Vakai Fakalūkufua maʻá e Ngaahi Mātuʻá

ʻOku tokolahi e ngaahi mātuʻa ʻoku ʻikai ke nau fakapapauʻi e founga ke akoʻi ʻaki ʻenau fānaú fekauʻaki mo e ponokalafí. ʻOku hohaʻa ha niʻihi ki he founga ke tokoniʻi ai e fānau ʻoku fefaʻuhi mo hono fakaʻaongaʻi ʻo e ponokalafí. Te ke lava ʻo tokoni ke akoʻi mo poupouʻi hoʻo fānaú ʻaki haʻo talanoa kiate kinautolu fekauʻaki mo e tōʻonga fakasekisuale ʻoku leleí, akoʻi kiate kinautolu e founga ke maluʻi lelei ange ai kinautolu mei he sio ʻi he ponokalafí, mo tokoniʻi kinautolu ke ako e meʻa totonu ke nau fakahoko ʻi he taimi ʻoku nau fehangahangai ai mo e ponokalafí.

Kapau ʻokú ke ʻiloʻi kuo kau hoʻo tamá ʻi he ponokalafí, ʻoku mahuʻinga ke ke tali ʻi he ʻofa. Hangē ko ia ne akoʻi ʻe Sisitā Soi D. Sōnasí, “Kapau te tau maʻu ha ʻamanaki lelei ke fakangata ʻa e [ponokalafí] mei he māmaní, kuo pau ke muʻomuʻa ʻa e ʻofá pea hoko ia ko e makatuʻunga ʻo ʻetau ngaahi feinga kotoa pē.”¹ Mahalo te ke ongoʻi ʻohovale, loto-mamahi, pe ʻita, ka ʻe hanga ʻe hano tali ia ʻi he founga ʻoku ʻikai leleí ʻo fakatupulekina e ngaahi ongoʻi mā mo e puputuʻu hoʻo tamá. ʻE malava pē foki ke iku ia ki ha ongoʻi ʻe hoʻo tamá he ʻikai ke ne lava ʻo haʻu kiate koe mo e ngaahi aʻusia, ngaahi ongo, mo e ngaahi meʻa ʻokú ne hohaʻa ki aí.