Iosefa ma Ema

Galulue faatasi e aumai i le lalolagi le Tusi a Mamona

O Ema Hale o loo nofonofo i tafatafa o se vaitafe e latalata i lona fale.

Sa ola ae Ema Hale i se aiga toatele i Penesilevania, e le mamao mai Niu Ioka, lea sa nofo ai Iosefa Samita. Sa talitonu Ema ma lona aiga i le Atua. Sa fiafia Ema e faitau, pese, tietie solofanua, ma aloina se paopao i le vaitafe i tafatafa o lona fale.

Au Paia, 1:31–32

O Iosefa Samita ma lona tama o loo savavali i tafatafa o le fale o Ema Hale. O loo tilotilo atu Ema i fafo o le faamalama ma matauina Iosefa.

Ina ua 21 tausaga o Ema, sa o mai Iosefa Samita ma lona tama e galulue mo se tasi o tuaoi o Ema. Sa valaaulia i laua e le tama o Ema e nonofo i lona fale.

Iosefa Samita—Talafaasolopito 1:56–57; Au Paia, 1:31–32

O loo talanoa faatasi Iosefa ma Ema i fafo atu o le fale o Ema. O loo i ai matua o Ema i le faitotoa.

Sa faamasani Iosefa ma Ema. Sa fiafia i laua e faatasitasi. Ae sa le fiafia matua o Ema ia Iosefa. La te lei talitonu na ia vaai i se agelu.

Au Paia, 1:32–33

O Ema ma Iosefa Samita o loo tietie faatasi i se taavale solofanua.

Pe tusa o le tasi tausaga mulimuli ane, na talosaga atu ai Iosefa ia Ema e faaipoipo ia te ia. O Ema ma Iosefa sa alofa le tasi i le isi. Sa la faaipoipo ma o atu e nonofo ma matua o Iosefa i Niu Ioka.

Iosefa Samita—Talafaasolopito 1:57–58; Au Paia, 1:34–35

O Ema ma Iosefa Samita o loo tietie i se taavale solofanua i le togavao.

Ua mavae le fa tausaga talu ona ta’u atu e Moronae ia Iosefa papatusi auro. Ina ua oo i le taimi, sa o atu Ema ma Iosefa i le mauga lea sa natia ai papatusi.

Iosefa Samita—Talafaasolopito 1:59; Au Paia, 1:36–37

Ua tuuina atu e Moronae papatusi auro ia Iosefa Samita.

Sa feiloai le agelu o Moronae ia Iosefa i luga o le mauga ma tuu atu ia te ia papatusi. Sa ia ta’u atu ia Iosefa afai na te faia le mea sili na te mafaia e tausia ai papatusi, o le a saogalemu.

Iosefa Samita—Talafaasolopito 1:59; Au Paia, 1:37–38

Iosefa Samita o loo tauaveina papatusi auro O loo tuli o ia e se tagata ma taumafai e ave papatusi.

Sa faalogo tagata sa i ai papatusi auro ia Iosefa, ma o nisi o i latou sa taumafai e gaoi papatusi mai ia te ia. Sa taumafai Iosefa e saili ni nofoaga e nana ai. A o aveina e Iosefa papatusi mai se nofoaga na nana ai i le togavao, sa osofaia o ia e ni tamaloloa. Sa ia taia i la’ua i lalo ma tamoe atu ai i le fale o ona matua.

Iosefa Samita—Talafaasolopito 1:60; Au Paia, 1:38, 40–41

Na aumai e Iosefa Samita papatusi auro i le fale ma tuu atu i lona aiga e pa’i atu i papatusi.

Ina ua aumai e Iosefa papatusi i le fale, sa fesoasoani lona tuafafine ia te ia e tuu i luga o le laulau. Sa ta’u atu e Moronae ia Iosefa e aua nei faatagaina se tasi e vaai i papatusi, ae sa mafai e lona aiga ona tagotago i papatusi a o afifiina i se ie.

Au Paia, 1:41

O Ema ma Iosefa ua siitia atu i se fale fou.

Na finagalo le Atua ia Iosefa e faaliliu papatusi auro ina ia mafai ai e tagata ona faitauina. Ae sa taumafai pea tagata i Niu Ioka e gaoi papatusi. Sa tatau ona nana pea e Iosefa papatusi ina ia saogalemu ai. O lea na siitia atu ai Iosefa ma Ema i se fale e latalata i matua o Ema. Sa la faamoemoe e mafai ona la faaliliuina papatusi ma le filemu.

Iosefa Samita—Talafaasolopito 1:61–62; Au Paia, 1:43, 45–46

O Iosefa Samita o loo sogi atu ia Ema i le muaulu. O loo fesoasoani o ia [Ema] ia te ia e faaliliu mai papatusi auro.

Na amata ona faaliliu papatusi e Iosefa. Sa ia faaaogāina meafaigaluega faapitoa na saunia e le Atua e fesoasoani ai iā te ia. A o faaliliuina e Iosefa, sa tusia i lalo e Ema mea na ia fai mai ai. Sa la galulue faatasi i lea itula ma lea itula. Sa maofa Ema. Sa ia iloaina sa faaliliu lana tane e ala i le mana o le Atua.

Iosefa Samita—Talafaasolopito 1:35; Au Paia, 1:49