“Lesona 8 Anomea mo le Sauniuniga o le Vasega: O Le Faatulagaina o le Ekalesia a Iesu Keriso,” Anomea mo le Sauniuniga o le Vasega O Faavae o le Toefuataiga (2019)
“Lesona 8 Anomea mo le Sauniuniga o le Vasega,” Anomea mo le Sauniuniga o le Vasega O Faavae o le Toefuataiga
Lesona 8 Anomea mo le Sauniuniga o le Vasega
O Le Faatulagaina o le Ekalesia a Iesu Keriso
O le a le uiga ia te oe o lou avea ma se tagata auai o le Ekalesia toefuataiga a Iesu Keriso? A o e suesue i le lesona lenei, mafaufau i auala e mafai ai e lou auai i le Ekalesia a le Alii ona taitai atu ai i faamanuiaga maoae atu mo oe ma lou aiga, faapea foi ma isi e te feiloai i ai i lou olaga atoa.
Vaega 1
E faapefea ona tulaga ese Le Ekalesia a Iesu Keriso o le Au Paia o Aso e Gata Ai i isi lotu ma tapuaiga uma?
O le tutu ai i autafa o se auvai i le aso 6 o Aperila, 1830, sa “molimauina ai [e Iosefa Samita] ia papatisoga o lona tina ma lona tama i totonu o le ekalesia. Ina ua mavae le tele o tausaga o uia ni auala eseese i la laua sailiga mo le mea moni, sa iu loa ina laua aufaatasi i le faatuatua. A o aluese mai lona tamā mai le vai, sa uu mai e Iosefa lona lima, ma fesoasoani e aumai o ia i luga o le auvai, ma opo ia te ia.
“‘Lo’u Atua e,’ sa ia tagi ai, ma tuu ona foliga i le fatafata o lona tamā, ‘Ua ou ola e vaai ua papatisoina lo’u tamā i totonu o le ekalesia moni a Iesu Keriso!’” (Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018], 86)
Ina ua uma ona faaliliu e Iosefa Samita le Tusi a Mamona ma maua le pule o le perisitua mai avefeau faalelagi, sa faatonuina o ia e le Alii “e ala i le Agaga o Valoaga ma faaaliga … e toe faatulaga le Ekalesia a [Iesu Keriso], iinei i luga o le fogaeleele” (Joseph Smith, i le History, circa June 1839–circa 1841 [draft 2], 29, josephsmithpapers.org). I le aso 6 o Aperila, 1830, e tusa ma le 60 tagata na faapotopoto i le maota o Pita Uitimera le Matua, i Feiete, Niu Ioka, e molimau i le “fana’e mai o le Ekalesia a Keriso i nei aso e gata ai” e tusa ai ma “le finagalo ma poloaiga a le Atua” (Mataupu Faavae ma Feagaiga 20:1).
I le aso na faatulagaina ai le Ekalesia, sa lagolagoina ai e le Au Paia ia Iosefa Samita ma Oliva Kaotui e avea ma o latou taitai, taumamafa i le faamanatuga, molimauina le faauuina o alii i tofi o le perisitua, ma vaaia i latou o e ua uma ona papatisoina o maua le meaalofa o le Agaga Paia ma ia faamauina o ni tagata o le Ekalesia.
E faatatau i lenei aso, sa saunoa ai le Perofeta o Iosefa Samita:
Ina ua mavae se taimi fiafia sa matou faaaluina e molimauina ma lagonaina ai mo i matou lava ia mana ma faamanuiaga o le Agaga Paia, e ala i le alofa tunoa o le Atua sa tuuina mai i o matou luga, sa matou taape loa ma le malamalama ua faamalieina e faapea o i matou o tagata taitoatasi, ma ua silafiaina e le Atua, “O le Ekalesia a Iesu Keriso,” sa faavaeina e tusa ai ma poloaiga ma faaaliga na tuuina mai e Ia. (Aoaoga a Peresitene o le Ekalesia: Iosefa Samita [2007],138)
Sa atofaina e le Alii e ala mai i faaaliga le aso tonu na tatau ona toe faatulagaina ai Lana Ekalesia i luga o le fogaeleele (tagai i le Mataupu Faavae ma Feagaiga 20, ulutala o le vaega), ma sa Ia tuuina mai mulimuli ane le igoa e tatau ona faaigoaina ai le Ekalesia.
Suesue e Sauniuni ai mo le Vasega
Faitau le Mataupu Faavae ma Feagaiga 115:4–5.
Pe tusa ma se tausaga ma le afa talu ona faatulagaina le Ekalesia, ae folafola mai e le Alii e faapea, ua Ia tuuina mai ia Iosefa Samita ma isi le mana, “e faataoto ai le faavae o lenei ekalesia, ma aumai ai i fafo o le lē mailoa ma i fafo o le pouliuli, le ekalesia moni ma ola e tasi i luga o le lalolagi atoa, lea ua fiafia tele i ai Aʼu, o le Alii, i le tautala atu lea i le ekalesia atoa ae lē i tagata taitoatasi” (Mataupu Faavae ma Feagaiga 1:30).
Mafaufau Loloto a o Sauniuni mo le Vasega
O faapefea e le avea ma se tagata o le Ekalesia a Iesu Keriso ona faatosinaina lou olaga?
Vaega 2
O a ni isi o mafuaaga na folafola mai ai le Alii ua “na’o le pau lenei o le ekalesia moni ma ola”?
Sa aoao mai Peresitene Dallin H. Oaks o le Au Peresitene Sili:
E tolu itu taua—(1) atoatoaga o aoaoga faavae, (2) mana o le perisitua, ma le (3) molimau ia Iesu Keriso—o loo faamatala mai ai le mafuaaga na tautino mai ai e le Atua, ma i le avea ai ma ni Ana auauna ua tausisia ua na o le pau lenei o le Ekalesia moni ma le ola i luga o lenei fogaeleele atoa. …
Ona sa tele mea na leiloloa i le Liliuese, o lea na talafeagai ai i le Alii ona toefuatai mai le atoaga o Ana aoaoga faavae. …
O le aoaoga faavae a Iesu Keriso, pe a malamalama i ai i lona atoatoaga, o le fuafuaga lea e mafai ai ona avea i tatou ma ituaiga fanau a le Atua e tatau ona avea ai i tatou. …
O le itu lona lua ma e matuai alagatatau lava … o le pule o le perisitua. …
O se taunuuga la o lo tatou mauaina o le mana o le perisitua, o taitai ma tagata ua faatagaina e tatau ai … ua i ai le pule e faatino ai sauniga manaomia o le perisitua. …
O le mafuaaga lona tolu ua avea ai la tatou Ekalesia ma ekalesia moni e tasi, ona ua ia i tatou le upumoni faaalia e uiga i le natura o le Atua ma lo tatou sootaga ia te Ia, ma o lea ua tatou maua ai se molimau tulaga ese ia Iesu Keriso. O le mea e taua ai, o lo tatou talitonuga i le natura o le Atua o le mea lea ua ese ai i tatou mai talitonuga o le tele o tapuaiga faa-Kerisiano. (Dallin H. Oaks, “The Only True and Living Church,” New Era, Aug. 2011, 3–5)
Sa faamalamalama atili mai e Elder David A. Bednar o le Korama a Aposetolo e Toasefululua e faapea, O Le Ekalesia a Iesu Keriso o le Au Paia o Aso e Gata Ai “o se ekalesia ola ona o galuega ma meaalofa a le Agaga Paia” (“Ia Maua le Agaga Paia,” Ensign po o le Liahona, Nov. 2010, 97).
Na aoao mai foi Uso Tad R. Callister, o le sa avea ma Peresitene Aoao o le Aoga Sa:
[O le folafolaga a le Alii o loo i le Mataupu Faavae ma Feagaiga 1:30] e le o le uiga e faapea, e le o i ai i isi ekalesia ni upumoni, aua e mautinoa lava e i ai. E le faapea ua le faia e isi lotu ni mea lelei, aua e tele mea lelei ua latou faia. O lona uiga o le, ua na’o le pau lenei o le ekalesia ua i ai upumoni uma ua faaalia mai e oo mai i le taimi nei i lenei tisipenisione—ua na’o le pau lea o le ekalesia ua i ai sauniga e alagatatau mo le faaeaga ma ua na’o le pau lea o le ekalesia ua i ai le perisitua a le Atua e faatino ai na sauniga e faavavau le aoga. O a ni faamaoniga ua ia i tatou e faatatau i lenei tautinoga? …
Afai e faatusatusa e se tasi le mamanu o le Ekalesia muamua a Keriso i lotu uma i le lalolagi i aso nei, e na te iloa ai …, e na o le tasi [le ekalesia] e fetaui i ai—O Le Ekalesia a Iesu Keriso o le Au Paia o Aso e Gata Ai. (Tad R. Callister, “O Le A le Mamanu a le Ekalesia a Keriso?” [Faigalotu a le Ofisa o Aoaoga a le Ekalesia mo talavou matutua, Ian. 12, 2014]; ChurchofJesusChrist.org)
E taua ona malamalama, o le avea ma se tagata o le “ekalesia moni ma le ola e tasi” a Iesu Keriso, e le faapea, ua tatou talitonu ua sili atu ona tatou lelei nai lo o isi tagata. Ae o lo tatou auai ai e aofia ai se tiutetauave ia alolofa atu i isi ma valaaulia i latou ia o mai ia Keriso ma maua faamanuiaga o Lana talalelei toefuataiina.
Mafaufau Loloto a o Sauniuni mo le Vasega
O a ni aafiaga ua fesoasoani ia te oe ua e iloa ai o Le Ekalesia a Iesu Keriso o le Au Paia o Aso e Gata Ai o le Ekalesia moni lea ma le ola a le Faaola?
Vaega 3
O le a se mea ou te ono faasoa atu i se tasi e manatu, e mafai ona avea o ia ma se tagata lotu pe faaleagaga e aunoa ma le auai i le Ekalesia a le Alii?
Na aoao mai Elder D. Todd Christofferson o le Korama a Aposetolo e Toasefululua:
E i ai i latou o e manatu ia i latou lava o tagata lolotu pe faaleagaga, ae tetee i le auai i se lotu pe tetee i le manaomia o sea faalapotopotoga. O faiga faalelotu mo latou o se mea e patino a’ia’i. Ae o le Ekalesia o le foafoaga a Ia o le o loo taulai i ai lo tatou faaleagaga—o Iesu Keriso lea. …
… O loo tumau pea le faamoemoega na i ai anamua: o lona uiga, o le talai atu o le tala fou o le talalelei a Iesu Keriso ma faatautaia ia sauniga o le faaolataga—i se isi faaupuga, ia aumaia tagata ia Keriso. …
… E taua le iloa o le faamoemoega autu lava o le Atua o lo tatou alualu i luma. O Lona finagalo ia tatou faaauau pea “mai lea alofa tunoa i lea alofa tunoa, seia oo ina [tatou maua] se atoatoaga” [Mataupu Faavae ma Feagaiga 93:13] o mea uma e mafai ona Ia foai mai. E manaomia ai mea e sili atu nai lo le na o na fia lelei pe lagona faaleagaga. E manaomia ai le faatuatua ia Iesu Keriso, salamo, papatisoga i le vai ma le Agaga, ma tumau i le faatuatua e oo i le iuga [tagai i le 2 Nifae 31:17–20]. E le mafai e se tasi ona ausia lenei mea na o ia lava, o lea, o se mafuaaga tele ua fai ai e le Alii se ekalesia, o le fatuina lea o se nuu o le Au Paia o le a lagolago ai e le tasi le isi i le “ala sa’o ma le vaapiapi lea e tau atu i le ola e faavavau” [2 Nifae 31:18]. …
Afai e talitonu se tasi e tau atu auala uma i le lagi pe faapea e leai ni mea patino e manaomia mo le faaolataga, o le a faapea o ia e le manaomia le folafola atu o le talalelei, e le manaomia foi ni sauniga ma ni feagaiga i le togiolaina o e ola po o e ua oti. Ae ua le na o tino ola pea o loo tatou talanoa ai ae faapea foi le ola e faavavau, ma ina ia taulau lena mea, o lea e taua ai le ala o le talalelei ma feagaiga o le talalelei. E manaomia foi e le Faaola se ekalesia ina ia maua ai na mea uma mo fanau uma a le Atua—o e ola ma e ua oti. (D. Todd Christofferson, “E Manaomia i Se A Le Ekalesia,” Ensign po o le Liahona, Nov. 2015, 108, 110)
Na aoao mai Sister Bonnie L. Oscarson, o le sa auauna atu o se Peresitene Aoao o Tamaitai Talavou e faapea, o le auai i le Ekalesia e fesoasoani foi tatou te avea atili ai e pei o le Faaola, e ala i le tuuina mai ia i tatou o avanoa e tautua ma auauna atu ai i isi.
E moni tatou te auai i a tatou sauniga Lotu i vaiaso taitasi e faatino sauniga, aoao aoaoga faavae, ma ia musuia, ae o le isi mafuaaga taua tele mo le auai o le, i le avea ma se aiga o le uarota ma soo o le Faaola o Iesu Keriso, tatou te vaavaaia le tasi ma le isi, faamalosiau i le tasi, ma saili auala e auauna ma fefaamalosia’i ai le tasi ma le isi. Ua le na o i tatou o ni e taliaina ma ave mea ua ofoina mai i le lotu; e manaomia foi i tatou ina ia avea ma tagata e tuuina atu ma ni e e sauniaina. …
Ole atu i lou Tama Faalelagi e faaali mai ia te oe i latou o siomia oe o manaomia lau fesoasoani ma uunaia oe i le auala sili e auauna atu ai ia i latou. Ia manatua sa masani lava ona auauna atu le Faaola i se tagata e toatasi i le taimi. (Bonnie L. Oscarson, “O Manaoga i o Tatou Luma,” Ensign po o le Liahona, Nov. 2017, 26)
Mafaufau Loloto a o Sauniuni mo le Vasega
E mafai faapefea e le auai ma le toaga i le Ekalesia a le Alii ona fesoasoani ia te oe ia avea atili ai e pei o Ia ma lou Tama Faalelagi? O le a se mea e mafai ona e faia ina ia auai atoatoa ai i le Ekalesia o Iesu Keriso?