“Lesona 9 Anomea mo le Sauniuniga o le Vasega: Iesu Keriso: O Lo Tatou Faaola Paia,” Anomea mo le Sauniuniga o le Vasega O Faavae o le Toefuataiga (2019)
“Lesona 9 Anomea mo le Sauniuniga o le Vasega,” Anomea mo le Sauniuniga o le Vasega O Faavae o le Toefuataiga
Lesona 9 Anomea mo le Sauniuniga o le Vasega
Iesu Keriso: O Lo Tatou Faaola Paia
O ni isi tagata e vaai ia Iesu Keriso ua na’o se faataitaiga lelei e mulimuli ai, o ni isi o se perofeta o anamua, ae o ni isi o le Faaola o le lalolagi. O a ni talitonuga ma ni uiga faaalia taatele i le mea o loo e nofo ai e uiga i le Alii? O a ni ou talitonuga ma tautinoga e uiga ia te Ia? A o e suesue i faaaliga vaaia, faaaliga, ma mau na maua e le Perofeta o Iosefa Samita e uiga ia Iesu Keriso, mafaufau i auala e mafai ona faalolotoina ai lou faatuatua ma le molimau ia te Ia o lou Faaola paia.
Vaega 1
E faapefea ona taua Iosefa Samita ma le Toefuataiga i lo’u malamalamaaga o le Alii o Iesu Keriso?
O le sootaga patino a Iosefa Samita ma le Alii na amatalia i le talavou o Iosefa. Sa ia tusia e faapea, pe a o le 12 o [ona] tausaga, “sa oo ina matuai atuatuvale lava lo’u mafaufau, ona sa ou lagonaina lo’u ta’usalaina i a’u agasala. … Sa ou lagona le faanoanoa i a’u lava agasala ma mo agasala a le lalolagi.”
Mulimuli ane, na “tagi atu ai [le Iosefa talavou] i le Alii mo le alofa mutimutivale,” ma sa fetalai mai le Alii ia te ia i se faaaliga vaaia, e faapea: “Iosefa e, lo’u atalii, ua faamagaloina au agasala. Alu i ou ala, savali i a’u tulafono ma tausi i aʼu poloaiga. Faauta, o a’u o le Alii o le mamalu. Sa faasatauroina au mo le lalolagi ina ia mafai ona maua e i latou uma o e talitonu mai i lou igoa le ola e faavavau.”
E ala i lenei aafiaga o le Uluai Faaaliga, na faapea ona iloa patino ai e Iosefa o Iesu Keriso ma le Tama Faalelagi e loto alolofa ma faamagalo. Ina ua uma le fagatuaga ma le Alii ma le faamagaloina i ana agasala, sa molimau mai Iosefa: “Na faatumulia lo’u agaga i le alofa, ma mo aso e tele, na mafai ona ou olioli ma le fiafia tele. Sa i ai le Alii ia te a’u” (“Joseph Smith’s Accounts of the First Vision,” Circa Summer 1832 History, josephsmithpapers.org).
Mafaufau i ni taimi i lou olaga na e lagonaina ai ni popolega e talitutusa ma popolega o Iosefa. Atonu e mafai ona e malamalama i lona naunau ina ia faamagaloina ma lona olioli foi i le iloaina sa i ai le Alii faatasi ma ia.
O faaaliga vaaia e tele a Iosefa Samita e uiga i le Faaola na mafai ai ona auauna o ia o se molimau malosi a Iesu Keriso i aso e gata ai. I le aso 6 o Fepuari, 1832, a o galue ai i faasa’oga musuia o le Tusi Paia (ua ta’ua o le Faaliliuga a Iosefa Samita), sa vaai ai Iosefa Samita ma Sini Rikitone i se faaaliga vaaia lea sa laua “vaaia le mamalu o le Alo, i le lima taumatau o le Tamā.” O le saunoa ai e uiga ia Iesu Keriso, sa laua molimau mai ai: “O loo soifua o ia!” (Mataupu Faavae ma Feagaiga 76:20, 22–23).
Ia maitau po o a isi upumoni e uiga ia Iesu Keriso le Perofeta sa faaalia mai i lenei faaaliga vaaia.
Suesue e Sauniuni ai mo le Vasega
Faitau le Mataupu Faavae ma Feagaiga 76:23–24.
O le fa o tausaga mulimuli ane, na toe molimau mai ai le Perofeta i le vaai ai i le Faaola i totonu o le Malumalu o Katelani, ma folafola mai e faapea “o ona fofoga sa pei o se afi mumū; o lauao o lona ao sa papaʼe e pei o le kiona mamā; o ona fofoga sa susulu e sili atu i lo le pupula o le la; ma o lona siufofoga sa pei o le leo o le tafe-taalili o vai tetele” (Mataupu Faavae ma Feagaiga 110:3).
Sa aoao e le Alii le Au Paia e faapea, pe a latou suesue i faaaliga e tuuina mai e ala i le Agaga, “e mafai ona outou molimau atu sa outou faalogo i loʼu leo, ma iloa aʼu upu” (Mataupu Faavae ma Feagaiga 18:36).
O le tomanatu ai i saofaga a Iosefa Samita i lo tatou malamalamaaga ia Iesu Keriso, na tautino mai ai e Elder D. Todd Christofferson o le Korama a Aposetolo e Toasefululua:
O lana aleaga patino ma le Alii, o lana faaliliuga ma le lolomiga o le Tusi a Mamona, ma le faamaufaailogaina o lana molimau i lona toto na faamaturoina, na avea ai Iosefa ma talifaaaliga aupito silisili ese a Iesu Keriso i Lona uiga moni o le Togiola paia. (D. Todd Christofferson, “Toe Fanauina,” Ensign po o le Liahona, Me 2008, 79)
Mafaufau Loloto a o Sauniuni mo le Vasega
Ona o faaaliga vaaia, faaaliga, ma tusitusiga paia na tuuina mai ia Iosefa Samita, ua tatou maua ai se malamalamaaga lelei atu i le uiga o le Faaola.
-
O le a se malamalamaaga e uiga i le Faaola o le a misi pe a aunoa ma le Perofeta o Iosefa Samita? O le a se aafiaga o le a i ai i lou olaga pe ana faapea e misi lena malamalama? (Ia teu na fesili i le mafaufau a o faaauau ona e suesue.)
Vaega 2
O a ni upumoni toefuataiina e uiga i le Togiola a le Faaola e mafai ona faateleina ai lo’u faatuatua ia te Ia?
Faamatalaga: A o e faitau i fuaitau o mau ma aoaoga faaperofeta o loo i lalo, mafaufau e faailoga upumoni e faatatau i le Togiola a le Faaola e sili ona taua ia te oe.
E tele mea manino ma pele e uiga i le talalelei ma le Togiola a le Faaola sa toefuatai mai e ala i le faaliliuga e Iosefa Samita o le Tusi a Mamona (tagai 1 Nifae 13:34, 40).
Suesue e Sauniuni ai mo le Vasega
Faitau le Alema 34:10, 12, vaavaai mo le mea na aoao mai e le perofeta o le Tusi a Mamona o Amoleka i se vaega o sa Sorama e uiga i le taulaga togiola a le Faaola.
Sa faamalamalama mai e Peresitene Russell M. Nelson le mea ua ala ai ona le i’u le Togiola a Iesu Keriso:
O Lana Togiola e le i’u—e leai se mutaaga [tagai 2 Nifae 9:7; 25:16; Alema 34:10, 12, 14]. E le i’u foi ina ia mafai ona faaolaina tagata ola uma mai le oti e le uma. E le i’u pe a fuafua i Lona puapuagatia tele. Sa le’i i’u i taimi, ua faamuta ai ia uluai faiga o taulaga sa osi i manu. Sa lei i’u i avanoa—na faia i le taimi e tasi mo tagata [tagai Eperu 10:10]. Ma sa faalautele atu le alofa mutimutivale o le Togiola a le [Faaola] e le gata i tagata e le mafaitaulia, ae faapena foi i le tele o lalolagi e le mafaitaulia na foafoaina e Ia [tagai Mataupu Faavae ma Feagaiga 76:24; Mose 1:33]. Sa le i’u i le tulaga e le oo i ai se fua faatatau po o se malamalama o le tagata soifua.
E na o Iesu lava e mafai ona ofoina atu lea ituaiga togiola e le i’u, talu ona soifua mai o Ia i se tina faitino, ma se Tama e tino ola pea. Ona o lena tofi tulagaese na fanau mai ma Ia, ua avea ai Iesu ma Tagata tumau faavavau. (Russell M. Nelson, “O Le Togiola,” Ensign, Nov. 1996, 35)
Suesue e Sauniuni ai mo le Vasega
Na aoao atu foi e le perofeta o Alema ni upumoni taua i tagata o Kiteona e uiga i le Togiola a le Faaola. Faitau le Alema 7:11–13.
Ina ua uma ona sii mai le Alema 7, sa aoao mai Elder David A. Bednar o le Korama a Aposetolo e Toasefululua:
E leai se tiga faaletino, leai se manua faaleagaga, leai se tiga o le agaga po o le loto nutimomoia, leai se ma’i po o se vaivaiga na faafetaiaia oe po o au foi i le olaga faaletino e lei oo muamua i ai le Faaola. I se taimi o le vaivai tatou te ono tagi atu ai, “E leai se tasi na te iloaina pe faape’i. E leai se tasi e malamalama i ai.” Ae ua silafia ma malamalama atoa i ai le Alo o le Atua, aua sa Ia lagonaina ma tauave a tatou avega taitoatasi. Ma ona o Lana taulaga le iu ma faavavau (tagai Alema 34:14), ua ia te Ia le tiga-alofa atoatoa ma e mafai ona ia faaloaloa mai Lona aao o le alofa mutimutivale ia i tatou. E mafai ona ia aapa atu, pai atu, fesoasoani, faamalolo, ma faamalosia i tatou. (David A. Bednar, “Tauave ma le Faigofie a Latou Avega,” Ensign po o le Liahona, Me 2014, 90)
Sa maua e le Perofeta o Iosefa Samita se faaaliga na faafesootaia ai puapuaga o le Alii lea e le mafai ona [tatou] malamalama i ai i le taua o agaga. Ina ua uma ona valaauina Oliva Kaotui ma Tavita Uitimera e talai atu le salamo, sa aoaoina i laua e le Alii.
Suesue e Sauniuni ai mo le Vasega
Faitau le Mataupu Faavae ma Feagaiga 18:10–11, 13.
Sa faamalamalama atili atu e le Alii Lana taulaga togiola i se faaaliga na tuuina mai mo Matini Harisi. Sa tauivi Matini ma le avanoa e ono aveesea ai lana faatoaga e totogi ai mo le lomiaina o le Tusi a Mamona. I le faaaliga, na poloaiina ai e le Alii ia Matini e salamo ona faaali mai lea e ia lava o se faamatalaga tulaga ese o Ona puapuaga.
Suesue e Sauniuni ai mo le Vasega
Faitau le Mataupu Faavae ma Feagaiga 19:16–19.
A o e mafaufau loloto i puapuaga na onosaia e Iesu Keriso e fai ai ma ou sui, mafaufau e faitau pe faalogologo i upu o le viiga “Ou te Tu ma Ofo” (Viiga, nu. 107).
E mafai faapefea ona ou iloa lelei Iesu Keriso?
I lau api talaaga po o le avanoa ua tuuina atu, tusi ai ni nai upumoni e tulaga ese ia te oe mai fuaitau o mau ma aoaoga o loo i le vaega lenei, faapea foi ma soo sou manatu ma fesili o i ai e uiga i le taulaga togiola a le Faaola. Sau sauni i le vasega e faasoa mai ni upumoni na e tau i ai ma soo se malamalamaaga loloto.