1825–1828

Siosefa mo ʻEma

Ngāue fakataha ke ʻomi ki māmani ʻa e Tohi ʻa Molomoná

Naʻe tupu hake ʻa ʻEma Heili ʻi ha fāmili tokolahi ʻi Penisilivēnia, ʻo ʻikai mamaʻo mei Niu ʻIoke, ʻa ia naʻe nofo ai ʻa Siosefa Sāmitá. Naʻe tui ʻa ʻEma mo hono fāmilí ki he ʻOtuá. Naʻe saiʻia ʻa ʻEma ke laukonga, hiva, heka hoosi, mo ʻaʻalo ha pōpao ʻi ha vaitafe ʻi hono veʻe ʻapí.

Kau Māʻoniʻoní, 1:32–33

ʻI he taʻu 21 ʻa ʻEmá, naʻe haʻu ai ʻa Siosefa Sāmita mo ʻene tamaí ke ngāue ʻi ha taha ʻo e ngaahi kaungāʻapi ʻo ʻEmá. Naʻe fakaafeʻi kinaua ʻe he tamai ʻa ʻEmá ke na nofo ʻi hono ʻapí.

Siosefa Sāmita—Hisitōlia 1:56–57; Kau Māʻoniʻoní, 1:32–33

Naʻe maheni ai ʻa Siosefa mo ʻEma. Naʻá na saiʻia ʻi heʻena feohi fakatahá. Ka naʻe ʻikai saiʻia e ongomātuʻa ʻa ʻEmá ʻia Siosefa. Naʻe ʻikai ke na tui kuó ne mamata ki ha ʻāngelo.

Kau Māʻoniʻoní, 1:33–34

Hili ha taʻu nai ʻe taha mei ai, naʻe kole mali ʻa Siosefa kia ʻEma. Naʻe feʻofaʻaki ʻa ʻEma mo Siosefa. Naʻá na mali peá na ō ʻo nofo mo e ongomātuʻa ʻa Siosefá ʻi Niu ʻIoke.

Siosefa Sāmita—Hisitōlia 1:57–58; Kau Māʻoniʻoní, 1:36–37

Kuo ʻosi ha taʻu ʻe fā talu mei hono fakahā ʻe Molonai kia Siosefa ʻa e ʻū lauʻi peleti koulá. ʻI he hokosia ʻa e taimí, naʻe ʻalu atu ai ʻa ʻEma mo Siosefa ki he moʻunga naʻe fūfuuʻi ai ʻa e ʻū lauʻi peletí.

Siosefa Sāmita—Hisitōlia 1:59; Kau Māʻoniʻoní, 1:38–39

Naʻe fetaulaki ʻa e ʻāngelo ko Molonaí mo Siosefa ʻi he tafungofungá pea ʻoange kiate ia ʻa e ʻū lauʻi peletí. Naʻá ne talaange kia Siosefa kapau te ne fai hono lelei tahá ke tokangaʻi ʻa e ʻū lauʻi peletí, ʻe malu ia.

Siosefa Sāmita—Hisitōlia 1:59; Kau Māʻoniʻoní, 1:39–40

Kuo fanongo ʻa e kakaí naʻe maʻu ʻe Siosefa ʻa e ʻū lauʻi peleti koulá, pea naʻe feinga honau niʻihi ke kaihaʻasi meiate ia ʻa e ʻū lauʻi peletí. Naʻe pau ke kumi ai ʻe Siosefa ha ngaahi feituʻu ke fufuuʻi ai kinautolu. Lolotonga hono toʻotoʻo ʻe Siosefa ʻa e ʻū lauʻi peletí mei ha feituʻu naʻe fūfuuʻi ai ʻi he vaoʻakaú, naʻe ʻohofi ia ʻe ha kau tangata. Naʻá ne taaʻi kinautolu pea lele ia ki he ʻapi ʻo ʻene ongomātuʻá.

Siosefa Sāmita—Hisitōlia 1:60; Kau Māʻoniʻoní, 1:40, 42–43

ʻI hono ʻomai ʻe Siosefa ʻa e ʻū lauʻi peletí ki ʻapí, naʻe tokoni hono tuofefiné kiate ia ke hili ia ʻi he funga tēpilé. Naʻe talaange ʻe Molonai kia Siosefa ke ʻoua naʻa tuku ha taha ke sio ki he ʻū lauʻi peletí, ka ʻe lava ke nau ala ki he ʻū lauʻi peletí lolotonga hono kofukofuʻi ʻaki ha konga tupenú.

Kau Māʻoniʻoní, 1:43

Naʻe finangalo ʻa e ʻOtuá ke liliu ʻe Siosefa ʻa e ʻū lauʻi peleti koulá koeʻuhí ke lava ʻe he kakaí ʻo lau kinautolu. Ka naʻe kei feinga pē ʻa e kakai ʻi Niu ʻIoké ke kaihaʻasi ʻa e ʻū lauʻi peletí. Naʻe pau ke toutou fūfuuʻi ʻe Siosefa ʻa e ʻū lauʻi peletí ke maluʻi kinautolu. Ko ia naʻe hiki ʻa Siosefa mo ʻEma ki ha ʻapi ofi ki he ongomātuʻa ʻa ʻEmá. Naʻá na ʻamanaki te na lava ʻo liliu ʻa e ʻū lauʻi peletí ʻi he nonga.

Siosefa Sāmita—Hisitōlia 1:61–62; Kau Māʻoniʻoní, 1:43, 45–46

Naʻe kamata liliu ʻe Siosefa ʻa e ʻū lauʻi peletí. Naʻá ne fakaʻaongaʻi ha ngaahi meʻangāue makehe naʻe teuteuʻi ʻe he ʻOtuá ke tokoni kiate ia. ʻI he liliu ʻa Siosefá, naʻe hiki ʻe ʻEma ʻa e meʻa naʻá ne lea ʻakí. Naʻá na ngāue fakataha ʻi ha ngaahi houa lahi. Naʻe ofo ʻa ʻEma. Naʻá ne ʻiloʻi naʻe liliu hono husepānití ʻaki e mālohi ʻo e ʻOtuá.

Siosefa Sāmita—Hisitōlia 1:35; Kau Māʻoniʻoní, 1:49