakita hain nga grupo nahisakop sila (tan-awa sa Alma 3:4). Sila labing malipayon sa dihang wala silay bisan unsa nga mga “-ite” (tan-awa sa 4 Nephi 1:16–17).
Hunahunaa ang inyong trabaho, eskwelahan, o kasilinganan. Tingali dili kita mogamit og tawag nga “mga Nephite” o “mga Zoramite”, apan makahunahuna ba kamo og laing mga tawag nga gamiton sa mga tawo? Ang ubang mga tawo sa kalibutan mosulay sa pagbulag kanato base sa mga butang sama sa pisikal nga mga abilidad, ang kolor sa atong panit, o gani kon pila ang salapi nga anaa kanato. Kana dili mao ang unsay gitudlo ni Jesukristo nga atong buhaton. Siya mitudlo kanato nga “higugmaa ang imong silingan sama sa imong kaugalingon” (Marcos 12:31). Aron mahimong mas mahisama ni Jesukristo, likayi ang paggamit sa mga tinawgan o mga ngalan nga mobahin kanato.
Pagpakita og Pagkamapainubsanon
Kabahin sa panaghiusa mao ang “pagkat-on nga malipay diha sa mga kalampusan sa mga igsoon ug mga higala. …Kitang tanan kinahanglang maningkamot nga mahimong mas mapainubsanon.”1 Usahay lisud kining bation. Tingali ang imong suod nga higala nakasulod sa koponan apan ikaw wala, o ang imong igsoon nakakuha og mas maayong grado sa eskwelahan kay nimo. Tingali mobati kita og kaguol o masakitan nga ang uban milampos. Bisan og tingali lisod bation, tsulayi nga magsaulog uban nila! Kitang tanan adunay maanindot nga mga gasa ug mga talento ug ang atong Langitnong Amahan gusto nga ang matag usa kanato magtinguha ug mopalambo sa maayong mga gasa.
Ang mga Kalainan Mahimong Maayo
Usahay kita may kalagmitan nga makigdait lamang niadtong kinsa tan-awon nga sama kanato, makig-istorya sama kanato, o maghunahuna sama kanato. Apan si Jesukristo kanunay nga molakaw aron sa pagpakig-uban sa mga tawo kinsa makita nga lahi. Ang kalainan mahimong maayo ug gikinahanglan!
Litrato gikan sa Getty Images
Si Presidente Henry B. Eyring sa Unang Kapangulohan miingon, “Bisan … ang mga kalainan mahimong makita nga usa ka oportunidad. Ang Dios motabang kanato nga makakita og kalainan sa usa ka tawo dili isip usa ka tinubdan sa kapungot apan isip usa ka kontribusyon.”2 Dili tanan makadula sa samang posisyon sa usa ka team sa sports o makakanta sa mao gihapon nga bahin sa choir. Ang kalibutan mahimong laay kon ang tanan nga mga bulak managsama og kolor o kon ang tanang kahoy parehas og hitsura. Ang panaglahi nakapahimo sa kalibutan nga mas nindot ug makatabang kanato nga mahimong usa.
“Paghiusa”
Samtang magbuhat kamo sa paglig-on sa panaghiusa sa uban, tingali inyong makita nga kita dili ingon kalahi sa usag usa sama sa atong gihunahuna. Samtang kita magkat-on nga motan-aw sa usag usa sama sa pagtan-aw sa Langitnong Amahan ngari kanato, atong masabtan nga ang tanan gikinahanglan ug nahisakop sa gingharian sa Dios. Ang matag usa kanato usa ka maanindot nga tulbok sa kolor diha sa usa ka matahum nga dibuho [mural]. Ug atong dawaton kini, lahi ra gayud kon wala kamo.