ທູດໂມໂຣໄນມາຢ້ຽມຢາມໂຈເຊັບ ສະມິດ

ຮຽນຮູ້ກ່ຽວກັບໜັງສືສັກສິດ

ໂຈເຊັບ ສະມິດ ກຳລັງແນມອອກໄປຈາກປ່ອງຢ້ຽມບ້ານຂອງເພິ່ນ.

ສາມປີຜ່ານໄປຕັ້ງແຕ່ພາບທີ່ມາໃຫ້ເຫັນຄັ້ງທຳອິດຂອງໂຈເຊັບ ສະມິດ. ໂຈເຊັບຮູ້ສຶກບໍ່ດີກ່ຽວກັບຄວາມຜິດບາງຢ່າງທີ່ເພິ່ນໄດ້ເຮັດຕັ້ງແຕ່ນັ້ນມາ. ເພິ່ນສົງໄສວ່າ ພຣະເຈົ້າຮູ້ສຶກແນວໃດກ່ຽວກັບເພິ່ນ.

ໂຈເຊັບ ສະມິດ—ປະຫວັດ 1:28–29; Saints, 1:20

ໂຈເຊັບ ສະມິດ ກຳລັງອະທິຖານຢູ່ຂ້າງຕຽງຂອງເພິ່ນ.

ຄືນໜຶ່ງ, ຫລັງຈາກທີ່ທຸກຄົນນອນຫລັບແລ້ວ, ໂຈເຊັບໄດ້ຕັດສິນໃຈທີ່ຈະອະທິຖານ. ພຣະເຈົ້າເຄີຍຕອບຄຳອະທິຖານຂອງເພິ່ນມາກ່ອນ, ແລະ ໂຈເຊັບຮູ້ວ່າ ພຣະອົງຈະຕອບເພິ່ນອີກຄັ້ງ.

ໂຈເຊັບ ສະມິດ—ປະຫວັດ 1:29; Saints, 1:21–22

ຂະນະທີ່ໂຈເຊັບກຳລັງອະທິຖານຢູ່ນັ້ນ, ແສງສະຫວ່າງກໍສ່ອງເຕັມຫ້ອງ. ໂຈເຊັບໄດ້ເຫັນທູດອົງໜຶ່ງຢືນຢູ່ກາງອາກາດຂ້າງຕຽງຂອງເພິ່ນ. ທູດອົງນັ້ນໄດ້ເວົ້າວ່າ ຊື່ຂອງເພິ່ນແມ່ນ ໂມໂຣໄນ. ພຣະເຈົ້າໄດ້ສົ່ງເພິ່ນມາ. ເພິ່ນໄດ້ກ່າວວ່າ ພຣະເຈົ້າໄດ້ອະໄພໃຫ້ໂຈເຊັບແລ້ວ ແລະ ຊົງມີວຽກງານໃຫ້ເພິ່ນເຮັດ. ຜູ້ຄົນທົ່ວໂລກຈະຮູ້ກ່ຽວກັບໂຈເຊັບ ແລະ ວຽກງານທີ່ພຣະເຈົ້າໄດ້ມອບໃຫ້ເພິ່ນ.

ໂຈເຊັບ ສະມິດ—ປະຫວັດ 1:30–33

ໂມໂຣໄນບອກໂຈເຊັບ ສະມິດ ກ່ຽວກັບໜັງສືທີ່ເຮັດຈາກແຜ່ນຈາລຶກຄຳ.

ໂມໂຣໄນໄດ້ກ່າວວ່າ ມີໜັງສືທີ່ເຮັດຈາກໜ້າທີ່ເປັນຄຳ ຫລື ແຜ່ນຈາລຶກ. ມັນຖືກຝັງໄວ້ໃນເນີນພູໃກ້ບ້ານຂອງໂຈເຊັບ. ໜັງສືເຫລັ້ມນັ້ນແມ່ນກ່ຽວກັບຜູ້ຄົນທີ່ເຄີຍອາໄສຢູ່ໃນອາເມຣິກາແຕ່ດົນນານມາແລ້ວ. ພວກເຂົາຮູ້ກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ໂມໂຣໄນໄດ້ກ່າວວ່າ ພຣະເຈົ້າຈະຊ່ວຍໂຈເຊັບແປໜັງສືນັ້ນ ເພື່ອວ່າຄົນທັງຫລາຍຈະໄດ້ອ່ານມັນ.

ໂຈເຊັບ ສະມິດ—ປະຫວັດ 1:34, 46

ໂຈເຊັບ ສະມິດ ລົມກັບພໍ່ຂອງເພິ່ນກ່ຽວກັບການມາຢ້ຽມຢາມຂອງໂມໂຣໄນ.

ໂມໂຣໄນໄດ້ມາຢ້ຽມຢາມສາມເທື່ອໃນຄືນນັ້ນ ແລະ ອີກເທື່ອໜຶ່ງໃນມື້ຕໍ່ມາ. ໂຈເຊັບໄດ້ບອກພໍ່ຂອງເພິ່ນເຖິງສິ່ງທີ່ເພິ່ນໄດ້ເຫັນ. ພໍ່ຂອງໂຈເຊັບດີໃຈຫລາຍ. “ມັນຄືພາບນິມິດຈາກພຣະເຈົ້າ,” ເພິ່ນໄດ້ບອກໂຈເຊັບ.

ໂຈເຊັບ ສະມິດ—ປະຫວັດ 1:35–50; Saints, 1:22–25

ໂຈເຊັບ ສະມິດ ຄົ້ນພົບແຜ່ນຈາລຶກຄຳຢູ່ກ້ອງຫີນກ້ອນໜຶ່ງ.

ໂຈເຊັບໄດ້ໄປທີ່ເນີນພູ ແລະ ໄດ້ພົບແຜ່ນຈາລຶກຄຳຢູ່ກ້ອງກ້ອນຫີນໜັກກ້ອນໜຶ່ງ. ຂະນະທີ່ເພິ່ນຢື້ມືໄປເອົານັ້ນ, ເພິ່ນໄດ້ຄິດກ່ຽວກັບວ່າ ມັນມີມູນຄ່າເປັນເງິນເທົ່າໃດ. ໂມໂຣໄນໄດ້ມາບອກໂຈເຊັບວ່າ ເພິ່ນບໍ່ພ້ອມທີ່ຈະເອົາແຜ່ນຈາລຶກໄປ. ເພິ່ນໄດ້ບອກໂຈເຊັບໃຫ້ກັບມາບ່ອນນີ້ທຸກປີຈົນກວ່າເພິ່ນຈະພ້ອມ.

ໂຈເຊັບ ສະມິດ—ປະຫວັດ 1:51–54; Saints, 1:25–27