“Pagtan-aw sa Kaayo sa Dios,” Alang sa Kalig-on sa mga Kabatan-onan, Abr. 2021, 20.
Pagtan-aw sa Kaayo sa Dios
Unsaon nako sa paghuman sa akong pasulit kon dili gani nako makita ang akong papel?
Paghulagway ni Michael Mullan
Usa ka adlaw sa hayskul, ako adunay usa ka pasulit sa hiyograpiya diin gihangyo ko sa pag-ila ug sa paghingalan sa matag kontinente ug sa nasud sa kalibutan. Morag lisud, dili ba? Nan, tinuod kini. Labi na kay hanap akong panan-aw.
Ako adunay hanap nga panan-aw, mao nga ang akong mga mata—kuan, ang kanang magsilbi—makaklaro lang sa usa ka gamayng porsyon sa pahina sa usa ka higayon. Dili makasarang alang sa usa ka pasulit diin nagkinahanglan nga makita nako ang tibuok nga talan-awon sa usa ka higayon.
Ako medyo dali nga nasagmuyo. Dili ko makasulti hain ang Europe gikan sa South America o ang Africa gikan sa Australia. Nasagmuyo kaayo ko nga misugod ko sa paghilak, nga nakapahimo sa mga nagkampat nga mga porma diha sa akong papel nga misamot ka hanap. Salamat na lang, naluwas ko sa dihang ang akong papa misulod ug mikuha nako pagtapos sa adlaw.
Ang akong magtutudlo mihatag kanako og dugang panahon sa pagkompleto sa mga pasulit sa panimalay. Human sa panihapon nianang gabhiona naglingkod ko sa lamesa, andam nga mosulay pag-usab, samtang ang akong mga igsoon nanan-aw og video diha sa sala.
Nagsugod ko sa pagsulat-sulat sa mapa sa dihang adunay butang diha sa video nga midani sa akong pagtagad. Usa ka tawo nga buta naghangyo sa Manluluwas kon Siya makahatag ba kaniya og panan-aw. Nianang higayona, mao kana ang akong gusto labaw pa sa tanang butang.
Sa kalit lang nakaamgo ko nga kon aduna may makatabang nako, kana mao si Jesukristo. Wala ako hatagi og panan-aw nianang adlawa, apan samtang naminaw ako ngadto sa Manluluwas nga miayo nianang tawo, gibati nako ang kalipay! Nasayud ko nga si Jesukristo nagpakabana nako ug motabang nako nga mahuman ang akong pasulit.
Miluhod ko ug mihalad og kinasingkasing nga pasalamat sa akong Langitnong Amahan alang sa gasa sa Iyang Anak. Dayon, uban sa bag-ong nakaplagan nga determinasyon, gipunit ko ang akong lapis, andam nga mosulay pag-usab.
Ang tagsulat nagpuyo sa California, USA.