1817–1820

ʻUluaki Mata Meʻa-hā-mai ʻa Siosefa Sāmitá

Ko ha tali ki ha lotu loto-fakatōkilalo

ʻI he feituʻu naʻe nofo ai e fāmili ʻo Siosefa Sāmitá, naʻe lahi ai ha ngaahi siasi naʻa nau akonaki fekauʻaki mo Sīsū Kalaisi. Naʻa nau akoʻi kotoa ha ngaahi meʻa kehekehe fekauʻaki mo Ia. Naʻe ʻikai ke fakapapauʻi ʻe Siosefa pe ko hai naʻe tonú. Naʻá ne ʻiloʻi naʻá ne fiemaʻu ʻa e Fakamoʻuí, ka naʻe ʻikai ke ne ʻilo pe ko e siasi fē ke kau ki aí.

Siosefa Sāmita—Hisitōlia 1:5–6; Kau Māʻoniʻoní, 1:9

Naʻe fakakaukau fuoloa ʻa Siosefa ki he meʻá ni. Naʻá ne loto ke fakamolemoleʻi ʻene ngaahi angahalá. Naʻá ne ʻaʻahi ki ha ngaahi siasi lahi, ka naʻá ne kei ongoʻi puputuʻu pē.

Siosefa Sāmita—Hisitōlia 1:8–10; Kau Māʻoniʻoní, 1:9–12

ʻI ha ʻaho ʻe taha, naʻe lau ai ʻe Siosefa ʻa e Sēmisi 1:5 ʻi he Tohi Tapú. Naʻe pehē ai kapau ʻoku tau fiemaʻu ʻa e potó, te tau lava ʻo kole ki he ʻOtuá. Naʻe ʻiloʻi ʻe Siosefa ʻi hono lotó ko e meʻa ʻeni naʻe fiemaʻu ke ne faí.

Siosefa Sāmita—Hisitōlia 1:11–13

ʻI he pongipongi fakaʻofoʻofa ʻi he faʻahitaʻu failau ʻo e 1820, naʻe ʻalu ai ʻa Siosefa ki he vaoʻakau ofi ki hono ʻapí. Naʻá ne loto ke ʻi ha feituʻu ʻe lava ke ne toko taha ai pē ke lotu ki he Tamai Hēvaní.

Siosefa Sāmita—Hisitōlia 1:14–15

Naʻe tūʻulutui ʻa Siosefa pea kamata ke ne lotu. ʻI heʻene fai iá, naʻá ne ongoʻi ʻoku maʻu ia ʻe ha mālohi kovi. Naʻá ne ongoʻi ʻoku takatakaiʻi ia ʻe ha fakapoʻuli. Naʻe hangē ʻoku feinga ha taha ke taʻofi ia mei heʻene fakataufolofola ki he ʻOtuá. Naʻe fakaʻaongaʻi ʻe Siosefa hono iví kotoa ke kole ki he ʻOtuá ke fakahaofi ia.

Siosefa Sāmita—Hisitōlia 1:15–16

Fakafokifā pē, kuo mamata ʻa Siosefa ki ha maama fakaʻofoʻofa mo ngingila ʻoku ʻalu hifo mei he langí. Naʻe mole atu ʻa e fakapoʻulí, pea naʻá ne ongoʻi nonga. ʻI he māmá, naʻe mamata ʻa Siosefa ki he Tamai Hēvaní mo Sīsū Kalaisi ʻokú Na tuʻu ʻi he ʻataá. Naʻe folofola ʻaki ʻe he Tamai Hēvaní ʻa e hingoa ʻo Siosefá. Naʻá Ne tuhu leva kia Sīsū mo folofola ʻo pehē, “Ko Hoku ʻAlo ʻOfaʻangá ʻEni. Fanongo kiate Ia!”

Siosefa Sāmita—Hisitōlia 1:16–17

Naʻe folofola ʻa Sīsū kia Siosefa kuo fakamolemoleʻi ʻene ngaahi angahalá. Naʻe fehuʻi ʻe Siosefa kia Sīsū pe ko e fē ʻa e siasi ʻoku totonu ke ne kau ki aí. Naʻe folofola ʻa Sīsū ʻoku ʻikai totonu ke ne kau ki ha taha ʻo kinautolu.

Siosefa Sāmita—Hisitōlia 1:18–19; Kau Māʻoniʻoní, 1:17

Naʻe folofola ʻa Sīsū kuo mole ha ngaahi moʻoni mahuʻinga fekauʻaki mo ʻEne ongoongoleleí. Naʻá Ne folofola te Ne fekauʻi mai ha kau ʻāngelo ke akoʻi e ngaahi moʻoni ko ʻení kia Siosefa, ke vahevahe mo e māmaní.

Kau Māʻoniʻoní, 1:17–18

Hili e ʻosi ʻa e mata meʻa-hā-maí, naʻe fonu ʻa Siosefa ʻi he ʻofa mo e fiefia. Naʻe ʻikai ke ne toe puputuʻu. Naʻá ne ʻiloʻi ʻoku ʻofa ʻa e ʻOtuá ʻiate ia. Neongo naʻe fehiʻa ha kakai ʻe niʻihi ʻiate ia ʻi heʻene pehē kuó ne mamata ki he Tamai Hēvaní mo Sīsū Kalaisí, ka naʻe ʻiloʻi ʻe Siosefa ʻoku moʻoni ia.

Siosefa Sāmita—Hisitōlia 1:20–26; Kau Māʻoniʻoni, 1:17