“Walay Nakapugong,” Alang sa Kalig-on sa mga Kabatan-onan, Abr. 2021, 14–17.
Walay Nakapugong
Duha ka batan-ong lalaki gikan sa Washington, USA, nakakaplag og mga paagi sa pagserbisyo bisan sa pisikal nga mga limitasyon.
Litrato sa sa mga siyudad gikan sa Getty Images
Si Austin Nickle nagsugod sa pagkat-on og sinyas nga pinulongan [sign language] sa dihang 18 anyos siya. Misugod siya sa pagtambong sa iyang lokal nga branch sa mga Bungol [Deaf branch] ug gani nagpalista aron mokuha og mga klase sa kolehiyo diha sa komunidad. Apan si Austin dili bungol.
“Natawo ko nga may depekto sa pagsulti,” miingon si Austin. “Nahadlok ko nga magsige og sulti sa tibuok nakong kinabuhi tungod sa akong pagkanga-kanga ug kakulang sa pagkalarino [ang abilidad sa pagsulti sa tanan nga mga tingog sa mga pulong aron klaro kining masabtan]. Apan dili ko maulawon. Malingaw ko sa sosyal nga mga kahimtang, dili lang ko moistorya kaayo kompara sa uban.”
Usahay nagkinahanglan si Austin og pipila ka minuto sa pag-istorya sa unsay mapaambit sa uban sa pipila lang ka segundo. Apan kana wala gayud nakapugong kaniya nga mahimong malaumon ug hingpit nga mosalmot sa eskwelahan o simbahan. Ug bisan kon mobati siya og kahadlok usahay, nagpakita siya og kaisog.
“Wala siyay kahadlok,” miingon ang bishop sa kaugalingong ward ni Austin, si Rodger Pickett.
“Ako kanhi ang magtutudlo niya sa seminary. Wala siyay kahadlok bisan sa kamatuoran nga siya mahimong sungogon. Ug dihay mga sakop sa klase kinsa mopakita nga gisamokan, apan wala siyay kahadlok nga mosalmot, motubag, mag-ampo, ug mobuhat og ubang mga butang diha sa klase.”
Ug tinuod kana. Si Austin dili lamang isog apan mabination usab. Apan wala kana magpasabut nga ang mga butang mahimong sayon.
Gitawag sa Pagserbisyo
Ang pagserbisyo og misyon usa ka butang nga nasayran ni Austin nga mahimong usa ka hagit.
“Kon maghunahuna ko sa pagserbisyo og full-time nga misyon,” miingon Austin, “Nasayud ko nga magmalampuson ko sa usa ka pangserbisyo nga misyon [service mission], apan nabalaka ko mahitungod sa pagserbisyo og full-time nga pagsangyaw [proselyting] nga misyon. Apan, nasayod ko nga bisan asa ko tawagon sa Ginoo mao ang dapit diin Siya makagamit kanako sa labing maayo.”
Alang ni Austin, ang pagsuta sa labing maayong pamaagi mao lamang ang gikinahanglan.
Usa ka Dominggo, ang direksyon nahimong mas klaro og gamay. Ang presidente sa stake ni Austin mibisita sa ward ni Austin, ug si Austin mao ang nanalangin sa sakramento. Sa wala pa siya nahuman sa pag-ampo, ang presidente sa stake ug si Bishop Pickett nakadawat sa samang pagbati.
“Milingi ug mitan-aw kami sa usag usa uban sa eksaktong sama nga hunahuna,” miingon si Bishop Pickett. “Kinahanglan siyang magkat-on og sinyas nga pinulongan!”
Sa dihang si Bishop Pickett ug si Presidente McCall mipaambit sa ilang hunahuna, miingon si Austin, “Wala na ko nakuyawan kabahin sa pag-adto og misyon. Nasayud ko nga gusto kong moserbisyo isip usa ka ASL [American Sign Language] nga misyonaryo.”
Si Austin misugod sa pagtambong sa lokal nga branch sa mga Bungol ug dayon mikuha og mga klase sa sinyas nga pinulongan sa lokal nga kolehiyo diha sa komunidad. Siyempre, walay kasigurohan, apan siya makugihong naningkamot ug miandam sa iyang kaugalingon pananglitan kon kini mao ang kabubut-on sa Ginoo alang kaniya nga moserbisyo og ASL nga misyon.
Niadtong Septyembre 26, 2019, si Austin nakadawat sa iyang tawag sa misyon—duha ka tuig nga ASL nga misyon ngadto sa Phoenix, Arizona, USA.
“Unta nakita ninyo ang iyang nawong,” miingon si Bishop Pickett. “Hingpit nga kalipay. Lunlon nga hingpit nga kalipay. Nagsinyas siya ug ang iyang inahan mao ang naghubad samtang iyang giablihan ang email. Misinggit siya sa kalipay … nga inubanan og pipila ka pagpataas sa kumo.”
“Mahinamon ko,” miingon si Austin. “Makapahinam kini nga anaay daghang paagi sa pagserbisyo.”
Si Elder Austin Nickle uban sa iyang unang kompanyon
“Ang Ginoo adunay misyon alang kaninyo diin makahimo kamo og kalainan.”
Usa ka mainitong paghangop sa misyon sa Phoenix, Arizona!
Himamata si Donovan
Si Donovan Sorensen natawo nga may muscular dystrophy, usa ka kahimtang diin ang lawas dili makahimo og igong protina aron sa pag-ayo sa mga kaunoran. Nahiling siya sa edad nga 7. “Nakalakaw pa ko hangtod ako 11,” miingon si Donovan, “apan dayon nahimo nakong nagsalig pirmi sa wheelchair.”
Nagkinahanglan si Donovan og mas taas nga panahon sa pagbuhat sa normal nga mga butang sama sa pagbangon gikan sa higdaanan, pagsul-ob og sinina, o pag-andam og pagkaon.
“Nakat-onan gayud nako nga dili ibaliwala ang mga butang,” miingon si Donovan. “Kini usab naghatag kanako og pasalamat alang sa uban kinsa tingali mas naglisud niini nga mga butang kay sa nako.”
Miingon ang mama ni Donovan, “Bisan pa sa iyang pisikal nga mga limitasyon, wala gayud niya gitugotan ang iyang kahimtang nga makapugong kaniya sa pagtuman sa bisan unsang butang nga iyang gitinguha. Nagpakita siya og talagsaong kaisog bisan pa sa kanunayng kawalay kasiguroan. Aduna siyay mahilom nga pagsalig sa kaugalingon ug OK ra nga mahimong lahi.”
Si Donovan miapil sa programa sa Scouting.
Nalingaw sa usa ka biyahe sa barko sa Washington!
Pagserbisyo sa Balay sa Ginoo
“Aw, sa sinugdanan ang usa ka full-time nga pagsangyaw nga misyon dili na usa ka opsiyon,” miingon si Donovan. “Ug OK ra ko niana. Gidawat na nako kini.”
Apan dayon si Donovan ug ang iyang pamilya nakadungog mahitungod sa pangserbisyo nga mga misyon.
“Gikontak namo ang among coordinator sa pangserbisyo nga misyon sa area. Gisultihan namo siya kon unsay akong mahimo nga buhaton,” miingon si Donovan. “Gitabangan ko niya nga makakita sa hustong kahigayonan. Gikan didto, nakigtambayayong siya uban sa akong presidente sa stake ug bishop sa paghuman sa proseso.”
Wala kini magdugay nga gipadala ni Donovan ang iyang papeles. Sa wala madugay nadawat niya ang iyang tawag sa pagserbisyo og misyon sa Templo sa Seattle Washington. Gi-set apart siya ug mitrabaho sa templo lima ka adlaw sa usa ka semana human niana.
“Sa sinugdanan gikulbaan ko og gamay. Nakighimamat kami sa presidente sa templo ug sa recorder usa ka semana sa dili pa ko magsugod. Gi-set apart ko isip ordinance worker, ug ang recorder mipakita kanako sa pipila ka butang nga akong buhaton. Mao nga kana mipakalma gayud sa akong kakulba. Ug sa dihang nakasugod nako, kini dili na ikabalaka. Ganahan ko sa matag minuto niini.”
Apan ang iyang pagserbisyo dili ingon nga walay sakripisyo ug mga hagit.
“Ang pagmata usa ka hagit, apan ako lang siguroon nga dili ko matulog og dugay. Sa kasagaran sayon-sayon ra ko makabangon ug makaadto sa templo ug makabuhat sa tanan nga ilang gikinahanglan kanako nga buhaton.” Apan ang pagmata og sayo mao lamang ang sinugdanan. Sunod mao ang hununganan sa bus, diin si Donovan mosakay sa pampublikong transportasyon padulong ug gikan sa templo, nga mobiyahe og tulo ka oras sa usa ka adlaw ug usahay sobra pa, depende sa panahon.
“Wala niya gilantaw ang bisan unsa niini isip usa ka sakripisyo,” miingon ang iyang mama. “Moadto siya, bisan og nag-ulan, nag-snow, o hayag ang adlaw. Dili siya gusto nga makapalta og usa ka adlaw, tungod kay nasayod siya nga ang mga tawo nagsalig kaniya ug nasayod siya kon unsa ka importante ang iyang pagserbisyo.”
“Ganahan ko sa pagtabang sa mga tawo nga mobati nga giabi-abi,” miingon si Donovan. “Daghang tawo na ang nagpasalamat kanako alang sa akong pagserbisyo, ug bisan kon nagbuhat ko og butang nga mahimo sa bisan kinsang ordinance worker, kini nakapahimo kanako nga maayo ang pagbati sa pagkahibalo nga ako makatabang kanila nga malipay.”
Si Donovan ug si Austin mahimong wala nagserbisyo sa mga paagi nga ilang giplano sa sinugdanan, apan silang duha nagserbisyo sa eksaktong paagi nga gusto sa Ginoo alang kanila—sa Iyang paagi.
Ang tagsulat nagpuyo sa Washington, USA.