“Gibati Nako nga Daw Napakyas,” Alang sa Kalig-on sa mga Kabatan-onan, Abr. 2021, 12–13.
Dali, Sunod Kanako
Gibati Nako nga Daw Napakyas
Wala koy bisan kinsa nga nabunyagan sa akong misyon. Dayon nakaamgo ko nga adunay mas maayong paagi sa pagsukod sa kalampusan.
Paghulagway ni Adam Howling
Mibati ba kamo nga daw napakyas sa usa ka butang bisan kon naglaom kamo sa tibuok ninyong kasingkasing nga kamo molampos? Mao kana ang akong gibati sa dihang miuli ko gikan sa akong misyon. Duha ka tuig sa France, ug unsay maayo nga akong nabuhat? Tinuod, nakahimo ako og mga higala, nakakat-on og pinulongan, ug nakakat-on sa paghigugma sa matinud-anong mga Santos kinsa naningkamot sa pagsunod sa ebanghelyo.
Apan wala koy bisan kinsa nga nabunyagan.
Dayon nahinumduman nako ang tambag nga gihatag kanako sa akong presidente sa misyon atol sa akong katapusang interbiyo: “Kon matinuoron kang makaingon nga ang Ginoo nahimuot sa paningkamot nga imong gihimo, kon matinuoron kang makaingon nga imong gibuhat ang imong labing maayo kutob sa imong mahimo alang Kaniya, nan mao kana ang sukod sa imong kalampusan. Walay laing mas mahinungdanon.”
Samtang naghunahuna ko kabahin niana, gibati nako nga kinahanglan nga mag-ampo. Sa hinay-hinay, miabot ang kalinaw sa akong kasingkasing. Mihunghong ang Espiritu, “Nasayud ang Ginoo nga gibuhat nimo ang imong labing maayo kutob sa imong mahimo. Ang imong sakripisyo madawat.” Panahon na kadto aron mopadayon sa sunod nga mga hugna sa akong kinabuhi.
I-abante nato gikan didto sa France
I-abante nato og daghang katuigan. Nagsulat ko ngadto sa akong anak nga babaye, kinsa nagserbisyo og misyon sa Canada, sa dihang nakadungog ko og pagpahibalo sa akong telepono. Adunay usa ka tawo nga nagpadala kanako og litrato sa sulod nga atubangang hapin sa usa ka kopya sa Basahon ni Mormon nga adunay pagpamatuod nga gisulat sa French—sa akong kaugalingong sinulatan! Gihatag nako ang basahon sa usa ka sister kinsa namiyembro sa Ang Simbahan ni Jesukristo sa mga Santos sa Ulahing mga Adlaw samtang usa ako ka misyonaryo (bisan og dili ako ang mibunyag kaniya), apan wala siya magpabilin nga aktibo pipila ka tuig ang milabay. Nganong magpadala kanako ang usa ka tawo og litrato sa pagpamatuod nga akong gisulat daghang katuigan na ang milabay?
Miabot ang litrato uban sa usa ka mensahe: “Tingali mainteresado ka nga makakita pag-usab sa imong pagpamatuod. Mahinamon kaayo ang akong tiya sa dihang namiyembro ko sa Simbahan nga gihatag niya kanako ang Basahon ni Mormon nga gihatag nimo kaniadto kaniya. Naghunahuna ko nga makasabot ka sa bili sa pagkahibalo kon unsa kini ka bahandi kanako.
“Ang akong iyaan wala nagpabiling aktibo sa Simbahan, apan kanunay siyang nagdayeg pag-ayo niini, hilabihan kaayo nga ang iyang manghud nga babaye (ang akong inahan) mihangyo sa mga misyonaryo sa pagtudlo kaniya. Ang akong inahan nagpamiyembro sa Simbahan. Naminyo siya sa templo. Siya ug ang akong amahan nagpadako og upat ka anak isip mga miyembro sa Simbahan. Ang akong tulo ka igsoon ug ako tanan miserbisyo og misyon ug naminyo sa templo. Kaming tanan aktibo ug matinud-anon.”
Napuno ako sa emosyon. Kadtong tanan nga mga tuig nga milabay, naghunahuna ko nga napakyas ko. Apan karon akong nakita kon sa unsang paagi ang Ginoo nakatuman sa Iyang buhat, sa Iyang paagi, sa paglabay sa panahon.
Samtang Inyong Buhaton ang Inyong Labing Maayo alang sa Ginoo
Ang mga panumduman sa ubang mga tawo nga akong natudloan isip usa ka misyonaryo misugod sa pagsantop sa akong hunahuna. Usa ka tawo ang nagpamiyembro sa Simbahan usa ka tuig human sa akong pagpauli. Nagpuyo na siya karon sa French Polynesia, ug pirme kaming mag-chat sa Skype. Laing tawo ang nagpamiyembro sa Simbahan pito ka tuig human sa akong misyon. Siya mismo nagserbisyo og misyon, sa Texas, USA. Karon siya ang executive secretary sa usa ka stake sa habagatang France.
Naghunahuna ko sa ubang French nga mga miyembro nga nailhan ug gihigugma gihapon nako—usa ka sister sa usa ka care center nga nagsulatan kanako; usa ka lalaki nga akong nailhan sa dihang tin-edyer pa siya kinsa usa na karon ka presidente sa misyon sa Africa.
Kon ikaw nangutana kanako sa katapusan sa akong misyon, moingon unta ko nga ako pakyas. Apan samtang naghunahuna ko mahitungod sa pagpamatuod nga akong gisulat diha niana nga Basahon ni Mormon niadtong tanang katuigan nga milabay, nakaamgo ko nga ikaw wala napakyas samtang buhaton nimo ang imong labing maayo alang sa Ginoo. Naghunahuna ko, “Tingali ang bugtong butang nga napakyas ko mao ang mahimong pakyas.”
Kapakyasan o Kalampusan?
Sa unang mga adlaw sa Pagpahiuli, gipadala ang usa ka grupo sa mga misyonaryo sa pagsangyaw ngadto sa mga American Indian nga nagpuyo sa kasadpan sa Missouri (tan-awa sa Doktrina ug mga Pakigsaad 28:8; 30:6; 32:2). Nagtuo sila nga gituman nila ang mga panagna sa Basahon ni Mormon mahitungod sa pagdawat sa mga Lamanite sa ebanghelyo sa ulahing mga adlaw. Apan sa katapusan sa ilang misyon, wala sila makabunyag bisan og usa ka American Indian.
Kon inyo silang pangutan-on, unsa kaha ang ilang masulti kabahin sa kapakyasan? Ug bisan pa niana, atol sa ilang paningkamot gidala nila ang uban ngadto sa Simbahan. Lakip kanila mao ang umaabot nga mga lider sama ni Sidney Rigdon ingon man usab sa daghang mga miyembro sa Kirtland, Ohio, diin sa wala madugay gitukod ang unang templo sa ulahing mga adlaw. Ilang nakat-onan, sama nga akong nakat-onan, nga ang Ginoo “mopakita ngadto sa mga katawhan nga Ako makahimo sa pagbuhat sa akong kaugalingon nga buhaton” (2 Nephi 27:21).
Mituyhad ko sa akong lingkuranan ug mipahiyom. Nakaamgo ko nga ang mga kalisdanan sa kinabuhi mahimong daw sama sa mga kapakyasan nianang higayona. Apan paglabay sa panahon, kon magpadayon kamo sa pagbuhat sa inyong labing maayo, motabang ang Ginoo kaninyo sa paghimo niini nga mga kalampusan.