1829

Fakafoki Mai ʻe he Kau ʻĀngeló ʻa e Lakanga Fakataulaʻeikí

Mālohi ke fakahokoʻaki e ngāue ʻa e ʻOtuá

ʻI hono liliu ʻe Siosefa mo ʻŌliva ʻa e ʻū lauʻi peleti koulá, naʻá na ʻilo ai naʻe finangalo ʻa Sīsū ke papitaiso ʻa e tokotaha kotoa pē. Naʻá Ne foaki foki ki ha niʻihi ʻa e mālohi ke fai papitaisó. Naʻe teʻeki ai papitaiso ʻa Siosefa. Naʻá ne fie ʻilo lahi ange ʻo kau ki he papitaisó.

Siosefa Sāmita—Hisitōlia 1:68; Kau Māʻoniʻoní, 1:70–71

Naʻe fifili ʻa Siosefa mo ʻŌliva pe ko hai kuó ne maʻu ha mālohi ke papitaiso e kakaí he taimi ní. Naʻá na loto ke fehuʻi ia ki he ʻOtuá. Naʻá na ō ki he vaoʻakaú ʻo tūʻulutui ke lotu.

Siosefa Sāmita—Hisitōlia 1:68; Kau Māʻoniʻoní, 1:71

ʻI heʻena lotú, naʻe hā mai ai ha ʻāngelo. Naʻá ne pehē ko Sione Papitaiso ia, ʻa ia naʻá ne papitaiso ʻa Sīsū Kalaisi ʻi he fuoloá. Naʻá ne foaki kia Siosefa mo ʻŌliva ʻa e Lakanga Taulaʻeiki Faka-ʻĒloné. Ko e lakanga fakataulaʻeikí ko e mālohi ia ʻo e ʻOtuá. ʻOku fakaʻaongaʻi ia ke tāpuakiʻi ʻaki ʻa e fānau ʻa e ʻOtuá.

Tokāteline mo e Ngaahi Fuakava 13; Siosefa Sāmita—Hisitōlia 1:69, 72; Kau Māʻoniʻoní, 1:71–72

Naʻe pehē ʻe Sione Papitaiso ʻe lava ʻe ha taha ʻokú ne maʻu ʻa e Lakanga Taulaʻeiki Faka-ʻĒloné ʻo akoʻi ʻa e kakaí ke nau fakatomala pea papitaiso kinautolu. Naʻe talaange ʻe Sione kia Siosefa mo ʻŌliva ke na papitaiso. Naʻá na ō ki ha vaitafe ʻo na fepapitaisoʻaki. ʻI heʻena ʻalu hake mei he vaí, naʻe fakafonu kinaua ʻaki ʻa e Laumālie Māʻoniʻoní. Naʻa na fuʻu fiefia ʻaupito!

Siosefa Sāmita—Hisitōlia 1:70–73

Naʻe haʻu kimui ange mo ha kau ʻāngelo kehe. Naʻe foaki ʻe ha kau ʻAposetolo ʻe toko tolu ʻa Sīsū—Pita, Sēmisi, mo Sione—kia Siosefa mo ʻŌliva ʻa e Lakanga Taulaʻeiki Faka-Melekisētekí. Naʻe lava leva ke foaki ʻe Siosefa mo ʻŌliva ʻa e meʻafoaki ʻo e Laumālie Māʻoniʻoní. Naʻe hoko foki ʻa Siosefa mo ʻŌliva ko ha ongo ʻAposetolo. Te na lava ʻo tataki ʻa e Siasí pea hoko ko ha ongo fakamoʻoni makehe ʻo Sīsū Kalaisi.

Tokāteline mo e Ngaahi Fuakava 27:12; Kau Māʻoniʻoní, 1:90