“Mga Sumusunod ni Jesukristo diha sa Dalan sa Pagkadisipulo,” Alang sa Kalig-on sa mga Kabatan-onan, Abr. 2021, 2–5.
Dali, Sunod Kanako
Mga Sumusunod ni Jesukristo diha sa Dalan sa Pagkadisipulo
Gikan sa pakigpulong sa Abril 2010 nga kinatibuk-ang komperensya nga “Kita Nagsunod Ni Jesukristo.”
Ang Manluluwas mihimo niini nga posible alang sa matag usa kanato nga makaangkon og kaluwasan ug kahimayaan. Apan kinahanglan nato nga sundon ang dalan nga Iyang gihatag alang sa kasegurohan ug kalinaw.
Gilitratohan ni Tyler Rickenbach
Sa Dominggo sa Pagkabanhaw, magsaulog kita sa kadaogan sa atong Ginoo ug Manluluwas, si Jesukristo, batok sa kamatayon. Atong gimahal ang atong salabutan ug mibati og kinasingkasing nga pagpasalamat alang sa kaandam sa maulaong sakripisyo sa Manluluwas alang kanato. Kini mao ang labing importanting panghitabo sa kasaysayan sa katawhan.
Tungod kay si Kristo mituman sa Iyang sagrado nga misyon isip Manluluwas ug Manunubos, mabanhaw kita gikan sa kamatayon ug ang atong mga espiritu mahiusa uban sa atong mga lawas. Gibase sa personal nga katakus, kita pinaagi sa Iyang grasya, makabaton og mahimayaong kahigayunan sa pagsulod og balik ngadto sa presensya sa Dios.
Atong Mensahe ngadto sa Kalibutan
Si Propeta Joseph Smith, nga naghisgot kabahin sa panghitabo niining Pasko sa Pagkabanhaw, miingon, “Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug ang ubang mga butang nga may kalabutan sa atong relihiyon sumpay lamang niini.”1
Samtang kita nagmaya sa mahangturong kahulugan sa Getsemani ug sa Kalbaryo, ang atong tumong kanunay mao ang nabanhaw nga Ginoo. Ang atong mensahe ngadto sa kalibutan mao nga Siya buhi! Ang simbolo ni Kristo alang sa mga Santos sa Ulahing mga Adlaw makita diha sa makahuluganon nga pagpahayag sa atong hugot nga pagtuo ug sa pamaagi sa atong pagsunod sa Iyang ebanghelyo.2
Samtang mamalandong kita kon unsay kahulugan sa pagkahimo nga mga Kristohanon karon, kinahanglan hunahunaon nato kon unsay gikinahanglan kanato sa atong pagkahimo nga disipulo. Akong isugyot nga kita maghunahuna ug sa tukma nga mga paagi magsunod sa unsay gihimo sa Manluluwas sa katapusang duha ka adlaw sa Iyang mortal nga kinabuhi ug pagpangalagad.
Hinumdumi ug Tahora ang Sakramento
Sa Katapusang Panihapon, ang Manluluwas mipaila sa ordinansa sa sakramento. Mikuha Siya og pan, gipikas-pikas kini, giampoan kini, ug gipasa kini ngadto sa Iyang mga tinun-an, nag-ingon, “Kini mao ang akong lawas nga gihatag alang kaninyo: buhata ninyo kini sa paghandum kanako” (Lucas 22:19). Niini nga paagi, iyang gipasiugdahan ang sakramento. Kon kita buot nga mahimo Niyang mga disipulo ug mahimong mapasaligon nga mga miyembro sa Iyang Simbahan, kita kinahanglan nga mohinumdom ug mohatag og balaang pagtahod sa sakramento.
Ang sakramento nagtugot sa matag usa kanato sa pagpahayag uban sa masulub-on nga mga kasingkasing ug mahinulsulon nga mga espiritu sa atong pagkaandam sa pagsunod sa Manluluwas, sa paghinulsol ug mahimong usa ka Santos pinaagi sa pag-ula ni Kristo (tan-awa sa Mosiah 3:19). Ang sakrament nagtugot usab kanato sa pagsaksi ngadto sa Dios nga kita maghinumdom sa Iyang Anak ug maghupot sa Iyang mga sugo samtang magbag-o kita sa atong pakigsaad sa bunyag (tan-awa sa Mosiah 18:8–10; Doktrina ug mga Pakigsaad 20:37, 77–79). Kini nagpalambo sa atong gugma ug pasalamat sa Amahan ug sa Anak.
Higugmaa ang Usag Usa
Ang Manluluwas mipahayag usab, “Tungod niini ang tanang tawo makaila nga kamo mga tinun-an ko pinaagi niini, kon kamo maghigugmaay ang usa sa usa” (tan-awa sa Juan 13:34–35). Kon atong ikonsiderar ang Pag-ula, diin adunay mahangturong sangputanan nga Iyang pagabuhaton, ang ingon nga sugo nagkinahanglan sa atong pagsunod. Kita nagpakita sa atong gugma sa Ginoo kon kita naghupot sa Iyang mga sugo ug nag-alagad sa Iyang mga anak. Kita wala kaayo makatugkad sa Pag-ula ni Jesukristo, apan kita makagahin sa atong kinabuhi sa paninguha nga magmahigugmaon ug maloloy-on bisan pa man sa kalisdanan nga atong gisinati.
Ang sugo sa Manluluwas sa Iyang Apostoles ug sa tanang umaabot nga mga disipulo nga maghigugmaay sa usag usa mao ang labing importante sa Iyang mga pagtulun-an. Ang atong pakigrelasyon ngadto sa uban mao ang sukod sa atong pagkaandam nga mosunod ni Jesukristo.
Mahimong Takos sa mga Pag-aghat sa Espiritu Santo
Niining panahona, ang Manluluwas misaad sa Espiritu Santo, ang ikatulo nga sakop sa Dios nga Kapangulohan, ngadto sa Apostoles. Ang Espiritu Santo usa ka personahe nga espiritu, ang Maghuhupay, kinsa nagpamatuod sa Amahan ug sa Anak, nagpadayag sa kamatuoran sa tanang butang, ug nagbalaan sa mga naghinulsol ug nabunyagan.
Kita nagpuyo sa samok, mabingkilon nga kalibutan, diin posible nga makatan-aw o makapaminaw og kasayuran, musika, o bisan puro walay hinungdang mga sugyot sa tanang panahon. Kon gusto natong makabaton og pagdasig sa Espiritu Santo, kinahanglan nga mangita kita og higayon sa paghinay-hinay, pagpamalandong, pag-ampo, ug pagsunod aron kita takus nga modawat ug molihok sa Iyang mga pag-aghat. Malikayan nato ang dagkong mga sayop kon mopatalinghug kita sa Iyang mga pahimangno. Kini mao ang atong pribilehiyo isip mga miyembro sa Ang Simbahan ni Jesukristo sa mga Santos sa Ulahing mga Adlaw nga modawat og kahayag ug kahibalo gikan Kaniya gani hangtod sa hingpit nga adlaw (tan-awa sa Doktrina ug mga Pakigsaad 50:24).
Sunda ang Dalan sa Manluluwas
Niining panahon sa Pasko sa Pagkabanhaw, nagmaya kita sa tanang nabuhat sa Manluluwas alang kanato. Siya mihimo niining posible alang sa matag usa kanato sa pag-angkon sa atong kaluwasan ug kahimayaan. Apan kinahanglan nato nga sundon ang dalan nga Iyang gihatag alang sa kasegurohan ug kalinaw.
Usa sa mga paagi aron kini atong mahimo mao ang pagsunod sa mga pagtulun-an sa atong buhing propeta. Siya ang labing maayo nga ehemplo sa tawo nga nagsunod sa Manluluwas. Lain nga paagi mao ang pagtinguha sa kadangpan ug mahangturong panalipod sa templo.
Ako mohatag sa apostolikanhon nakong pagpamatuod nga si Jesukristo buhi ug mao ang Manluluwas ug Manunubos sa kalibutan. Siya mihatag og agianan sa tinuod nga kalipay.