Leksiyon 207: Pagpangandam alang sa Templo

Family History ug Pagserbisyo sa Templo

Makahimo Kita og mga Ordinansa para sa Atong Namatay Na nga mga Katigulangan diha sa Balay sa Ginoo

Sa maluluy-ong plano sa Langitnong Amahan, kadtong namatay nga wala makadawat sa makaluwas nga mga ordinansa sa ebanghelyo ni Jesukristo dili mawala sa kahangtoran. Makatanyag kita og tabang nga gikinahanglan sa atong namatay na nga mga katigulangan pinaagi sa paghimo sa family history ug sa pagserbisyo sa templo. Kini nga leksiyon makatabang sa mga estudyante nga makita ang mga ngalan sa ilang namatay na nga mga katigulangan ug makapangandam sa paghimo og mga ordinansa para nila diha sa mga templo sa Ginoo.

Posibleng mga Kalihokan sa Pagkat-on

Mga panalangin sa family history ug pagserbisyo sa templo

Tabangi ang mga estudyante nga pamalandongan ang mga panalangin nga anaa pinaagi sa buhat sa family history ug sa templo. Kon naay personal nga mga kasinatian ang mga estudyante, pwede nimo silang dapiton nga ipakigbahin ang mga panalangin nga ilang nasaksihan.

Kon kinahanglan, pwede sab nimong ipakigbahin ang bidyo nga “Pauswaga ang Imong Kasinatian sa Templo; Usba ang Imong Kinabuhi” (3:21), nga anaa sa ChurchofJesusChrist.org, gikan sa time code nga 1:42 hangtod 3:21.

Improve Your Temple Experience; Change Your Life

Elder Scott speaks of youth doing family history and how the youth in Kansas City embraced and succeeded in the work.

Ang laing opsiyon mao ang pagpakigbahin sa mosunod nga pagpamatuod.

Si Pierre-Alban, 17 anyos nga nagpuyo sa France, mipakigbahin sa mosunod nga pagpamatuod bahin sa iyang kasinatian sa pagbisita sa templo:

Ang unang higayon nga miadto ako sa Bern Switzerland Temple, miadto ako uban sa akong pamilya ug mga higala. Kini nga kasinatian nakahatag kanako og dakong kalipay. Nabati namong tanan ang Espiritu. Nasayod ako nga maayo ang akong gihimo ug nga ang Dios mapasigarbohon sa among buhat. Nasayod ako nga ang templo magdala kanato og daghang panalangin. Kon mogahin kita og panahon sa paghimo sa buhat sa templo alang sa atong mga katigulangan, panalanginan kita sa Langitnong Amahan. Magmalipayon Siya sa unsay atong nahimo alang sa Iyang mga anak diha sa Iyang balay. (Pierre-Alban C., Alang sa Kalig-on sa mga Kabatan-onan, Abr. 2022, sulod sa atubangang hapin)

• Unsa nga mga panalangin ang imong nahibaloan nga anaa pinaagi sa family history ug sa pagserbisyo sa templo?

• Sa unsang paagi makasugod ka sa pagtabang sa usa ka tawo nga gustong moapil sa buhat sa templo ug sa family history pero wala mahibalo kon unsaon pagsugod?

Pagpahigayon og mga ordinansa alang niadtong namatay na

Ikonsiderar ang pagpakigbahin og pipila ka kasinatain gikan sa kasaysayan sa Simbahan sa mga tawo nga nakakat-on bahin sa bunyag alang sa mga patay dihang una kining gitudlo niini nga dispensasyon. Pwede nimong dapiton ang mga estudyante nga basahon ang mosunod nga kinutlo gikan sa Mga Santos, Vol. 1, Ang Sumbanan sa Kamatuoran ug hisgotan ang ilang nakat-onan uban sa usa ka kapares.

Nagpundok ang mga Santos sa Nauvoo alang sa Oktubre 1840 nga kinatibuk-ang komperensiya. Gitudloan sila ni Joseph og dugang mahitungod sa bunyag alang sa mga patay, nagpasabot nga ang mga espiritu sa mga patay naghulat sa ilang buhi nga mga kaliwat sa pagdawat sa makaluwas nga ordinansa alang kanila.

Tali sa mga sesyon sa komperensiya, ang mga Santos midali og adto sa Suba sa Mississippi, diin pipila ka mga elder nagbarog sa taga-hawak nga giladmon sa tubig, nagsinyas kanila nga magpabunyag alang sa ilang nangamatay na nga mga apohan, mga amahan, mga inahan, mga igsoon, ug mga anak. Wala madugay, si Hyrum gibunyagan alang sa iyang igsoon nga si Alvin.

Samtang si Vilate Kimball nagtan-aw sa mga elder diha sa suba, naghandom siya nga mabunyagan alang sa iyang inahan, kinsa namatay sobra na sa usa ka dekada ang milabay. Nangandoy siya nga si Heber mahibalik na gikan sa England aron mopahigayon sa ordinansa, apan tungod kay si Joseph miawhag sa mga Santos sa pagtubos sa mga patay sa labing dali nga panahon, nakahukom siya nga magpabunyag alang sa iyang inahan diha-diha dayon.

Ang hunahuna ni Emma Smith anaa usab diha sa pamilya. Ang iyang amahan, si Isaac Hale, namatay niadtong Enero 1839. …

… Gimahal ni Emma ang iyang amahan ug nagpabunyag alang kaniya diha sa suba. Wala niya dawata ang gipahiuli nga ebanghelyo niini nga kinabuhi, apan naglaom siya nga dili kini ang paagi sa kahangtoran. (Mga Santos, 1:423–24)

• Unsay nakaplagan nimo nga makahuloganon gikan niini nga mga kasinatian?

Agig dugang sa ubang mga butang nga gihisgotan, pwede nimong itudlo nga kini nga mga bunyag gihimo diha sa Suba sa Mississippi ug dili sa templo. Nianang higayona, wala pay templo o bunyaganan sa Nauvoo. Nabantayan usab tingali sa mga estudyante nga gibunyagan si Emma Smith para sa iyang amahan. Pwede nimong ipasabot nga sa ulahi, gipadayag sa Ginoo ang sumbanan sa mga babaye nga mipahigayon sa mga ordinansa para sa mga babaye ug ang mga lalaki para sa mga lalaki (tan-awa sa Mga Santos, 1:578–79).

Basaha ang Doktrina ug mga Pakigsaad 124:29–36, nga pangitaon kon unsay gipadayag sa Ginoo kang Joseph Smith bahin sa mga bunyag nga gipahigayon sa mga Santos sa Nauvoo alang sa mga patay.

• Unsa ang gipadayag sa Ginoo?

• Unsausab ang matudlo niini nga mga bersikulo kanato bahin Kaniya?

  Mailhan tingali sa mga estudyante ang lainlaing kamatuoran bahin sa Ginoo nga nagpasiugda sa Iyang gibutang nga kaimportante sa Iyang mga templo. Ang usa ka pananglitan mao nga dawaton sa Ginoo ang mga ordinansa nga atong gihimo diha sa Iyang balaang mga templo para sa atong namatay na nga mga katigulangan.

  Ang mga estudyante mahimo usab nga maghisgot og mga kamatuoran mahitungod sa kinaiya sa Ginoo. Mailhan tingali nila nga si Jesukristo mapailobon ug patas kay gisaaran Niya ang mga Santos og “igo nga panahon” (bersikulo 31, 33) sa pagtukod og templo. Samtang nakapunting ang nahibiling bahin sa leksiyon sa pagpahigayon og mga ordinansa diha sa templo ilabina alang sa atong mga katigulangan, kon gusto sa mga estudyante, ayaw pagduhaduha sa paggahin og panahon sa paghisgot sa mga hiyas ni Jesukristo.

• Unsay atong makat-onan sa paggamit sa Ginoo sa mga pulong nga “pagbunyag alang sa inyong mga patay”? (tan-awa sa Doktrina ug mga Pakigsaad 124:32–33; 127:5).

Si Elder Quentin L. Cook sa Korum sa Napulog Duha ka Apostoles miingon niini bahin sa atong mga katigulangan:

Ang Ginoo sa Iyang orihinal nga pagpadayag nagpasabot sa “bunyag alang sa inyong mga patay” [Doktrina ug mga Pakigsaad 127:5]. Ang atong doktrinal nga obligasyon mao ang ngadto sa atong mga katigulangan. Kini tungod kay ang celestial nga pag-organisar sa langit gibasi sa mga pamilya. (Quentin L. Cook, “Mga Gamot ug mga Sanga,” Liahona, Mayo 2014, 45)

• Sa unsang paagi nakaimpluwensiya nimo ang pagkahibalo bahin sa imong mga katigulangan? Sa unsang paagi kini nakaimpluwensiya nimo?

• Sa imong hunahuna, sa unsang paagi ang pagpahigayon og mga ordinansa sa templo alang sa imong namatay na nga mga katigulangan makaapektar sa imong relasyon sa imong Langitnong Amahan?

Ang papel nga imong mahimo sa buluhaton sa kaluwasan sa Ginoo

Pwede nimong dapiton ang mga estudyante nga hunahunaon ang ilang mga kasinatian sa buhat sa family history ug sa templo pinaagi sa pagpamalandong kon sa unsang paagi magamit kanila ang mosunod nga mga pamahayag.

Sa sukdanan nga 1 hangtod 5 (1 = dili tinuod ug 5 = tinuod kaayo), i-rate kon unsa ka maayo kini nga mga pamahayag naghulagway kanimo.

Kahibalo ko kon unsaon pagpangita sa mga ngalan sa akong mga katigulangan.

Kahibalo ko kon unsaon pagsumiter sa mga ngalan sa akong mga katigulangan ngadto sa templo.

Gusto nakong makita ang mga ngalan sa akong mga katigulangan ug mopahigayon og mga ordinansa alang nila diha sa templo.

Gibati nako ang kaimportante sa paghimo sa buhat alang sa akong namatay na nga mga paryente.

Dasiga ang mga estudyante nga ipakigbahin ang ilang mga pagsabot ug mga kasinatian sa buhat sa templo ug sa family history. Pangutan-a sila kon unsay gusto nilang makat-onan ug kon unsa nga tabang ang ilang gikinahanglan. Dapita sila nga magkat-on sa usag usa ug gikan sa Espiritu Santo pinaagi sa paghisgot sa mga panalangin nga madawat sa buhat sa family history ug sa templo.

Kon kinahanglan, ikonsiderar ang pagpasalida sa usa sa mosunod nga mga bidyo.

“Pagpunting ngadto sa Templo” (7:18; tan-awa gikan sa time code 3:50 hangtod 4:36)

Magpunting sa Templo

Si Presidente Nelson nagtudlo mahitungod sa kaimportante sa mga templo ug nagpahibalo sa mga plano sa pagtukod og bag-o nga mga templo.

“Espirituwal nga Dinamita” (2:40)

Spiritual Dynamite

Family history and temple service combine to create a spiritual power that will enable you to become the person God wants you to be. You can read Elder Renlund's talk from Family Discovery Day here.Read about Alfred Nobel - Man of Peace.

“Pagpundok sa Pamilya sa Dios” (4:18)

Gathering the Family of God

Family History enthusiasts share touching experiences they had while finding their ancestors’ stories.

Mga lakang nga imong mahimo

Ipakita ang mosunod nga mga lakang nga makatabang sa mga estudyante nga moapil sa buhat sa family history ug sa templo. Awhaga ang mga estudyante nga mihimo na niini nga mga lakang sa miagi nga tabangan ang ubang mga estudyante kutob sa mahimo.

• Lakang 1. Paghimog account sa Simbahan.

• Lakang 2. Tan-awa ang booklet nga Akong Pamilya: Mga Istorya nga Naghiusa Namo, FamilySearch, o ang Family Tree nga app.

• Lakang 3. Gamita ang feature nga Andam na sa mga Ordinansa.

• Lakang 4. Pag-eskedyul og appointment ug tambong sa templo.

Dapita ang usa ka estudyante nga ipakita kon unsaon paggamit ang feature nga Andam na nga mga Ordinansa. Dasiga ang estudyante nga i-download ug kat-onan ang paggamit sa Family Tree nga app. Diha sa app, pwede nilang iklik ang icon sa templo ug ang link sa Andam na sa mga Ordinansa aron mapangita ang mga ngalan sa mga sakop sa pamilya nga pwede nilang ipahigayon ang mga ordinansa. Tabangi ang mga estudyante nga makakat-on kon unsaon paghangyo ug pagprinta og mga kard sa ngalan nga dad-on sa templo. Dihang makit-an na sa mga estudyante ang mga ngalan sa pipila ka katigulangan, awhaga sila nga hibaloon kon nganong paryente sila ug ang bisan unsang personal nga impormasyon nga anaa bahin niadtong mga katigulangan. Dapita ang mga estudyante nga adunay rekomend sa templo nga magpaeskedyul og appointment aron makatambong sa templo.

Kon kinahanglan, makahatag og dugang giya ang mosunod nga impormasyon.

• “Unsaon nako paghimo og account sa Simbahan gamit ang ChurchofJesusChrist.org?”

• “Unsa ang imong gusto aron makasugod na?”

• “Unsaon Pagsugod og Family Tree diha sa FamilySearch: Pagdugang sa Unang Upat ka Henerasyon”

• Akong Pamilya: Mga Istorya Nga Naghiusa Namo

• “Andam na nga mga Ordinansa”

Dihang natabangan na sa mga estudyante ang usag usa aron makit-an ang mga ngalan nga dad-on ngadto sa templo, pwede nimo silang dapiton nga ipakigbahin ang mga panabot ug mga leksiyon nga nakat-onan. Awhaga sila nga maghunahuna bahin sa Manluluwas ug sa Iyang tinguha nga tabangan nato ang atong mga katigulangan. Pwede kang mangutana:

• Sa imong hunahuna, sa unsang paagi ang pag-apil sa buhat sa templo ug family history karon makatabang nimo sa pagpangandam sa paghimo ug pagtuman sa mga pakigsaad sa Dios diha sa Iyang templo?

• Sa unsang paagi ang paghimo og family history ug pagserbisyo sa templo makapalawom sa imong gugma sa Manluluwas?

Dugang nga mga Kapanguhaan

Nganong gikinahanglan ko sa akong mga katigulangan?

Si Elder Gerrit W. Gong sa Korum sa Napulog Duha ka Apostoles mitudlo:

Kami mitahod sa among mga katigulangan pinaagi sa paghimong posible sa mga panalangin sa langit pinaagi sa buhat sa templo ug family history ug pinaagi sa pagtinabangay nga masumpay ang kutay sa among henerasyon. …

… Ang walay paghinakog nga serbisyo sa templo alang sa atong pamilya ug sa uban makapahimo sa Pag-ula sa Manluluwas nga matinuod alang kanila ug kanato. Gibalaan, kita makabalik sa panimalay ngadto sa presensya sa Dios isip mga pamilya nga mahangtoron nga nahiusa. (Gerrit W. Gong, “Matag Usa Kanato Adunay usa ka Istorya,” Liahona, Mayo 2022, 44–45)

Unsay mga panalangin gikan sa buhat sa templo ug sa family history?

Si Elder Quentin L. Cook sa Korum sa Napulog Duha ka Apostoles misaad:

Nagsaad ako nga ang mahigugmaong pagpahigayon sa mga ordinansa alang sa mga katigulangan molig-on ug mopanalipod sa atong kabatan-onan ug mga pamilya sa usa ka kalibotan nga nahimong nag-anam ka daotan. (Quentin L. Cook, “Dakong Gugma alang sa mga Anak sa Atong Amahan,” Liahona, Mayo 2019, 79)

Si Elder Dale G. Renlund sa Korum sa Napulog Duha ka Apostoles mitudlo:

Makatingala gayod, nga pinaagi sa buhat sa family history ug sa templo, makatabang kita og luwas sa mga patay.

Apan, kon moapil kita karon sa buhat sa family history ug sa templo, sarang usab kitang makadawat sa “makaayo” nga mga panalangin nga gisaad sa mga propeta ug mga apostoles. … Kining taas nga lista naglakip niining mga panalangin:

• Dugang nga panabut bahin sa Manluluwas ug sa Iyang maulaon nga sakripisyo;

• Dugang nga impluwensya sa Espiritu Santo aron mobati sa kalig-on ug direksyon sa kaugalingon natong kinabuhi;

• Dugang nga pagtuo, aron ang pagkakabig ngadto sa Manluluwas magkalawom ug magpadayon;

• Dugang nga abilidad ug kadasig sa pagkat-on ug paghinulsol tungod sa panabot kon si kinsa kita, diin kita gikan, ug mas tin-aw nga panan-awon kon asa kita padulong;

• Dugang nga makahapsay, makabalaan, ug makapakalma nga impluwensya sa atong kasingkasing;

• Dugang nga kalipay pinaagi sa paglambo sa abilidad nga mobati sa gugma sa Ginoo;

• Dugang nga mga panalangin sa pamilya, bisan unsa pay atong kasamtangan, nangagi, o umaabot nga sitwasyon o bisan unsa kadili hingpit sa atong family tree;

• Dugang nga gugma ug pasalamat para sa mga katigulangan ug buhing mga paryente, aron dili na kita mobati nga nag-inusara;

• Dugang nga gahom sa pag-ila sa butang nga nagkinahanglan og pagkaayo ug, uban sa tabang sa Ginoo, makaserbisyo sa uban;

• Dugang nga proteksyon batok sa mga tintasyon ug sa nagkagrabing impluwensya sa kaaway; ug

• Dugang nga tabang sa pag-ayo sa samok, guba, o mabalak-ong kasingkasing ug pag-ayo sa samaran.

Kon nag-ampo ka bisan asa niini nga mga panalangin, apil sa buhat sa family history ug sa templo. Sa inyong pagbuhat niini, tubagon ang inyong mga pag-ampo. (Dale G. Renlund, “Buhat sa Family History ug sa Templo: Pagsilyo ug Pagkaayo,” Liahona, Mayo 2018, 47)

Unsay akong buhaton kon nagpuyo ko nga layo sa bisan unsang templo?

Si Elder Gary E. Stevenson sa Korum sa Napulog Duha ka Apostoles miingon:

Ang mga templo nagkaduol ug nagkaduol kaninyo. Hinoon, alang niadtong ang distansya o mga sirkumstansya dili motugot nga kanunay nga makatambong sa templo, kinahanglan nga magpabilin kamong kanunay nga takus sa pagtambong. Makahimo kamo og importanting mga buluhaton sa gawas sa mga templo kon mag-research kamo ug mosumiter sa mga ngalan sa inyong pamilya. (Gary E. Stevenson, “Asa ang mga Yawe ug Awtoridad sa Priesthood?,” Liahona, Mayo 2016, 31)

Unsa kaha kon dili ko kahibalo kon unsaon pagpangita ang akong mga katigulangan?

Si Elder Benjamín De Hoyos sa Seventy miingon:

Niadtong wala mobati nga makahimo niini nga buhat, kinahanglan kamo nga masayod nga wala kamo mag-inusara. Kitang tanan makadangop ngadto sa mga himan nga giandam sa Simbahan ug nga makit-an sa mga sentro sa FamilySearch nga sa kanhiay atong nailhan nga mga sentro sa family history. Kining mga sentro sa FamilySearch gidesinyo aron nga hapit ang tanan, uban sa gamay nga tabang, makakita sa impormasyon sa ilang katigulangan ug han-ayon kini og maayo aron ila kining madala ngadto sa Ginoo. Palihog kontaka ang inyong mga konsultant sa family history sa inyong ward o branch, kinsa mogiya kaninyo sa matag lakang. (Benjamín De Hoyos, “Ang Buhat sa Templo ug Family History—Usa ug Sama nga Buhat,” Liahona, Mayo 2023, 53–54)

Dugang nga mga Kalihokan sa Pagkat-on

Pagkonektar sa atong mga katigulangan

Ikonsiderar ang pagdapit sa pipila ka estudyante sa pagpakigbahin sa ilang nahibaloan bahin sa ilang mga katigulangan. Awhaga ang mga estudyante nga ipakigbahin ang mga detalye nga nakatabang nila nga mobati nga konektado niini nga mga sakop sa pamilya. Pwede kang magpakita og kard sa ordinansa ug hangyoon ang mga estudyante nga ipakigbahin kon sa unsang paagi kini nga mga kard makatabang nato sa pagpahigayon og mga ordinansa alang sa atong mga katigulangan diha sa mga templo. Kon gikinahanglan, ipasabot nga ang mga kard sa ordinansa sa templo makatabang sa pagsubay sa buhat sa templo samtang gipahigayon ang mga ordinansa alang sa atong mga katigulangan.

Mahimong makatabang sa imong mga estudyante ang artikulo nga “Pag-andam sa Imong Anak para sa mga Bunyag ug Kompirmasyon diha sa Templo” aron makapangandam para sa templo pinaagi sa pagpangita sa ngalan sa katigulangan.

“Makapalipay nga mga Balita: Ang Kasaysayan sa Bunyag alang sa mga Patay”

Makabenepisyo tingali ang mga estudyante sa pagkat-on bahin sa kasaysayan sa bunyag alang sa mga patay niini nga dispensasyon. Ikonsiderar ang paggamit sa mosunod nga bidyo ug paghunong kadiyot sa lainlaing bahin aron tugotan ang mga estudyante sa pagpangutana o pagpakigbahin og mga panabot.

“Makapalipay nga mga Balita: Ang Kasaysayan sa Bunyag alang sa mga Patay” (6:55)

Glad Tidings: The History of Baptisms for the Dead

Joseph Smith's struggle with his brother Alvin's death led eventually to the introduction of baptisms for the dead. This new ordinance was embraced by saints in Nauvoo who did the first genealogical and family history research in Church history.

Gisaad nga mga panalangin sa pagpundok sa atong mga pamilya

Kon gusto sa mga estudyante nga hatagan og pagtagad ang mga panalangin sa pagpahigayon og mga ordinansa para sa namatay na nga mga katigulangan diha sa templo, pwede nimong ipasalida ang usa sa mosunod nga mga bidyo. Awhaga ang mga estudyante nga irekord ang mga panalangin nga gisaad sa Ginoo ug mopili tingali og usa o duha nga tinguhaon.

• “Pagpundok sa Pamilya sa Dios” (2:10)

  Gathering the Family of God

  President Henry B. Eyring describes how we can grow closer to our ancestors through family history and temple work.

• “Ang Gisaad nga mga Panalangin sa Buhat sa Templo ug Family History” (3:26)

  The Promised Blessings of Temple and Family History Work

  Modern apostles, including David A. Bednar, Quentin L. Cook, Neil L. Andersen and Dale G. Renlund have promised many powerful blessings to those who participate in Family History and Temple Service.

• “Ang Gisaad nga mga Panalangin sa Buhat sa Templo ug Family History 2” (4:04)

  The Promised Blessings of Temple and Family History Work 2

  Temple and family history work can provide you with purpose and strength as you selflessly engage in it. It can also help you understand that you are precious in the eyes of God.

Daghan sa mga namatay na ang nagtinguha nga maselyo ngadto sa ilang mga pamilya

Tabangi ang mga estudyante nga mailhan nga daghan sa ilang mga katigulangan ang gustong mapahigayon ang ilang mga ordinansa sa templo. Pwede nimong ipakigbahin ang mga asoy nga gihatag sa mga lider sa Simbahan diha sa kinatibuk-ang komperensiya.

Si Presidente Russell M. Nelson mipakigbahin sa mosunod niadtong Abril 2016:

Sa akong mensahe sa miaging komperensya, gisaysay nako ang akong makahugno nga kasinatian daghang katuigan na ang milabay, sa dihang isip usa ka doktor sa kasingkasing, wala nako maluwas ang kinabuhi sa duha ka managsoon nga batang babaye. …

Sakit sa kasingkasing ang mitakboy sa tulo ka anak nila ni Ruth ug Jimmy Hatfield. Ang ilang unang anak nga lalaki, si Jimmy Jr., namatay nga walay matino nga diagnosis. Nalambigit ko sa sitwasyon sa dihang ang ginikanan nangayo og tabang alang sa ilang duha ka anak nga babaye, si Laural Ann ug ang iyang manghud, si Gay Lynn. Naguol ko sa dihang ang duha ka batang babaye namatay human sa ilang operasyon. Masabot gayod, nga sila si Ruth ug Jimmy nahugno sa espirituhanong paagi. …

Dayon, usa ka gabii sa miaging Mayo, nakamata ko tungod niadtong duha ka batang babaye gikan sa pikas bahin sa tabil. Bisan kon og dili sa akto nga nakita o nadungog sila, gibati nako ang ilang presensya. Sa espirituhanong paagi, nadungog nako ang ilang pangamuyo. Ang ilang mensahe mubo ug klaro: “Brother Nelson, wala pa mi ma-sealed ni bisan kinsa! Mahimo ba nimo kaming matabangan?” …

Niadtong Hunyo, miluhod gyod ko sa atubangan ni Jimmy, nga karon 88 anyos na, ug kinasingkasing nga nakig-istorya niya. Naghisgot ko bahin sa pangamuyo sa iyang mga anak nga babaye ug gisultihan siya nga akong dungog nga mopahigayon sa mga ordinansa sa sealing alang sa iyang pamilya. …

… Ug dayon, dili pa kaayo dugay, didto sa Payson Utah Temple, duna koy talagsaong pribilehiyo nga maselyo si Ruth ngadto ni Jimmy ug ang ilang upat ka anak ngadto nila. Si Wendy ug ako naghilak samtang miapil mi nianang talagsaong kasinatian. Daghang kasingkasing ang naayo nianang adlawa! (Russell M. Nelson, “Ang Bugti sa Gahum sa Priesthood,” Liahona, Mayo 2016, 66–67).

Si Elder Gary E. Stevenson mipakigbahin sa mosunod niadtong Abril 2016:

Asa ang mga Yawe ug Awtoridad sa Priesthood?

Elder Stevenson teaches about how priesthood keys and authority were restored and how they can bless young men and young women.

Isip ehemplo, bag-ohay lang kong nahibalo sa usa ka inahan nga kanunay ubanan ang iyang mga anak ngadto sa templo sa pagpahigayon og proxy nga mga bunyag. Niining piho nga adlaw, dihang nahuman na kini nga pamilya sa mga bunyag ug mobiya na sa templo, usa ka tawo misulod sa bunyaganan dala ang dakong hugpong sa mga ngalan sa iyang kaugalingong pamilya. Nakaamgo nga wala nay nabilin sa bunyaganan aron makatabang niini nga mga ngalan sa pamilya, usa ka temple worker nakakita sa manglakaw na nga pamilya ug mihangyo sa mga bata kon mahimo ba silang mosulod og balik ug mag-ilis pag-usab aron motabang niini nga mga bunyag. Misugot dayon sila ug misulod og balik. Samtang gipahigayon sa mga bata ang mga bunyag, ang ilang inahan, naminaw, misugod sa pagkaila sa mga ngalan ug wala madugay, sa katingala sa tanan, nakamatikud nga ang hugpong sa mga ngalan sa pamilya sa tawo mga katigulangan usab diay sa iyang pamilya. Pagkatam-is, pagkadako sa ilang pasalamat. (Gary E. Stevenson, “Asa ang mga Yawe ug Awtoridad sa Priesthood?,” Liahona, Mayo 2016, 31)