Te u tokoniʻi fēfē ʻeku tamá ke fakatomala mo ngāueʻi e ngaahi faingataʻá?

ʻI he tupu mo fakalakalaka hoʻo tamá, ʻoku ngalingali te ne aʻusia ha ngaahi faingataʻa ʻi he ponokalafí. Te ke lava ʻo akoʻi hoʻo tamá ke mamahi koeʻuhí ko e ngaahi fehalākí, fai ha fakalelei ʻo ka fie maʻu, pea fekumi ki ha fakamolemole. ʻI hoʻo hoko ko e mātuʻá, te ke lava ʻo fili pe te ke fie faleʻi mo ha pīsope, palesiteni ʻo e Kau Finemuí, pe ko ha toe maʻu mafai falalaʻanga ʻo e Siasí. Vakai, Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.6.13: “ʻOku faʻa feʻunga pē ʻa e faleʻi fakatāutahá mo e ngaahi fakangatangata angamaheni ki he mēmipasipí ʻi he taimi ʻoku tokoniʻi ai ha taha ke fakatomala mei hono fakaʻaongaʻi ʻo e ponokalafí.”

ʻOku faʻa hoko ʻa e liliu tuʻuloá ʻi he tokanga taha ki he ngaahi liliu fakakongokongá kae ʻikai ko e ngaahi ola ʻoku hoko ʻi he taimi pē ko iá. ʻI hoʻo feinga ko ia ke vakai ki hoʻo tamá ko ha tokotaha taʻengata ʻoku taʻefakangatangata hono mahuʻingá, te ke lava ʻo tokoniʻi ia ke tupulaki mo fakalakalaka. Te ke lava ʻo tokoniʻi hoʻo tamá ke ne ʻiloʻi ʻa e mahuʻinga ʻo e ngāue ʻokú ne faí kae ʻikai loto-siʻi ʻi he ngaahi faingataʻa ʻe hoko ʻi he fonongá.

Ngaahi Fakakaukau Lahi Angé

Poupouʻi hoʻo tamá ke tauhi ha tohinoa pea hiki ʻene ngaahi fakakaukaú, ngaahi ongó mo e ngaahi ʻamanaki lelei ki he kahaʻú.

Feinga ke poupouʻi hoʻo tamá ʻi he ngaahi tafaʻaki kotoa pē ʻo ʻene moʻuí. Aleaʻi e founga te ke lava ai ʻo tokoniʻi hoʻo tamá ke fakatupulaki ha ngaahi ʻulungaanga lelei mo mahuʻinga, mo e ngaahi taukei kehe, kae ʻikai nofotaha pē ʻi hono ikunaʻi ʻo e ponokalafí. Ke maʻu ha ngaahi fakakaukau lahi ange, lau ʻa e “Cheering Your Children On (Ko Hono Poupouʻi Hoʻomou Fānaú)”¹ mo e “Giving Kids a Growth Mindset (Ko Hono ʻOange ki he Fānaú ha Fakakaukau ʻoku Tupulakí).”²

Lau mo hoʻo tamá pe fāmilí ʻa e talanoa ʻo ʻAlamā ko e Siʻí ʻi he Mōsaia 27 mo e ʻAlamā 36. Kole ki ha mēmipa ʻo e fāmilí ke ne tā ha laine mei ʻolunga ki lalo ʻi lotomālie ʻo ha laʻipepa. ʻI he tafaʻaki ʻe taha ʻo e laʻipepá, ʻe lava ke lisi ai ʻe homou fāmilí ʻa e meʻa ʻoku akoʻi mai ʻe he talanoa ko ʻení fekauʻaki mo e founga ke fakatomala aí. ʻI he tafaʻaki ʻe taha ʻo e laʻipepá, ʻe lava ke lisi ai ʻe homou fāmilí ʻa e meʻa ʻoku akoʻi mai ʻe he talanoa ko ʻení fekauʻaki mo e ngaahi tāpuaki ʻo e fakatomalá. Ke maʻu ha ngaahi fakakaukau lahi ange, vakai ki he “How Can I Support My Child in His or Her Repentance Process?”

Ngaahi Maʻuʻanga Fakamatalá

1. Amie Leavitt, “Cheering Your Children On,” ChurchofJesusChrist.org.

2. “Giving Kids a Growth Mindset,” ChurchofJesusChrist.org.