Ngaahi Talanoa ʻo e Folofolá
Ko e ʻAʻahi ʻa e ʻĀngelo ko Molonaí kia Siosefa Sāmitá

“Ko e ʻAʻahi ʻa e ʻĀngelo ko Molonaí kia Siosefa Sāmitá,” Ngaahi Talanoa ʻo e Tokāteline mo e Ngaahi Fuakavá (2024)

“Ko e ʻAʻahi ʻa e ʻĀngelo ko Molonaí kia Siosefa Sāmitá,” Ngaahi Talanoa ʻo e Tokāteline mo e Ngaahi Fuakavá

1823

2:29

Ko e ʻAʻahi ʻa e ʻĀngelo ko Molonaí kia Siosefa Sāmitá

Ako fekauʻaki mo ha tohi toputapu

Ko e sio ʻa Siosefa Sāmita ki tuʻa ʻi he matapā sioʻata ʻo hono ʻapí.

Kuo ʻosi atu ha taʻu ʻe tolu talu mei he ʻUluaki Mata Meʻa-Hā-Mai ʻa Siosefa Sāmitá. Naʻe loto-mamahi ʻa Siosefa ʻi ha ngaahi fehalaaki ʻe niʻihi naʻá ne fai talu mei ai. Naʻá ne fifili pe ko e hā e ongo ʻa e ʻOtuá kiate iá.

Siosefa Sāmita—Hisitōlia 1:28–29; Kau Māʻoniʻoni, 1:21

Ko e lotu ʻa Siosefa Sāmita ʻi hono veʻe mohengá.

ʻI ha pō ʻe taha, hili e mohe ʻa e tokotaha kotoa, naʻe pehē ʻe Siosefa ke lotu. Naʻe tali ʻe he ʻOtuá ʻene ngaahi lotú kimuʻa, pea naʻe ʻiloʻi ʻe Siosefa te Ne toe tali mai ia.

Siosefa Sāmita—Hisitōlia 1:29; Kau Māʻoniʻoní, 1:22–23

Ko e hā ʻa Molonai kia Siosefa Sāmitá.

Lolotonga e lotu ʻa Siosefá, naʻe fakafonu ʻe ha maama ʻa e lokí. Naʻe mamata ʻa Siosefa ki ha ʻāngelo ʻoku tuʻu ʻi he ʻeá ʻi hono veʻe mohengá. Naʻe pehē ʻe he ʻāngeló ko hono hingoá ko Molonai. Naʻe fekauʻi mai ia ʻe he ʻOtuá. Naʻá ne pehē kuo fakamolemoleʻi ʻe he ʻOtuá ʻa Siosefa pea ʻoku ʻi ai ha ngāue ke ne fai. ʻE ʻilo ʻe he kakai ʻi he funga ʻo e māmaní ʻa Siosefa pea mo e ngāue naʻe tuku ange ʻe he ʻOtuá kiate iá.

Siosefa Sāmita—Hisitōlia 1:30–33

Ko e fakamatala ʻa Molonai kia Siosefa Sāmita kau ki ha tohi ne faʻu ʻaki ha ʻū lauʻi peleti koula.

Naʻe pehē ʻe Molonai ʻoku ʻi ai ha tohi naʻe ngaohi ʻaki ha ʻū lauʻi peesi koula pe ʻū lauʻi peleti. Naʻe tanu ia ʻi ha tafungofunga ofi ki he ʻapi ʻo Siosefá. Naʻe fekauʻaki ʻa e tohí mo ha kakai naʻe nofo ʻi he ongo ʻAmeliká ʻi he kuonga muʻá. Naʻa nau ʻilo fekauʻaki mo Sīsū Kalaisi mo ʻEne ongoongoleleí. Naʻe pehē ʻe Molonai ʻe tokoniʻi ʻe he ʻOtuá ʻa Siosefa ke liliu ʻa e tohí ke lava ʻe he kakaí ʻo lau ia.

Siosefa Sāmita—Hisitōlia 1:34, 46

Ko e talanoa ʻa Siosefa Sāmita ki heʻene tamaí fekauʻaki mo e ʻaʻahi mai ʻa Molonaí.

Naʻe ʻaʻahi tuʻo tolu ange ʻa Molonai ʻi he pō ko iá pea ʻi he ʻaho hono hokó. Naʻe talaange ʻe Siosefa ki heʻene tamaí ʻa e meʻa naʻá ne mamata ki aí. Naʻe fiefia ʻa e tamai ʻa Siosefá. Naʻá ne talaange kia Siosefa, “Ko ha meʻa-hā-mai ia mei he ʻOtuá.”

Siosefa Sāmita—Hisitōlia 1:35–50; Kau Māʻoniʻoní, 1:23–26

Ko e ʻiloʻi ʻe Siosefa Sāmita ʻa e ʻū lauʻi peleti koulá ʻi lalo ʻi ha fuʻu maka.

Naʻe ʻalu ʻa Siosefa ki he moʻungá ʻo maʻu ʻa e ʻū lauʻi peleti koulá ʻi lalo ʻi ha fuʻu maka mamafa. ʻI heʻene ala atu ke toʻo maí, naʻá ne fakakaukau ki hono mahuʻinga fakapaʻangá. Naʻe haʻu ʻa Molonai ʻo talaange kia Siosefa ʻoku teʻeki ke ne mateuteu ke ʻave ʻa e ʻū lauʻi peletí. Naʻá ne talaange kia Siosefa ke foki mai ki he feituʻú ni ʻi he taʻu kotoa pē kae ʻoua kuó ne mateuteu.

Siosefa Sāmita—Hisitōlia 1:51–54; Kau Māʻoniʻoní, 1:26–28