ພາບທີ່ມາໃຫ້ເຫັນຄັ້ງທຳອິດຂອງໂຈເຊັບ ສະມິດ

ຄຳຕອບຕໍ່ຄຳອະທິຖານທີ່ຖ່ອມຕົວ

ໂຈເຊັບ ສະມິດ ກຳລັງຟັງຜູ້ຄົນທີ່ກຳລັງສັ່ງສອນກ່ຽວກັບຄວາມເຊື່ອທາງສາດສະໜາທີ່ແຕກຕ່າງກັນໄປຂອງເຂົາເຈົ້າ.

ໃນສະຖານທີ່ ທີ່ຄອບຄົວຂອງໂຈເຊັບ ສະມິດ ໄດ້ອາໄສຢູ່ນັ້ນ, ມີຫລາຍສາດສະໜາຈັກທີ່ສິດສອນກ່ຽວກັບພຣະເຢຊູຄຣິດ. ເຂົາເຈົ້າສິດສອນແຕກຕ່າງກັນໄປກ່ຽວກັບພຣະອົງ. ໂຈເຊັບບໍ່ແນ່ໃຈວ່າແມ່ນໃຜທີ່ຖືກຕ້ອງ. ເພິ່ນຮູ້ວ່າເພິ່ນຕ້ອງການພຣະຜູ້ຊ່ວຍໃຫ້ລອດ, ແຕ່ເພິ່ນບໍ່ຮູ້ວ່າຄວນໄປຮ່ວມກັບສາດສະໜາຈັກໃດ.

ໂຈເຊັບ ສະມິດ—ປະຫວັດ 1:5–6; Saints, 1:9

ໂຈເຊັບ ສະມິດ ກຳລັງເຮັດວຽກຢູ່ໄຮ່ຂອງເພິ່ນ.

ໂຈເຊັບໄດ້ຄິດກ່ຽວກັບເລື່ອງນີ້ມາດົນແລ້ວ. ເພິ່ນຢາກໄດ້ຮັບການອະໄພບາບຂອງເພິ່ນ. ເພິ່ນໄດ້ໄປຢ້ຽມຢາມຫລາຍສາດສະໜາຈັກ, ແຕ່ເພິ່ນກໍຍັງຮູ້ສຶກສັບສົນ.

ໂຈເຊັບ ສະມິດ—ປະຫວັດ 1:8–10; Saints, 1: 9–12

ໂຈເຊັບ ສະມິດ ກຳລັງອ່ານພຣະຄຣິສຕະທຳຄຳພີດ້ວຍແສງທຽນ.

ມື້ໜຶ່ງ, ໂຈເຊັບໄດ້ອ່ານ ຢາໂກໂບ 1:5 ໃນພຣະຄຣິສຕະທຳຄຳພີ. ພຣະຄຳພີອ່ານວ່າ ຖ້າຫາກເຮົາຕ້ອງການສະຕິປັນຍາ, ໃຫ້ເຮົາທູນຂໍຈາກພຣະເຈົ້າ. ໂຈເຊັບຮູ້ໃນໃຈວ່ານີ້ແມ່ນສິ່ງທີ່ເພິ່ນຕ້ອງເຮັດ.

ໂຈເຊັບ ສະມິດ—ປະຫວັດ 1:11–13

ໂຈເຊັບ ສະມິດ ກຳລັງຍ່າງເຂົ້າໄປໃນປ່າໃກ້ບ້ານຂອງເພິ່ນເພື່ອອະທິຖານ.

ໃນເຊົ້າມື້ທີ່ສວຍງາມຂອງລະດູໃບໄມ້ປົ່ງໃນປີ 1820, ໂຈເຊັບໄດ້ເຂົ້າໄປໃນປ່າໃກ້ບ້ານຂອງເພິ່ນ. ເພິ່ນຕ້ອງການຢູ່ໃນສະຖານທີ່ ທີ່ເພິ່ນສາມາດຢູ່ຄົນດຽວເພື່ອອະທິຖານຫາພຣະບິດາເທິງສະຫວັນ.

ໂຈເຊັບ ສະມິດ—ປະຫວັດ 1:14–15

ໂຈເຊັບໄດ້ຄຸເຂົ່າລົງ ແລະ ເລີ່ມອະທິຖານ. ໃນຂະນະທີ່ເພິ່ນໄດ້ເຮັດສິ່ງນັ້ນ, ເພິ່ນໄດ້ຮູ້ສຶກເຖິງອຳນາດຂອງຄວາມຊົ່ວຮ້າຍເຂົ້າມາຄອບງຳເພິ່ນໄວ້. ເພິ່ນໄດ້ຮູ້ສຶກເຖິງຄວາມມືດປົກຄຸມເພິ່ນໄວ້. ມັນຄືກັນກັບວ່າມີຄົນໃດຄົນໜຶ່ງທີ່ກຳລັງພະຍາຍາມຢຸດເພິ່ນໄວ້ບໍ່ໃຫ້ກ່າວກັບພຣະເຈົ້າ. ໂຈເຊັບໄດ້ໃຊ້ກຳລັງທັງໝົດຂອງເພິ່ນເພື່ອຂໍໃຫ້ພຣະເຈົ້າຊ່ວຍເພິ່ນ.

ໂຈເຊັບ ສະມິດ—ປະຫວັດ 1:15–16

ພຣະບິດາເທິງສະຫວັນ ແລະ ພຣະເຢຊູຄຣິດປະກົດຕໍ່ໂຈເຊັບ ສະມິດ. ເພິ່ນໄດ້ຄຸເຂົ່າຢູ່ຕໍ່ພຣະພັກຂອງພວກພຣະອົງ.

ທັນໃດນັ້ນ, ໂຈເຊັບໄດ້ເຫັນແສງສະຫວ່າງທີ່ເຈີດຈ້າອັນສວຍງາມສ່ອງລົງມາຈາກສະຫວັນ. ຄວາມມືດນັ້ນໄດ້ຫາຍໄປ, ແລະ ເພິ່ນຮູ້ສຶກເຖິງຄວາມສະຫງົບສຸກ. ໃນແສງນັ້ນ, ໂຈເຊັບໄດ້ເຫັນພຣະບິດາເທິງສະຫວັນ ແລະ ພຣະເຢຊູຄຣິດກຳລັງປະທັບຢືນຢູ່ໃນອາກາດ. ພຣະບິດາເທິງສະຫວັນໄດ້ເອີ້ນຊື່ຂອງໂຈເຊັບ. ຈາກນັ້ນພຣະອົງໄດ້ຊີ້ພຣະຫັດໄປຫາພຣະເຢຊູ ແລະ ກ່າວວ່າ, “ນີ້ຄືບຸດທີ່ຮັກຂອງເຮົາ. ຈົ່ງຟັງທ່ານ!”

ໂຈເຊັບ ສະມິດ—ປະຫວັດ 1:16–17

ພຣະເຢຊູບອກໂຈເຊັບ ສະມິດ ວ່າບາບຂອງເພິ່ນຖືກອະໄພໃຫ້ແລ້ວ.

ພຣະເຢຊູໄດ້ບອກໂຈເຊັບວ່າ ບາບຂອງເພິ່ນໄດ້ຖືກອະໄພໃຫ້ແລ້ວ. ໂຈເຊັບໄດ້ຖາມພຣະເຢຊູວ່າສາດສະໜາຈັກໃດທີ່ເພິ່ນຄວນເຂົ້າຮ່ວມ. ພຣະເຢຊູໄດ້ກ່າວວ່າ ເພິ່ນບໍ່ຄວນເຂົ້າຮ່ວມສາດສະໜາຈັກໃດເລີຍ.

ໂຈເຊັບ ສະມິດ—ປະຫວັດ 1:18-19; Saints, 1:16

ໂຈເຊັບ ສະມິດ, ກຳລັງຄຸເຂົ່າຢູ່ໃນປ່າ, ຟັງພຣະຜູ້ຊ່ວຍໃຫ້ລອດ.

ພຣະເຢຊູໄດ້ກ່າວວ່າຄວາມຈິງທີ່ສຳຄັນກ່ຽວກັບພຣະກິດຕິຄຸນຂອງພຣະອົງໄດ້ຖືກສູນຫາຍໄປ. ພຣະອົງໄດ້ກ່າວວ່າພຣະອົງຈະສົ່ງທູດສະຫວັນລົງມາເພື່ອສິດສອນຄວາມຈິງເຫລົ່ານີ້ໃຫ້ກັບໂຈເຊັບ, ເພື່ອຈະໄດ້ແບ່ງປັນໃຫ້ກັບໂລກ.

Saints, 1:16–17

ໂຈເຊັບ ສະມິດ ກຳລັງຍ່າງອອກຈາກປ່າເພື່ອກັບບ້ານ.

ຫລັງຈາກພາບນິມິດຈົບລົງ, ໂຈເຊັບກໍເຕັມໄປດ້ວຍຄວາມຮັກ ແລະ ຄວາມສຸກ. ເພິ່ນບໍ່ສັບສົນອີກຕໍ່ໄປ. ເພິ່ນຮູ້ວ່າພຣະເຈົ້າຮັກເພິ່ນ. ເຖິງແມ່ນວ່າບາງຄົນອາດຈະກຽດຊັງເພິ່ນ ຍ້ອນເພິ່ນໄດ້ເວົ້າວ່າເພິ່ນໄດ້ເຫັນພຣະບິດາເທິງສະຫວັນ ແລະ ພຣະເຢຊູຄຣິດ, ແຕ່ໂຈເຊັບຮູ້ວ່າມັນເປັນຄວາມຈິງ.

ໂຈເຊັບ ສະມິດ—ປະຫວັດ 1:20–26; Saints, 1:16