Vaaiga Aoao mo Matua

E toatele matua e le o mautinoa pe faapefea ona aoao a latou fanau e uiga i ponokalafi. O isi o loo atugalu pe faapefea ona fesoasoani i fanau o loo tauivi ma le faaaogaaga o ponokalafi. E mafai ona e fesoasoani e a’otau ma lagolago lau fanau e ala i le talanoa atu ia i latou e uiga i feusuaiga maloloina, aoao i latou i auala e sili ona puipuia ai i latou lava mai i le tosina atu i ponokalafi, ma fesoasoani ia i latou e aoao i auala e tali talafeagai atu ai pe a latou fetaiai ma ponokalafi.

Afai e te maua ua aofia ai lau tama i ponokalafi, e tatau ona e tali atu ma le alofa. E pei ona sa aoao mai e Sister Joy D Jones, “Afai o le a i ai so tatou faamoemoe e tafiesea [ponokalafi] mai le lalolagi, o le alofa lava e tatau ona taulamua atoa ma le faavae o a tatou taumafaiga uma.”¹ Atonu e te lagona le ofo, tiga, ita, po o le le fiafia, ae o le tali i se tulaga le lelei o le a faateleina ai lagona o le maasiasi ma le fenumiai o lau tama. E ono taunuu ai foi ina lagona e lau tama e faapea, e le mafai ona sau ia te oe ma ni ona aafiaga, lagona, ma atugaluga.