1828–1829

Tokoni ʻa Māteni Hālisi kia Siosefá

Ko e Ako ke falala ki he ‘Eikí

ʻI ha ʻaho ʻe taha, lolotonga e nofo ʻa Siosefa mo ʻEma ʻi Penisilivēniá, naʻe haʻu ha kaungāmeʻa ko Māteni Hālisi ke ʻaʻahi kiate kinaua. Naʻe ʻi ai ha faama lahi ʻa Māteni ʻi Niu ʻIoke. Naʻá ne ʻilo ki he ngāue ʻa Siosefa ki he ʻū lauʻi peleti koulá. Naʻá ne tokoniʻi ʻa Siosefa kimuʻa, pea naʻá ne fie ʻilo ʻeni pe naʻe toe lahi ange ʻa e meʻa te ne lava ʻo fai ke tokoní.

Kau Māʻoniʻoní, 1:54

Naʻe houngaʻia ʻa Siosefa mo ʻEma. Naʻe pehē ʻe ha kakai tokolahi naʻe loi ʻa Siosefa. Naʻe lelei ke maʻu ha kaungāmeʻa hangē ko Mātení ʻa ia naʻá ne tui ʻoku moʻoni ʻa e ʻū lauʻi peleti koulá.

Kau Māʻoniʻoní, 1:54

ʻI hono liliu ʻe Siosefa ʻa e ʻū lauʻi peletí, naʻe hiki ʻe Māteni ʻa e meʻa naʻá ne lea ʻakí. Naʻe fiefia ʻa Māteni ke tokoni ki he ʻEikí ʻi he ngāue maʻongoʻongá ni.

Kau Māʻoniʻoní, 1:55

Naʻe ʻikai ke fiefia ʻa Lusi ko e uaifi ʻo Mātení. Naʻe ʻikai ke ne tui naʻe maʻu moʻoni ʻe Siosefa ha ʻū lauʻi peleti koula. Naʻá ne fakakaukau naʻe kākaaʻi ʻe Siosefa ʻa Māteni. Naʻá ne fiemaʻu ʻa Māteni ke taʻofi ʻene tokoni kia Siosefá pea foki ange ki Niu ʻIoke.

Kau Māʻoniʻoní, 1:54–55

Ka naʻe kei ngāue pē ʻa Māteni mo Siosefa. Naʻá ne fakakaukau kapau ʻe lava ʻe Lusi ʻo lau e meʻa naʻá na ngāue ki aí, te ne tui foki ki ai. Naʻá ne kole kia Siosefa pe te ne lava ʻo ʻave ʻa e ʻū peesi kuó na liliú ki Niu ʻIoke ke fakaʻaliʻali ki hono uaifí. Naʻe pehē ʻe Siosefa te ne lotu ʻo kole ki he ʻOtuá.

Kau Māʻoniʻoní, 1:55–56

Naʻe folofola ʻa e ʻOtuá kia Siosefa ke ʻoua naʻa ʻave e ʻū lauʻi pēsí kia Māteni. Naʻe kole ʻe Māteni kia Siosefa ke toe lotu. Naʻe lotu ʻa Siosefa peá ne maʻu ʻa e tali tatau. Ka naʻe fiemaʻu moʻoni ʻe Māteni ke fakaʻaliʻali ki hono uaifí ʻa e ʻū lauʻi pēsí, pea naʻe fie tokoni ʻa Siosefa ki hono kaungāmeʻá. Naʻe lotu ʻa Siosefa ko hono tuʻo tolú. ʻI he taimi ko ʻení naʻe folofola ʻa e ʻOtuá kia Siosefa te ne lava ʻo fili ʻa e meʻa ke faí.

Kau Māʻoniʻoní, 1:56

Naʻe talaange ʻe Siosefa kia Māteni te ne lava ʻo ʻalu mo e ʻū lauʻi pēsí ki Niu ʻIoke, ka ke fakaʻaliʻali pē ia ki ha kau mēmipa pau ʻo e fāmilí. Pea naʻe fiemaʻu ke ne fakafoki mai ʻa e ʻū lauʻi pēsí hili ha uike ʻe ua. Naʻe loto ki ai ʻa Māteni peá ne ʻalu mo e ʻū lauʻi pēsí.

Kau Māʻoniʻoní, 1:56

Lolotonga e mavahe ʻa Mātení, naʻe fāʻeleʻi ha pēpē kia Siosefa mo ʻEma. Ka naʻe mālōlō ʻa e pēpeé, pea puke ʻa ʻEma. Na‘e fuʻu loto-mamahi ʻa ʻEma mo Siosefa.

Kau Māʻoniʻoní, 1:56–57

Naʻe hohaʻa ʻa Siosefa fekauʻaki mo ʻEma. Naʻá ne hohaʻa foki fekauʻaki mo Māteni. Kuo ʻosi ʻa e uike ʻe uá, pea naʻe teʻeki ke foki mai ʻa Māteni. Naʻe hohaʻa foki mo ʻEma.

Kau Māʻoniʻoní, 1:57

Naʻe talaange ʻe ʻEma kia Siosefa ke ʻalu ki Niu ʻIoke ʻo kumi ʻa Māteni. Naʻe fetaulaki ʻa Siosefa mo Māteni ʻi he ʻapi ʻo ʻene ongomātuʻá. ʻI he fehuʻi ange ʻe Siosefa kia Māteni fekauʻaki mo e ʻū lauʻi pēsí, naʻe loto-mamahi ʻaupito ʻa Māteni. Naʻá ne pehē kuo mole ʻa e ʻū lauʻi pēsí. Naʻá ne fakasio ʻi he feituʻu kotoa pē ka naʻe ʻikai ke ne maʻu kinautolu.

Kau Māʻoniʻoní, 1:57–59

Naʻe fuʻu loto-mamahi mo ilifia ʻaupito ʻa Siosefa. Naʻá ne ʻiloʻi naʻe hala ʻene tuku ʻa Māteni ke ʻalu mo e ʻū lauʻi pēsí. Naʻá ne foki ki ʻapi ʻo talaange kia ʻEma ʻa e meʻa naʻe hokó. Naʻe haʻu ʻa e ʻāngelo ko Molonaí ʻo fakafoki ʻa e ʻū lauʻi peleti koulá. Naʻá ne pehē kapau naʻe loto-fakatōkilalo mo fakatomala ʻa Siosefa, te ne lava ʻo toe maʻu ʻa e ʻū lauʻi peletí pea toe liliu ia.

Tokāteline mo e Ngaahi Fuakava 3:5–11; 10:1–3; Kau Māʻoniʻoní, 1:58–59

Naʻe fakakaukau ʻa Siosefa ʻi ha ngaahi uike lahi, ki he fehalaaki naʻá ne fakahokó. Naʻá ne lotu ʻo kole ha fakamolemole. Naʻe fakamolemoleʻi ia ʻe he ʻOtuá. Naʻá Ne folofola kia Siosefa naʻe kaihaʻasi e ʻū lauʻi pēsí ʻe he kakai naʻa nau feinga ke taʻofi e ngāue ʻa e ʻOtuá. Ka he ʻikai lava ʻe ha taha ʻo taʻofi e ngāue ʻa e ʻOtuá. Naʻe ʻi ai ha palani ʻa e ʻOtuá ke kei hokohoko atu pē ʻEne ngāué.

Tokāteline mo e Ngaahi Fuakava 3:1–10; Kau Māʻoniʻoní, 1:59–60

Naʻe ʻoange fakafoki ʻe Molonai ʻa e ʻū lauʻi peletí kia Siosefa. Naʻe folofola ʻa e ʻOtuá kia Siosefa mo Māteni kapau te na loto-fakatōkilalo mo falala kiate Ia, te na lava ʻo kei tokoni ki Heʻene ngāué ʻi ha ngaahi founga lahi. Te na lava ʻo tokoni ke ʻomi ʻa e Tohi ʻa Molomoná ki he māmaní. ʻE tokoni ʻa e tohí ni ki he kakai ʻi he feituʻu kotoa pē ke nau fakatomala mo tui kia Sīsū Kalaisi.

Tokāteline mo e Ngaahi Fuakava 3:16–20; 5:21–35; Kau Māʻoniʻoní, 1:61–62