“Lesona 22 Anomea mo le Sauniuniga o le Vasega: Faaipoipoga Autaunonofo,” Anomea a le Faiaoga O Faavae o le Toefuataiga (2019)
“Lesona 22 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 22 Anomea mo le Sauniuniga o le Vasega
Faaipoipoga Autaunonofo
Sa aoao e le Alii ia Aperaamo, o le tasi o faamoemoega o le olaga faitino o le ia, “tofotofoina ai” fanau a le Atua “e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:25). O nisi o poloaiga a le Atua e mafai ona foliga sili ona faigata, ae maise pe a ese mai i aganuu masani po o o tatou lava faamoemoega. A o e suesue, mafaufau loloto i mea e mafai ona e aoao mai le faatuatuaga tulaga ese ma le usiusitai o le Perofeta o Iosefa Samita ma le Au Paia anamua i le poloaiga a le Alii e faia faaipoipoga autaunonofo.
Vaega 1
Aisea na faia ai e le Perofeta o Iosefa Samita ma le toatele o le uluai Au Paia ia faaipoipoga autaunonofo?
I le vave i le 1831, a o galue Iosefa Samita i lana faaliliuga musuia o le Feagaiga Tuai, sa tatalo o ia ina ia malamalama i le pogai na faia ai e perofeta anamua ma tupu o Isaraelu faaipoipoga autaunonofo (tagai i le ulutala o le vaega ma le fuaiupu 1 o le Mataupu Faavae ma Feagaiga 132). Na tuuina mai e le Alii se faaaliga i le Perofeta o Iosefa Samita.
Suesue e Sauniuni ai mo le Vasega
Faitau le Mataupu Faavae ma Feagaiga 132:34–37.
I le fuaiupu 37, o le upu palake e faatatau i se tamaitai o lē, i vaitaimi o le Feagaiga Tuai, sa faaipoipoina faaletulafono i se alii ae e maualalo teisi ifo le tulaga faaleagafesootai nai lo o se avā. O palake sa le o se vaega o le faiga o faaipoipoga autaunonofo i lo tatou tisipenisione.
O se taimi ina ua uma ona faaali mai e le Alii le mataupu faavae o faaipoipoga autaunonofo ia Iosefa Samita, sa Ia poloaiina ai le Perofeta ia ola i lenei mataupu faavae ma ia aoao atu i isi. E ui tatou te le malamalama uma i faamoemoega a le Atua mo le amataina o faaipoipoga autaunonofo i aso popofou o le Ekalessia, o lona faalauiloaga sa o se vaega o le toefuataiga i aso e gata ai o “mea uma” (Mataupu Faavae ma Feagaiga 132:40, 45; tagai foi Galuega 3:19–21).
Vaega 2
O a ni mea ua tatou iloa e uiga i le aafiaga a le Perofeta o Iosefa Samita i le faaipoipoga autaunonofo?
Sa lipoti mai e tagata sa vavalalata ia Iosefa Samita e faapea, sa ia ta’u atu ia i latou e faapea sa faatolu ona faaali mai se agelu a le Atua ia te ia i le va o le 1834 ma le 1842, ma poloaiina o ia ia ola i le mataupu faavae o le faaipoipoga autaunonofo. “O ni vaega iti o faamaoniga e le atoatoa e faapea, na faatino e Iosefa Samita i le poloaiga muamua a le agelu e ala i le faaipoipo i se toalua lona lua o Fanny Alger, i Katelani, Ohaio i le ogatotonu o le vaitaimi o le 1830. … E itiitii lava se mea o iloa e uiga i lea faaipoipoga, ma e leai foi se mea o iloa e uiga i talanoaga i le va o Iosefa ma Ema e faatatau ia Alger. Ina ua mavae le faamutaina o le faaipoipga ma Alger ina ua tete’a, sa foliga mai na faataatia ese e Iosefa le mataupu o le faaipoipoga autaunonofo seia mavae ona siitia atu le Ekalesia i Navu, Ilinoi” (“Plural Marriage in Kirtland and Nauvoo,” Gospel Topics, topics.lds.org).
Na amata i le 1841, ona faaipoipo atu le Perofeta o Iosefa Samita i nisi tamaitai e usitaia ai le poloaiga a le Alii ma sa faalauiloa atu ai le mataupu faavae o faaipoipoga autaunonofo i se vaega toaitiiti o isi tagata o le Ekalesia.
Sa faamatalaina e Eliza R. Snow, o lē sa faamauina i le Perofeta o Iosefa Samita ma mulimuli ane, na auauna atu o se Peresitene Aoao lona lua o le Aualofa:
O le Perofeta o Iosefa Samita … sa faamatalaina le faigata faalemafaufau sa ia oo i ai i le faatoilaloina o ona lagona inoino … e faatatau i le faalauiloaga o faaipoipoga autaunonofo. Sa ia iloa le siufofoga o le Atua—sa ia iloaina le poloaiga a le Silisili Ese ia te ia, o le agai i luma. … Sa ia iloa, sa ia te ia na le gata i ona lava manatu faapito ma manatu na i ai muamua ina ia faatoilalo [talitonuga faalelotu] ma ia manumalo ai, ae o manatu foi o le lalolagi Kerisiano atoa na tau fai fepulafi atu ia te ia; ae peitai, o le Atua, o lē e sili atu i mea uma, na tuuina mai le poloaiga, ma e ao ona usitaia o Ia. (Eliza R. Snow, i le Biography and Family Record of Lorenzo Snow [1884], 69)
Mafaufau Loloto a o Sauniuni mo le Vasega
O le a se mea ua faaalia mai e le naunau o le Perofeta o Iosefa Samita ia usitai i se poloaiga faigata faapea, e uiga i lona faatuatua ma lona tagata?
O se tasi o mafuaaga e tapulaa ai lo tatou malamalama e uiga i le faia e Iosefa Samita o le faaipoipoga autaunonofo ona, o ia faapea ma isi sa faia faaipoipoga autaunonofo i Navu sa seāseā ona latou ta’uaina i totonu o faamaumauga tusitusia. O le tele o faamatalaga e uiga i le faia o faaipoipoga autaunonofo na le faalauaiteleina, ma e le taliina uma a tatou fesili e faamaumauga faaletalafaasolopito.
Mai se tala i Autu o le Talalelei e uiga i faaipoipoga autaunonofo tatou te iloa ai:
I le vaitau lea na faia ai faaipoipoga autaunonofo, na iloa ai e le Au Paia o Aso e Gata Ai le eseesega i le va o faamauga mo le taimi nei ma le faavavau ma faamauga mo na o le faavavau. O faamauga mo le taimi nei ma le faavavau na aofia ai tautinoga ma mafutaga i lenei olaga, e masani lava ona aofia ai le i ai o faiā faalefeusuaiga. O faamauga mo-na o le faavavau na faaalia mai ai mafutaga i le na o le isi olaga. …
O nisi o tamaitai na faamau ia Iosefa Samita na molimau mai mulimuli ane o a latou faaipoipoga sa mo le taimi nei ma le faavavau, ao isi na faaalia o a latou mafutaga sa mo na o le faavavau lava.
O le toatele o e na faamau ia Iosefa Samita na i le va o le 20 ma le 40 tausaga le matutua i le taimi o la latou faamauga ia te ia. O lē sa sili ona matua, o Fanny Young, sa 56 tausaga. O lē sa sili ona laitiiti o Helen Mar Kimball, … lea na faamau ia Iosefa ini nai masina ona oo lea i lona aso fanau e atoa ai lona 15. O le faaipoipo i lena matua, lea e le talafeagai i tulaga faatonuina o aso nei, sa faatagaina i lena vaitau, ma o nisi tamaitai na faaipoipo i le ogatotonu o o latou tai-sefulu ma ona tupu tausaga. Na saunoa Helen Mar Kimball e uiga i lona faamauga ia Iosefa sa “mo na o le faavavau,” e faaalia ai, o le mafutaga sa lei aofia ai ni faiga faalefeusuaiga. …
… Na faamauina Iosefa Samita i ni tamaitai o e sa fai ni o latou taitoalua. E leai nisi o nei tamaitai po o Iosefa Samita na faamatala tele e uiga i nei faamauga, e ui ina sa faapea mai nisi o tamaitai, sa mo na o le faavavau lava. …
E i ai ni faamalamalamaga talafeagai mo lenei faiga. O nei faamauga atonu na saunia ai se auala e fatu ai le sootaga po o se sosooga e faavavau i le va o le aiga o Iosefa ma isi aiga i totonu o le Ekalesia. …
O nei faamauga e mafai foi ona faamalamalamaina i le musu o Iosefa e ulu atu i faaipoipoga autaunonofo ona o le faanoanoa o le a aumaia ai i lana avā o Ema. Atonu na talitonu o ia o faamauga i fafine ua faaipoipo o le a tusa ai ma le poloaiga a le Alii ae le manaomia ai ona ia faia ni mafutaga masani faalefaaipoipoga. …
O se isi tulaga na mafai ai, i se vaitaimi sa pupuu ai le uumi o le ola nai lo aso nei, sa lagonaina e tamaitai faatuatua se faanatinati ina ia faamauina i le pule o le perisitua. O nisi o nei tamaitai sa faaipoipo a le i ni [alii] e le o ni Mamona po o e sa avea muamua o ni Mamona, ma e sili atu ma le toatasi ia tamaitai sa faaalia mulimuli ane lo latou le fiafia ia latou faaipoipoga sa i ai i lena taimi. O le ola ai i se taimi sa faigata ona tatala ai ni faaipoipoga, atonu sa talitonu nei tamaitai o se faamauga ia Iosefa Samita o le a latou maua ai faamanuiaga atonu na semanu latou te le mauaina i le isi olaga. …
… Ina ua mavae le maliu o Iosefa, o le toatele o tamaitai sa faamau ia te ia sa me’i atu i Iuta faatasi ma le Au Paia, sa tumau faamaoni o ni tagata o le Ekalesia, ma sa puipuia faaipoipoga autaunonofo faapea ma Iosefa. (“Plural Marriage in Kirtland and Nauvoo,” topics.ChurchofJesusChrist.org)
Vaega 3
Na faapefea ona tali atu tagata o le Ekalesia i le mataupu faavae o faaipoipoga autaunonofo?
O le faiga o faaipoipoga autaunonofo sa fou ma faigata mo le toatele o le uluai Au Paia e pei foi o le a i ai i tagata o le Ekalesia i aso nei. “I le tele o vaega o le lalolagi, o le tele o avā sa taliaina faalauaitele ma faatagaina faaletulafono. Ae i le Iunaite Setete, sa manatu ai le toatele o tagata o lea faiga sa sese i tulaga o amioga tatau” (“The Manifesto and the End of Plural Marriage,” Gospel Topics, topics.ChurchofJesusChrist.org). O lenei poloaiga ia faia faaipoipoga autaunonofo, “sa o se tasi lea o vaega sa sili ona luitauina o le Toefuataiga—mo Iosefa lava ia ma mo isi tagata o le Ekalesia. … Mo le faletua o Iosefa Samita o Ema, sa o se aafiaga matuai tiga matuitui. … Sa faalotolotolua o ia i ona manatu i faaipoipoga autaunonofo, i nisi o itu sa ia lagolagoina ae i nisi taimi sa ia ta’usalaina” (“Plural Marriage in Kirtland and Nauvoo,” topics.ChurchofJesusChrist.org).
Sa le o tagata uma o le Au Paia o Aso e Gata Ai sa faapea na tatau ona ola i faaipoipoga autaunonofo. Ma o nisi o tagata o le Ekalesia o e sa tauivi ma le mataupu faavae o le faaipoipoga autaunonofo na faamanuiaina i se molimau faaleagaga lea na latou maua ai le lototele e agai ai i luma e ola i lea faiga. Ua aotele atu iinei ni aafiaga a ni tagata se toalua o le au paia:
Na saunoa Polika Iaga e faapea, ina ua faalogo i le faaipoipoga autaunonofo, “o le taimi muamua lea o lo’u olaga na ou manao ai ou te oti.” “Sa le mapu ona ou tatalo,” o lana tala lea, “ma na tatau ona faaali lo’u faatuatua ma sa faaali mai e le Alii ia te a’u le moni o lea mea ma faapea ona faamalieina ai a’u.” …
Na ta’ua e Lusi Walker lona matuai le mautonu ina ua valaaulia o ia e Iosefa Samita e avea ma ana avā. “Sa inoino atoa i ai lagona o lo’u loto,” sa ia tusia ai. Ae, ina ua mavae ni nai po o le le moe ae tatalo i tulivae, na ia maua se toomaga ina ua “faatumuina lona potu i se faatosinaga paia” e pei o se “la susulu malosi.” Na ia faapea mai, “Na tumu lou agaga i se filemu mafanafana matagofie ou te lei iloaina muamua lava,” ma “na lagona uma e lou tino le olioli mamana.”
Sa le o [tagata uma o le Ekalesia] na mauaina na aafiaga. Sa teena e nisi o le Au Paia o Aso e Gata Ai le mataupu faavae o le faaipoipoga autaunonofo ma tuua ai le Ekalesia, a o isi na mumusu e ulu atu i lea faiga ae sa tumau faamaoni lava [i le Ekalesia]. Ae ui o lea, mo le toatele o tamaitai ma alii, o le inoino ma le ita sa i ai muamua na sosoo ma tauiviga, faaiuga, ma taualuga ai i le malamalama ma le filemu. O aafiaga paia na mafai ai e le Au Paia ona agai i luma i le faatuatua. (“Plural Marriage in Kirtland and Nauvoo,” topics.ChurchofJesusChrist.org)
Mafaufau Loloto a o Sauniuni mo le Vasega
Mata e faapefea ona fesoasoani nei aafiaga a tagata anamua o le Ekalesia i se tasi o loo i ai ni fesili e faatatau i le, pe sa faatinoina e Iosefa Samita o se perofeta musuia a le Atua i le taimi sa ia faaaogaina ai le faiga o faaipoipoga autaunonofo?
Vaega 4
Na faapefea ona muta le faiga o faaipoipoga autaunonofo i totonu O Le Ekalesia a Iesu Keriso o le Au Paia o Aso e Gata Ai?
E le’i umi ona uma le maliu o le Perofeta o Iosefa Samita i le 1844, sa malaga atu le Au Paia i le Vanu o Sate Leki i le Iunaite Setete i sisifo, lea sa iu ina faatinoina saoloto ai e tagata o le Ekalesia le faiga o faaipoipoga autaunonofo. Mai i le vaitaimi o le 1860 e oo i le 1880, sa pasia ai e le malo o le Iunaite Setete ni tulafono e tetee ai i lea faiga ma iu ai ina faatulaga ni faasalaga ogaoga mo i latou o e sa le’i usitaia, e aofia ai le faafalepuipuiina. Ina ua mavae ona saili atu i le taitaiga a le Alii ma maua mai Lana taitaiga, sa saunia loa e Peresitene Uilifoti Uitilafi se faamatalaga ia Setema, 1890 lea sa lauiloa “o le Manifeso” (Folafolaga Aloaia 1) lea na iu ina taitai atu ai i le mutaaga o le faiga o faaipoipoga autaunonofo e tagata o le Ekalesia.
Sa faaauau pea e se vaega toaitiiti o tagata o le Ekalesia ona ulu atu i faaipoipoga autaunonofo fou ina ua uma ona tuuina atu le Manifeso. I le konafesi aoao ia Aperila 1904, sa faalauiloa atu ai e Peresitene Iosefa F. Samita se manifeso lona lua ma faasilasila atu ai, “e faapea ua faasaina faaipoipoga [autaunonofo] uma, ma afai o le a faaauau pea e se taitai po o se tagata o le Ekalesia ona faatinoina pe ulu atu i soo se faaipoipoga faapena, o le a … tapeina lona igoa [mai le Ekalesia]” (i le Conference Report, Ape. 1904,75). O lenei aiaiga faavae o loo faaauau pea i aso nei.
Vaega 5
E manaomia faaipoipoga autaunonofo mo le faaeaga?
Na aoao mai Elder Marcus B. Nash o le Au Fitugafulu:
O nisi [ua faitau seseina tusitusiga paia] ina ia faauigaina o faaipoipoga autaunonofo e manaomia mo le faaeaga. … Peitai, o lenei mea, e le o lagolagoina i faaaliga. … Ua folafola mai le ola e faavavau i se ulugalii e taitoatasi o e ua faamauina i le pule o le perisitua ma o e usitai i le feagaiga—ma le leai o se tuutuuga faaopoopo po o se mea e manaomia [tagai Mataupu Faavae ma Feagaiga 132:19]. … Ua faamautuina e le Ekalesia o le faaipoipo i le toalua e toatasi o le tulaga faatonuina lea a le Atua mo se faaipoipoga sei vagana ai ua Ia faatagaina pe poloaiina ai e ala mai i Lana perofeta. E le aoaoina i le Ekalesia faapea, o le auai i faaipoipoga autaunonofo e manaomia mo le faaeaga. (“OLe Feagaiga Fou ma Faavavau,” Ensign, Dec. 2015, 44, 46)
Ma le isi, tatou te le malamalama i faamoemoega uma o le Atua mo le faalauiloaina mai o faaipoipoga autaunonofo i aso popofou o le Ekalesia. Ae e faaaloalogia e le Au Paia o Aso e Gata Ai i aso nei osigataulaga ma taumafaiga tuuto sa faia e i latou o e sa faia faaipoipoga autaunonofo e usitaia ai le poloaiga a le Atua.
Tusifaamaumau Ou Lagona Uunai
E faavae i mea ua e aoaoina, na faapefea ona avea le faiga o faaipoipoga autaunonofo e uluai Au Paia o lenei tisipenisione, o se faailoaga o lo latou faatuatua, talitonuina, ma le alolofa i le Alii?