Te ’atu’atura’a i te mau fare purera’a

Mau tāmāra’a fare purera’a

E ti’a i te mau fare purera’a a te ’Ēkālesia ’ia ’atu’atuhia nā roto i te rāve’a e fa’a’ite rā i te nātura ’e te ’ōpuara’a mo’a. Nā te feiā fa’atere nō terā iho vāhi, te mau melo ’e te mau pupu fa’atere nō te mau vāhi patuhia, te hōpoi’a ’āmui ’ia vai mā noa ’e te tura te fare purera’a ’e te ’āua.

Te tuha’a ’ohipa a te mau melo

Tē anihia nei i te mau melo ’ia amo i te hōpoi’a, nā muri i te pupu fa’atere nō te mau vāhi patuhia, nō te tāmāra’a ’e te ’atu’atura’a i te fare purera’a. Te fā mātāmua o te ’āmuira’a mai te melo, ’o te fa’afāna’ora’a ïa ’e te ha’amaita’ira’a i te mau melo ato’a—tae noa atu i te feiā ’āpī ’e te melo paruparu—nā roto i te hōro’ara’a i te mau rāve’a tāvinira’a. E ha’apuai ’e e fa’ahōhonu ato’a te reira i te fa’atura i te mau fare ha’amorira’a a te Fatu.

E fa’anahohia te tuha’a ’ohipa a te mau melo ’e e ha’apa’ohia i raro a’e i te fa’aterera’a a te peresidenira’a titi. E nehenehe e pi’ihia te mau ti’a ha’apa’o fare a te titi ’e a te pāroita nō te tauturu i te ha’api’i ’e i te fa’aau i teie hōpoi’a. (Hi’o i te ha’amāramaramara’a nō ni’a i te fa’anahora ’ohipa.)

E fa’aitihia te tāmāra’a ’e te tahi atu ’ohipa mai te peu e ha’apa’o te feiā e fa’a’ohipa nei i te fare ’ia tāmā i muri mai ia rātou iho ’e ’ia fa’a’ohipa i te pa’ari, te ha’apa’o ’e te fa’atura i te mau taime ato’a.

E nehenehe te ti’a ha’apa’o fare a te pāroita e fa’anaho ’e, mai te mea e nehenehe, e fa’atere i te mau tāmāra’a tāhepetoma. E mea maita’i ’ia hōro’ahia i te mau melo ato’a te taime nō te ’āmui mai i te tāmāra’a. E ani-manihini-hia te feiā ’āpī tamāroa ’e te feiā ’āpī tamāhine ’ia ’āmui ato’a mai ’e tō rātou mau ’utuāfare, te mau pupu autahu’ara’a, ’aore rā, ’ei piha ha’api’ira’a.

’Eiaha nā te feiā ’āpī te hōpoi’a nō te pōnao i te fare i te pō ’aore rā nō te fa’a’ohipa i te mau mauha’a.

Vaira’a tauiha’a nā te mau melo

Te vai ra i roto i te tahi mau fare purera’a hō’ē piha vaira’a tauiha’a ’ia nehenehe te mau melo e fa’a’ohipa i te reira. E nehenehe te mau ti’a ha’apa’o fare a te titi ’e a te pāroita e fa’aau ’e te pupu fa’atere nō te mau vāhi patuhia, nō te hōro’a i te mau mauha’a, nō te fa’a’ī, ’e nō te ’atu’atu i teie vaira’a.

Te mau fa’anahora’a nō te tau rū

E fa’anaho te feiā fa’atere autahu’ara’a o te fenua iho i te mau fa’anahora’a nō te pāhono i te mau taime rū e tupu i te fare purera’a. E fa’a’ohipa rātou i teie mau fa’anahora’a nō te ha’api’ipi’i i te mau melo ’e nō te hi’o atu ’ia tae mai te mau taime rū. E mea maita’i ’ia pia i te mau vāhi tano i te mau rāve’a tūreia nō ni’a i te mau mūto’i, te piha ’ohipa nō te auahi ’e te mau pū ’utuutura’a ma’i rū.

Āraira’a auahi

E iti mai te tumu ’ia tupu te hō’ē auahi ’ia tītau-ana’e-hia te mau ta’ata ato’a e fa’a’ohipa i te fare purera’a mai tei tītau-maita’i-hia. Teie te tahi mau fa’aotira’a nō te āraira’a auahi :

• Vaiiho i te mau mātēria ’ama ’ōhie ato’a—mai te rā’au, te mau tauiha’a pāpie, te mau tao’a himio e te mau māruarua—i rāpae i te mau piha, te mau vaira’a tauiha’a, e te mau vāhi tē vai ra te mau pāni auahi, te mau umu, te mau mātini uira, ’e te mau tāmaura’a uira, pape ’e māhu.

• ’Eiaha e fa’a’ohipa i te mau mātini tāmahanahanara’a.

• ’Eiaha e vaiiho i te mau umu mā tē ’ore e ha’apa’o ’a tāmahanahana ai i te mā’a ’aore rā, ha’apīha’a ai i te pape.

Te mau aroā haerera’a ta’ata ’e te mau ’ē’a i rāpae

Mai tā te feiā fa’atere e ha’apa’o rā i te mau aroā ’e i te tahi atu mau vāhi i roto ’ia ateatea maita’i, e mea faufa’a ’ia ha’apa’o ato’a i te mau haerera’a ta’ata ’aore rā te mau ’ē’a i rāpae’au ’ia ’ōhie te tomora’a ’aore rā te haere i rāpae.

Te mau tāviri nō te fare purera’a

E hōro’a te pupu fa’atere nō te mau vāhi patuhia i te mau tāviri fare purera’a i te feiā fa’atere titi. E ’ōpere atu te mau ’episekōpora’a i te mau tāviri i te feiā fa’atere o te pāroita mai tei fa’ata’ahia e te titi. E fa’aherehere te ’episekōpora’a tāta’itahi i ni’a i te hō’ē parau i te i’oa o te mau ta’ata tē vai tā rātou tāviri, ’e e nehenehe tā rātou e hōro’a i te hō’ē hōho’a nō te reira parau i te ti’a ha’apa’o fare a te titi. E fa’aho’i te mau melo i te mau tāviri ato’a ’ia ha’amāuruuru-ana’e-hia rātou i tā rātou mau hōpoi’a.

Te moni

’Aita te moni e vaiihohia i roto i te fare purera’a i te hō’ē-noa-a’e pō ’aore rā e ’ore e vaiiho i te moni mā tē ha’apa’o ’ore hia i te hō’ē noa a’e taime.

Te mau fa’anahora’a pārurura’a ’e te pōnaora’a

E nehenehe te feiā fa’atere o te titi ’aore rā te mau ’episekōpo i mā’itihia e fa’a’ohipa i te hō’ē tārena nō te mau hora ’ōpanira’a ’e te mau fa’anahora’a pōnaora’a fare purera’a. E pe’ehia teie mau fa’anahora’a i te mau pō ato’a i muri noa mai i te hora fa’aotira’a tei mā’itihia.

E nehenehe te feiā fa’atere o te autahu’ara’a e fa’ata’a i te mau ta’ata ’āpipiti ’ia pōnao i te fare nō te fa’aitira’a i te fifi o te ta’ata. Tei roto ato’a te fa’anahora’a pōnaora’a, te hi’ora’a ’aita ānei e ta’ata ’aita tāna parau fa’ati’a nō te fa’aea i roto i te fare, te tūpohera’a i te mau mōrī ato’a ’e te mau mātini tāmahanahanara’a ’aore rā ha’apūva’iva’ira’a, ’e te pōnaora’a i te mau ’ūputa ’e te mau ha’amāramarama.

Tītauhia i te mau melo o te ’Ēkālesia e vai ra tā rātou tāviri fare purera’a ’ia tāpiri atu ’e e pōnao i te mau ’ōpani nō rāpae ’e te mau ha’amāramarama ato’a ’ia fa’aru’e ana’e rātou.

E ha’apāpū te feiā fa’atere ē ’ua fa’aho’ihia te mau mātini rorouira, te mau mātini nene’i hōho’a, te mau piana uira ’āfa’ifa’i ’e te mau tauiha’a hi’o ’e fa’aro’o, i roto i te mau piha pōnaohia ’aore rā te mau vāhi ha’aputura’a. Ta’a ’ē noa atu i te reira, ’a ha’apāpū ē ’ua tāpa’ohia te mau mātini rorouira ’e te mau tauiha’a uira ’ei mea fatuhia e te ’Ēkālesia, ’e ’ua fa’ahereherehia te hō’ē tāpura nō te hōho’a ’e te mau nūmera tauiha’a ato’a.