“Fāmili ʻo Siosefa Sāmitá,” Ngaahi Talanoa ʻo e Tokāteline mo e Ngaahi Fuakavá (2024)

“Fāmili ʻo Siosefa Sāmitá,” Ngaahi Talanoa ʻo e Tokāteline mo e Ngaahi Fuakavá

1805–1817

3:22

Fāmili ʻo Siosefa Sāmitá

Ko ha fāmili ʻo e tuí

Ngāue fakataha ʻa Siosefa Sāmita mo hono fāmilí ʻi heʻenau fāmá.

Naʻe fāʻeleʻi ʻa Siosefa Sāmita ʻi he ʻaho 23 ʻo Tīsema, 1805, ʻi he fakatokelau hahake ʻo e ʻIunaiteti Siteití. Naʻe fakahingoa foki ʻene tamaí ko Siosefa. Ko e hingoa ʻo ʻene faʻeé ko Lusi. Naʻe ʻi ai hono ngaahi tokoua mo e tuofāfine tokolahi. Ko e fāmili ʻo Siosefá ko ha kau faama. Naʻa nau tui ki he ʻOtuá mo feʻofaʻaki foki.

Siosefa Sāmita—Hisitōlia 1:3–4

Ko Siosefa Sāmita ʻi heʻene kei tamasiʻi siʻí. ʻOku lalava hono vaʻe toʻohemá ʻaki ha meʻa haʻi lavea. ʻOku hohaʻa ʻene faʻeé kiate ia.

ʻI he kei tamasiʻi siʻi ʻa Siosefá, naʻá ne puke ʻo tupu ai ha palopalema ʻi hono vaʻé. Naʻe langa lahi ia. Naʻe feinga e fāmili ʻo Siosefá ke tokoniʻi ia ke ne ongoʻi fiemālie, ka naʻe kei langa lahi pē hono vaʻé. Naʻe feinga ʻa e kau toketaá ke ʻai hono vaʻé ke sai, ka naʻe ʻikai ke nau lava.

Kau Māʻoniʻoní, 1:7

Siosefa Sāmita ʻi ha mohenga. ʻOku tūʻulutui hono tokouá ʻi he veʻe mohengá. ʻOku talanoa ʻene faʻeé mo ʻene toketaá mei mui.

Naʻe talaange ʻe he toketaá ʻoku fiemaʻu ke tuʻusi e vaʻe ʻo Siosefá ke fakahaofi ʻene moʻuí. Ka naʻe ʻikai loto ki ai ʻene faʻeé. Naʻá ne ʻeke ange pe naʻe toe ʻi ai ha founga ke tokoni ai kia Siosefa. Naʻe fakakaukau e kau toketaá ke tuʻusi ha konga ʻo e hui ʻi hono vaʻé. Naʻe ʻiloʻi ʻe Siosefa ʻe mamahi ʻeni, ka naʻá ne tui ʻe tokoniʻi ia ʻe he ʻOtuá.

Kau Māʻoniʻoní, 1:7

ʻOku ʻoange ʻe he toketā ʻa Siosefa Sāmitá ki ai ha kava mālohi ki heʻene tafa vaʻé. ʻOku ʻikai tali ia ʻe Siosefa. ʻOku puke ia ʻe heʻene tamaí.

Naʻe fiemaʻu ʻe he kau toketaá ke ʻoange kia Siosefa ha kava mālohi ke ongonoa ʻa e langá. Ka naʻe talaange ʻe Siosefa ʻikai. Naʻá ne fiemaʻu pē ke puke ia ʻe heʻene tamaí.

Kau Māʻoniʻoní, 1:7

ʻOku mavahe ʻa e faʻē ʻa Siosefa Sāmitá mei he lokimohé lolotonga e teuteu ʻa e kau toketaá ke fai e tafá.

Naʻe kole ʻe Siosefa ki heʻene faʻeé ke hū ki tuʻa. Naʻe ʻikai ke ne loto ke sio ki heʻene mamahiʻia lahi lolotonga hono tafa ʻe he kau toketaá hono vaʻé.

Ko ha toketā ʻokú ne fakahoko ha tafa ʻi he vaʻe ʻo Siosefa Sāmitá. ʻOku puke ia ʻe heʻene tamaí ke tokoni.

Naʻe puke ʻe he tamai ʻa Siosefá ia lolotonga hono tuʻusi ʻe he kau toketaá ha ngaahi konga kovi ʻo e hui ʻi hono vaʻé. Naʻe mamahi lahi ʻeni, ka naʻe tokoniʻi ʻe he ʻOtuá ʻa Siosefa ke loto-toʻa. Hili ha ngaahi taʻu siʻi, naʻe sai ange ʻa e vaʻe ʻo Siosefá, ka naʻe kei langa pē ke lue ʻaki.

Kau Māʻoniʻoní, 1:6–7

Ko Siosefa Sāmita mo hono fāmilí ʻi Niu ʻIoke. ʻOku nau ngāue ʻi hono tānaki ʻo e huhuʻa ʻo e ʻuluʻakau māpelé.

ʻI he fuʻu lahi ange ʻa Siosefá, naʻe hiki hono fāmilí ki he siteiti ko Niu ʻIoké. Naʻe masiva e fāmili ʻo Siosefá. Naʻa nau ngāue mālohi ke maʻu ha meʻakai feʻunga maʻa honau fāmilí. Ko ha tamasiʻi lelei ʻa Siosefa. Naʻá ne fiefia pea naʻá ne saiʻia ke kata mo fiefia.

Kau Māʻoniʻoní, 1:5–9

Ko e tangutu fiemālie e fāmili ʻo Siosefa Sāmitá ʻi he tēpile kaí.

Naʻe ʻofa e fāmili ʻo Siosefá ʻia Sīsū Kalaisi. Na‘a nau lotu mo lau fakataha ʻa e Tohi Tapú. Ka naʻe ʻikai ke fakapapauʻi ʻe he ongomātuʻa ʻa Siosefá ʻa e siasi ʻoku totonu ke nau kau ki aí. ʻI ha pō ʻe taha, naʻe lotu ai ʻa e faʻē ʻa Siosefá ko Lusi, ʻo fakahā ki he ʻOtuá ʻokú ne fiemaʻu ke ʻilo ʻa e Siasi moʻoni ʻo Sīsū Kalaisí. Naʻe tali ʻe he ʻOtuá ʻene lotú mo palōmesi ange te ne ʻilo ia.

Kau Māʻoniʻoní, 1:10–11