“Lesona 11 Anomea mo le Sauniuniga o le Vasega: O Le Faapotopotoina o Isaraelu,” Anomea a le Faiaoga O Faavae o le Toefuataiga (2019)
“Lesona 11 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 11 Anomea mo le Sauniuniga o le Vasega
O Le Faapotopotoina o Isaraelu
A o saunoa atu i tagata talavou o le Ekalesia, sa fesili ai Peresitene Russell M. Nelson: “Pe tou te mananao e avea o se vaega tele aupito silisili, luitau aupito silisili, ma se mafuaaga tele aupito silisili i le lalolagi i le taimi nei? Pe tou te mananao e fesoasoani i le faapotopotoina o Isaraelu i nei aso taua e gata ai?” (“Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le Ensign ma le New Era, 8, ChurchofJesusChrist.org; faatusilima i le uluai lomiga).
A o e suesue i le lesona lenei, vaavaai mo le pogai ua faapotopoto ai e le Alii Lona nuu mai tulimanu uma o le lalolagi, ma mafaufau pe faapefea ona e fesoasoani ia te Ia ia ausia lenei galuega tele.
Vaega 1
O le a le faapotopotoina o Isaraelu?
O le fanauga a Isaraelu o fanau a le perofeta o le Feagaiga Tuai o Iakopo, o lona igoa lea na suia ia Isaraelu. O i latou o e tofo i le feagaiga lava lea e tasi na tuuina atu e le Atua i le tama o Iakopo o Isaako ma i lona tamamatua o Aperaamo (tagai Kenese 26:3–4, 24; Aperaamo 2:6–11). O atalii e toa 12 o Iakopo ma a latou fanau o le “aiga lea o Isaraelu” po o “ituaiga e sefululua o Isaraelu.” Na i ai taimi “na faataapeapeina ma faapuapuagatia e le Alii ituaiga e sefululua o Isaraelu ona o lo latou amioleaga ma le fouvale. Ae ui i lea, ua faaaoga foi e le Alii lenei faataapeapega o Lona nuu filifilia i atunuu eseese o le lalolagi e faamanuia ai na atunuu” (Guide to the Scriptures, “Israel,” scriptures.ChurchofJesusChrist.org).
Mafaufau e faailoga nisi o valoaga o loo i lalo e uiga i le faapotopotoina o Isaraelu.
Suesue e Sauniuni ai mo le Vasega
Faitau le Isaia 11:11–12 (tagai foi 2 Nifae 25:17; 29:1; Iakopo 6:2).
Ua aoao mai le Tusi a Mamona, o le a faapotopoto e le Faaola lava Ia le fanau a Iakopo.
Suesue e Sauniuni ai mo le Vasega
Faitau le 3 Nifae 5:24–26.
I la tatou tisipenisione, sa fiafia tele ai nisi o uluai tagata o le Ekalesia i le valoaga a le Tusi a Mamona e uiga i le faapotopotoina o le nuu o le Atua i aso amuli i Siona e sauniuni ai mo le Afio Mai Faalua o le Faaola (tagai 3 Nifae 21:23–26). O ni aso ao lumanai se konafesi a le Ekalesia i a Setema 1830, sa fesili atu ai Iosefa Samita ma isi i le Alii e uiga i lenei valoaga ma sa maua mai ai le faaaliga ua faamaumauina i le Mataupu Faavae ma Feagaiga 29.
Suesue e Sauniuni ai mo le Vasega
Faitau le Mataupu Faavae ma Feagaiga 29:1–2, 7.
O se masina talu ona mavae le tuuina mai o lenei faaaliga, sa amatalia ai e Oliva Kaotui ma isi e toatolu se malaga faamisiona e fesoasoani ai i le faapotopotoina o tagata filifilia o le Alii.
Na o’o mai le faamanuiaina silisili i faifeautalai ina ua latou afe i le eria o Katelani, Ohaio. O iina sa latou papatisoina ai, le tusa ma le 130 tagata liliu mai, o le toatele sa mai i le aulotu Papatiso Toe Faatulagaina a Sini Rikitone, ma ua faapea ona tatalaina ai se mea, o le a avea o se nofoaga e faapotopoto i ai le faitau selau o tagata o le Ekalesia, i le tausaga na sosoo ai. (Aoaoga a Peresitene o le Ekalesia: Iosefa Samita [2007], 150)
Ina ua mavae lenei uluai taumafaiga faafaifeautalai, sa faaauau ona valaauina e le Alii ia faifeautalai e galulue i le faapotopotoina mai o i latou o e o le a faalogo i Lona siufofoga.
Suesue e Sauniuni ai mo le Vasega
Faitau le Mataupu Faavae ma Feagaiga 33:5–7.
I le faaiuga o Tesema 1830, na faaali mai ai e le Alii e ala ia Iosefa Samita Lona finagalo mo le Ekalesia e faatatau i se nofoaga o faapotopotoga i Ohaio:
Sa ia folafola mai, “Ou te tuuina atu se poloaiga i le Ekalesia, e tatau ona latou faapotopoto faatasi i le Ohaio.” Na tatau ona latou faapotopoto faatasi ma tagata fou liliu mai i le eria o Katelani ma faatalitali ai mo faifeautalai e foi ane mai Sisifo. …
O le valaau e siitia atu i Ohaio sa foliga mai na latalata ai le Au Paia i le faataunuuga o valoaga anamua e uiga i le faapotopotoina o le nuu o le Atua. Na folafola uma mai le Tusi Paia ma le Tusi a Mamona e faapea, o le a faapotopoto faatasi e le Alii Ona tagata o le feagaiga e puipui i latou e faasaga i mea faigata o aso amuli. (Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018], 109)
E ala mai i lenei ma isi faaaliga, sa poloaiina ai le Au Paia e faapotopoto faatasi muamua i Ohaio ma Misuri, sosoo ai ma Ilinoi, ona sosoo ai lea i le Vanu o Sate Leki. I nei nofoaga taitasi o faapotopotoga, na poloaiina ai e le Alii le Au Paia e fausia se malumalu.
Elder David A. Bednar o le Korama Aposetolo e Toasefululua na aoao mai:
E faapotopoto e le Alii Lona nuu e tapuai, e atinae le Ekalesia, mo se puipuiga, ma ia maua fautuaga ma faatonuga. …
”Na ta’utino mai e le Perofeta o Iosefa Samita e faapea o tupulaga uma, o le faamoemoega paia o le faapotopotoina o le fausia lea o malumalu ina ia mafai ai e fanau a le Alii ona maua sauniga aupito silisili ma faapea ona maua ai le ola e faavavau [tagai Aoaoga a Peresitene o le Ekalesia: Iosefa Samita (2007), 416–19]. (David A. Bednar, “The Spirit and Purposes of Gathering” [faigalotu a le Iunivesite o Polika Iaga–Idaho, 31 Oke., 2006], byui.edu)
O aso nei o loo faapotopoto faaletino ai e le Alii Lona nuu i siteki o Siona ma i malumalu i atunuu i le lalolagi atoa.
O loo Ia faapotopotoina faaleagaga foi i latou i le malamalama o Lana talalelei (tagai 1 Nifae 15:12–16).
Mafaufau Loloto a o Sauniuni mo le Vasega
O le a se mea e mafai ona tatou aoao mai e uiga i le Alii ma Lona tagata e ala i le faataapeapeina ma le faapotopotoina mai o Lona nuu o le feagaiga? O faapefea e le faapotopoto faatasi ma isi tagata o le Ekalesia i uarota, siteki, ma malumalu ona faamanuiaina ai lou olaga?
Vaega 2
E mafai faapefea ona ou fesoasoani i le Alii e faapotopoto mai Isaraelu o aso e gata ai?
O se tasi o uluai tagata liliu mai i le Ekalesia toefuataiina fou, na igoa ia Heber C. Kimball, sa valaauina mulimuli ane e avea ma se tasi o le Korama a Aposetolo e Toasefululua. Sa lagona e Heber lona popole i lona gafatia e faasoa atu ai le talalelei i isi. Na ia ta’ua:
“E tusa o le aso muamua o Iuni 1837, na oo mai ai le Perofeta o Iosefa ia te a’u, a’o o’u nofo i totonu … o le Malumalu o Katelani, ma musumusu mai ia te au ma faapea mai, ‘Uso e Heber, ua musumusu mai le Agaga o le Alii ia te au: “Tuu atu la’u auauna o Heber, e alu atu i Egelani ma folafola atu la’u talalelei, ma tatala le faitotoa o le faaolataga i lena atunuu.”’” Na avea ma avega mamafa ia Elder Kimball le manatu i lenei tiutetauave: “Na ou lagonaina o a’u lava o se tasi o auauna silisili ona vaivai o auauna a le Atua. Na ou fesili atu ia Iosefa o le a sa’u tala e fai pe a ou oo atu iina; na ia ta’u mai ia te a’u ou te alu atu i le Alii, ma o le a Ia taialaina a’u, ma fetalai e ala mai ia te a’u i le agaga lava e tasi lea na [taitaiina] o ia.“ (Aoaoga a Peresitene o le Ekalesia: Iosefa Samita [2007], 327)
Sa faamaumauina e Elder Kimball le mea lenei i lana apitalaaga:
O le lagonaina o lo’u lava vaivai ma le le agavaa mo se galuega faapea, sa oo ai ina ou tagi malosi atu i le Alii mo le poto ma mo lena faamafanafanaga ma le lagolago lea sa matuai o’u manaomiaina lava. …
Sa ou taumafai e tuu atu lo’u faatuatuaga i le Atua, talitonu o le a fesoasoani mai o ia ia te a’u i le tuuina atu o le upumoni, faagaganaina a’u, ma ia avea o ia ma se fesoasoani e i ai i taimi o puapuaga. (Apitalaaga a Heber C. Kimball, ed. R. B. Thompson [1840], 15)
Sa ta’ua mulimuli ane e Heber C. Kimball:
Sa ou alu ma faatino le misiona e tusa ai ma le saunoaga a le Perofeta a le Atua soifua, ma sa ou aluese mo le sefulutasi masina ma aso e lua mai Katelani, … i totonu o lea taimi sa pe a ma le lua afe agaga na faaopoopo mai i le ekalesia ma le malo o le Atua. (Heber C. Kimball, “Sermon,” Deseret News, Dec. 2, 1857, 3)
Sa aoao mai foi Peresitene Dallin H. Oaks o le Au Peresitene Sili, e mafai ona tatou faalagolago i le Alii a o tatou fesoasoani e faapotopoto mai Isaraelu e ala i le faasoa atu o Lana talalelei:
E tatau ona tatou tatalo mo le fesoasoani ma le taitaiga a le Alii ina ia mafai ona avea i tatou ma meafaigaluega i ona aao mo le ua saunia nei —o se tasi o loo Ia finagalo tatou te fesoasoani ai i le taimi nei. O lea, e tatau ai ona tatou mataala e faalogo ma faia musumusuga a lona agaga i le mea e tatau ona tatou faia.
O na musumusuga o le a oo mai. O loo tatou iloa mai i le tele o molimau patino i Lona lava ala ma i lona lava taimi o le Alii o loo saunia tagata e talia Lana Talalelei. O nei tagata o loo sailiili, ma i le taimi tatou te sailia e faailoa i latou o le a talia e le Alii a latou talosaga e ala i le taliina o a tatou talosaga . O le a ia musuia ma taitaia i latou o loo iai le manao ma i latou o loo saili ma le naunautai i le faapefea, o fea, o afea, ma o ai e faasoa i ai Lana talalelei. (Dallin H. Oaks, “Faasoaina Atu o le Talalelei,” Ensign, Nov. 2001, 8)
Na faaauau ona aoao mai Peresitene Nelson:
O lenei, o le auai i le faapotopotoina o Isaraelu atonu o le a manaomia ai sina osigataulaga i la outou pitolaau. Atonu foi e manaomia ai ni nai suiga o lou olaga. O le a mautinoa lava e alu sina vaega o lou taimi ma le malosi ma au taleni na avatu e le Atua. E te fia faia? …
… O le faapotopotoina o Isaraelu o lona uiga moni lava o le ofoina atu lea o le talalelei a Iesu Keriso i fanau a le Atua i itu uma o le veli, o e e lei osia feagaiga taua ma le Atua pe maua o latou sauniga e tatau ai. …
… Na auina mai outou i le lalolagi i lenei taimi patino, lenei taimi aupito taua i le talafaasolopito o le lalolagi, e fesoasoani e faapotopoto ia Isaraelu. E leai se mea o tupu i le lalolagi i le taimi nei, e sili atu ona taua nai lo lena. E leai se isi mea e sili atu lona taunuuga. E matua leai lava.
… O le misiona lenei na auina mai ai oe i le lalolagi. (Russell M. Nelson, “Faamoemoe o Isaraelu,” 8; faatusilima i le uluai lomiga)
Faatino Mea Ua E Aoaoina
O le a se mea o le a e faia i aso ma vaiaso o loo loma e faia ai se vaega sili atu ona mataalia i le faapotopotoina o Isaraelu?