“Se a se mea e tatau ona ou aoao atu i la’u tama e fai pe a vaai i ponokalafi?” Fesoasoani mo Matua (2021)

“Se a se mea e tatau ona ou aoao atu i la’u tama e fai pe a vaai i ponokalafi?” Fesoasoani mo Matua

Se a se mea e tatau ona ou aoao atu i la’u tama e fai pe a vaai i ponokalafi?

Ua tuufaatasia e le Ekalesia ia manatu mai le au taiulu atamama e atia’e ai se vitio e fesoasoani ai i matua e faama’ite talanoaga e uiga i ponokalafi ma tamaiti o vaitausaga o le Peraimeri.

5:59

Ua aoao mai e lenei vitio e faapea:

O o tatou tino o se meaalofa mai le Atua.
O le tausiga o o tatou tino e aofia ai le tausia o lo latou saogalemu.
O ponokalafi ua faauigaina o ata o tagata e itiiti pe leai ni lavalava o faia. E tele nofoaga tatou te ono vaai ai i ponokalafi. O ponokalafi foi e mafai ona tele atu nai lo na o ata.
E lua vaega o o tatou fai’ai: o se vaega e mafaufau ai ma se vaega e lagona ai. E toso e ponokalafi le vaega o lagona e taumafai ai ia uunai tatou ia tilotilo atili pea , ae e mafai ona tatou faaaoga le vaega e mafaufau ai, e tilotilo ese ai.
Na aumai e le Atua ia i tatouia lagona malolosi o le fiailoa ma le tosinaga e fesoasoani ia i tatou ia mananao ai e faaipoipo ma foafoa aiga.
Pe a tatou vaai i ponokalafi, e ao ona tatou faia ni mea se tolu:
- Ia faailoa ma fai ane, “O le ponokalafi lea.”
- Tape pe faliu ese.
- Ta’u i se tasi o matua po o se tagata matua faatuatuaina.

Ina ia faamaite talanoaga ma talavou, e ono mananao matua e matamata le vitio “How to Talk to Your Kids about Pornography.”

Ua aoao mai e lenei vitio e faapea:

O o tatou lagona tauafinea’itane e lelei, ma sa tuuina mai ia i tatou e le Atua. Pe a faasoaina ma le talafeagai i totonu o le faaipoipoga, e fesoasoani nei lagona e tuufaatasia ai ulugalii ma foafoa ni aiga.
E taua talanoaga e le taotaomia ma le alofa ma tupulaga: E i ai ia i tatou uma le fiailoa faalenatura e uiga i le feusuaiga. O lau sini o se matua o le saunia e tuuina atu le malamalama ma le lagolago. Pe a oo ina lagona e tupulaga e mafai ona latou talanoa i se tagata matua faatuatuaina, latou te ono faasoa atu a latou fesili, aafiaga ma lagona.
E toatele tupulaga e mananao e fiailoa pe aisea e leaga ai ponokalafi. E mafai ona e talanoaina le ala o lo o faaalia ai e ponokalafi ia sootaga sese lea e faaalia ai tagata o ni mea faitino mo faitogafiti nai lo o ni tagata moni e i ai mafaufauga ma lagona. E mafai foi ona e talanoaina le ala e faalavefau ai ponokalafi i le atina’ega o le fai’ai o se talavou a o ia aoao i ala e faia ai faaiuga.¹
Afai na matamata lau talavou i ponokalafi, e le faapea ai la ua fai ma ana vaisu ia ponokalafi.

O le aiga o le nofoaga sili lea mo fanau e aoao ai e uiga ma talanoaina ai tulaga feusuaiga. E aofia i lenei mea le aoao e uiga i le pa’i ma faananauga lelei, upu alofa, ma le taua o tulaga feusuaiga i totonu o se faaipoipoga. A o oulua fesoasoani i le lua tama ia maua se malamalama maloloina e uiga i tulaga feusuaiga, na te aoaoina le ala e iloatino ai le sa’o ma le sese. Ua e fesoasoani foi e saunia lau tama mo ana matafaioi mulimuli ane o se toalua ma se matua.

Manatu Faaopoopo

Fesoasoani i lau fanau ia malamalama i le sootaga i le va o lagona feusuaiga latou te maua pe o le a atia’e ma amioga feusuaiga e tatau ona faapolopolo mo ulugalii ua faaipoipoina. Aoao atu i latou e le faapea ua i ai so latou faaletonu ona ua i ai so latou fiailoa i tulaga feusuaiga pe ona ua latou vaai i ponokalafi. O le vitio “Replacing Myth with Truth: A Better Way to Talk to Your Kids About Pornography” e mafai ona fesoasoani e talaia la outou talanoaga.² E mafai foi ona e manatulia ou lava aafiaga i le aoao ai e uiga i tulaga feusuaiga. O le a se mea o le a e toe faia? O le a se mea e te moomoo na ese se auala na fai ai ?

Fesili i lau fanau pe o a ni o latou lagona pe a latou faalogo i se tasi o talanoa e uiga i feusuaiga po o le, pe a latou vaai i se ata e le talafeagai. Talanoa i auala e tali atu ai i tulaga—i totonu ma fafo atu o le aiga—i tulaga e le o faaalia ai feusuaiga ma tulaga feusuaiga i se ala faaaloalo pe faagaeetia.

Faaali ia ata o lau fanau po o le aiga. Faasoa atu ou lagona ina ua fananau mai lau fanau pe e uiga foi i le olioli ma le faamalieina latou te aumaia i lou olaga. Faamatala atu faapea o le feusuaiga e tatau ona avea o se faailoaga o le alofa ma e mafai ai ona fananau mai fanau ma aiga ia faatasia. Tagai i le “O Le Aiga: O se Folafolaga i le Lalolagi” e fesoasoani ai e aoao atu e uiga i le aoaoga faavae o le faaipoipoga.