1817–1820

O Le Uluai Faaaliga Vaaia a Iosefa Samita

O se tali i se tatalo faatauvaa

I le nofoaga sa nonofo ai le aiga o Iosefa Samita, sa tele ekalesia sa aoao atu e uiga ia Iesu Keriso. Sa latou aoao uma atu ni mea eseese e uiga ia te Ia. Sa le’i mautinoa e Iosefa po o ai e sa’o. Sa ia iloaina sa ia manaomia le Faaola, ae sa le iloa po o le fea ekalesia e auai ai.

Iosefa Samita—Talafaasolopito 1:5–6; Au Paia, 1:9

Sa mafaufau Iosefa i lenei mea mo se taimi umi lava. Sa manao o Ia e faamagaloina mai ana agasala. Sa asiasi atu o ia i le tele o lotu, ae sa ia lagonaina pea le le mautonu.

Iosefa Samita—Talafaasolopito 1:8–10; Au Paia, 1:9–12

I se tasi aso, sa ia faitauina ai le Iakopo 1:5 i le Tusi Paia. Na fai mai afai tatou te manaomia le poto, e mafai ona tatou ole atu i le Atua. Sa iloa e Iosefa i lona loto o le mea lenei e tatau ona ia faia.

Iosefa Samita—Talafaasolopito 1:11–13

I le taeao o se aso matagofie o le tautotogo i le 1820, na alu ai Iosefa i le togavao e latalata i lona fale. Sa manao o ia e i ai i se nofoaga na o ia e tatalo ai i le Tama Faalelagi.

Iosefa Samita—Talafaasolopito 1:14–15

Sa tootuli Iosefa ma amata ona tatalo. A o ia faia, sa ia lagonaina le puleaina o ia e se mana leaga. Sa ia lagonaina le pogisa o siomia ai o ia. Sa foliga mai sa taumafai se tasi e taofia o ia mai le talanoa atu i le Atua. Sa faaaoga e Iosefa lona malosi atoa e ole atu ai i le Atua e laveai o ia.

Iosefa Samita—Talafaasolopito 1:15–16

Na faafuasei lava ona vaaia e Iosefa se malamalama susulu matagofie o sau i lalo mai le lagi. Na alu ese le pogisa, ma sa ia lagonaina le filemu. I le malamalama, sa vaai ai Iosefa i le Tama Faalelagi ma Iesu Keriso o tutu i le ea. Na ta’u mai e le Tama Faalelagi le igoa o Iosefa. Na Ia faasino atu ia Iesu Keriso ma fetalai mai, “O Lo’u Atalii Pele Lenei. Faalogo ia te Ia!”

Iosefa Samita—Talafaasolopito 1:16–17.

Sa ta’u atu e Iesu ia Iosefa ua faamagaloina ana agasala. Sa fesili Iosefa ia Iesu po o le fea ekalesia e tatau ona ia auai ai. Na fetalai Iesu e lē tatau ona ia auai i se tasi o na lotu.

Iosefa Samita—Talafaasolopito 1:18–19; Au Paia, 1:16

Na fetalai Iesu ua leiloloa upumoni taua e uiga i Lana talalelei. Sa Ia fetalai o le a Ia auina mai agelu e aoao atu nei upumoni ia Iosefa, e faasoa atu i le lalolagi.

Au Paia, 1:16–17

Ina ua maea le faaaliga, sa faatumulia Iosefa i le alofa ma le olioli. Sa le’i toe le mautonu Iosefa. Sa ia iloa e alofa le Atua ia te ia. E ui lava ina sa inoino nisi tagata ia te ia ona o le faapea mai sa ia vaai i le Tama Faalelagi ma Iesu Keriso, ae sa iloa e Iosefa e moni.

Iosefa Samita—Talafaasolopito 1:20–26; Au Paia, 1:16