“4 ka Elemento sa Hingpit nga Pag-ula sa Manluluwas,” Alang sa Kalig-on sa mga Kabatan-onan, Abr. 2021, 18–19.
Dali, Sunod Kanako
4 ka Elemento sa Hingpit nga Pag-ula sa Manluluwas
Ang Pag-ula ni Jesukristo hingpit alang sa tanan, lakip na kaninyo!
Mga paghulagway ni Corey Egbert
Naghunahuna ba kamo sukad kon sa unsang paagi si Jesukristo makaluwas sa tanan kinsa sukad nabuhi? Unsay nakapahimo sa Iyang maulaong sakripisyo nga epektibo alang sa tanan?
Kining tanan magsugod sa plano sa kaluwasan. Ang buhat sa Langitnong Amahan mao ang “pagpahinabo sa pagka-imortal ug sa kinabuhi nga dayon” sa tanan Niyang mga anak—lakip kaninyo ug kanako (Moises 1:39). Apan adunay pipila ka babag nga kinahanglang buntogon sa matag usa kanato aron madawat ang pagka-imortal ug kinabuhing dayon. Matag usa kanato mamatay ugma damlag, busa kita dili imortal. Ug ang matag usa kanato makahimo og sala, nga nakapahimo kanato nga dili takos sa kinabuhing dayon, o sa pagkahimong anaa sa presensya sa Langitnong Amahan ug sa pagpuyo ingon nga Siya nagpuyo.
Ang Langitnong Amahan nasayod nga atubangon nato kini nga mga babag, busa gipadala Niya ang Iyang Anak, si Jesukristo, sa yuta aron mabuhi, mag-antos sa atong mga sala, mamatay, ug mabanhaw. Gitawag nato kini nga Pag-ula ni Jesukristo. Tungod ni Jesukristo, kitang tanan mabanhaw. Ug kon mopili kita nga maghinulsol, mahimo kitang malimpyo gikan sa atong mga sala ug makabalik ngadto sa Langitnong Amahan (tan-awa sa 2 Nephi 9:8–9; Alma 11:41–43).
Walay usa kanato ang makahimo niini alang sa atong mga kaugalingon. Si Jesukristo mao ang bugtong tawo kinsa makahimo og maulaong sakripisyo alang kanato, tungod kay kini kinahanglang hingpit nga buhaton. Apan unsay buot natong ipasabot kon moingon kita nga hingpit ang Iyang maulaon nga sakripisyo?
Ania ang upat ka butang nga nakahimo nga hingpit sa Pag-ula sa atong Manluluwas, si Jesukristo.
1. Iyang Balaan nga Pagkatawo
Si Jesukristo natawo nga Anak sa Dios (tan-awa sa Mosiah 3:5–8). Siya adunay usa ka mortal nga inahan ug usa ka balaan nga Amahan. Kini nagpasabot nga si Kristo makasinati og mortal nga kinabuhi ug mohimo og mga pagpili alang sa Iyang Kaugalingon, apan aduna usab Siyay tabang ug kalig-on sa Dios, ingon man sa gahum nga mabanhaw.
2. Iyang Walay Sala nga Kinabuhi
Si Jesukristo wala makasala atol sa Iyang kinabuhi. Gigamit Niya ang Iyang kabubut-on sa pagpili sa pagkamasulundon ug pagkamatarong kay sa sala (tan-awa sa Mosiah 15:5; Doktrina ug mga Pakigsaad 19:24; 20:22). Tungod kay nagpuyo Siya og hingpit nga kinabuhi, ang Iyang kinabuhi usa ka takos nga sakripisyo nga makatubos sa uban gikan sa sala.
3. Iyang Pag-antos didto sa Tanaman sa Getsemani ug sa Krus
Didto sa Tanaman sa Getsemani ug didto sa krus sa Kalbaryo, ang atong Manluluwas miantos sa kasakit ug sa mga sala sa tanang nabuhi sukad (tan-awa sa Doktrina ug mga Pakigsaad 19:16–19; Alma 7:11–14). Tungod niana nga pag-antos, si Jesukristo nakasabot sa unsay inyong gibati ug gisinati—ang maayo ug ang daotan—ug makatabang kaninyo latas sa inyong mga pagsulay.
4. Iyang Kamatayon ug Pagkabanhaw
Human sa Iyang pag-antos sa tanaman, si Jesukristo gidakop, gibunalan, ug gilansang sa krus. Gisalikway siya sa Iyang mga katawhan bisan sa Iyang pagkawalay sala (tan-awa sa Mosiah 3:9, Doktrina ug mga Pakigsaad 45:3–4). Sa ikatulong adlaw human sa Iyang kamatayon, si Jesukristo nabanhaw, ang unang tawo nga nakabuhat sa ingon dinhi sa yuta (tan-awa sa 1 Mga Taga-Corinto 15:20–22). Mibangon Siya gikan sa mga patay ug nakadawat og hingpit nga lawas. Human sa Iyang Pagkabanhaw, ang Iyang Pag-ula alang kanato nahingpit. Si Jesus adunay gahum sa pagtabang kanato sa pagbuntog sa sala ug kamatayon aron kita makabalik sa pagpuyo uban sa Langitnong Amahan (tan-awa sa Doktrina ug mga Pakigsaad 18:11–12; 20:23–26).
Sa Unsang Paagi ang Pagsabot Niini Makatabang Kaninyo?
Ang pagsabot kon sa unsang paagi nahitabo ang usa ka butang makatabang kanato nga makasabot sa bili sa unsay nahitabo. Tungod kay si Jesukristo mituman sa Iyang gi-orden nang daan nga misyon pinaagi sa Iyang balaan nga pagkatawo, kinabuhi nga walay sala, pag-antos, kamatayon, ug pagkabanhaw, Iyang nakompleto ang hingpit nga Pag-ula.
Hingpit kaayo ang Pag-ula ni Jesukristo nga Siya makatubos “dili lamang kadto kinsa mituo human siya mianhi … diha sa unod, apan kadtong tanan nga gikan sa sinugdanan” (Doktrina ug mga Pakigsaad 20:26). Ang tanan nga sukad nabuhi—kana nagpasabut nga kamo!—makapili nga magbaton og hugot nga pagtuo, maghinulsol, mohimo ug motuman sa mga pakigsaad, ug mobalik sa Langitnong Amahan.