ຄອບຄົວຂອງໂຈເຊັບ ສະມິດ

ຄອບຄົວແຫ່ງສັດທາ

ໂຈເຊັບ ສະມິດ ແລະ ຄອບຄົວຂອງເພິ່ນກຳລັງເຮັດວຽກນຳກັນໃນຟາມຂອງພວກເພິ່ນ.

ໂຈເຊັບ ສະມິດ ເກີດວັນທີ 23 ເດືອນທັນວາ, 1805, ໃນພາກຕາເວັນອອກສຽງເໜືອຂອງສະຫະລັດອາເມຣິກາ. ພໍ່ຂອງເພິ່ນກໍຊື່ວ່າ ໂຈເຊັບ ຄືກັນ. ແມ່ຂອງເພິ່ນຊື່ວ່າ ລູສີ. ເພິ່ນມີອ້າຍເອື້ອຍນ້ອງຫລາຍຄົນ. ຄອບຄົວຂອງໂຈເຊັບເປັນຊາວໄຮ່ຊາວນາ. ພວກເພິ່ນເຊື່ອໃນພຣະເຈົ້າ ແລະ ຮັກກັນແລະກັນ.

ໂຈເຊັບ ສະມິດ—ປະຫວັດ 1:3–4

ໂຈເຊັບ ສະມິດ ຕອນຍັງນ້ອຍ. ຂາຂວາຂອງເພິ່ນຖືກພັນດ້ວຍຜ້າພັນແຜ. ແມ່ຂອງເພິ່ນເປັນຫ່ວງເພິ່ນຫລາຍ.

ຕອນໂຈເຊັບຍັງເປັນເດັກນ້ອຍ, ເພິ່ນປ່ວຍເປັນໂຣກທີ່ເຮັດໃຫ້ຂາຂອງເພິ່ນມີບັນຫາ. ມັນເຮັດໃຫ້ເພິ່ນເຈັບຫລາຍ. ຄອບຄົວຂອງໂຈເຊັບໄດ້ພະຍາຍາມທີ່ຈະຊ່ວຍໃຫ້ເພິ່ນຮູ້ສຶກດີຂຶ້ນ, ແຕ່ຂາຂອງເພິ່ນຍັງເຈັບຫລາຍຢູ່. ໝໍທັງຫລາຍໄດ້ພະຍາຍາມທີ່ຈະເຮັດໃຫ້ຂາຂອງເພິ່ນດີຂຶ້ນ, ແຕ່ພວກເພິ່ນກໍເຮັດບໍ່ໄດ້.

Saints, 1:7

ໂຈເຊັບ ສະມິດ ນອນຢູ່ຕຽງ. ອ້າຍຂອງເພິ່ນຄຸເຂົ່າຢູ່ຂ້າງຕຽງ. ແມ່ຂອງເພິ່ນລົມກັບໝໍຂອງເພິ່ນຢູ່ເບື້ອງຫລັງ.

ພວກໝໍໄດ້ເວົ້າວ່າ ພວກເພິ່ນຕ້ອງຕັດຂາຂອງໂຈເຊັບອອກ ເພື່ອຊ່ວຍຊີວິດເພິ່ນ. ແຕ່ແມ່ຂອງເພິ່ນບໍ່ໃຫ້ພວກເພິ່ນຕັດ. ເພິ່ນຖາມວ່າ ມີວິທີອື່ນອີກບໍ່ທີ່ຈະຊ່ວຍໂຈເຊັບ. ພວກໝໍຕັດສິນໃຈທີ່ຈະຕັດສ່ວນໜຶ່ງຂອງກະດູກໃນຂາຂອງເພິ່ນແທນ. ໂຈເຊັບຮູ້ວ່າ ມັນຈະເຈັບຫລາຍ, ແຕ່ເພິ່ນມີສັດທາວ່າ ພຣະເຈົ້າຈະຊ່ວຍເພິ່ນ.

Saints, 1:7

ທ່ານໝໍຂອງໂຈເຊັບ ສະມິດ ໄດ້ເອົາເຫລົ້າໃຫ້ເພິ່ນກິນເພື່ອການຜ່າຕັດຂາ. ໂຈເຊັບປະຕິເສດ. ພໍ່ຂອງເພິ່ນກອດເພິ່ນໄວ້.

ພວກໝໍຢາກໃຫ້ໂຈເຊັບກິນເຫລົ້າເພື່ອເຮັດໃຫ້ຄວາມເຈັບຊາລົງ. ແຕ່ໂຈເຊັບເວົ້າວ່່າ ບໍ່. ເພິ່ນພຽງແຕ່ຢາກໃຫ້ພໍ່ຂອງເພິ່ນກອດເພິ່ນໄວ້.

Saints, 1:7

ແມ່ຂອງໂຈເຊັບ ສະມິດ ອອກໄປຈາກຫ້ອງນອນ ຂະນະທີ່ທ່ານໝໍກຽມທີ່ຈະຜ່າຕັດ.

ໂຈເຊັບໄດ້ຂໍໃຫ້ແມ່ຂອງເພິ່ນອອກໄປທາງນອກ. ເພິ່ນບໍ່ຢາກໃຫ້ແມ່ເຫັນເພິ່ນຢູ່ໃນຄວາມເຈັບປວດຫລາຍ ຂະນະທີ່ທ່ານໝໍຕັດເຂົ້າໄປໃນຂາຂອງເພິ່ນ.

ທ່ານໝໍກຳລັງຜ່າຕັດຂາຂອງໂຈເຊັບ ສະມິດ. ພໍ່ຂອງເພິ່ນກອດເພິ່ນເພື່ອໃຫ້ກຳລັງໃຈ.

ພໍ່ຂອງໂຈເຊັບໄດ້ກອດເພິ່ນໄວ້ ຂະນະທີ່ທ່ານໝໍຕັດເອົາສ່ວນທີ່ບໍ່ດີອອກຈາກກະດູກໃນຂາຂອງເພິ່ນ. ມັນເຈັບຫລາຍ, ແຕ່ພຣະເຈົ້າໄດ້ຊ່ວຍໃຫ້ໂຈເຊັບກ້າຫານ. ສອງສາມປີຕໍ່ມາ, ຂາຂອງໂຈເຊັບກໍດີຂຶ້ນ, ແຕ່ມັນຍັງເຈັບຢູ່ເວລາຍ່າງ.

Saints, 1:6–7

ໂຈເຊັບ ສະມິດ ແລະ ຄອບຄົວຂອງເພິ່ນໃນລັດນິວຢອກ. ພວກເພິ່ນເຮັດວຽກກີດຕົ້ນເມເປິ້ນ.

ເມື່ອໂຈເຊັບໃຫຍ່ຂຶ້ນ, ຄອບຄົວຂອງເພິ່ນກໍໄດ້ຍ້າຍໄປລັດນິວຢອກ. ຄອບຄົວຂອງໂຈເຊັບທຸກຍາກ. ພວກເພິ່ນໄດ້ເຮັດວຽກໜັກເພື່ອທີ່ຈະມີອາຫານພຽງພໍສຳລັບຄອບຄົວຂອງພວກເພິ່ນ. ໂຈເຊັບເປັນເດັກດີ. ເພິ່ນມີຄວາມສຸກ ແລະ ມັກຫົວ ແລະ ສະໜຸກສະໜານ.

Saints, 1:5–9

ຄອບຄົວຂອງໂຈເຊັບ ສະມິດ ກຳລັງນັ່ງນຳກັນຢ່າງສະຫງົບສຸກຢູ່ໂຕະກິນເຂົ້າ.

ຄອບຄົວຂອງໂຈເຊັບຮັກພຣະເຢຊູຄຣິດ. ພວກເພິ່ນໄດ້ອະທິຖານ ແລະ ອ່ານພຣະຄຳພີນຳກັນທຸກມື້. ແຕ່ພໍ່ແມ່ຂອງໂຈເຊັບບໍ່ແນ່ໃຈວ່າ ພວກເພິ່ນຄວນເປັນຂອງສາດສະໜາຈັກໃດ. ຄືນໜຶ່ງ, ລູສີ ແມ່ຂອງໂຈເຊັບໄດ້ອະທິຖານ ແລະ ບອກພຣະເຈົ້າວ່າ ເພິ່ນຢາກພົບສາດສະໜາຈັກທີ່ແທ້ຈິງຂອງພຣະເຢຊູຄຣິດ. ພຣະເຈົ້າໄດ້ຕອບຄຳອະທິຖານຂອງເພິ່ນ ແລະ ໄດ້ສັນຍາວ່າ ເພິ່ນຈະໄດ້ພົບ.

Saints, 1:10–11