Lesson 206: Paghahanda para sa Templo

Sa Templo, Nakikipagtipan Tayo na Sundin ang Batas ng Paglalaan

Ang Pagsasabuhay sa Batas ng Paglalaan ay Makatutulong sa Atin na Maging Katulad ng Diyos

Bilang bahagi ng kaloob, o endowment, makatatanggap tayo mula sa Panginoon sa Kanyang mga templo, gumagawa tayo ng mga sagradong tipan. Ang isa sa mga tipang ginawa natin sa Ama sa Langit ay ang sundin ang batas ng paglalaan. Nangangako ang mga miyembrong nakatanggap na ng endowment na ilalaan ang kanilang oras, talento, at iba pang pagpapalang natatanggap nila sa pagtatayo ng Simbahan ni Jesucristo sa lupa. Ang lesson na ito ay makatutulong sa mga estudyante na maunawaan ang sagradong batas ng paglalaan, na nakipagtipan tayo sa Diyos sa templo na sundin ito.

Mga Posibleng Aktibidad sa Pag-aaral

Pagsunod sa isang recipe

Tandaan: Itinuturo sa lesson na ito ang mga tipang ginagawa natin bilang bahagi ng ordenansa ng endowment sa templo at nakatuon ito sa batas ng paglalaan. Tinatalakay ng mga lesson sa ibang kurso sa seminary ang ibang batas.

Sabihin sa mga estudyante na maghanap ng recipe para sa pagkain na maaaring masiyahan silang kainin. Hikayatin silang maghanap ng mga kasamang larawan ng mga resulta mula sa pagsunod sa recipe. Maaari mong sabihin sa mga estudyante na maghanap at magbahagi sa maliliit na grupo. Kung hindi makahanap ang mga estudyante ng mga recipe at mga kasamang larawan sa klase, maaari mong ipakita ang sumusunod na larawan at hilingin sa mga estudyante kung paano sila mahihikayat na sundin ang recipe kung makikita nila ang resulta nito.

• Ano na ba ang nagawa ninyo gamit ang isang recipe?

• Paano makatutulong ang pagkakaroon ng larawan o video kasama ng recipe?

Nakikipagtipan tayo sa Diyos sa mga banal na templo

Tulad ng larawan o video ng naluto mula sa recipe, makatutulong na malaman ang inaasahang resulta ng pagtanggap ng ating endowment sa templo. Bilang bahagi ng ordenansa ng endowment, nakikipagtipan tayo sa Diyos na sundin ang limang magkakaibang batas. Ang pamumuhay ayon sa mga batas na ito ay tulad ng pagsunod sa bawat mahalagang hakbang ng isang recipe. Ang mga batas na nakipagtipan tayong sundin sa templo ay tumutulong sa atin na maging mas katulad ng Diyos at maihahanda tayo nito na mamuhay kasama Niya sa kahariang selestiyal.

Maaari mong isulat sa pisara ang sumusunod (hindi isinasama ang mga salita sa loob ng mga panaklong) at sabihin sa mga estudyante na isulat ang bawat isa sa mga batas na nakikipagtipan tayong isabuhay kapag tinatanggap ang ating endowment sa mga templo. Kung kailangan ng tulong ng mga estudyante, maaari mong ituro sa kanila ang 27.2, “Ang Endowment,” sa Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, na makikita sa ChurchofJesusChrist.org.

1. Batas ng (pagsunod)

2. Batas ng (sakripisyo)

3. Batas ng (ebanghelyo ni Jesucristo)

4. Batas ng (kalinisang-puri)

5. Batas ng (paglalaan)

   Isulat sa pisara ang sumusunod na katotohanan: Bilang bahagi ng endowment sa templo, nakikipagtipan tayo sa Diyos na isabuhay ang batas ng paglalaan.

   Maaaring natutuhan ng mga estudyante ang batas ng paglalaan sa nakaraang lesson. (Tingnan sa “Lesson 57: Doktrina at mga Tipan 42:29–39: Inilaan sa Panginoon”)

   Sabihin sa mga estudyante na ibahagi ang nalalaman nila tungkol sa batas na ito. Kapag sinuri mo kung ano na ang nalalaman ng mga estudyante, malalaman mo kung sa saan mo tutulungang tumuon ang mga estudyante sa lesson. Maaari mong itanong muli ang ilan sa mga ito sa pagtatapos ng lesson upang matulungan ang mga estudyante na ipahayag ang natutuhan nila.

   • Ano ang alam ninyo tungkol sa batas ng paglalaan?

   • Ano pa ang mga tanong ninyo tungkol sa batas ng paglalaan?

Hikayatin ang mga estudyante na humingi ng tulong sa Espiritu Santo upang maunawaan ang batas ng paglalaan at kung paano sila mapagpapala ng paghahandang makipagtipan sa Diyos sa templo.

Bigyan ang mga estudyante ng sumusunod na handout at anyayahan silang tuklasin kung ano ang batas ng paglalaan at kung paano tayo matutulungan ng pagsasabuhay sa batas na ito na maging mas katulad ng Diyos. Para sa karagdagang impormasyon, maaaring hanapin ng mga estudyante ang Topics and Questions, “Consecration.”

Ang Batas ng Paglalaan ng Panginoon

• Doktrina at mga Tipan 42:30, 38–39

• Doktrina at mga Tipan 78:3–7

• Doktrina at mga Tipan 105:1–5

Ipinaliwanag ni Elder D. Todd Christofferson ng Korum ng Labindalawang Apostol:

[Ang] batas ng paglalaan ng Panginoon (halimbawa, tingnan sa D&T 42:32, 53) … [ay] may papel na ginagampanan sa kabuhayan, ngunit, higit pa riyan, ito ay pagpapamuhay ng selestiyal na batas sa buhay na ito (tingnan sa D&T 105:5). Ang paglalaan ay pagtatalaga sa isang bagay bilang sagrado, na inilaan para sa mga banal na layunin. Ang tunay na tagumpay sa buhay na ito ay nagmumula sa paglalaan ng ating buhay—iyon ay, ang ating panahon at mga pagpili—sa mga layunin ng Diyos (tingnan sa Juan 17:1, 4; D&T 19:19). Sa paggawa nito, tinutulutan natin Siya na iangat tayo sa pinakamaluwalhati nating tadhana. (D. Todd Christofferson, “Larawan ng Isang Buhay na Inilaan,” Liahona, Nob. 2010, 16)

Itinuro ni Elder Dieter F. Uchtdorf ng Korum ng Labindalawang Apostol:

Ang sakripisyo at paglalaan ay dalawang batas ng langit na nakipagtipan tayong susundin sa banal na templo. Ang dalawang batas na ito ay may pagkakatulad ngunit hindi magkapareho. …

Ang paglalaan ay naiiba sa sakripisyo kahit paano sa isang mahalagang paraan. Kapag inilalaan natin ang isang bagay, hindi natin ito iniiwan para matupok sa ibabaw ng dambana. Sa halip, ginagamit natin ito sa paglilingkod sa Panginoon. Inilalaan natin ito sa Kanya at sa Kanyang banal na mga layunin. Tinanggap natin ang mga talentong bigay ng Panginoon sa atin at sinisikap na mapaunlad ang mga ito, nang maraming beses, upang lalong makatulong sa pagtatayo ng kaharian ng Panginoon.

Kakaunti sa atin ang hihilingang isakripisyo ang ating buhay para sa Tagapagligtas. Ngunit lahat tayo ay inaanyayahang ilaan ang ating buhay sa Kanya. (Dieter F. Uchtdorf, “Buong Puso Natin,” Liahona, Mayo 2022, 124)

Ano ang batas ng paglalaan? Paano ito nakakaapekto sa akin?

Ngayon, ipinamumuhay natin ang batas na ito sa iba-ibang paraan. Halimbawa, naglilingkod tayo sa iba, tumatanggap ng mga calling at tungkulin sa Simbahan at ginagawa ang lahat ng makakaya natin, at nagbabayad ng buong ikapu at bukas-palad na handog-ayuno. Kapag sinusunod natin ang ipinagagawa sa atin ng mga propeta at ng Espiritu Santo para maitayo ang kaharian ng Diyos at tulungan ang mga nangangailangan, sinusunod natin ang batas ng lubos na paglalaan. (“Ano ang batas ng lubos na paglalaan? Paano ito nakakaapekto sa akin?,” Para sa Lakas ng mga Kabataan, Abr. 2021, 31)

• Batay sa inyong naunawaan tungkol sa batas ng paglalaan, paano ito naging pagpapala mula sa Diyos?

• Sa palagay ninyo, paano makatutulong sa atin ang pagsasabuhay sa batas ng paglalaan na maging katulad ang Ama sa Langit at ni Jesucristo?

Ano ang kahulugan ng pagsasabuhay sa batas ng paglalaan

Upang matulungan ang mga estudyante na maipakita ang natutuhan nila, maaari mo silang anyayahan na gawin ang sumusunod na aktibidad nang mag-isa, kasama ang isang kapartner, o sa maliliit na grupo. Kung pipiliin ng mga estudyante ang isa sa unang dalawang mungkahi, hikayatin silang magsama ng mga larawan o paglalarawan.

Kung kailangan ng mga estudyante ng tulong sa paghahanap ng mga halimbawa sa banal na kasulatan para sa unang opsiyon, maaari mong imungkahi ang Mateo 4:23; 26:36–44; Lucas 8:1–3; 10:30–37; Mga Gawa 3:2–8; 4:32.

Gamitin ang isa sa mga sumusunod na opsiyon upang gumawa ng isang bagay na makatutulong sa inyo na ipaliwanag ang mahahalagang detalye tungkol sa batas ng paglalaan. Ang ginawa ninyo ay maaari ding magsilbing paalala habang inihahanda ninyo ang inyong sarili na tumanggap ng inyong endowment mula sa Panginoon.

1. Magsulat ng dalawa o tatlong pangungusap na nagpapaliwanag ng batas ng paglalaan sa isang tinedyer. Magsama ng ilang halimbawa mula sa mga banal na kasulatan kung saan ipinakita ni Jesucristo o ng Kanyang mga disipulo ang pagsasabuhay sa batas na ito sa pamamagitan ng pagbabahagi ng kanilang oras, talento, o iba pang mga pagpapala sa iba.

2. Magsulat ng maikling artikulo para sa magasin na Para sa Lakas ng mga Kabataan. Maaari mong piliing ituon ang iyong mensahe sa pagtulong sa mga tinedyer na naghahandang tumanggap ng kanilang endowment mula sa Panginoon.

3. Magsagawa ng maikling role play o skit upang maipakita ang mga paraan kung paano isabuhay ang batas ng paglalaan. Subukang magsama ng mga halimbawa na magkakaroon ng kaugnayan sa pagpili ng mga tinedyer na isabuhay ang batas na ito.

   Bigyan ng pagkakataon ang mga estudyante na maipakita ang kanilang pag-unawa sa batas ng paglalaan sa pamamagitan ng pagbabahagi ng inihanda nila. Maaari mong anyayahan ang mga estudyante na magbahagi sa klase, o maaaring gusto nilang magbahagi sa isa’t isa sa maliliit na grupo.

   Maaari mong anyayahan ang mga estudyante na ibahagi kung paano maituturing kaagad na pagpapala sa kanila at sa iba ngayon mismo ang pagsisimulang isabuhay ang mga alituntunin ng batas ng paglalan. Maaari kang mag-anyaya ng talakayan sa klase sa pamamagitan ng pagpapakita ng mga sumusunod na tanong at pagsasabi sa mga estudyante na sagutin ang isa sa mga ito. Maaari mo ring idagdag ang iyong patotoo sa ibinabahagi ng mga estudyante.

   • Ano ang isang bagay na natutuhan ninyo ngayon na makatutulong sa inyo na maghandang dumalo sa templo at tumanggap ng inyong endowment mula sa Panginoon?

   • Sa palagay ninyo, paano makakaapekto ang pagsasabuhay sa batas ng paglalaan sa inyong ugnayan sa Ama sa Langit at kay Jesucristo?

Karagdagang Resources

Saan ko malalaman pa ang tungkol sa endowment sa templo?

Dito maghanap para sa impormasyon: “About the Temple Endowment.”

Paano natin maisasabuhay ang batas ng paglalaan ngayon?

Itinuro ni Elder David A. Bednar ng Korum ng Labindalawang Apostol:

Habang isinasabuhay natin ang batas ng paglalaan, hindi lamang tayo handa na ialay ang anumang bagay at lahat ng bagay na pag-aari natin para sa kapakanan ng ebanghelyo—kundi nangangako rin tayong pauunlarin at iaalay ang ating pinakamabuting sarili—ating panahon, ating mga talento, at ating patuloy na lumalaking kakayahan—sa pagtatayo ng kaharian ng Diyos sa lupa.

Ang pangako natin ay: Ibibigay ko ang aking sarili at ang lahat ng maaari kong maabot, at mamumuhay ako para sa ebanghelyo ni Jesucristo. …

Ang tunay na paglalaan ay nagagawa dahil sa pag-ibig sa kapwa-tao at lumilikha ng dagdag na hangaring maglingkod. …

… Sa mga huling araw na ito, … higit pa ang kailangan sa atin bilang mga anak ng tipan bukod sa ating pera, kabuhayan, at panahon. Kailangan nating ilaan sa Panginoon ang ating buong kaluluwa. (David A. Bednar, “Your Whole Souls as an Offering unto Him” [debosyonal sa Ricks College, Ene. 5, 1999], byui.edu)

Itinuro ni Pangulong Ezra Taft Benson (1899–1994):

Tayo ay nakikipagtipan na isabuhay ang batas ng paglalaan. Ang ibig sabihin ng batas na ito ay ilalaan natin ang ating panahon, mga talento, lakas, pag-aari, at pera para sa pagtatatag ng kaharian ng Diyos sa mundong ito at sa pagtatatag ng Sion. Hanggang hindi sumusunod ang isang tao sa mga batas ng pagsunod, sakripisyo, ebanghelyo, at kalinisang-puri, hindi niya makakayang sundin ang batas ng paglalaan, na siyang batas na nauukol sa kahariang selestiyal. “Sapagkat kung inyong nanaisin na bigyan ko kayo ng isang lugar sa selestiyal na daigdig, kailangan ninyong ihanda ang inyong sarili sa paggawa ng mga bagay na aking iniuutos sa inyo at hinihingi sa inyo” (Doktrina at mga Tipan 78:7). (Teachings of Ezra Taft Benson [1988], 121)

Ano ang matututuhan natin tungkol sa batas ng paglalaan mula sa kasaysayan ng Simbahan?

Tinalakay ng mga mananalaysay ng Simbahan na sina Steven Harper at Kate Holbrook ang kasaysayan ng batas ng paglalaan mula nang ipanumbalik ito noong 1831 sa pamamagitan ni Propetang Joseph Smith.

Isang halimbawa mula sa kasaysayan ng Simbahan: “Treasure in Heaven: The John Tanner Story”

“Paglalaan at Pangangasiwa,” Mga Paksa sa Kasaysayan ng Simbahan

Mga Karagdagang Aktibidad sa Pag-aaral

Pagtutulungan sa isang inilaan na pagsisikap

Maaari mong ipakilala ang batas ng paglalaan sa pamamagitan ng pag-aanyaya sa mga estudyante na isagawa ang isang gawain kung saan makapag-aambag ang bawat estudyante sa anumang paraan. Maaari mong bigyan ang bawat estudyante ng isa o dalawang piraso ng puzzle at anyayahan silang magtulungan upang mabuo ang puzzle. Sabihin sa mga estudyante na talakayin ang mga sumusunod na tanong:

• Ano ang mangyayari kung mag-aambag ang lahat sa pagkamit sa iisang mithiin?

• Ano ang natututuhan ninyo tungkol sa kahalagahan ng kontribusyon ng lahat?

Tulungan ang mga estudyante na maunawaan na ang pagsasabuhay sa batas ng paglalaan ay nagbibigay-daan sa lahat ng disipulo ng Panginoon na makapag-ambag sa pagtatayo ng Kanyang kaharian sa lupa. Sabihin sa mga estudyante na magbahagi ng mga ideya sa maliliit na grupo mula sa gawaing natapos nila at kung paano ito maaaring maiugnay sa pagsasabuhay sa batas ng paglalaan.

Ang mga turo ni Jesucristo ay makatutulong sa atin na maunawaan ang paglalaan

Maaaring makinabang ang mga estudyante sa pag-aaral sa mga salita ng Tagapagligtas at sa kung paano maiaangkop ang mga ito sa batas ng paglalaan. Maaari mong ipakita ang mga sumusunod na reperensya na pag-aaralan ng mga estudyante:

Mateo 25:34–40

Marcos 12:41–44

Upang matulungan ang mga estudyante na matuto nang higit pa mula sa mga turo ng Tagapagligtas tungkol sa lepta ng balo, maaari mong ipakita at talakayin ang sumusunod na pahayag ni Elder Dieter F. Uchtdorf:

Para sa Panginoon, ang halaga ng donasyon ay hindi nasusukat sa epekto nito sa kabang-yaman kundi sa epekto nito sa puso ng nagbigay.

Sa pagpuri sa tapat na balong ito, binigyan tayo ng Tagapagligtas ng pamantayan para masukat ang ating pagkadisipulo sa lahat ng maraming aspeto nito. Itinuro ni Jesus na maaaring malaki o maliit ang ating handog, ngunit gaano man ito kalaki o kaliit, ito ay dapat ialay nang buong puso natin. …

… Tulad ng balo sa Jerusalem, kailangan nating ialay sa Kanya ang ating buong kaluluwa. Maaaring maliit ang handog natin, ngunit dapat mula ito sa ating puso at kaluluwa. (Dieter F. Uchtdorf, “Buong Puso Natin,” Liahona, Mayo 2022, 122–23)

Mga Turo sa Aklat ni Mormon na makatutulong para maunawaan ang paglalaan

Sabihin sa mga estudyante na pag-aralan ang iba’t ibang passage mula sa Aklat ni Mormon upang mas maunawaan nila ang ibig sabihin ng paglalaan ng ating oras, mga talento, at iba pang mga pagpapala. Tulungan ang mga estudyante na tuklasin ang hangarin ng Panginoon na pangalagaan natin ang isa’t isa. Maaari mong ipakita ang mga reperensya at sabihin sa mga estudyante na makipagtulungan sa isang kapartner upang makahanap ng mga kabatiran. Maaari mong anyayahan ang mga estudyante na ibahagi kung ano ang natutuhan nila tungkol sa Panginoong Jesucristo at kung ano ang maaari nating gawin upang maging mas katulad Niya.

• Jacob 2:18–19

• Mosias 4:21

• Mosias 18:27–29

• Alma 1:26–30

• 4 Nephi 1:3