“Unsaon nako sa pag-istorya ang akong anak mahitungod sa maayo nga sekswalidad?” Tabang alang sa mga Ginikanan (2021)

“Unsaon nako sa pag-istorya ang akong anak mahitungod sa maayo nga sekswalidad?” Tabang alang sa mga Ginikanan

Imahe

pamilya nga nanglakaw sa gawas

Unsaon nako sa pag-istorya ang akong anak mahitungod sa maayo nga sekswalidad?

Daghang ginikanan ang magpanuko o maulaw nga makigsulti sa ilang mga anak mahitungod sa sekswalidad, o mahadlok sila nga ang pagsulti ngadto sa ilang mga anak mahitungod sa sekswalidad makapukaw unya sa ilang sekswal nga kinaiya. Ang tinuod mao, nga kon dili ka makig-istorya sa inyong mga anak mahitungod sa sekswalidad, makat-onan nila kini gikan sa ubang tinubdan. Pinaagi sa paghimo og regular nga pagsultihanay kauban sa inyong mga anak mahitungod sa importanting mga hilisgotan sama sa maayong sekswalidad, matabangan ninyo sila sa pagsabot nga kamo ang luwas nga tawo nga kaduolan.

Kadaghanan sa mga anak natural ang kakuryuso, ug gusto sila nga makasabot sa natural, sa hinatag sa Dios nga mga pagbati nga ilang nasinati. Makaandam kamo sa inyong kaugalingon sa pagpakigsulti sa inyong mga anak mahitungod sa sekswalidad pinaagi sa paghinumdom kon unsa kamo dihang kamo susama pa nila og edad. Unsa ang pipila ka mga pagbati ang inyong nasinati? Unsa nga mga hunahuna, mga pangutana, o mga kabalaka ang diha kaninyo? Diin man kamo nangita og impormasyon? Unsa man ang inyong gipanghinaot nga unta inyong nadungog o natudlo kaninyo?

OK ra kon mobati kamo og kawalay kasiguroan mahitungod sa kon sa unsang paagi ninyo madumala kini nga mga panagsultihanay. Mahimo ninyong gamiton ang inyong pagkahuyang sa paglig-on sa inyong relasyon sa inyong mga anak. Ang mga bata mobati sa inyong gugma samtang magmatinuoron kamo ug sinsero sa pagpakigsulti kanila, bisan unsa kadili komportable ang inyong pagbati.

Aron makapasiugda og bukas nga komunikasyon, kamo makahimo sa:

Pagsugod samtang ang inyong mga anak bata pa pinaagi sa pagngalan sa mga parte sa lawas sa ilang husto nga mga ngalan. Kini magtudlo sa mga bata mahitungod sa ilang lawas ug maghatag diha kanila sa pulong nga ilang gikinahanglan aron mahimong himsog ug may kahibalo.
Pahibaloa ang inyong mga anak nga mahimo silang mangutana kaninyo og bisan unsang mga pangutana, ug dayon paningkamot nga dili manghinobra ang pag-react o mapakaulawan sila sa ilang mga pangutana o mga pagtug-an. Ikalipay nga sila nakig-istorya kaninyo, ipakita sa ilaha ang gugma ug suporta, ug buhata ang tanan nga mapadayon ang pagpakig-istorya kanila.
Likayi ang paggamit og mga sumbingay alang sa sekswalidad. Ang mga bata nagkinahanglan og impormasyon nga gipresentar sa klaro ug matinuoron nga paagi. Sama pananglit, ang ubang kabatan-onan naghisgot bahin sa mga leksyon diin ang pagsupak sa balaod sa kaputli gitandi sa giusap nga chewing gum o pagkaon nga gipasapasa gikan sa usa ka tawo ngadto sa usa ka tawo nga naglibot sa kwarto ug busa dili na madanihon. Bisan og maayo ang intensyon, kini nga mga matang sa sumbingay sa kasagaran mougmad og kahadlok sa sekswalidad o sa mga pagbati nga ubos ug dili na gayod matarong og balik ang kaugalingong bili.
Maghimo og mga leksyon sa home evening mahitungod sa mga hilisgotan nga may kalabotan sa sekswalidad ug tugoti nga ang inyong mga anak maoy motudlo kon sila mobati nga andam na. Ang mga hilisgotan tingali maglakip sa ilang sogod nga pagkahingkod, hitsura sa lawas, ug positibong mga aspeto sa sekswalidad.
Hisgoti kon sa unsang paagi nga normal ang sekswal nga mga pagbati ug sekswal nga gana. Ang mga bata dili kinahanglan nga mosanong niana nga mga pagbati ug mga sensasyon apan magmahunahunaon mahitungod niini. Nagpasabot kini sa pagmatikod sa sekswal nga mga pagbati apan dili sa negatibong paghukom niini. Ang pagsiksik nagpakita nga ang kaanad sa pagkamahunahunaon makatabang sa mga bata sa paghimo og mas maayong mga pagpili nga nahiuyon sa atong mga mithi ug mga tumong.
Paningkamoti ang dili pag-react uban sa kalagot o kasuko kon ang mga bata nakahimo og paghikap-hikap sa ilang kaugalingon o mitug-an ang kabatan-onan nga naka-masturbate. Kon giunsa sa pagsanong sa mga ginikanan kini nga mga kinaiya makaapekto sa unsay pagbati sa mga bata ug kabatan-onan mahitungod sa ilang kaugalingon ug sa ilang sekswalidad.
Tudloi ang inyong mga anak bahin sa ngano nga nagpaluyo sa mga sumbanan nga may kalabotan sa mga relasyon ug sekswalidad. Samtang itudlo ninyo kini nga mga sumbanan, ug ang mga rason nganong bililhon kini, hinumdomi nga importante nga mabuhat kana nga dili makamugna og kaulaw o kahadlok.¹