1805–1817

O Le Aiga o Iosefa Samita

O se aiga o le faatuatua

Sa soifua mai Iosefa Samita i le aso 23 o Tesema, 1805 i matu i sasae o le Iunaite Setete o Amerika. O lona tama saigoa foi ia Iosefa. O le igoa o lona tina o Lusi. Sa toatele ona uso ma tuafafine. O le aiga o Iosefa o ni faifaatoaga. Sa latou talitonu i le Atua ma alolofa le tasi i le isi.

Iosefa Samita—Talafaasolopito 1:3–4

A o tamaititi Iosefa, sa i ai sona ma’i na mafua ai se faafitauli i lona vae. Sa matuai mafatia ai lava o ia. Sa taumafai le aiga o Iosefa e fesoasoani ia te ia ia maua se lagona lelei, ae sa matuai tiga lava lona vae. Sa taumafai foma’i e faaleleia lona vae, ae sa le mafai.

Au Paia, 1:7

Na fai mai fomai e tatau ona latou tipi ese le vae o Iosefa ina ia faasaoina ai lona ola. Ae sa le’i faatagaina i latou e lona tina. Sa ia fesili atu pe i ai se isi auala e fesoasoani ai ia Iosefa. Na filifili foma’i e tipi ese se vaega o le ponaivi o lona vae. Sa iloa e Iosefa o le a tiga lenei mea, ae sa ia te ia le faatuatua o le a fesoasoani le Atua ia te ia.

Au Paia, 1:7

Sa mananao fomai e avatu ia Iosefa le ava malosi e inu ai ina ia faaitiitia ai le tiga. Ae na fai mai Iosefa e leai. Sa na ona manao lava o ia e taofi o ia e lona tama.

Au Paia, 1:7

Sa fai atu Iosefa i lona tina e alu i fafo. Sa le’i manao o ia e vaai mai [lona tina] ia te ia i le tiga tele a o tipi e fomai lona vae.

Sa taofia Iosefa e lona tama a o tipi ese e fomai vaega leaga o le ponaivi i lona vae. Sa matuai tiga lava lenei mea, ae sa fesoasoani le Atua ia Iosefa ina ia lototoa. Ina ua mavae ni nai tausaga, sa toe malosi le vae o Iosefa, ae sa tiga lava pe a savali.

Au Paia, 1:6–7

Ina ua matua Iosefa, sa siitia atu lona aiga i le setete o Niu Ioka. Sa matitiva le aiga o Iosefa. Sa latou galulue malosi ina ia lava meaai mo lo latou aiga. O Iosefa o se tama lelei. Sa fiafia o ia ma fiafia e ata ma faia meamalie.

Au Paia, 1:5–9

Sa alolofa le aiga o Iosefa ia Iesu Keriso. Sa latou tatalo ma faitau faatasi le Tusi Paia. Ae sa le mautinoa e matua o Iosefa po o le a le lotu e tatau ona latou auai ai. I se tasi po, sa tatalo ai le tina o Iosefa, o Lusi, ma ta’u atu i le Atua e manao e saili le Ekalesia moni a Iesu Keriso. Na tali mai le Atua i lana tatalo ma folafola mai o le a ia maua.

Au Paia, 1:10–11