Lesona 13 Anomea mo le Sauniuniga o le Vasega

O Tulafono a le Atua

Mafaufau i uiga faaalia agai i tulafono ma poloaiga a le Atua ua e vaai i ai i le lalolagi ua siomia ai oe. E lelei, leaga, pe ese lava ia nei uiga faaalia? A o e suesue i tulafono ma poloaiga na toefuatai mai e ala mai i le Perofeta o Iosefa Samita, vaavaai mo auala e mafai ona latou aumaia ai ia te oe le filemu ma le puipuiga ma fesoasoani ia avea atili ai oe e pei o le Faaola.

Vaega 1

E mafai faapefea e le usiusitai i tulafono a le Alii ona manuia ai lo’u olaga?

Ia Tesema 1830, na poloaiina ai e le Alii le Au Paia na nonofo i Niu Ioka e faapotopoto faatasi ma le Au Paia i Ohaio. Na folafola atu e le Alii afai latou te usiusitai, o le a Ia faaali mai ia i latou Ana poloaiga ma faauu i latou “i le mana mai luga” (Mataupu Faavae ma Feagaiga 38:32). E le’i leva ona taunuu i Ohaio ia Fepuari, 1831, ae maua e le Perofeta o Iosefa Samita se faaaliga na faapea ona faaali mai ai e le Alii Ana tulafono (tagai Mataupu Faavae ma Feagaiga 42). I le faaaliga, na toe faamausali mai ai e le Alii le alagatatau o le tausia o poloaiga ua Ia tuuina mai i Lona nuu anamua, e aofia ai le tulafono o le ola mama.

Na poloaiina foi e le Alii le Au Paia ia tausi i e matitiva ma ia atiae Lona malo e ala i le ola i le tulafono o le faapaiaga (tagai i le Mataupu Faavae ma Feagaiga 42:30--35). E pei lava ona Ia aoaoina Ona Aposetolo anamua, sa faamalamalama mai e le Alii e faapea, a auauna atu le Au Paia ia te Ia ma tausi Ana poloaiga, ua latou faaali atu lo latou alolofa mo Ia (tagai Ioane 14:15; Mataupu Faavae ma Feagaiga 42:29).

I tausaga na sosoo ai na toefuatai mai ai e le Alii isi Ana tulafono anamua e ala ia Iosefa Samita, e aofia ai le tulafono o le Sapati (tagai Mataupu Faavae ma Feagaiga 59; 68:29) ma le tulafono o le sefuluai (tagai Mataupu Faavae ma Feagaiga 64:23; 119). Sa ia faaalia mai foi se tulafono o le soifua maloloina ua ta’ua o le Upu o le Poto (tagai Mataupu Faavae ma Feagaiga 89).

Ina ia saunia mo le vasega, faamolemole suesue se tasi pe sili atu o tulafono nei ua toefaamausali pe faaali mai e le Alii i o tatou aso: (1) o le tulafono o le ola mama, (2) o le tulafono o le faapaiaga, (3) o le tulafono o le Sapati, po o (4) le tulafono o le soifua maloloina, ua ta’ua o le Upu o le Poto. Faaaoga punaoa o loo i lalo a o e suesue i le tulafono po o tulafono ua e filifilia. E mafai foi ona e sailiili mo punaoa faaopoopo i luga o le ChurchofJesusChrist.org. O mai sauni i le vasega e talanoa i fesili nei:

1. O le a se upumoni po o ni upumoni na e aoaoina mai au suesuega?

2. O a ni luitau e o faatasi ma le usitaia o lenei tulafono i aso nei, ma e ono mafai faapefea ona foia i latou?

3. O a ni faamanuiaga ua patino ona e mauaina i le tausia o lenei tulafono?

4. E mafai faapefea e le usitaia o lenei tulafono ona fesoasoani ia te oe ia avea atili e pei o lou Tama Faalelagi ma Lona Alo o Iesu Keriso?

Vaega 2

O Le Tulafono o le Ola Mamā

1. Suesue le Mataupu Faavae ma Feagaiga 42:22–25, ma vaavaai mo le aoaoga faavae ma mataupu faavae ua aoao mai e le Alii e uiga i le mamā i tulaga faalefeusuaiga.

2. Mafaufau i mea na aoao mai e Elder Jeffrey R. Holland o le Korama a Aposetolo e Toasefululua e uiga i le ogaoga o le soli o le tulafono a le Atua o le ola mama ma le paia o tulaga faalefeusuaiga. Suesue i parakalafa 9–16 o lana lauga “Mama Patino” (Ensign, Nov. 1998, 75–79), ma vaavaai mo mafuaaga e tatau ona tatou malupuipuia ma le faaeteete o tatou mama mai feusuaiga.

3. Matamata le vitio “Tulafono o le Legavia” (2:03) o loo maua i luga o le ChurchofJesusChrist.org, ma vaavaai mo le taua ma faamanuiaga o le tausia o le tulafono o le ola mama.

Manao Pea i Nisi Mea? (Tuu i le faitalia)

Suesue le vaega “Mama Atoatoa i Tulaga Feusuai” o loo maua i le Mo le Malosi o le Autalavou (2011) mo aoaoga lata mai nei a le Ekalesia e faatatau i le tulafono o le legavia.

Matamata “We Believe in Being Chaste” (1:17). I lenei vitio, o loo faamatala ai e Elder David A. Bednar o le Korama a Aposetolo e Toasefululua ia tulaga faatonuina a le Alii e uiga i le mama i tulaga faalefeusuaiga.

Matamata i le “I Choose to Be Pure” (4:19). I le vitio lenei, e toaono le autalavou matutua o ni tapuaiga eseese o loo faamatala sa’o mai ai le pogai ua latou filifili ai ia mama i feusuaiga.

I Choose to be Pure

E toano ni tagata talavou o ekalesia soofaatasi na talanoa faalauaitele atu i le pogai ua latou filifili ai ia mama i feusuaiga.

Vaega 3

O Le Tulafono o le Faapaiaga

Aoao atili e uiga i le tulafono o le faapaiaga e ala i le faia o mea nei:

1. Faitau i le mea o loo aoao mai e le Taiala i Tusitusiga Paia e uiga i le tulafono o le faapaiaga.

2. Toe iloilo auala na taumafai ai le Au Paia anamua e ola i le tulafono o le faapaiaga. A o le’i taunuu atu Iosefa Samita i Katelani, Ohaio, ia Fepuari 1831, e toatele le Au Paia i Katelani sa taumafai ia mulimuli i le faataitaiga a le Au Paia i le Feagaiga Fou o e “ua tuu tele a latou mea uma” (tagai Galuega 4:32) e ala i le taumafai e faasoa atu a latou oloa ma meatotino i le tasi ma le isi o se aiga toatele e tasi. Suesue i le Mataupu Faavae ma Feagaiga 42:30–35, ma vaavaai mo faatonuga a le Alii na faamanino mai ai le ala na tatau ona tausia ai e le Au Paia le tasi ma le isi i lalo o le tulafono o le faapaiaga.

3. Fai se tasi o gaoioiga nei:

   • Matamata i le “The Law of Consecration” (5:02) i luga o le ChurchofJesusChrist.org, ma faalogologo mo faamatalaga o le ala na ola ai le Au Paia o Aso e Gata Ai anamua i le tulafono o le faapaiaga.

   • Suesue i le tusiga “Consecration and Stewardship” i luga o le ChurchofJesusChrist.org, ma mafaufau i auala na ola ai le Au Paia o Aso e Gata Ai i le tulafono o le faapaiaga.

Manao Pea i Nisi Mea? (Tuu i le faitalia)

Faitau i le tautalaga a D. Todd Christofferson, “Toe Manatunatuga i se Olaga Faapaiaina” (Ensign po o le Liahona, Nov. 2010, 16–19). I le lauga lenei, o loo faamalamalama mai ai e Elder Christofferson o le Korama a Aposetolo e Toasefululua auala e mafai e le Au Paia o Aso e Gata Ai ona tulitulimatagauina se olaga faapaiaina.

Vaega 4

Tulafono o le Sapati

1. A o nofoia e tagata o le Ekalesia ia le Itumalo o Siakisone, Misirui, i le taumafanafana o le 1831, sa latou fetaiai ma se nuu tuaoi sa taatele ai taaloga faitupe, o le onanā, vesiga, ma le soli Sapati. Suesue le Mataupu Faavae ma Feagaiga 59:9-19, ma vaavaai mo le mea na faatonuina e le Alii le Au Paia e fai, e fesoasoani ai ia latou teena faatosinaga o le amioleaga a le lalolagi.

2. Na aoao mai Peresitene Russell M. Nelson i le taua o le aso Sapati. Faitau parakalafa 3–16 o lana tautalaga, “O Le Sapati o se Aso Fiafia” (Ensign po o le Liahona, Me 2015, 129-30). Vaavaai mo fautuaga e mafai ona fesoasoani e te faia ai le Sapati o se aso fiafia.

3. Matamata i le vitio “Upon My Holy Day—Honoring the Sabbath” (1:30), lea o loo faamalamalama mai ai e Elder Jeffrey R. Holland ia nisi o faamanuiaga o le faamamaluina o le Sapati.

Manao Pea i Nisi Mea? (Tuu i le faitalia)

Matamata le “Upon My Holy Day” (9:52). I lenei vitio, o loo aoao mai ai Elder Jeffrey R. Holland e uiga i faamoemoega ma faamanuiaga o le aso Sapati.

Vaega 5

Tulafono o le Soifua Maloloina

1. O le Aoga a Perofeta, sa faatulagaina ia Ianuari, 1833, sa amata ona potopoto e le aunoa i se potu i le falealuga o le Faleoloa o Newel K. Whitney i Katelani, Ohaio. I le taimi o nei fonotaga, e masani ona faaaoga ai e le usoga ia tapaa. Ina ua uma ona faaleo atu e Ema ona atugaluga, sa fesili atu Iosefa Samita i le Alii ma na maua mai ai le faaaliga ua lauiloa o le Upu o le Poto (tagai Au Paia: O Le Tala o le Ekalesia a Iesu Keriso o le Au Paia o Aso e Gata Ai, vol. 1, O Le Tulaga o le Upumoni, 1815–1846 [2018], 167–68). Faitau le Mataupu Faavae ma Feagaiga 89:1–14, 18–21, ma mafaufau e faailoga ia faatonuga ma folafolaga a le Alii i le Au Paia.

2. Sa mafaufau nisi o le Au Paia o Aso e Gata Ai pe aisea e le o fitoitonu ai le faasaina e le Upu o le Poto o isi fualaau ma vailaau e afaina ai. Na saunoa Peresitene Boyd K. Packer o le Korama a Aposetolo e Toasefululua, e uiga i lenei fesili ma faamanino mai faamanuiaga folafolaina mo le tausia o le Upu o le Poto. Faitau parakalafa 10–12 ma le 23–34 o lana saunoaga “O Le Upu o le Poto: O Le Mataupu Faavae ma Folafolaga” (Ensign, May 1996, 17–19).

Manao Pea i Nisi Mea? (Tuu i le faitalia)

Suesue le vaega “Soifua Maloloina Faaletino ma Faalelagona” o loo maua i le Mo le Malosi o le Autalavou (2011) mo aoaoga lata mai nei a le Ekalesia i le Upu o le Poto.

O le Upu o le Poto na oo mai o se faaaliga, ae o le taimi muamua sa o se “poloaiga po o se faamalosiga” (Mataupu Faavae ma Feagaiga 89:2). Faitau le tusiga “Upu o le Poto (MF&F 89)” i luga o le ChurchofJesusChrist.org. Vaavaai pe ua faapefea ona suia le tausia o le Upu o le Poto i le aluga o taimi.