“Usa ka Batang Lalaki lang ang Gikinahanglan aron Maluwas ang Balangay,” Alang sa Kalig-on sa mga Kabatan-onan, Abr. 2021, 10–11.
Usa ka Batang Lalaki lang ang Gikinahanglan aron Maluwas ang Balangay
Si Tom Fanene 12 anyos lamang, apan sa dihang ang usa ka makadaot nga sakit mitakboy sa iyang Samoan nga balangay, siya gitawag aron sa pagbuhat og talagsaong mga butang.
Litrato gikan sa Getty Images
Sama sa giingon sa tema karong tuiga sa kabatan-onan, kamo “nagpahimutang sa tukuranan sa mahinungdanon nga buhat” (Doktrina ug mga Pakigsaad 64: 33). Sa tibuok kasaysayan sa Simbahan, ang mga batan-on sa kanunay adunay mahinungdanong papel sa kritikal nga mga panahon sa pagtukod sa gingharian sa Dios. Aniay usa ka ehemplo.
Epidemya sa Isla
Sobra sa 100 ka tuig ang milabay, sa mga Isla sa Samoa sa Pacific Ocean, usa ka batan-ong lalaki nga ginganlan og Tom Fanene mao ang usa ka importanting tabang atol sa sitwasyon nga nag-ungaw sa kamatayon ang kinabuhi sa mga miyembro sa Ang Simbahan ni Jesukristo sa mga Santos sa Ulahing mga Adlaw.
Si Tom nagpuyo sa usa ka balangay nga gitawag og Sauniatu, nga gitukod sa mga Santos sa Ulahing mga Adlaw diha sa lugar isip usa ka dapit nga sila magpundok ug maghimo og usa ka komunidad. Sama sa mga Santos sa Dios sa ubang mga panahon ug mga dapit, sila nakasinati og mga pagsulay ingon man usab mga milagro samtang sila nagtinabangay sa pagtukod sa gingharian sa Dios. Usa ka pagsulay ang miabot niadtong 1918, sa dihang ang usa ka influenza nga pandemya daling mikatap sa balangay.
Sa pag-abot dayon sa sakit, grabe ang kadaot niini, ug dali kaayo kining mikatap. Hapit ang matag usa sa mga 400 ka lumulupyo dili kabangon sa higdaanan tungod niini. Duha lamang kanila ang naarang-arang ug makalihok-lihok: usa ka tigulang nga lalaki ug ang 12-anyos nga si Tom.
Hugot nga pagtuo ug Kakugi
Ang pamilya ni Tom mipakita og hugot nga pagtuo sa dihang sila nakigharong sa sakit kaniadto ug nakakita og mga milagro isip resulta. Ang manghud ni Tom nga lalaki nga si Ailama nasakit pipila ka tuig nang milabay. Ang ilang amahan, si Elisala, adunay damgo diin siya nahatagan og piho nga mga direksyon sa unsay buhaton aron sa pag-atiman ni Ailama: mangita og usa ka kahoy nga wili-wili, kuhaan og panit, ug dokdokon ang lawas para moduga. Gibuhat kini ni Elisala ug midala sa duga ngadto ni Ailama, kinsa miinom niini ug sa wala madugay naulian. Busa nakita ni Tom kon sa unsang paagi ang paglihok uban sa hugot nga pagtuo makatabang sa pagbuntog sa sakit.
Panahon sa 1918 nga influenza nga epidemya, si Tom nagpakita og hugot nga pagtuo samtang siya naningkamot sa pag-atiman sa mga katawhan sa balangay. “Matag buntag miadto ko sa kabalayan aron mopakaon ug manglimpyo sa mga tawo ug aron sa pagsuta kon kinsa ang namatay,” miingon siya.
Gisag-uban niya ang mga baldi og tubig gikan sa tubod ug gipanghatud ang tubig sa matag balay. Mokatkat siya sa mga punoan sa lubi, magkuha og mga lubi, bunotan kini, ug kolektahon ang tuno aron dad-on kini ngadto sa masakiton. Giihaw usab niya ang tanang manok sa balangay aron maghimo og sabaw alang sa matag pamilya.
Ang 12-anyos nga si Tom Fanene mitabang sa pag-atiman sa iyang balangay aron mamaayo atol sa usa ka pandemya.
Paghulagway ni Jim Madsen
Paghimo og Kalainan
Atol niining pandemya, mga ikaupat nga bahin sa tanang mga tawo sa Samoa ang namatay sa influenza. Pipila sa mga tawo sa balangay ni Tom namatay usab. Mitabang si Tom pagkalot sa lubnganan ug sa paglubong sa sobra sa 20 kanila, lakip sa iyang kaugalingong amahan, si Elisala.
Apan salamat sa pagkugi ug mapinanggaong pag-atiman ni Tom, daghang mga tawo sa iyang balangay ang naluwas. Siya nakahimo og dakong kalainan niadto nga mga tawo ug sa pagtukod sa gingharian sa Ginoo didto sa Samoa. Siya “nagpahimutang sa tukuranan sa usa ka mahinungdanon nga buhat.”
Ug sa inyong kaugalingong paagi, kamo usab.
Mahimong dili kamo tawagon aron buhaton ang matang sa butang nga gihimo ni Tom, apan kamo, sa pagkatinuod, nagpakita og hugot nga pagtuo sa lain-laing mga paagi nga makahimo og dakong kalainan alang kaninyo, ngadto sa uban, ug sa buhat sa pagtukod sa gingharian sa Dios.
Kamo nagpakita og ehemplo sa inyong pamilya, mga higala, ug sa uban pinaagi sa pagpakita sa hiyas, pailub, kamabination ug gugma. Kamo nagserbisyo sa uban. Kamo miapil sa pagtuon sa kasulatan ug pag-ampo. Inyong gipaambit ang mga kamatuoran sa gipahiuli nga ebanghelyo ni Jesukristo.
Atol niining miaging tuig, daghan kaninyo ang tingali nagbuhat na niining mga butang samtang naglahutay sa mga epekto sa usa ka pandemya. Tingali wala kamo nakasag-ob og tubig, ug mga lubi ug nag-atiman sa 400 ka mga tawo aron maulian sa maayong panglawas, apan kamo ang midala sa mga katawhan sa kahupayan, paglaum, kalipay ug kalinaw sa daghang mga paagi.
Ang inyong edad mas minus ang kaimportante kay sa inyong hugot nga pagtuo ug ang inyong kaandam sa pagbuhat ug pagserbisyo sa uban. Ang mga ehemplo gikan sa nangagi, sama ni Tom Fanene, makatabang ninyo nga makakita nga kamo gikinahanglan sa pagpahimutang sa pundasyon sa dako nga buhat sa Dios.