“Unsay angay nga paagi sa akong pagsanong kon madiskobrehan nako nga ang akong anak nakakita og pornograpiya?” Tabang alang sa mga Ginikanan (2021)
“Unsay angay nga paagi sa akong pagsanong kon madiskobrehan nako nga ang akong anak nakakita og pornograpiya?” Tabang alang sa mga Ginikanan
Unsay angay nga paagi sa akong pagsanong kon madiskobrehan nako nga ang akong anak nakakita og pornograpiya?
Kon madiskobrehan ninyo nga ang inyong anak nakakita og pornograpiya, kinahanglan sundon ninyo ang ehemplo sa Langitnong Amahan bahin sa pagkaginikanan. Pipila sa mga bata tingali dili mosulti sa ilang mga ginikanan kon makakita sila og pornograpiya, samtang ang uban gusto nga mosulti mahitungod niini. Kon ang mga bata mobati nga luwas ug gisuportahan, mas dako ang kalagmitan nga sila mopaambit sa ilang mga pagbati ug mga kasinatian.
Sa kasagaran kon ang mga bata motan-aw og pornograpiya, nagbuhat sila niini aron makab-ot ang pihong mga panginahanglan. Kini nga mga panginahanglan lahi ug piho alang sa matag bata apan posibling maglakip og sekswal nga kakuryoso o tinguha nga mabalda gikan sa kahingawa ug depresyon. Samtang magtinguha kamo sa pagsabot sa indibidwal nga mga panginahanglan sa inyong anak, matabangan ninyo siya nga makakita og mga solusyon ug makab-ot kana nga mga panginahanglan sa maayong mga paagi. Kini posible usab nga usa ka maayong panahon nga mapalig-on ang pagpanudlo mahitungod sa tahas sa maayong sekswalidad ug kon sa unsang paagi ang pornograpiya naghulagway og sayop nga impormasyon mahitungod sa sekswal nga mga relasyon. Kini nga mga matang sa mga panagsultihanay tingali magkinahanglan og bag-ong mga kahanas isip ginikanan, sama sa mga pagpangutana sa linahi nga paagi ug paggahin og panahon nga maminaw. Pwede usab nga mogamit kamo og mga sitwasyon nga inyong nasugatan sa matag adlaw nga kinabuhi sa paghisgot og maayong sekswalidad. Makatabang ang paghisgot niini nga mga hilisgotan sa usa ka komportable ug mahigugmaon nga palibot kay sa mapugsanon o masuk-anon.
Dugang nga mga Ideya
Hunahunaa ang inyong kaugalingon nga mga pagbati bahin sa sekswalidad ug pornograpiya. Sa unsang paagi ninyo matubag ang bisan unsang mga kabalaka nga moabot kaninyo kabahin sa paghisgot niini nga mga hilisgotan sa dili pa maistorya ang inyong mga anak?
Tinguhaa ang pagsabot sa kalainan tali sa kaulaw ug pagbati nga sad-an ug kon unsaon sa pag-ila ug pagpasabot niana nga kalainan (tan-awa sa “It Isn’t a Sin to Be Weak”1 ug “How Do I Help My Child Understand the Difference between Shame and Guilt?”).
Tinoa ang mga sumbanan sa maayong komunikasyon nga mahimong mapalambo sa inyong pamilya. Sama pananglit, makahimo ba mo sa pagtinan-away nga mata sa mata, mangutana og dinasig nga mga pangutana, o mas mahinuklogon ug minos ang pag-react atol sa pagpaminaw? Sa unsang paagi inyong mapalambo ang komunikasyon kauban sa inyong anak? (Tan-awa sa “Communicating with Love.”)2
Mga Kapanguhaan sa Simbahan ug sa Komunidad
Pipila sa mga kapanguhaan nga nalista sa ubos wala gimugna, gimintinar, o gikontrol sa Ang Simbahan ni Jesukristo sa mga Santos sa Ulahing mga Adlaw. Samtang kini nga mga materyal gituyo aron magsilbing dugang nga mga kapanguhaan, ang Simbahan wala mag-endorso og bisan unsang sulod nga wala mahisubay sa mga doktrina ug mga pagtulun-an niini.