1828–1829

Ua Fesoasoani Matini Harisi ia Iosefa

Aoao e faalagolago i le Alii

I se tasi aso, a o nonofo Iosefa ma Ema i Penesilevania, sa asiasi atu ai se uo e igoa ia Matini Harisi ia i laua. Sa umia e Matini se faatoaga tele i Niu Ioka. Sa ia iloa le galuega a Iosefa i papatusi auro. Sa ia fesoasoani muamua ia Iosefa, ma o lea ua ia fia iloa pe i ai nisi mea e mafai ona ia faia e fesoasoani ai.

Au Paia, 1:49

Sa tutumu Iosefa ma Ema i le faafetai. E toatele tagata na manatu e pepelo Iosefa. Sa manaia le i ai o se uo e pei o Matini o le sa talitonu e moni papatusi auro.

Au Paia, 1:49

A o faaliliuina e Iosefa papatusi, sa tusia i lalo e Matini mea na ia fai mai ai. Sa fiafia Matini e fesoasoani i le Alii i lenei galuega maoae.

Au Paia, 1:50

Sa le fiafia le faletua o Matini, o Lusi. Sa le talitonu o ia o loo i ai moni lava papatusi auro ia Iosefa. Sa manatu o ia o loo faase’eina e Iosefa ia Matini. Sa manao o ia ia toe foi mai Matini i Niu Ioka ma aua le fesoasoani ia Iosefa.

Au Paia, 1:49–50

Ae sa faaauau pea ona galulue Matini ma Iosefa. Sa manatu o ia afai e mafai e Lusi ona faitau i mea o loo la galulue ai, o le a talitonu foi o ia. Sa ia fesili atu ia Iosefa pe mafai ona ia aveina itulau na la faaliliuina i Niu Ioka e faaali atu ai i lona toalua. Na fai atu Iosefa o le a ia tatalo ma ole atu i le Atua.

Au Paia, 1:50–51

Sa ta’u atu e le Alii ia Iosefa e ‘aua ne’i faatagaina Matini e ave itulau. Sa talosaga atu Matini ia Iosefa e toe tatalo. Sa tatalo Iosefa ma maua le tali lava e tasi. Ae sa manao moni lava Matini e faaali atu i lona toalua itulau, ma sa manao Iosefa e fesoasoani i lana uo. Sa tatalo Iosefa mo le taimi lona tolu. O le taimi lea na fetalai atu ai le Atua ia Iosefa e mafai ona ia filifili po o le a le mea e fai.

Au Paia, 1:51

Sa ta’u atu e Iosefa ia Matini e mafai ona ia aveina itulau i Niu Ioka, ae e na o ni tagata faapitoa o le aiga e mafai ona ia faaali atu i ai. Ma sa manaomia ona ia toe aumai itulau i le lua vaiaso. Sa ioe Matini ma alu ese atu ma itulau.

Au Paia, 1:51

A o toesea Matini, sa fanau mai se pepe ia Iosefa ma Ema. Ae na maliu le pepe, ma na amata ona ma’i Ema. Sa faanoanoa tele Ema ma Iosefa.

Au Paia, 1:51–52

Sa popole Iosefa ia Ema. Sa popole foi o ia ia Matini. Ua mavae le lua vaiaso, ma e lei toe foi mai Matini. Sa popole foi Ema.

Au Paia, 1:52

Sa fai atu Ema ia Iosefa e alu i Niu Ioka e saili Matini. Sa feiloai Iosefa ia Matini i le fale o ona matua. Ina ua fesili Iosefa ia Matini e uiga i itulau, sa matuai faanoanoa lava Matini. Sa ia fai mai ua leiloloa itulau. Sa ia saili i mea uma ae sa le mafai ona maua.

Au Paia, 1:52–53

Sa matuai faanoanoa ma fefe Iosefa. Sa ia iloaina lona sese i le faatagaina o Matini e ave itulau. Sa toe foi o ia i le fale ma ta’u atu ia Ema le mea ua tupu. Na sau le agelu o Moronae ma toe ave papatusi auro. Sa ia fai mai afai e lotomaualalo Iosefa ma salamo, e mafai ona ia toe aumaia papatusi ma toe faaliliu.

Mataupu Faavae ma Feagaiga 3:5–11; 10:1–3; Au Paia, 1:53–54

Mo le tele o vaiaso, sa mafaufau Iosefa i le mea sese na ia faia. Na ia tatalo ma ole atu i le Alii mo le faamagaloga. Na faamagaloina o ia e le Atua. Sa ia ta’u atu ia Iosefa o itulau na gaoia e tagata o e sa taumafai e taofi le galuega a le Atua. Ae e leai se tasi e mafai ona taofia le galuega a le Atua. Sa i ai se fuafuaga a le Atua e faaauau ai pea Lana galuega.

Mataupu Faavae ma Feagaiga 3:1–10; Au Paia, 1:54–55

Ua toe tuuina atu e Moronae papatusi ia Iosefa. Sa ta’u atu e le Atua ia Iosefa ma Matini afai la te lotomaualalo ma faatuatuaina o Ia, e mafai ona la fesoasoani pea i Lana galuega i le tele o auala. E mafai ona la fesoasoani e aumai le Tusi a Mamona i le lalolagi. O le a fesoasoani lenei tusi i tagata i soo se mea ia salamo ma talitonu ia Iesu Keriso.

Mataupu Faavae ma Feagaiga 3:16–20; 5:21–35; Au Paia, 1:56–57