“Lesona 2 Anomea mo le Sauniuniga o le Vasega: O Le Uluai Faaaliga,” Anomea mo le Sauniuniga o le Vasega O Faavae o le Toefuataiga (2019)
“Lesona 2 Anomea mo le Sauniuniga o le Vasega,” Anomea mo le Sauniuniga o le Vasega O Faavae o le Toefuataiga
Lesona 2 Anomea mo le Sauniuniga o le Vasega
O Le Uluai Faaaliga
Sa faamatalaina e Peresitene Iosefa F. Samita le Uluai Faaaliga a Iosefa Samita o “le mea aupito maoae na tupu … talu mai le toetu o le Alo o le Atua” (Aoaoga a Peresitene o le Ekalesia: Iosefa F. Samita [1998], 14). A o e suesue i le Uluai Faaaliga, mafaufau i le taua o lenei mea paia na tupu ma le aafiaga ua ia faia i lou olaga ma i luga o le lalolagi.
Vaega 1
O a ni upumoni e mafai ona tatou aoao mai i le Uluai Faaaliga a Iosefa Samita?
O le saunoa ai e uiga i le Uluai Faaaliga a Iosefa Samita, na aoao mai ai Elder Richard J. Maynes o le Au Fitugafulu:
O se aafiaga ofoofogia ma le faamalamalamaina le iloiloina o le mea ua tatou aoao mai i lenei aafiga paia, ma le maoae … e faatatau i le natura e faavavau o lo tatou Tama Faalelagi ma Lona Alo, o Iesu Keriso; o le iai o Satani; o le feteenaiga i le va o le lelei ma le leaga; ma isi vaega taua o le fuafuaga sili o le faaolataga. …
O le Uluai Faaaliga a Iosefa Samita o le ki lea e tatalaina ai le tele o upumoni sa tanumia mo le tele o seneturi. Ia aua nei galo ia i tatou pe le ano i le tele o upumoni taua ua tatou aoaoina mai le Uluai Faaaliga. (Richard J. Maynes, “The First Vision: Key to Truth,” Ensign, June 2017, 64, 65)
Sa ola ae Iosefa Samita i se vaitaimi o le tetele o le fenumiai i mea tau lotu. Sa tauva lotu Kerisiano eseese i lana eria mo tagata liliu mai ma sa fefinauai malosi le tasi ma le isi e uiga i aoaoga faavae ma faiga faalelotu A o e suesue i le tala o loo i lalo e uiga i le Uluai Faaaliga lea na tusifaamaumauina i le 1838, ma o lea ua aofia nei i tusitusiga faavae o le Iosefa Samita—Talafaasolopito, ia maitau malamalamaaga loloto e te maua ma faaailoga upumoni o le talalelei e patino le anoa ia te oe.
Suesue e Sauniuni ai mo le Vasega
Faitau le Iosefa Samita—Talafaasolopito 1:8, 11–19
Tusifaamaumau Ou Lagona Uunai
Tusifaamaumau upumoni na mafai ona e maitaua mai le tala a Iosefa Samita i le 1838, e uiga i lana Uluai Faaaliga i se apitalaaga po o le avanoa o loo tuuina atu i lalo. Ia tusi foi i lalo le pogai e te manatu e taua ai le malamalama i nei upumoni. Sau sauni i le vasega e faasoa mai mea sa e tusiaina.
Vaega 2
E faapefea ona tuuina mai e faamatalaga e tele o le Uluai Faaaliga a Iosefa Samita se malamalamaaga loloto i lenei mea paia na tupu?
O le tusitusi a Iosefa Samita mai lana faamatalaga i le 1832 o le Uluai Faaaliga.
O le tala i le 1838 o le Uluai Faaaliga o loo tusifaamaumauina i le Iosefa Samita—Talafaasolopito, sa faamalau atu e Iosefa i se taimi o le tetee ina ia “tuu atu ai i tagata sailiili uma le mea moni ia maua tala sa’o” (Iosefa Samita—Talafaasolopito 1:1). O le faamatalaga aupito maoae o le Uluai Faaaliga ma sa tusifaamaumauina o se vaega o le talafaasolopito aloaia a Iosefa Samita o le Ekalesia. Sa tuufaatasia ma le vaega atoa o le Penina Tau Tele i le 1880 ma avea ai ma vaega o tusitusiga faavae o le Ekalesia i lena vaitaimi.
E faaopoopo atu i le faamatalaga i le 1838, sa tusifaamaumauina pe faamalau atu e le Perofeta o Iosefa Samita ia isi faamatalaga e tolu o lona aafiaga. E i ai foi faamatalaga e lima o le Uluai Faaaliga na tusifaamaumauina e tagata na ola i le vaitaimi lava lea ma Iosefa Samita.
O faamatalaga eseese o le Uluai Faaaliga ua faamatala ai se tala e tutusa, e ui lava e masani ona eseese mea e faamamafaina ma auiliilia. O tusitalafaasolopito e faamoemoe afai e toe faamatalaina e se tasi se aafiaga i ni tulaga eseese ini tagata faalogologo i ni tausaga se tele, o tala taitasi o le a faamamafa ai ni manatu eseese o le aafiaga ma e maua ai ni faamatalaga tulaga ese. E moni lava, o eseesega e pei ona iai i le uluai faaaliga o loo maua i le tele o tala faatusitusiga paia o le faaaliga a Paulo i le ala i Tamaseko ma le aafiaga o Aposetolo i le Mauga o Liua. Ae e ui lava i eseesega, e i ai pea se faavae tumau i tala uma o le Uluai Faaaliga. O nisi ua finau sese e faapea, soo se eseesega lava i le toefaamatalaina o le tala o se faamaoniga o se talafatu. I le isi itu, o le faamaumauga anoa o le talafaasolopito, ua mafai ai ona tatou aoao atili e uiga i lenei mea taua na tupu, nai lo le mea semanu tatou te aoaoina pe ana faapea e laitiiti faamatalaga na faamauina. (“O Faamatalaga o le Uluai Faaaliga,” Gospel Topics, topics.ChurchofJesusChrist.org)
A o e faitau i faamatalaga pupuu nei mai faamatalaga faaopoopo tuusao o le Uluai Faaaliga a Iosefa Samita, mafaufau e faailoga faamatalaga ma upumoni e taua ia te oe. Atonu e te manao foi e tusi i lalo ni au fesili e i ai ma aumai i le vasega.
Faamatalaga: O le faamaumauga atoa o faamatalaga taitasi o loo maua i le “Joseph Smith’s Accounts of the First Vision” i le josephsmithpapers.org.
Tala i le 1832
O le faamatalaga lenei na tusia i le amataga o le api o tusi a Iosefa Samita ma ua na’o le pau lea o le faamatalaga o loo i ai se vaega o lana ia lava tusitusi. O isi mea sa tusia i le tusitusi a le tusiupu a Iosefa.
Pe tusa o le 12 o [o’u] tausaga, sa oo ina matuai faagaeetia ai lo’u mafaufau e uiga i atugaluga sili ona taua mo le manuia o lo’u agaga e faavavau. …
… Sa oo ina matuai atuatuvale lava lo’u mafaufau, ona sa ou lagonaina lo’u ta’usalaina i a’u agasala. … Sa ou lagona le faanoanoa i a’u lava agasala ma mo agasala a le lalolagi. …
O lea, sa ou tagi atu ai i le Alii mo le alofa tunoa, aua sa leai se isi na mafai ona ou alu i ai e maua mai ai le alofa tunoa. Ma sa faafofogaina e le Alii la’u tagi i le togavao, ma a’o i ai i le agaga o le valaau atu i le Alii, i le sefuluono o tausaga o lo’u olaga, sa alu ifo mai luga se malamalama faaniutu e sili atu i le pupula o le la i le aoauli, ma nofo i o’u luga. Sa faatumulia a’u i le agaga o le Atua ma sa tatala e le Alii ia le lagi i o’u luga ma sa ou vaai i le Alii.
Ma na ia fetalai mai ia te a’u, e faapea, “Iosefa, lou atalii e, ua faamagaloina au agasala. Alu i ou ala, savali i a’u tulafono ma tausi i aʼu poloaiga. Faauta, o a’u o le Alii o le mamalu. Sa faasatauroina au mo le lalolagi ina ia mafai ona maua e i latou uma o e talitonu mai i lou igoa le ola e faavavau. Faauta, o le taimi nei ua taoto le lalolagi i le agasala, ma ua leai se tasi o faia le lelei, e leai, e leai lava se tasi. Ua latou faasaga ese mai le talalelei ma ua le tausia a’u poloaiga. Ua latou faalatalata mai ia te a’u i o latou laugutu, a o o latou loto ua mamao mai ia te a’u. Ma ua oso lo’u ita e faasaga i e nonofo i le lalolagi, ia asia i latou e tusa ma lo latou amioleaga ma ia faataunuu ai mea na tautalagia e fofoga o perofeta ma aposetolo. Aua faauta, e pei ona tusia e uiga ia te a’u, ou te vave sau, i ao, e ofu i le mamalu o lo’u Tama.”
Na faatumulia lo’u agaga i le alofa, ma mo aso e tele, na mafai ona ou olioli ma le fiafia tele. Sa faatasi mai le Alii ia te au, ae e le mafai ona ou maua se tasi e talitonu i faaaliga faalelagi. E ui i lea, sa ou mafaufau loloto i nei mea i lou loto.
Tala i le 1835
O le faamatalaga lenei o se faamaumauga a Iosefa na faamatalaina ai lana Uluai Faaaliga i se tasi sa asiasi atu i lona fale. Sa tusia i le apitalaaga a Iosefa e lana tusiupu.
Sa ou faatoga atu i le Alii i le tatalo faatauanau. Na faaali mai se afi faaniutu i luga a’e o lo’u ulu. Sa nofo i ou luga ma faatumulia ai au i le olioli e le mafaamatalaina. Na faaali mai se peresona i le totonugalemu o lenei taulotoaʼiga o le poutu o le apefai mumu, ua salalau solo ma mu, ae e leai se mea na faaleagaina. Na lei pine ae faaali mai se isi peresona e faapei o le na muamua. Sa ia fai mai ia te au, “Ua faamagaloina au agasala.” Na ia molimau mai ia te a’u o Iesu Keriso o le Alo o le Atua. Ma sa ou vaai i le tele o agelu i lenei faaaliga vaaia. Sa pe a ma le sefulufa o o’u tausaga i le taimi na ou maua ai lenei uluai fesootaiga.
Tala i le 1842
O le faamatalaga lenei e sau mai i se tusi sa tusia e tali atu ai i fesili mai i le faatonu o nusipepa a Chicago na igoa ia Ioane Wentworth.
Sa ou alu atu i se nofoaga faalilolilo i se togavao ma amata ona valaau atu i le Alii. A o [o’u] auai ma le faatauanau i le olega, sa aveesea lo’u mafaufau mai mea na faapea ona siomia ai a’u, ma sa fusifusia au i se faaaliga faalelagi ma vaai i le mamalu o ni tagata e toalua e foliga tutusa lava i vaaiga, ma faatusa, ua siomia e se malamalama pupula lea na punitia le la i le aoauli. Sa laua fai mai ia te au o tapuaiga faalelotu uma ua talitonu i aoaoga faavae sese, ma e leai so latou na aloaia le Atua e faapea o lana ekalesia ma le malo. Ma sa faatonuina manino au e “aua le mulimuli atu ia te i latou,” ma i le taimi lava lea na maua ai se folafolaga o le a faaalia mai ia te au le atoatoaga o le talalelei i se taimi o le lumanai.
Mafaufau Loloto a o Sauniuni mo le Vasega
E faapefea ona faaopoopo atu nei faamatalaga faaopoopo i lou malamalama ma le talisapaia o le Uluai Faaaliga a Iosefa Samita? O a ni upumoni faaopoopo e mafai ona e faaopoopo atu i lau lisi mai le vaega 1 o lenei anomea? O faapefea ona aafia lou olaga i lau molimau e uiga i lenei mea paia na tupu?