E faapefea ona ou talanoa i la’u tama e uiga i tulaga feusuaiga maloloina?

E toatele matua e lagona le musua po o le matamumuli e talanoa ia latou fanau e uiga i tulaga feusuaiga, pe e fefefe foi nei avea le talanoa ia latou fanau e uiga i tulaga feusuaiga ma mea o le a fagua ai a latou amioga feusua’i. O le mea moni o le, afai e te le talanoa i lau fanau e uiga i tulaga feusuaiga, o le a latou aoao e uiga i ai mai i se isi punavai. O le faia e le aunoa o talanoaga ma lau fanau e uiga i autu taua e pei o tulaga feusuaiga maloloina, e te fesoasoani ai ia i latou ia malamalama o oe o se tagata e saogalemu ona sulufai i ai.

O le toatele o tamaiti e faalenatura le fiailoa, ma e latou te mananao ia malamalama i lagona faaletagata, na tuuina mai e le Atua ua latou iloaina. E mafai ona e tapenaina oe lava e talanoa i lau fanau e uiga i tulaga feusuaiga e ala i le manatuaina pe sa faape’ī oe i le taimi o lou matua pei o i latou. O a nisi o lagona sa oo ia te oe? O a ni mafaufauga, fesili, po o ni ou atugaluga sa i ai? O fea na e saili ai mo ni faamatalaga? O le a se mea sa e moomoo maimau pe ana e faalogo i ai pe na aoaoina ai oe?

E le afaina pe afai e te le o mautinoa pe o le a le ala sili e taulima ai nei talanoaga. E mafai ona e faaaogaina lou fesaēgagofie e fausia ai lau sootaga ma lau fanau. E mafai e tamaiti ona lagona lou alofa pe a e faamaoni ma agatonu e fesootai ma i latou, e ui i soo se faalelagolelei atonu o e te lagonaina.

Ina ia faia se fesootaiga e le taotaomia, e mafai ona e:

• Amata a o laiti lau fanau e ala i le valaauina o vaega o le tino e ala i o latou igoa sao. E aoaoina e lenei mea tamaiti e uiga i o latou tino ma tuuina atu ia i latou le gagana latou te manaomia ia maloloina ma malamalama ai.

• Tuu atu i lau fanau ia iloa e mafai ona latou fesili atu ia te oe i soo se fesili, onae taumafai lea e aua le mateletele pe faapipii ai le maasiasi i a latou fesili po o ni mea e ta’uta’u atu. Ia patipatia lo latou talanoa atu ia te oe, faaali atu ia i latou le alofa ma le lagolago, ma ia fai le mea sili e te mafaia e fesootai atu ai pea.

• Aloese mai le faaaogaina o upu faafaatusa mo tulaga feusuaiga. E manaomia e fanau ni faamatalaga e tuuina atu i se auala manino ma faamaoni. Mo se faataitaiga, o nisi o le autalavou e faamatala e uiga i ni lesona lea e faatusaina ai le solia o le tulafono o le legavia i le pulu ua lamuina po o meaai e tuufaasolo ane mai lea tagata i lea tagata i le potu ma o lea ua le toe manaomia ai. E ui ina lelei le faamoemoe, ae o nei ituaiga o upu faafaatusa e masani ona faalauiloa atu ai le fefe i tulaga feusuaiga po o lagona o le maualalo po o le leai o se taua o le tagata lava ia.

• Fai ni lesona i afiafi faaleaiga e faatatau i autu e fesootai i tulaga feusuaiga ma tuu atu i lau fanau e aoao atu pe a o latou lagona ua saunia. O autu e mafai ona aofia ai taimi o le talavou, foliga o le tino, ma itu lelei o tulaga feusuaiga.

• Talanoa i auala e avea ai le i ai o lagona feusuaiga ma le faaosofia o lagona feusuaiga o ni tulaga masani. E le manaomia e fanau ona faatino ia lagona ma faalogona ae e mafai ona latou magafagafa i ai. O lona uiga o le matauina o lagona feusuaiga ae le o le faamasinoina sese o na lava lagona. Ua faaalia i suesuega o le faata’ita’ia o le magafagafa e mafai ona fesoasoani i fanau e faia ai filifiliga sili ona lelei e ogatasi ma o latou tulaga faatauaina ma sini.

• Taumafai aua e te tali atu ma le inoino po o le ita pe a faia e tamaiti le lote o ia lava, po o talavou ua ta’usa’o mai ua puleiletino. O le ala e tali atu ai matua i nei amioga e aafia ai lagona o tamaiti ma talavou ia i latou lava ma o latou tulaga feusuaiga.

• Aoao lau fanau i le aisea o loo i tua atu o tulaga faatonuina e fesootai ma sootaga ma tulaga feusuaiga. A o e aoao atu nei tulaga faatonuina ma mafuaaga e taua ai, ia manatua e taua le faia o lena mea e aunoa ma le faamalosia ai o le maasiasi po o le fefe.¹

Faamatalaga

1. O itu faamamafa na sii mai ma fetuunai mai ia Laura M. Padilla-Walker ma Meg O. Jankovich, “Faapefea, O Anafea, ma le Pe Aisea: Talanoa i Lau Fanau e uiga i Feusuaiga,” Liahona, Aok. 2020.