29.

Ireo fivoriana ao amin’ny Fiangonana

29.0

Teny fanolorana

Miara-mivory ny Olomasin’ny Andro Farany mba hivavaka, hifankahery, ary hampianatra sy hianatra ny filazantsara (jereo ny Almà 6:6; Môrônia 6:5–6). Nampanantena ny Mpamonjy fa: “Na aiza na aiza no hiangonan’ny roa na telo amin’ny anarako, dia ao afovoany Aho” (Matio 18:20). Ny fiaraha-mivory dia fomba iray ahafahan’ny fontsika “mifamihina ao amin’ny firaisan-kina sy ny fifankatiava[na].” (Môzià 18:21).

Kanefa ny fanaovana fivoriana dia tsy tokony hahasolo na oviana na oviana ny fanompoana ny hafa tahaka izay nataon’i Jesoa Kristy.

29.1

Fanomanana sy fitarihana fivoriana

Ireo mpitarika dia manomana sy mitarika ireo fivoriana “araka izay itarihan’ny Fanahy Masina azy, araka ireo didy sy ireo fanambaran’ Andriamanitra” (Fotopampianarana sy Fanekempihavanana 20:45; jereo koa ny Môrônia 6:9; Fotopampianarana sy Fanekempihavanana 46:2). Mikatsaka fomba hanasana ny fitarihan’ny Fanahy izy ireo mandritra ny fivoriana ataony.

Maka antoka ireo mpitarika fa tsy miteraka vesatra ho an’ireo mpikambana na ho an’ny fianakavian’izy ireo ny isan’ireo fivoriana sy ny faharetany.

29.2

Ireo fivoriana ao amin’ny paroasy

29.2.1

Ny fivoriana fanasan’ny Tompo

Tanjona

Mahatsiaro an’i Jesoa Kristy amin’ny alalan’ny fandraisana ny fanasan’ny Tompo. Isan’ireo tanjona hafa hanaovana izany ny fitsaohana, ny fampiorenana finoana sy fijoroana ho vavolombelona, ary ny fitarihana ny raharahan’ny paroasy.

Ireo mpandray anjara

Asaina hanatrika izany avokoa ny rehetra.

Hatetiny

Isaky ny alahady.

29.2.1.1

Fanomanana ny fivoriana fanasan’ny Tompo

Ny episkôpà no manomana sy mitarika ny fivoriana fanasan’ny Tompo. Maka antoka izy ireo fa ny fanasan’ny Tompo sy ny fampiorenana finoana an’i Jesoa Kristy no hifantohan’ilay fivoriana.

Maharitra adiny iray ny fivoriana fanasan’ny Tompo. Mety ho hita ao anatin’izany ireto manaraka ireto:

1. Feon-kira mialoha ny fivoriana (jereo ny 19.3.2 raha te hahita ireo torolalana).

2. Fiarahabana.

3. Fankasitrahana ireo manampahefana miahy na ireo mpitarika hafa izay mitsidika.

4. Filazana. Tokony hatao fohy araka izay azo atao izany.

5. Hira sy vavaka fanombohana. Jereo ny 19.3.2 sy ny 29.6.

6. Raharahan’ny tsatòka sy ny paroasy, toy izao manaraka izao:

   • Fanohanana sy fisaorana ireo mpiandraikitra sy mpampianatra (jereo ny 30.3 sy ny 30.6).

   • Fanolorana ny anaran’ireo rahalahy hotendrena ho amin’ny anjara fanompoana ao amin’ny Fisoronana Aharôna (jereo ny 18.10.3).

   • Fanekena ireo mpikambana vaovao ao amin’ny paroasy, isan’izany ireo olona niova fo.

7. Fanomezana anarana sy fitsofan-drano ny zaza (jereo ny 18.6). Mazàna izy io no atao mandritra ny fivoriana fifadian-kanina sy fijoroana ho vavolombelona (jereo ny 29.2.2).

8. Fandraisana ireo olona niova fo ho mpikambana (jereo ny 18.8).

9. Hira ho an’ny fanasan’ny Tompo sy fanatanterahana ny fanasan’ny Tompo. Ny fanasan’ny Tompo no zavatra voalohany hifantohan’ilay fivoriana. Fotoana ahafahan’ny mpikambana mampifantoka ny eritreriny amin’ny Mpamonjy sy ny sorona nataony ho azy ireo io ôrdônansy io.

   Raha te hahalala kokoa mikasika ny fanomanana sy ny fanamasinana ary ny fizarana ny fanasan’ny Tompo dia jereo ny 18.9

10. Hafatra avy amin’ny filazantsara sy fihiran’ny daholobe na hira hafa.

11. Hira sy vavaka famaranana

12. Feon-kira aorian’ny fivoriana.

29.2.1.4

Fisafidianana izay handaha-teny

Ny episkôpà no mifidy ireo mpandahateny mandritra ny fivoriana fanasan’ny Tompo. Amin’ny ankamaroan’ny fotoana dia manasa ireo mpikambana ao amin’ny paroasy izy ireo, ka tafiditra ao anatin’izany ny zatovo.

Mijoro ho vavolombelona momba an’i Jesoa Kristy sy mampianatra ny filazantsarany amin’ny fampiasana soratra masina ireo mpandahateny (jereo ny Fotopampianarana sy Fanekempihavanana 42:1252:9

29.2.2

Fivoriana fifadian-kanina sy fijoroana ho vavolombelona

Tanjona

Mandray ny fanasan’ny Tompo sy mifankahery amin’ny alalan’ny fijoroana ho vavolombelona momba an’i Jesoa Kristy sy ny filazantsarany. Amporisihina ny mpikambana mba hifady hanina rehefa mamonjy ilay fivoriana raha afaka mifady hanina izy ireo.

Ireo mpandray anjara

Asaina hanatrika izany avokoa ny rehetra.

Hatetiny

Indray mandeha isam-bolana, ny fivoriana fanasan’ny Tompo dia fivoriana fifadian-kanina sy fijoroana ho vavolombelona. Ny alahady voalohan’ny volana izy io raha ny mahazatra.

Tsy misy mpandahateny tendrena na fisafidianana hafa narindra tamin’ny fomba miavaka mandritra ny fivoriana fifadian-kanina sy fijoroana ho vavolombelona. Fa manao fijoroana ho vavolombelona fohy kosa ilay olona mitarika ny fotoana ho solon’izany. Avy eo izy dia manasa ny mpikambana manatrika ny fivoriana mba hizara ny fijoroany ho vavolombelona. Ny hoe mijoro ho vavolombelona dia midika hoe manambara ireo fahamarinana ao amin’ny filazantsara araka izay hitaoman’ny Fanahy Masina.

29.2.3

Ny fihaonamben’ny paroasy

Tanjona

Mandritra ny fihaonamben’ny paroasy dia mampianatra sy manohana ary manompo ny mpitarika sy ny mpikambana ao amin’ny paroasy ny mpitarika eo anivon’ny tsatòka. Manohana ireo mpitarika maneran-tany sy eo an-toerana ireo mpikambana ao amin’ny paroasy.

Ireo mpandray anjara

Asaina hanatrika izany avokoa ny rehetra.

Hatetiny

Indray mandeha isan-taona mandritra ny alahady iray ankoatra ny alahady fifadian-kanina.

29.2.4

Ny fivorian’ny episkôpà

Tanjona

Mifampidinika sy mandray fanapahan-kevitra momba ireo raharaha mahakasika ny paroasy.

Ireo mpandray anjara

Ny episkôpà, ny mpitambokin’ny paroasy, ary ny mpitantsoratra mpanatanteraka.

Hatetiny

Isan-kerinandro raha ny mahazatra.

Mety ho tafiditra ao anatin’ireo raharaha hodinihina ny:

• Fandrindrana ny asa famonjena sy ho an’ny fisandratana ao amin’ny paroasy.

• Fanamafisana orina ny isam-batan’olona sy ny fianakaviana ao amin’ny paroasy, indrindra fa ny zatovo sy ny ankizy.

• Famantarana ireo mpikambana izay afaka miomana ny handray ireo ôrdônansy, anisan’izany ny fanendrena ho amin’ny fisoronana.

• Famantarana ireo mpikambana ho antsoina amin’ireo antso ao amin’ny paroasy.

29.2.5

Fivoriana filankevitry ny paroasy

Tanjona

Manampy amin’ny fanatanterahana ny asan’ Andriamanitra ho an’ny famonjena sy ho an’ny fisandratana ao amin’ny paroasy (jereo ny 1.2).

Ireo mpandray anjara

• Ny episkôpà, ny mpitambokin’ny paroasy, ary ny mpitantsoratra mpanatanteraky ny paroasy.

• Ireo filohan’ny kôlejin’ny loholona, ny an’ny Fikambanana Ifanampiana, ny an’ny Zatovovavy, ny an’ny Kilonga, ary ny an’ny Sekoly Alahady.

Hatetiny

Isan-kerinandro raha ny mahazatra (saingy afaka mivory tsy dia matetika noho izany izy ireo).

Ny eveka no mandrafitra sy miahy ary mitarika ireo fivoriana filankevitry ny paroasy. Tsy mandray fanapahan-kevitra lehibe ny filankevitra rehefa tsy eo ny eveka.

Manatrika ireo fivoriana filankevitry ny paroasy ireo mpitarika ny rafitra eo anivon’ny paroasy noho ny fananan’izy ireo anjara andraikitra anankiroa:

1. Amin’ny maha-mpikambana ao amin’ny filankevitry ny paroasy izay manampy amin’ny fitahiana ireo mpikambana rehetra eo anivon’ny paroasy.

2. Amin’ny maha-solontenan’ny rafitra sahanin’izy ireo azy ireo.

Rehefa miara-mivory ireo mpikambana ao amin’ny filankevitry ny paroasy, dia miresaka mikasika ireo zavatra izay hahazo tombontsoa avy amin’ny ezaka iombonana ataon’ny filankevitra iray manontolo izy ireo. Entanina mba hizara ny eritreriny sy ny fanentanam-panahy azony mahakasika ireo zavatra ireo ny mpikambana tsirairay ao amin’ny filankevitra.

Amin’ny ankapobeny dia tsy tokony hihoatra ny adiny iray ilay fivoriana filankevitry ny paroasy. Atombok’izy ireo amin’ny alalan’ny vavaka sy fanaovana tatitra fohy mikasika ireo asa nampanaovina tao anatin’ny fivoriana teo aloha izany. Ataon’ny eveka lohalarana ireo zavatra izay tena ilaina mba hitahiana ny tsirairay sy ny fianakaviana.

• Fiainana ny filazantsaran’i Jesoa Kristy. Manampy ny mpikambana rehetra hanorina finoana sy handray ireo ôrdônansin’ny famonjena ary hanao ireo fanekempihavanan’ny tempoly.

• Fikarakarana ireo izay sahirana. Mizara ireo loharanom-panampiana sy fahaiza-manao mba hitahiana ny tsirairay sy ny fianakaviana ary ny fiarahamonina. Manampy ireo mpikambana ao amin’ny paroasy mba ho lasa mizaka tena. (Jereo ny toko 22.)

• Fanasana ny rehetra handray ny filazantsara. Mandinika ny fivoaran’ireo izay mianatra momba ny filazantsara, ary koa ireo mpikambana vaovao sy ireo miverina mavitrika. Mifanakalo hevitra mikasika ny fomba ahafahan’ny mpikambana mizara ny filazantsara amin’ny hafa. (Jereo ny toko 23.)

• Fampiraisana ireo fianakaviana ho mandrakizay. Mandinika ny fivoaran’ireo mpikambana izay miomana handray ireo ôrdônansin’ny tempoly. Mandrafitra fomba hanampiana mpikambana maro kokoa ho mendrika ny handray fahazoan-dalana hidirana ny tempoly. Mifanakalo hevitra momba ny fomba ahafahan’ireo mpikambana mandray anjara amin’ny asa atao any amin’ny tempoly sy ny asa mikasika ny tantaram-pianakaviana. (Jereo ny toko 25.)

Ireo mpikambana ao amin’ny filankevitra dia tsy maintsy mitazona ho tsiambaratelo izay fampahalalana momba ny fiainan’olona manokana na fampahalalana saropady (jereo ny 4.4.6

29.2.6

Fivorian’ny filankevitry ny zatovon’ny paroasy

Tanjona

Manamafy orina ny zatovo ao amin’ny paroasy. Manampy azy ireo handray anjara amin’ny asan’ Andriamanitra ho an’ny famonjena sy ho an’ny fisandratana (jereo ny 1.2).

Ireo mpandray anjara

• Ny episkôpà.

• Ny iray amin’ireo mpanampy ny eveka ao amin’ny kôlejin’ny mpisorona sy ireo filohan’ny kôlejin’ny mpampianatra sy ny an’ny diakona.

• Ireo filohan’ny kilasin’ny Zatovovavy (na ny fiadidiana iray manontolo raha tsy manana afa-tsy kilasin’ny Zatovovavy iray ihany ilay paroasy).

• Ny filohan’ny Zatovovavy.

Hatetiny

Mazàna no atao isam-bolana.

Mialoha ny fivoriana tsirairay dia mamerina mijery ireo zavatra horesadresahina ny eveka sy ilay olona mitarika ny fivoriana.

• Ny asa famonjena sy ho an’ny fisandratana.

• Ny zavatra ilain’ireo zatovo ao amin’ny paroasy sy ny fomba hiatrehana izany.

• Ireo ezaka atao mba hifandraisana amin’ireo zatovo malaindaina na mpikambana vaovao.

• Ireo fiaraha-mientana, tafiditra ao anatin’izany ireo fahafahana hanompo ireo izay sahirana. Vitaina mandritra ireo fivorian’ny fiadidian’ny kôlejy na ny kilasy ny ankamaroan’ny fanomanana (jereo ny toko 20).

• Fanompoana (jereo ny toko 21).

• Fanofanana ireo fiadidiana vaovao an’ny kôlejy sy ny kilasy.

29.2.8

Fitsinjaram-potoana ho an’ireo fivoriana isaky ny alahady

Mampiasa ny iray amin’ireto fitsinjaram-potoana adiny roa ireto ny paroasy ho an’ ireo fivoriana isaky ny alahady.

Drafitra 1

60 minitra	Fivoriana fanasan’ny Tompo
10 minitra	Fiomanana hiroso amin’ireo fotoam-pianarana sy ireo fivoriana
50 minitra	Alahady rehetra: Kilonga, anisan’izany ny zaza madinika Alahady voalohany sy fahatelon’ny volana: Sekoly Alahady Alahady faharoa sy fahefatra: fivorian’ny kôlejin’ny fisoronana sy ireo fivorian’ny Fikambanana Ifanampiana ary ireo fivorian’ny Zatovovavy Alahady fahadimy: fivoriana ho an’ny zatovo sy ny olon-dehibe. Ny episkôpà no mamaritra ilay lohahevitra sy manendry ireo mpampianatra.

Drafitra 2

50 minitra	Alahady rehetra: Kilonga, anisan’izany ny zaza madinika Alahady voalohany sy fahatelon’ny volana: Sekoly Alahady Alahady faharoa sy fahefatra: fivorian’ny kôlejin’ny fisoronana sy ireo fivorian’ny Fikambanana Ifanampiana ary ireo fivorian’ny Zatovovavy Alahady fahadimy: fivoriana ho an’ny zatovo sy ny olon-dehibe. Ny episkôpà no mamaritra ilay lohahevitra sy manendry ireo mpampianatra.
10 minitra	Fotoana hamonjena ny fivoriana fanasan’ny Tompo
60 minitra	Fivoriana fanasan’ny Tompo

29.3

Ireo fivoriana ao amin’ny tsatòka

29.3.1

Ny fihaonamben’ny tsatòka

Tanjona

Ny tanjona voalohany hanaovana ny fihaonamben’ny tsatòka dia ny hanamafy orina ny finoan’ny mpikambana an’i Jesoa Kristy.

Ireo mpandray anjara

Asaina hanatrika fivoriana ho an’ny daholobe ny rehetra. Natao ho an’ny mpandray anjara voafaritra manokana ireo fivoriana hafa, araka ny hazavaina etsy ambany.

Hatetiny

Indroa isan-taona.

29.3.2

Ny fivoriamben’ny fisoronana ao amin’ny tsatòka

Tanjona

Mampianatra sy manome hevitra avy amin’ny fitaomam-panahy an’ireo mpihazona ny fisoronana amin’ny andraikitr’izy ireo.

Ireo mpandray anjara

Ny mpihazona ny fisoronana rehetra eo anivon’ny tsatòka.

Hatetiny

Indray mandeha isan-taona.

29.3.3

Ny fivorian’ny mpitarika ao amin’ny fisoronana ao amin’ny tsatòka

Tanjona

Mampianatra ireo mpitarika ao amin’ny fisoronana ny andraikitr’izy ireo, mampitombo ny fahaiza-manaon’izy ireo, ary manamafy orina ny finoany.

Ireo mpandray anjara

• Ny fiadidian’ny tsatòka.

• Ny filankevitra avo.

• Ireo mpitamboky eo anivon’ny tsatòka sy ny paroasy (ary ireo mpitamboky mpanampy raha ilaina).

• Ireo mpitantsoratra mpanatanteraka eo anivon’ny tsatòka sy ny paroasy.

• Ny fiadidian’ny Zatovolahy eo anivon’ny tsatòka (sy ny mpitantsoratra raha nisy voantso).

• Ireo episkôpà.

• Ireo fiadidiana sy mpitantsoratry ny kôlejin’ny loholona

• Mpanoro hevitra ao amin’ny kôlejin’ny Fisoronana Aharôna.

Hatetiny

Atao mandritra ny fihaonamben’ny tsatòka ny fivorian’ny mpitarika ao amin’ny fisoronana.

29.3.4

Fivorian’ny mpitarika eo anivon’ny tsatòka

Tanjona

Mampianatra ny andraikitr’ireo mpitarika ny rafitra ao amin’ny paroasy, manampy azy ireo ho lasa mpitarika sy mpampianatra tsara kokoa, ary manamafy orina ny finoan’izy ireo an’i Jesoa Kristy. Mifanakalo hevitra sy mifampizara hevitra ihany koa ireo mpitarika mandritra ireo fivoriana ireo.

Ireo mpandray anjara

Ny fiadidiana sy ny mpitantsoratra rehetra ao amin’ny Fikambanana Ifanampiana, ny Zatovovavy, ny Kilonga ary ny Sekoly Alahady eo anivon’ny tsatòka sy ny paroasy. Manatrika sy miahy izany ny mpikambana iray ao amin’ny fiadidian’ny tsatòka na ny mpikambana iray ao amin’ny filankevitra avo izay nomena andraikitra. Azo atao koa ny manasa ireo mpampianatra, sy mpanoro hevitra, sy mpikambana ao amin’ny filankevitra avo, ary ireo mpikambana ao amin’ny episkôpà izay nasaina hiandraikitra ireo rafitra ireo.

Hatetiny

Indray mandeha isan-taona.

29.3.5

Ny fivorian’ny kôlejin’ny mpisorona avo ao amin’ny tsatòka

Tanjona

Mampianatra an’ireo mpikambana ao amin’ny kôlejy ny andraikitr’izy ireo sy ny fotopampianarana mifandray amin’ny fisoronana.

Ireo mpandray anjara

Ny mpikambana rehetra ao amin’ny kôlejin’ny mpisorona avo eo anivon’ny tsatòka.

Hatetiny

Indray mandeha isan-taona farafahakeliny.

29.3.6

Ny fivorian’ny fiadidian’ny tsatòka

Tanjona

Mifampidinika sy mandray fanapahan-kevitra momba ireo raharaha mahakasika ny tsatòka.

Ireo mpandray anjara

Ny fiadidian’ny tsatòka, ny mpitambokin’ny tsatòka, ary ny mpitantsoratra mpanatanteraka.

Hatetiny

Atao tsy tapaka (isan-kerinandro raha ny mahazatra).

29.3.7

Fivorian’ny filankevitra avo

Tanjona

Miara-midinika ny momba ny asan’ Andriamanitra ho an’ny famonjena sy ho an’ny fisandratana eo anivon’ny tsatòka (jereo ny 1.2).

Ireo mpandray anjara

• Ny fiadidian’ny tsatòka.

• Ny filankevitra avo.

• Ny mpitamboky sy ny mpitantsoratra mpanatanteraka eo anivon’ny ny tsatòka.

Hatetiny

Indroa isam-bolana raha azo atao.

29.3.8

Ny fivoriana filankevitry ny tsatòka

Tanjona

Miara-midinika ny momba ny asan’ Andriamanitra ho an’ny famonjena sy ho an’ny fisandratana eo anivon’ny tsatòka (jereo ny 1.2).

Ireo mpandray anjara

• Ny fiadidian’ny tsatòka.

• Ny filankevitra avo.

• Ny mpitamboky sy ny mpitantsoratra mpanatanteraka eo anivon’ny ny tsatòka.

• Filohan’ny Fikambanana Ifanampiana sy ny an’ny Zatovovavy ary ny an’ny Kilonga eo anivon’ny tsatòka.

• Mpitarika ny tanora tokan-tena sy mpitarika ny olon-dehibe tokan-tena eo anivon’ny tsatòka (raha misy nantsoina).

Hatetiny

Isam-bolana raha azo atao.

29.3.9

Ny fivorian’ny kômitin’ny mpitarika ny olon-dehibe eo anivon’ny tsatòka

Tanjona

Mifampidinika mikasika ny fomba hanohanana ireo mpitarika ao amin’ny paroasy eo amin’ny fitondran’izy ireo fanampiana ao amin’ny asan’ Andriamanitra ho an’ny famonjena sy ho an’ny fisandratana. Manomana fomba hanampiana amin’ny fanatanterahana ny vinan’ireo mpitarika eo anivon’ny tsatòka ho an’io asa io ao amin’ny tsatòka.

Ireo mpandray anjara

• Ny fiadidian’ny tsatòka.

• Ny Fiadidian’ny Fikambanana Ifanampiana (sy ny mpitantsoratra raha nisy nantsoina).

• Ny mpikambana ao amin’ny filankevitra avo nomena andraikitra hiara-hiasa amin’ireo kôlejin’ny loholona.

Hatetiny

Araka izay ilaina.

29.3.10

Ny fivorian’ny kômitin’ny mpitarika ny zatovo eo anivon’ny tsatòka

Tanjona

Ireo mpitarika eo anivon’ny tsatòka sy ny zatovo dia (1) mifampinidika mikasika ny fanamafisana orina ny zatovo eo anivon’ny tsatòka sy (2) mandrafitra asa fanompoana sy fiaraha-mientana.

Ankoatra izany ireo mpitarika eo anivon’ny tsatòka dia mifampidinika mikasika ny fomba hanoroana lalana sy hanohanana ireo mpitarika ao amin’ny paroasy amin’ny fampandraisana anjara ny zatovo ao amin’ny asan’ Andriamanitra ho an’ny famonjena sy ho an’ny fisandratana. Manomana fomba hanampiana amin’ny fanatanterahana ny vinan’ny filankevitry ny tsatòka ho an’ny zatovo eo anivon’ny tsatòka izy ireo.

Ireo mpandray anjara

• Mpikambana iray ao amin’ny fiadidian’ny tsatòka.

• Ny fiadidian’ny Zatovolahy eo anivon’ny tsatòka (sy ny mpitantsoratra raha nisy nantsoina).

• Ny fiadidian’ny Zatovovavy eo anivon’ny tsatòka (sy ny mpitantsoratra raha nisy nantsoina).

• Zatovo avy amin’ny paroasy tsirairay ao amin’ny tsatòka rehefa ahitana zavatra izay hahazo tombontsoa avy amin’ny fandraisan’izy ireo anjara ny fivoriana na ny ampahan’ilay fivoriana.

Hatetiny

Araka izay ilaina.

29.3.11

Ny fivoriana filankevitry ny eveka eo anivon’ny tsatòka

Tanjona

Mizara traikefa sy mamaly ireo fanontaniana ary manome torolalana mahakasika manokana ny eveka.

Ireo mpandray anjara

Mpikambana ao amin’io filankevitra io ny filohan’ny tsatòka sy ny eveka sy ny filohan’ny sampana rehetra eo anivon’ny tsatòka. Manatrika ihany koa ny mpitamboky eo anivon’ny tsatòka mba hirakitra an-tsoratra ireo asa ampiandraiketina sy ireo fanapahan-kevitra noraisina.

Hatetiny

Isaky ny telo volana farafahakeliny.

29.5

Fotoam-pivavahana amin’ny fandevenana sy fotoam-pivoriana hafa ho an’ny olona nodimandry

29.5.1

Fitsipika ankapobeny

Antony manan-danja hanaovana ireo fotoam-pivavahana ho an’ny maty ny mijoro ho vavolombelona momba ny drafitry ny famonjena, indrindra fa ny Sorompanavotan’ny Mpamonjy sy ny Fitsanganany tamin’ny maty. Tokony ho traikefa ara-panahy mendrika ireny fotoam-pivavahana ireny.

Ireo mpitarika ao amin’ny Fiangonana dia tsy tokony hampiditra ireo fombafomban’ny fivavahana na ny vondrona hafa ao amin’ireo fotoam-pivavahana ataon’ny Fiangonana ho an’ireo olona nodimandry.

29.5.2

Fanolorana fanampiana ho an’ny fianakaviana

Amin’ny maha-mpianatr’i Jesoa Kristy an’ireo mpitarika ao amin’ny Fiangonana sy ireo mpikambana, izy ireo dia “hiara-malahelo amin’izay malahelo … ary hampionona ireo izay mila fampiononana” (Môzià 18:9). Rehefa misy mpikambana iray maty dia mamangy ilay fianakaviana ny eveka mba hampionona azy ireo.

Manolotra fanampiana avy amin’ireo mpikambana ao amin’ny paroasy ny eveka, isan’izany ny kôlejin’ny loholona sy ny Fikambanana Ifanampiana.

29.5.4

Ireo fotoam-pivavahana amin’ny fandevenana (raha izany no fomba amam-panao)

Ny fotoam-pivavahana amin’ny fandevenana izay tarihin’ny eveka, na ao amin’ny tranon’ny Fiangonana na any amin’ny toerana hafa, dia fivorian’ny Fiangonana sady fivoriana ara-pivavahana. Tokony ho fotoana iainana zavatra ara-panahy izany.

Tokony hanomboka ara-potoana ireo fotoam-pivavahana amin’ny fandevenana. Amin’ny ankapobeny dia tsy tokony haharitra mihoatra ny adiny 1 sy sasany izany, mba ho fanajana ireo izay manatrika.

Ireo fotoam-pivavahana amin’ny fandevenana, raha ny tokony ho izy, dia tsy atao andro alahady.

29.6

Ireo vavaka mandritra ireo fivorian’ny Fiangonana

Tokony ho fohy sy tsotra ary tononina araka izay hitarihan’ny Fanahy ny vavaka ao amin’ireo trano fivorian’ny Fiangonana. Afaka manolotra vavaka fanombohana na vavaka famaranana ny mpikamban’ny Fiangonana rehetra efa vita batisa. Afaka mivavaka any amin’ny Kilonga ny ankizy tsy vita batisa.

29.7

Fampitana an-tsary ireo fivoriana sy fanaovana fivoriana amin’ny alalan’ny visioconférence

Afaka manome lalana, ho tranga maningana, ny eveka mba hanaovana fampitana an-tsary mivantana ny fivoriana fanasan’ny Tompo sy ny fotoam-pivavahana amin’ny fandevenana ary ny fanambadiana atao ao amin’ny trano fivorian’ny Fiangonana.

Tsy tokony ho tafiditra ao anatin’ny fampitana an-tsary mivantana ny fivoriana fanasan’ny Tompo ny fanatanterahana ny fanasan’ny Tompo.

Amin’ny fivoriana sasany dia azon’ny eveka na ny filohan’ny tsatòka atao ny manome lalana ireo mpikambana tsy afaka manatrika mivantana handray anjara amin’ny fomba virtoaly. Ireto avy no fivoriana mety ho tafiditra amin’izany:

• Fivorian’ny mpitarika, toy ny fivorian’ny fiadidiana na ny filankevitra.

• Fivorian’ny Kôlejy sy Fikambanana Ifanampiana ary Zatovovavy.

• Ireo kilasin’ny Sekoly Alahady.

• Ireo kilasin’ny Kilonga sy ny fotoam-pihirana.

29.8

Fakana sary sy firaketana amin’ny horonan-tsary ireo fivoriana

Mba hihazonana ny fahamasinan’ireo fivoriana ao amin’ny Fiangonana dia tsy tokony hisy haka sary na hanao firaketana amin’ny horonan-tsary ireo fivoriana fanasan’ny Tompo na ireo fihaonamben’ny tsatòka.

Mba hahitana fampahalalana mikasika ny fampitana an-tsary ireo fivoriana dia jereo ny 29.7.