“Panalipdi ang Pribado nga mga Higayon,” Alang sa Kalig-on sa mga Kabatan-onan, Abr. 2021, 22–25.
Panalipdi ang Pribado nga mga Higayon
Ang akong papa mitudlo kanako sa kaimportante sa paggamit sa akong panahon sa pagbuhat og maayo nga mga butang imbis sa paglikay lamang sa daotan nga mga butang.
Litrato pinaagi ni Cody Bell
Sa dihang 13 anyos ko, ang akong pamilya nagpuyo sa yuta sa Granger, Utah, ug matag Sabado sa buntag, ako ug ang akong igsoon momata og sayo aron sa pagsugod sa among mga buluhaton. Sa usa ka piho nga Sabado, ang akong buluhaton mao ang paghabas sa nataran. Kami adunay dako-dako nga nataran, mao nga kinahanglan kong mobangon og mas sayo aron mahuman kini sa dili pa moinit og maayo.
Samtang akong giuli ang tighabas sa nataran [lawn mower] ngadto sa payag sa akong paghuman, nakadungog ko nga misirado ang pultahan sa luyo sa among balay. Mihangad ko ug nakakita sa akong amahan nga mitawag kanako sa pag-adto ug molingkod uban kaniya diha sa mga ang-ang sa luyo nga balkonahe sa among panimalay. Nanglingkod kami nga nagtupad, nagdayeg sa matahum nga pagsubang sa adlaw, samtang naghulat ko kaniya nga makig-istorya kanako.
Paglantaw sa Umaabot
Sa wala madugay nangutana siya kanako, “Dong, sultihi ko mahitungod kon unsay gusto nimong buhaton sa imong kinabuhi. Unsa man ang imong mga tumong? Unsa man ang imong mga hunahuna kabahin sa umaabot?”
Giingnan nako siya sa akong mga tumong ug mga damgo, lakip sa mga butang sama sa talagsaong mga kalampusan sa paugnat sa kusog [sport] ug sa pagkahimong usa ka abogado. Sa dihang nahuman ko, miingon siya, “Nindot kana. Makab-ot nimo ang bisan unsa niini nga kinabuhi uban sa tabang sa atong Langitnong Amahan.”
Dayon miingon siya, “Dong, adunay butang nga gusto nakong hisgotan kanimo, ug gusto nako nga masayod ka nga nag-ampo ko mahitungod sa unsay akong ipaambit kanimo karon. Ug nag-ampo ko nga ang mensahe nga akong ihatag kanimo mapatik diha sa imong kalag.
“Unsay akong isulti kanimo makaapekto og dako kon sa unsang paagi ka mosagubang sa mga hagit ug sa mga kasakit nga sigurado gayud nimong atubangon sa imong kinabuhi. Ug kini makaimpluwensya kon sa unsang paagi ka moatubang sa mga kalampusan nga anaa sa imong kinabuhi labaw pa kay sa bisan unsang butang nga akong nasayran nga isulti kanimo.”
Ang Tambag ni Papa: Panalipdi ang Pribado nga mga Higayon
Mihunong siya, ug kuryoso akong nagpaabot aron masayran kon unsa kaha kini nga talagsaon nga tambag.
“Panalipdi ang pribado nga mga higayon sa imong kinabuhi,” miingon siya. “Nahibalo ka niadtong mga higayon sa imong kinabuhi sa dihang maghunahuna ka, ‘Walay laing tawo sa palibot, walay laing tawo nga nasayod unsay akong gibuhat, ug walay butang nga akong buhaton atol niining higayona nga adunay bisan unsang negatibong epekto ni bisan kinsa’? Nahibalo ka niadto nga mga panahon?
“Unsay imong buhaton niadtong mga higayona, atol niining pribado nga mga panahon sa imong kinabuhi, maoy motino sa ang-ang sa pagsalig nga maanaa kanimo diha sa presensya sa Dios ug sa mga tawo. Kini motino sa imong abilidad nga makatutok sa lisud ug komplikado nga mga hagit sa imong kinabuhi labaw pa kay sa bisan unsa nga akong matudlo kanimo. Ug kini mas adunay kalabutan kon sa unsang paagi ka molambo ug mopadako sa imong kaugalingong pamilya ug sa unsang paagi ka maningkamot nga magpaduol ngadto sa atong Langitnong Amahan kay sa bisan unsa nga ako makasulti kanimo. Dong, panalipdi ang pribado nga mga panahon sa imong kinabuhi.”
Naminaw ko og maayo niadto nga tambag. Ug sama sa iyang giingon, kana nga higayon nasilsil sa akong hunahuna ug sa akong kasingkasing. Kadto nga mga pulong sa kahangturan napatik sa akong kalag.
Pagpalambo sa Akong Pagpamatuod
Samtang namalandong ko sa unsay gitudlo sa akong papa kanako, nakaamgo ko nga ang akong amahan wala lamang nagpasabut sa kaimportante sa paglikay gikan sa mga butang sama sa pornograpiya ug pagpabadlong. Nagtambag siya kanako sa pagpuno niadtong pribado nga mga panahon uban sa positibo nga mga butang. Mga usa ka tuig human niana nga panag-istoryahanay, akong nahuman og basa ang Basahon ni Mormon sa akong kaugalingon sa unang higayon. Ug ako nakadawat og saksi pinaagi sa Espiritu, diha sa usa ka pribado nga higayon, nga ang Basahon ni Mormon mao ang pulong sa Dios. Ug ako nakahimo og koneksyon tali sa kaimportante niini nga mao ang pulong sa Dios ug niini nga mao ang Simbahan sa Ginoo.
Niadtong pribado nga mga higayon, nakaangkon ko og pagpamatuod nga ang propeta sa akong kabatan-on, si Presidente Spencer W. Kimball, usa ka tigpama-ba sa Ginoo. Ug diha niana nga pundasyon nga ako nagpadayon sa pagkahibalo nga ang matag propeta nga misunod, lakip ni Presidente Russell M. Nelson karon, mao ang pinili sa Ginoo, gitawag, ug gidihogan nga tigpama-ba ngadto sa kalibutan.
Alang kanako, kadtong pribado nga mga higayon mao ang pundasyon diin ang akong pagpamatuod natukod.
Pagpaningkamot nga Molambo
Sukad nianang kabuntagon diha sa mga ang-ang sa luyo nga balkonahe sa akong panimalay sa pagkabata, ang pagpanalipod sa pribado nga mga higayon sa akong kinabuhi wala lamang nagpasabot sa pagbuhat niadtong mga butang nga mibantay sa matag higayon batok sa sayop o sala apan sa pagpuno niadto nga mga higayon uban sa espiritwal ug pisikal nga makapabayaw nga mga kalihokan. Pipila niadto naglakip sa pagpaminaw og maayo nga musika, pag-ampo, pagbasa sa mga kasulatan o ubang maayo nga mga basahon, ug pisikal nga pag-ehersisyo. Naningkamot ko ug nagpuno niadtong pribado nga mga panahon nga adunay pagtunong sa pagpalambo sa akong mga talento ug sa pagtrabaho sa akong mga hilig. Akong nakaplagan nga ang paghimo sa ingon naghatag kanako og malungtarong hingpit nga kalipay kay sa temporaryong kalipay.
Atol sa akong pagkabatan-on, samtang naningkamot ko sa pagpanalipod sa pribado nga mga panahon sa akong kinabuhi, mihimo ako og personal nga mga tumong sa mga dapit nga gusto ko nga molambo, sama sa paghimo og mga tumong sa pagbasa sa Basahon ni Mormon, pagpalambo sa akong gipaspason [race time] sa 400 metros nga dagan, pagserbisyo og full-time nga misyon, ug pag-eskwela sa unibersidad. Naningkamot ko sa paggamit sa panahon nga anaa nako aron mouswag ug mopalambo sa akong mga kahanas. Ang paghimo ug pagpaningkamot sa pagkab-ot niadto nga mga tumong nakapanalangin sa akong kinabuhi og mas maayong pisikal nga panglawas, nalig-on nga pagpamatuod, kalinaw sa kahiladman, ug malungtarong hingpit nga kalipay.
Mapasalamaton kaayo ko sa tambag nga gihatag kanako sa akong amahan sa katuigan nga milabay nga panalipdan ang pribado nga mga panahon sa akong kinabuhi. Nasayod ko nga ang iyang tambag nakatabang kanako sa pag-atubang sa mga hagit sa kinabuhi ug sa pagbati og pagsalig sa pagkasayod nga ako adunay Amahan sa Langit kinsa nahigugma kanako ug kang kinsa ako makaadto atol sa tam-is nga mga takna sa pag-ampo, ang tanan atol sa pribado nga mga panahon sa akong kinabuhi (tan-awa sa Doktrina ug mga Pakigsaad 121:45–46). Samtang inyong panalipdan kadto nga mga higayon sa inyong kinabuhi ug pun-on kini og maayo, makabayaw nga mga kalihokan inyong makita ug mabati ang mga panalangin sa kalinaw sa atong Langitnong Amahan, dugang nga pagsalig ug malungtarong hingpit nga kalipay nga ibubo diha sa inyong kinabuhi.