ມາຕິນ ແຮຣິສ ຊ່ວຍໂຈເຊັບ

ຮຽນຮູ້ທີ່ຈະໄວ້ວາງໃຈພຣະຜູ້ເປັນເຈົ້າ

ມາຕິນ ແຮຣິສ ແລະ ພັນລະຍາຂອງເພິ່ນທັກທາຍໂຈເຊັບ ແລະ ເອມມາ ສະມິດ.

ມື້ໜຶ່ງ, ຂະນະທີ່ໂຈເຊັບ ແລະ ເອມມາອາໄສຢູ່ລັດເພັນໂຊເວເນຍ, ໝູ່ຄົນໜຶ່ງຊື່ວ່າ ມາຕິນ ແຮຣິສ ໄດ້ມາຢ້ຽມຢາມພວກເພິ່ນ. ມາຕິນເປັນເຈົ້າຂອງຟາມໃຫຍ່ແຫ່ງໜຶ່ງໃນລັດນິວຢອກ. ເພິ່ນຮູ້ກ່ຽວກັບວຽກງານຂອງໂຈເຊັບກັບແຜ່ນຈາລຶກຄຳ. ເພິ່ນເຄີຍຊ່ວຍໂຈເຊັບມາກ່ອນ, ແລະ ບັດນີ້ ເພິ່ນຢາກຮູ້ວ່າ ມີຫຍັງທີ່ເພິ່ນສາມາດຊ່ວຍໄດ້ອີກບໍ່.

Saints, 1:49

ພາບປະກອບໄລຍະໃກ້ຂອງມາຕິນ ແຮຣິສ. ເພິ່ນກຳລັງຢືນຢູ່ເຮືອນຄົວໃນບ້ານຂອງໂຈເຊັບ ແລະ ເອມມາ ສະມິດ.

ໂຈເຊັບ ແລະ ເອມມາຮູ້ສຶກຂອບຄຸນ. ຫລາຍຄົນຄິດວ່າ ໂຈເຊັບເວົ້າຕົວະ. ມັນເປັນເລື່ອງດີທີ່ມີໝູ່ຄືມາຕິນ ຜູ້ທີ່ເຊື່ອວ່າ ແຜ່ນຈາລຶກຄຳມີຈິງ.

Saints, 1:49

ໂຈເຊັບ ແລະ ເອມມາ ສະມິດ ກຳລັງຢືນຢູ່ໃນເຮືອນກັບມາຕິນ ແຮຣິສ. ໂຈເຊັບ ແລະ ມາຕິນກຳລັງຖືໜ້າຕົ້ນສະບັບຢູ່.

ຂະນະທີ່ໂຈເຊັບແປແຜ່ນຈາລຶກຢູ່, ມາຕິນໄດ້ຂຽນສິ່ງທີ່ເພິ່ນກ່າວລົງ. ມາຕິນຕື່ນເຕັ້ນທີ່ໄດ້ຊ່ວຍພຣະຜູ້ເປັນເຈົ້າເຮັດວຽກງານອັນຍິ່ງໃຫຍ່ນີ້.

Saints, 1:50

ມາຕິນ ແລະ ລູສີ ແຮຣິສ ກຳລັງຖຽງກັນຢູ່ໜ້າລົດມ້າຂອງເຂົາເຈົ້າ.

ລູສີ ພັນລະຍາຂອງມາຕິນບໍ່ພໍໃຈ. ນາງບໍ່ເຊື່ອວ່າໂຈເຊັບມີແຜ່ນຈາລຶກຄຳແທ້ໆ. ນາງຄິດວ່າໂຈເຊັບກຳລັງຫລອກມາຕິນ. ນາງຢາກໃຫ້ມາຕິນກັບຄືນໄປລັດນິວຢອກ ແລະ ເຊົາຊ່ວຍໂຈເຊັບ.

Saints, 1:49–50

ໂຈເຊັບ ສະມິດ ກຳລັງຖືໜ້າຕົ້ນສະບັບ. ມາຕິນ ແຮຣິສ ກຳລັງຂໍໂຈເຊັບ ເພື່ອຢືມຕົ້ນສະບັບມາໃຫ້ພັນລະຍາຂອງເພິ່ນເບິ່ງ.

ແຕ່ມາຕິນໄດ້ສືບຕໍ່ເຮັດວຽກງານກັບໂຈເຊັບ. ເພິ່ນຄິດວ່າ ຖ້າລູສີສາມາດອ່ານສິ່ງທີ່ພວກເພິ່ນກຳລັງເຮັດຢູ່, ນາງຈະເຊື່ອເຊັ່ນກັນ. ເພິ່ນໄດ້ຖາມໂຈເຊັບວ່າ ເພິ່ນຈະສາມາດເອົາໜ້າທີ່ພວກເພິ່ນໄດ້ແປແລ້ວໄປລັດນິວຢອກເພື່ອເອົາໃຫ້ພັນລະຍາຂອງເພິ່ນເບິ່ງໄດ້ບໍ່. ໂຈເຊັບເວົ້າວ່າ ເພິ່ນຈະອະທິຖານ ແລະ ທູນຖາມພຣະເຈົ້າ.

Saints, 1:50–51

ໂຈເຊັບ ສະມິດ ກຳລັງອະທິຖານທູນຖາມພຣະເຈົ້າວ່າ ມາຕິນ ແຮຣິສ ສາມາດຢືມຕົ້ນສະບັບໄດ້ບໍ່.

ພຣະເຈົ້າໄດ້ບອກໂຈເຊັບບໍ່ໃຫ້ມາຕິນເອົາໜ້າເຫລົ່ານັ້ນໄປ. ມາຕິນໄດ້ຂໍໃຫ້ໂຈເຊັບອະທິຖານອີກຄັ້ງ. ໂຈເຊັບໄດ້ອະທິຖານ ແລະ ໄດ້ຮັບຄຳຕອບດຽວກັນ. ແຕ່ມາຕິນຢາກເອົາໜ້າເຫລົ່ານັ້ນໄປໃຫ້ພັນລະຍາຂອງເພິ່ນເບິ່ງແທ້ໆ, ແລະ ໂຈເຊັບກໍຢາກຊ່ວຍໝູ່ຂອງເພິ່ນ. ໂຈເຊັບໄດ້ອະທິຖານເປັນເທື່ອທີສາມ. ເທື່ອນີ້ ພຣະເຈົ້າໄດ້ບອກໂຈເຊັບວ່າ ເພິ່ນສາມາດຕັດສິນໃຈໄດ້ວ່າຈະເຮັດແນວໃດ.

Saints, 1:51

ມາຕິນ ແຮຣິສ ກຳລັງຖືໜ້າຕົ້ນສະບັບ. ໂຈເຊັບ ສະມິດ ຢູ່ເບື້ອງຫລັງ, ເບິ່ງຄືວ່າກັງວົນ.

ໂຈເຊັບໄດ້ບອກມາຕິນວ່າ ເພິ່ນສາມາດເອົາໜ້າເຫລົ່ານັ້ນໄປລັດນິວຢອກໄດ້, ແຕ່ເພິ່ນຕ້ອງເອົາໃຫ້ແຕ່ສະມາຊິກຄອບຄົວບາງຄົນເທົ່ານັ້ນເບິ່ງ. ແລະ ເພິ່ນຕ້ອງເອົາໜ້າເຫລົ່ານັ້ນກັບມາພາຍໃນສອງອາທິດ. ມາຕິນໄດ້ຕົກລົງ ແລະ ຈາກໄປພ້ອມກັບໜ້າເຫລົ່ານັ້ນ.

Saints, 1:51

ໂຈເຊັບ ສະມິດ ກຳລັງຄຸເຂົ່າຢູ່ຕໍ່ໜ້າຫລຸມຝັງສົບຂອງລູກນ້ອຍຂອງເພິ່ນທີ່ໄດ້ເສຍຊີວິດໄປ.

ຂະນະທີ່ມາຕິນບໍ່ຢູ່, ລູກນ້ອຍໄດ້ມາເກີດກັບໂຈເຊັບ ແລະ ເອມມາ. ແຕ່ແອນ້ອຍໄດ້ຕາຍໄປ, ແລະ ເອມມາກໍລົ້ມປ່ວຍ. ເອມມາ ແລະ ໂຈເຊັບໂສກເສົ້າຫລາຍ.

Saints, 1:51–52

ໂຈເຊັບເປັນຫ່ວງເອມມາ. ເພິ່ນຍັງເປັນຫ່ວງມາຕິນນຳອີກ. ສອງອາທິດໄດ້ຜ່ານໄປ, ແລະ ມາຕິນຍັງບໍ່ທັນກັບມາ. ເອມມາກໍໄດ້ເປັນຫ່ວງເຊັ່ນກັນ.

Saints, 1:52

ມາຕິນ ແຮຣິສ ກຳລັງນັ່ງຢູ່ໂຕະ, ລົມກັບໂຈເຊັບ ສະມິດ ແລະ ພໍ່ແມ່ຂອງເພິ່ນ.

ເອມມາໄດ້ບອກໂຈເຊັບໃຫ້ໄປທີ່ລັດນິວຢອກເພື່ອຊອກຫາມາຕິນ. ໂຈເຊັບໄດ້ພົບມາຕິນຢູ່ບ້ານຂອງພໍ່ແມ່ເພິ່ນ. ເມື່ອໂຈເຊັບຖາມມາຕິນກ່ຽວກັບໜ້າເຫລົ່ານັ້ນ, ມາຕິນກໍໂສກເສົ້າຫລາຍ. ເພິ່ນເວົ້າວ່າ ໜ້າເຫລົ່ານັ້ນເສຍແລ້ວ. ເພິ່ນຊອກຫາຢູ່ທົ່ວທຸກບ່ອນແລ້ວ ແຕ່ກໍບໍ່ພົບ.

Saints, 1:52–53

ໂຈເຊັບໂສກເສົ້າ ແລະ ຢ້ານຫລາຍ. ເພິ່ນຮູ້ວ່າ ເພິ່ນຜິດທີ່ໃຫ້ມາຕິນເອົາໜ້າເຫລົ່ານັ້ນໄປ. ເພິ່ນໄດ້ກັບບ້ານ ແລະ ບອກເອມມາເຖິງສິ່ງທີ່ເກີດຂຶ້ນ. ທູດໂມໂຣໄນໄດ້ມາເອົາແຜ່ນຈາລຶກຄຳຄືນ. ເພິ່ນກ່າວວ່າ ຖ້າໂຈເຊັບຖ່ອມຕົວ ແລະ ກັບໃຈ, ເພິ່ນຈະສາມາດເອົາແຜ່ນຈາລຶກຄືນ ແລະ ກັບມາແປອີກໄດ້.

ຄຳສອນ ແລະ ພັນທະສັນຍາ 3:5–11; 10:1–3; Saints, 1:53–54

ໂຈເຊັບ ສະມິດ ກຳລັງຄຸເຂົ່າຢູ່ຂ້າງຕຽງຂອງເພິ່ນ, ຂໍໃຫ້ພຣະເຈົ້າອະໄພໃຫ້.

ເປັນເວລາຫລາຍອາທິດ, ໂຈເຊັບໄດ້ຄິດກ່ຽວກັບສິ່ງທີ່ເພິ່ນໄດ້ເຮັດຜິດໄປ. ເພິ່ນໄດ້ອະທິຖານ ແລະ ຂໍການໃຫ້ອະໄພ. ພຣະເຈົ້າໄດ້ອະໄພໃຫ້ເພິ່ນ. ພຣະອົງໄດ້ບອກໂຈເຊັບວ່າ ໜ້າເຫລົ່ານັ້ນໄດ້ຖືກລັກໄປໂດຍຜູ້ຄົນທີ່ກຳລັງພະຍາຍາມທີ່ຈະຢຸດວຽກງານຂອງພຣະເຈົ້າ. ແຕ່ບໍ່ມີໃຜສາມາດຢຸດວຽກງານຂອງພຣະເຈົ້າໄດ້. ພຣະເຈົ້າມີແຜນທີ່ຈະໃຫ້ວຽກງານຂອງພຣະອົງດຳເນີນຕໍ່ໄປ.

ຄຳສອນ ແລະ ພັນທະສັນຍາ 3:1–10; Saints, 1:54–55

ໂຈເຊັບ ແລະ ເອມມາ ສະມິດ ກຳລັງລົມກັບມາຕິນ ແຮຣິສ. ໂຈເຊັບກຳລັງຈັບມືມາຕິນ ແຮຣິສ.

ໂມໂຣໄນໄດ້ມອບແຜ່ນຈາລຶກຄືນໃຫ້ໂຈເຊັບ. ພຣະເຈົ້າໄດ້ບອກໂຈເຊັບ ແລະ ມາຕິນວ່າ ຖ້າພວກເພິ່ນຖ່ອມຕົວ ແລະ ໄວ້ວາງໃຈພຣະອົງ, ພວກເພິ່ນກໍຈະສາມາດຊ່ວຍເຮັດວຽກງານຂອງພຣະອົງຕໍ່ໄປໃນຫລາຍໆວິທີ. ພວກເພິ່ນສາມາດຊ່ວຍນຳພຣະຄຳພີມໍມອນມາສູ່ໂລກ. ໜັງສືເຫລັ້ມນີ້ຈະຊ່ວຍຄົນທັງຫລາຍຢູ່ທຸກທີ່ທຸກບ່ອນໃຫ້ກັບໃຈ ແລະ ເຊື່ອໃນພຣະເຢຊູຄຣິດ.

ຄຳສອນ ແລະ ພັນທະສັນຍາ 3:16–20; 5:21–35; Saints, 1:56–57