ທູດສະຫວັນຟື້ນຟູຖານະປະໂລຫິດ

ອຳນາດເພື່ອກະທຳວຽກງານຂອງພຣະເຈົ້າ

ໂຈເຊັບ ສະມິດ ແລະ ອໍລີເວີ ຄາວເດີຣີ ກຳລັງລົມກັນ, ເພີ່ມເຕີມດ້ວຍຮູບພາບຂອງພຣະເຢຊູ ແລະ ຜູ້ຄົນໃນອາເມຣິກາສະໄໝບູຮານ.

ຂະນະທີ່ໂຈເຊັບ ແລະ ອໍລີເວີແປແຜ່ນຈາລຶກຄຳ, ພວກເພິ່ນໄດ້ຮຽນຮູ້ວ່າພຣະເຢຊູຕ້ອງການໃຫ້ທຸກຄົນຮັບບັບຕິສະມາ. ພຣະອົງຍັງໄດ້ປະທານອຳນາດໃຫ້ແກ່ຜູ້ຄົນເພື່ອໃຫ້ບັບຕິສະມາແກ່ຄົນອື່ນໆນຳອີກ. ໂຈເຊັບຍັງບໍ່ທັນໄດ້ຮັບບັບຕິສະມາ. ເພິ່ນຕ້ອງການຮູ້ເພີ່ມເຕີມກ່ຽວກັບການບັບຕິສະມາ.

ໂຈເຊັບ ສະມິດ—ປະຫວັດ 1:68; Saints, 1:65–66

ໂຈເຊັບ ສະມິດ ແລະ ອໍລີເວີ ຄາວເດີຣີ ຢູ່ໃນປ່າ, ກຳລັງຄຸເຂົ່າອະທິຖານ.

ບັດນີ້ໂຈເຊັບ ແລະ ອໍລີເວີສົງໄສວ່າແມ່ນໃຜທີ່ມີອຳນາດທີ່ຈະໃຫ້ບັບຕິສະມາແກ່ຜູ້ຄົນ. ພວກເພິ່ນໄດ້ຕັດສິນໃຈທູນຖາມພຣະເຈົ້າ. ພວກເພິ່ນໄດ້ເຂົ້າໄປໃນປ່າ ແລະ ຄຸເຂົ່າອະທິຖານ.

ໂຈເຊັບ ສະມິດ—ປະຫວັດ 1:68; Saints, 1:66

ທູດສະຫວັນອົງໜຶ່ງ, ໂຢຮັນບັບຕິສະໂຕ, ມອບຖານະປະໂລຫິດແຫ່ງອາໂຣນໃຫ້ແກ່ໂຈເຊັບ ສະມິດ.

ຂະນະທີ່ພວກເພິ່ນອະທິຖານຢູ່ນັ້ນ, ທູດສະຫວັນອົງໜຶ່ງໄດ້ມາປະກົດ. ເພິ່ນໄດ້ກ່າວວ່າເພິ່ນຄື ໂຢຮັນບັບຕິສະໂຕ, ຜູ້ທີ່ໃຫ້ບັບຕິສະມາແກ່ພຣະເຢຊູຄຣິດເປັນເວລາດົນນານມາແລ້ວ. ເພິ່ນໄດ້ມອບຖານະປະໂລຫິດແຫ່ງອາໂຣນໃຫ້ກັບໂຈເຊັບ ແລະ ອໍລີເວີ. ຖານະປະໂລຫິດຄືອຳນາດຂອງພຣະເຈົ້າ. ມັນຖືກໃຊ້ເພື່ອໃຫ້ພອນແກ່ລູກໆຂອງພຣະເຈົ້າ.

ຄຳສອນ ແລະ ພັນທະສັນຍາ 13; ໂຈເຊັບ ສະມິດ—ປະຫວັດ 1:69, 72; Saints, 1:66–67

ໂຈເຊັບ ສະມິດ ກຳລັງໃຫ້ບັບຕິສະມາແກ່ອໍລີເວີ ຄາວເດີຣີ ໃນແມ່ນ້ຳ.

ໂຢຮັນບັບຕິສະໂຕໄດ້ກ່າວວ່າ ຜູ້ທີ່ມີອຳນາດຖານະປະໂລຫິດແຫ່ງອາໂຣນ ສາມາດສິດສອນຜູ້ຄົນໃຫ້ກັບໃຈ ແລະ ໃຫ້ບັບຕິສະມາແກ່ເຂົາເຈົ້າໄດ້. ໂຢຮັນໄດ້ບອກໃຫ້ໂຈເຊັບ ແລະ ອໍລີເວີຮັບບັບຕິສະມາ. ພວກເພິ່ນໄດ້ລົງໄປໃນນ້ຳ ແລະ ໃຫ້ບັບຕິສະມາແກ່ກັນແລະກັນ. ເມື່ອພວກເພິ່ນຂຶ້ນມາຈາກນ້ຳ, ພວກເພິ່ນກໍເຕັມໄປດ້ວຍພຣະວິນຍານບໍລິສຸດ. ພວກເພິ່ນດີໃຈຫລາຍ!

ໂຈເຊັບ ສະມິດ—ປະຫວັດ 1:70–73

ເປໂຕ, ຢາໂກໂບ, ແລະ ໂຢຮັນ ມອບຖານະປະໂລຫິດແຫ່ງເມນຄີເສເດັກໃຫ້ແກ່ໂຈເຊັບ ສະມິດ.

ຕໍ່ມາ, ທູດສະຫວັນອົງອື່ນໆໄດ້ລົງມາ. ອັກຄະສາວົກທັງສາມຂອງພຣະເຢຊູ—ເປໂຕ, ຢາໂກໂບ, ແລະ ໂຢຮັນ—ໄດ້ມອບຖານະປະໂລຫິດແຫ່ງເມນຄີເສເດັກໃຫ້ກັບໂຈເຊັບ ແລະ ອໍລີເວີ. ບັດນີ້ ໂຈເຊັບ ແລະ ອໍລີເວີສາມາດມອບຂອງປະທານແຫ່ງພຣະວິນຍານບໍລິສຸດ. ໂຈເຊັບ ແລະ ອໍລີເວີກໍກາຍເປັນອັກຄະສາວົກເຊັ່ນກັນ. ພວກເພິ່ນສາມາດນຳພາ ແລະ ເປັນພະຍານພິເສດຂອງພຣະເຢຊູຄຣິດ.

ຄຳສອນ ແລະ ພັນທະສັນຍາ 27:12; Saints, 1:84