Unsay angay nakong itudlo nga ipabuhat sa akong anak kon ugaling makakita siya og pornograpiya?

Ang Simbahan adunay gitingob nga mga ideya gikan sa nanguna nga mga eksperto aron makapalambo og usa ka video sa pagtabang sa mga ginikanan nga makapasiugda og mga diskusyon mahitungod sa pornograpiya sa mga bata nga Primary ang pangidaron. What Should I Do When I See Pornography [Unsay Akong Buhaton kon Makakita ko og Pornograpiya]?”).

Kini nga video nagtudlo nga:

• Ang atong lawas usa ka gasa gikan sa Dios.

• Ang pag-atiman sa atong lawas maglakip sa paghimo niini nga luwas.

• Ang pornograpiya nagpasabot isip mga hulagway sa mga tawo nga gamay ra o walay gisul-ob nga sinina. Adunay daghang dapit diin kita makakita og pornograpiya. Ang pornograpiya posible usab nga mas labaw pa kay sa mga hulagway lamang.

• Adunay duha ka bahin sa atong utok: ang usa mao ang para sa panghunahuna ug ang usa ka bahin mao ang para sa pagbati. Ang pornograpiya mobira sa pagbati nga bahin aron mas ganahan pa kitang motan-aw pa og daghan, apan makagamit kita sa panghunahuna nga bahin aron ilayo ang atong panan-aw.

• Gihatagan kita sa Dios og kusog nga mga pagbati sa pagkakuryuso ug pagkaagni aron matabangan kita nga magtinguha sa pagminyo ug maghimo og mga pamilya.

• Kon makakita kita og pornograpiya, angay nga kita mobuhat og tulo ka butang:

  • Ilhon kini ug moingon nga, “Pornograpiya kana.”

  • Palongon kini o mopalayo.

  • Sultihan ang ginikanan o kasaligan nga hamtong.

Aron makasugod og mga diskusyon uban sa mga tin-edyer, ang mga ginikanan tingali mas ganahan nga motan-aw sa video nga “How to Talk to Your Kids about Pornography [Unsaon Pagpakigsulti sa mga Bata mahitungod sa Pornograpiya].”

Kini nga video nagtudlo nga:

• Ang atong sekswal nga mga pagbati positibo ug gihatag kini sa Dios kanato. Kon mapaambit kini sa tukmang paagi diha sa kaminyoon, kini nga mga pagbati makatabang sa paghiusa sa mga magtiayon ug makamugna og mga pamilya.

• Ang dayag, mapinanggaon nga dayalogo kauban sa mga tin-edyer mahinungdanon kaayo. Tanan kita adunay natural nga pagkakuryuso mahitungod sa sex. Ang imong tumong isip ginikanan mao ang pagsangkap og kahibalo ug suporta. Kon ang mga tin-edyer mobati nga puwede silang mosulti ngadto sa kasaligan nga hamtong, mas malagmit nga mopaambit sila sa ilang mga pangutana, mga kasinatian, ug mga pagbati.

• Daghang mga tin-edyer gustong mahibalo kon ngano nga ang pornograpiya makadaot. Mahimo nimong hisgotan kon sa unsang paagi ang pornograpiya naghulagway og sayop nga mga pakigrelasyon diin ang mga tawo gipakita isip mga butang nga gimaniobra kaysa isip usa ka tinuod nga mga tawo nga adunay mga hunahuna ug mga pagbati. Puwede usab nimong hisgotan kon sa unsang paagi ang pornograpiya mobabag sa paglambo sa utok sa usa ka tin-edyer samtang siya nagkat-on kon unsaon sa paghimo og mga desisyon.¹

• Kon ang imong tin-edyer nagtan-aw og pornograpiya, wala kana magpasabot nga siya naadik na sa pornograpiya.

Ang panimalay mao ang labing maayo nga dapit alang sa mga anak sa pagkat-on ug paghisgot mahitungod sa sekswalidad. Maglakip kini sa pagkat-on mahitungod sa maayo og intensyon nga paghikap ug pagpangga, mahigugmaong mga pulong ug sa kaimportante sa sekswalidad diha sa kaminyoon. Samtang tabangan nimo ang imong anak nga makaangkon og maayong panabot bahin sa sekswalidad, siya makakat-on kon unsaon sa pag-ila tali sa eksakto ug sa sayop. Ikaw usab makatabang sa pag-andam sa imong anak alang sa iyang umaabot nga mga tahas isip kapikas ug ginikanan.

Dugang nga mga Ideya

Tabangi ang inyong mga anak sa pagsabot sa relasyon tali sa ilang sekswal nga mga pagbati o ipalambo nga mga sekswal nga kinaiya nga kinahanglang ireserba alang sa minyo nga mga magtiayon. Sultihi sila nga dili sila abnormal tungod kay may interes sila sa sekswalidad o tungod kay tingali nakakita sila og pornograpiya. Ang video nga “Replacing Myth with Truth: A Better Way to Talk to Your Kids About Pornography [Pulihan og Kamatuoran ang Tumo-tumo nga mga Istorya: Mas maayo nga Paagi sa Pagsulti sa Inyong mga Bata Kabahin sa Pornograpiya]” tingali makatabang sa paggiya sa inyong pagsultihanay.² Mahimong ikonsiderar usab ninyo ang inyong kaugalingong mga kasinatian sa pagkat-on mahitungod sa sekswalidad. Unsa ang inyong sublion? Unsa ang inyong gipanghinaot nga unta lahi ang inyong gibuhat?

Pangutan-a ang inyong mga anak kon unsay ilang pagbati kon makadungog sila og tawo nga maghisgot mahitungod sa pakighilawas o kon makakita sila og dili angay nga imahe. Hisgoti ang mga paagi sa pagtubag sa mga sitwasyon—diha man sa sulod o sa gawas sa balay—diin ang pakighilawas ug sekswalidad wala ipadayag sa usa ka matinahuron o makabayaw nga paagi.

Ipakita ang mga hulagway sa imong mga anak o pamilya. Ipaambit ang imong mga pagbati mahitungod sa dihang ang imong mga anak natawo o mahitungod sa kalipay ug katumanan nga ilang gidala sa imong kinabuhi. Ipasabot nga ang pakighilawas gituyo nga usa ka ekspresyon sa gugma ug nga kini makapahimo sa mga anak nga matawo ug ang mga pamilya magkauban sa hangtod. Gamita ang “Ang Pamilya: Usa ka Pamahayag ngadto sa Kalibutan” alang sa tabang sa pagtudlo mahitungod sa doktrina sa kaminyoon.

Mubo nga mga Sulat

1. “How Pornography Affects the Teenage Brain—An Infographic [Sa Unsang paagi ang Pornograpiya Makaapekto sa Utok sa Linghod nga mga Batan-on—Usa ka Hulagway nga Puno sa Impormasyon],” councilonrecovery.org.

2. Jason S. Carroll ug uban pa, “Replacing Myth with Truth: A Better Way to Talk to Your Kids About Pornography [Pulihan og Kamatuoran ang Tumo-tumo nga mga Istorya: Mas Maayo nga Paagi sa Pagpakigsulti sa Inyong mga Anak Kabahin sa Pornograpiya],” ldsliving.com.