“Lesson 204—Si Jesucristo ang Sentro ng Lahat ng Pagsamba sa Templo: ‘Si Jesucristo ang Dahilan Kung Bakit Tayo Nagtatayo ng mga Templo,’” Manwal ng Titser ng Seminary para sa Doktrina at mga Tipan (2025)
“Si Jesucristo ang Sentro ng Lahat ng Pagsamba sa Templo,” Manwal ng Titser ng Seminary para sa Doktrina at mga Tipan
Lesson 204: Paghahanda para sa Templo
Si Jesucristo ang Sentro ng Lahat ng Pagsamba sa Templo
“Si Jesucristo ang Dahilan Kung Bakit Tayo Nagtatayo ng mga Templo”
Sa lahat ng panahon, iniutos ng Panginoon sa Kanyang mga tao na magtayo ng mga templo. Sa ating panahon, nakita natin ang labis na pagdami ng itinatayong templo. Si Jesucristo ang sentro ng lahat ng ginagawa natin sa templo. Ang lesson na ito ay makatutulong sa mga estudyante na magkaroon ng mas matinding hangarin na sambahin si Jesucristo sa Kanyang bahay.
Mga Posibleng Aktibidad sa Pag-aaral
Ang Tagapagligtas ang sentro ng ating pagsamba
Maaari kang magpakita ng mga larawan ng mga taong nakikibahagi sa sakramento, kabataang nagsisimba, at mga young adult na naglilingkod bilang mga full-time missionary.
-
Sa inyong palagay, paanong si Jesucristo ang sentro ng pakikibahagi sa sakramento, pagpunta sa Simbahan, o paglilingkod sa full-time mission?
-
Paano maaaring maapektuhan ang karanasan ng isang tao kung hindi siya nakatuon sa Tagapagligtas habang nakikibahagi sa mga aktibidad na ito?
Magpakita sa mga estudyante ng isang larawan ng templo na malapit sa inyo pati na rin ng larawan ng Tagapagligtas. Sabihin sa mga estudyante na pag-isipan ang mga sumusunod na tanong. Maaaring makatulong sa kanila kung isusulat nila ang mga sagot nila sa kanilang study journal.
Pagnilayan ang sarili ninyong karanasan sa templo o paghahanda para sa templo.
-
Gaano ninyo itinutuon sa Tagapagligtas ang inyong paghahanda para makibahagi sa templo at sa mga karanasan ninyo kapag naroon kayo?
-
Paano makakaapekto sa inyong karanasan sa templo ang higit na pagtuon sa Tagapagligtas?
Hikayatin ang mga estudyante na anyayahan ang Espiritu na gabayan sila habang sinisikap nilang matutuhan pa ang tungkol sa kung paanong ang Tagapagligtas ang sentro ng pagsamba sa templo.
Iniutos ng Panginoon sa Kanyang mga tao na magtayo ng mga templo
Ang mga sumusunod na larawan ay mga pagsasalarawan sa ilan sa mga banal na lugar at templo na iniutos ng Panginoon sa Kanyang mga tao na itayo noong unang panahon. Maaari mong ipakita ang mga ito at itanong sa mga estudyante kung matutukoy nila ang mga gusaling nakalarawan (ang tabernakulong itinayo ni Moises sa ilang [tingnan sa Exodo 25:8], ang templo ni Solomon sa Jerusalem [tingnan sa 1 Mga Hari 6:12–13], ang templo ng mga Nephita sa lungsod ng Masagana [tingnan sa 3 Nephi 11:1]).
Sa Doktrina at mga Tipan, iniutos ng Panginoon sa mga Banal na magtayo ng mga templo (tingnan sa Doktrina at mga Tipan 57:3; 109:2; 115:7–8; 124:26–27). Ang utos na ito ay tulad sa huwarang itinatag ng Panginoon noong unang panahon.
Ipinahayag ng Unang Panguluhan:
Sa tuwing may mga tao ang Panginoon sa mundo na susunod sa Kanyang salita, sila ay inuutusan na magtayo ng templo. (“First Presidency Releases Statement on Temples,” Ene. 2, 2019, ChurchofJesusChrist.org)
Basahin ang Doktrina at mga Tipan 109:2, 5, 12–13, at alamin kung ano ang itinuturo ng Panginoon tungkol sa templo.
-
Ano ang nalaman ninyo?
-
Paano ninyo ilalarawan ang talata 13 gamit ang sarili ninyong mga salita?
Ang isang katotohanang maaaring matukoy ng mga estudyante ay ang templo ay bahay ng Panginoon, isang lugar ng Kanyang kabanalan.
-
Anong mga pagpapala ang maaari nating matanggap dahil nalaman natin mismo ang katotohanang ito?
Kung naaangkop, hikayatin ang mga estudyante na magbahagi ng mga karanasan nila kung saan nadama nila na malapit sila sa Panginoon sa templo o nadama nila na ang templo ay isang banal na lugar. Makatutulong ang pagbabahagi ng sarili mong mga karanasan para ibahagi rin ng mga estudyante ang kanilang mga karanasan.
Ang Tagapagligtas ang sentro ng templo
Ang mga sumusunod na pahayag ay makatutulong sa mga estudyante na maunawaan kung paanong ang Tagapagligtas ang sentro ng templo. Habang binabasa ng mga estudyante ang mga pahayag, sabihin sa kanila na maghanap ng isang pangunahing layunin ng templo.
Itinuro ni Pangulong Russell M. Nelson:
Ang Templo at ang Inyong Espirituwal na Pundasyon
Binanggit ni Pangulong Nelson ang ginagawa sa pundasyon ng Salt Lake Temple para ituro kung paano pinatitibay ng mga ordenansa at tipan sa templo ang ating espirituwal na pundasyon.
Ang templo ang sentro sa pagpapalakas ng ating pananampalataya at espirituwal na katatagan dahil ang Tagapagligtas at ang Kanyang doktrina ang pinakasentro ng templo. Ang lahat ng bagay na itinuturo sa templo, sa pamamagitan ng mga tagubilin at ng Espiritu, ay nakadaragdag sa nauunawaan natin tungkol kay Jesucristo. Ang Kanyang mahahalagang ordenansa ang nagbibigkis sa atin sa Kanya sa pamamagitan ng mga sagradong tipan ng priesthood. (Russell M. Nelson, “Ang Templo at ang Inyong Espirituwal na Pundasyon,” Liahona, Nob. 2021, 93–94)
Pinatotohanan ni Elder David A. Bednar ng Korum ng Labindalawang Apostol:
Lahat ng natututuhan at lahat ng ginagawa sa templo ay nagbibigay-diin sa kabanalan ni Jesucristo at sa Kanyang papel sa dakilang plano ng kaligayahan ng Ama sa Langit. (David A. Bednar, “Ang Bahay na Ito ay Itayo sa Aking Pangalan,” Liahona, Mayo 2020, 86)
-
Sa inyong palagay, ano ang mahalaga sa mga pahayag na ito?
-
Sa inyong palagay, bakit mahalagang malaman na tayo ay tinutulungan ng templo na mas maunawaan at makilala si Jesucristo?
Kung maaari, sabihin sa mga estudyante na maghanap ng mga larawan ng templo sa temples.ChurchofJesusChrist.org at ipaliwanag kung paano nila naaalala si Jesucristo sa ilang partikular na larawan. Maaari mo ring talakayin ang kahalagahan ng mga pariralang “Kabanalan sa Panginoon” at “Ang Bahay ng Panginoon,” na matatagpuan sa bawat templo.
Ang mga sumusunod na pahiwatig ay naglalayong tulungan ang mga estudyante na talakayin ang mga paraan kung paano nila makikita na ang Tagapagligtas ang sentro ng kanilang karanasan sa templo. Sabihin sa mga estudyante na kumpletuhin ang mga pahiwatig na ito nang sama-sama bilang maliliit na grupo. Maaaring magkakasamang kumpletuhin ng bawat grupo ang mga pahiwatig na ito sa isang papel.
Habang kinukumpleto ninyo ang mga sumusunod na pahiwatig, isipin kung paano ninyo naaalala si Jesucristo sa templo.
-
Naaalala natin si Jesucristo sa puting damit na isinusuot natin sa templo dahil …
-
Naaalala natin si Jesucristo sa nakikita natin sa templo dahil …
-
Naaalala natin si Jesucristo sa ginagawa natin sa templo dahil …
-
Naaalala ko si Jesucristo sa kung paano ako naghahandang pumunta sa templo dahil …
Kapag natapos na ang mga grupo, maaari mo silang anyayahan na ibahagi ang isinulat nila sa ibang grupo sa klase. Sa pamamagitan ng pagbabahagi ng natutuhan nila, mapalalalim nila ang kanilang pag-unawa at mapalalakas ang patotoo nila tungkol sa Tagapagligtas.
Ang paghahangad na makasama si Jesucristo sa templo
Maaari mong sabihin sa mga estudyante na sagutin ang mga sumusunod na tanong sa kanilang study journal. Kung maaari, magpatugtog ng malumanay na musika na makatutulong sa mga estudyante na maisip ang templo. Makatutulong ang musika na maanyayahan ang Espiritu sa pag-aaral ng ebanghelyo. Maaari kang magpatugtog ng himno tungkol sa templo. O maaari mong i-play ang video ng isang koro ng mga kabataang babae na nagtatanghal ng “In That Holy Place,” na makikita sa ChurchofJesusChrist.org.
In That Holy Place
A Young Women choir from stakes in Highland sings “In That Holy Place.”
-
Ano ang natuklasan o nadama ninyo ngayon tungkol sa Tagapagligtas bilang sentro ng ating pagsamba sa templo?
-
Paano maiimpluwensyahan ng natutuhan o nadama ninyo ang inyong paraan ng paghahanda at pagsamba sa Panginoon sa Kanyang bahay?
Tiyaking nagkaroon ng sapat na oras ang mga estudyante sa pagsagot bago anyayahan ang mga handang estudyante na ibahagi ang kanilang mga saloobin. Maaari ka ring magbahagi ng mga paraan kung paano mo ginagawang sentro ng iyong karanasan sa templo ang Tagapagligtas.