Te mau pūhapara’a fa’a’oa’oara’a

Te fa’aterera’a i te mau vāhi fa’a’oa’oara’a

’Ua fa’ata’ahia te mau vāhi fa’a’oa’oara’a a te ’Ēkālesia, nō te mau fa’a’oa’oara’a nā rāpae a te ’Ēkālesia iho. ’Ua hāmanihia te reira mai te au i te mau fa’ata’ara’a ’e te mau fa’anahora’a tei ha’amauhia e te ’Ēkālesia. Tē vai ra e piti huru vāhi fa’a’oa’oara’a :

1. Te vāhi pūhapara’a fa’a’oa’oara’a

2. Te pū fa’a’oa’oara’a nā te ’āmuira’a (LURC)

Te fā mātāmua o te mau vāhi pūhapara’a fa’a’oa’oara’a, ’o te tauturura’a ïa i te feiā ’āpī tamāhine ’ia fāri’i i te Vārua ma te fa’a’oa’oara’a fifi ’ore ’e te au. E nehenehe ato’a te mau titi, te mau pāroita, te mau ’utuāfare melo o te ’Ēkālesia, ’e tā rātou mau manihini e fa’a’ohipa i teie mau pūhapara’a nō te mau ’ātivite tei fa’ati’ahia. ’Eiaha te mau tāpa’ora’a i’oa nō te vāhi pūhapara’a fa’a’oa’oara’a a te ’Ēkālesia ’ia ravehia nō te tahi atu mau fa’anahonahora’a a te ’oire, nō te mau ’ohipa tapiho’ora’a ’e nō te mau ta’ata nō te tahi atu mau ha’apa’ora’a fa’aro’o. Terā rā, tē fāri’i-poupou-hia nei te mau melo o te ’Ēkālesia ’ia ani i tō rātou mau hoa nō te tahi atu mau ha’apa’ora’a fa’aro’o ’ia ’āmui mai ia rātou i reira.

E nehenehe te tahi tino moni e anihia i te ta’ata e haere mai nō te fa’a’ohipara’a i te hō’ē pūhapara’a fa’a’oa’oara’a, nō te ’aufau i te mau ’atu’atura’a, te mau tātā’ira’a ’aore rā te mau ha’amaita’ira’a. Nō te tāpa’ora’a i’oa, e fa’a’ohipa te mau pūhapara’a fa’a’oa’oara’a ato’a i te fa’anahora’a a te ’Ēkālesia nā ni’a i te natirara i te camping.ChurchofJesusChrist.org. E fāri’i-noa-hia te mau ’aufaura’a nā roto i te fa’anahora’a ’āitauira’a i rotopū i te mau ’āmuira’a, nō te mau ’āmuira’a e tāpa’o i tō rātou i’oa, ’e nā roto i te tāreta ’aufaura’a a te ta’ata iho mai te peu e ta’ata tē tāpa’o i tōna i’oa.

Tōna tanora’a, tei roto te hō’ē pū fa’a’oa’oara’a nā te ’āmuira’a (LURC) i te mau ’ōti’a o te titi, ’e ’ua fa’ata’ahia nā mua nō te mau pāroita i roto i terā titi, ’aore rā i roto i te mau titi tāpiri noa mai. Hō’ē hi’ora’a mātauhia, ’o te hō’ē ïa fare pōte’e ’aore rā, te tahi atu vāhi nō te mau fa’a’oa’oara’a nā rāpae. ’Eiaha te mau titi e tītau i te tino moni i te mau melo o te ’Ēkālesia ’ia fa’a’ohipa ana’e rātou i te pū fa’a’oa’oara’a nā te ’āmuira’a (LURC).

E nehenehe te mau titi e tītau i te hō’ē pū fa’a’oa’oara’a ’āpī (LURC) ’aore rā, te tahi atu vāhi pūhapara’a fa’a’oa’oara’a, mai te mea ē, tē vai ra te hina’aro pāpū. E nehenehe te mau peresideni titi e fārerei i te fa’atere nō te mau vāhi patuhia ’aore rā te piha tōro’a nō te ārea, ’e nā rātou e nehenehe e tu’u i te anira’a i ni’a i te fa’anahora’a matahiti e hāponohia i te peresidenira’a ārea.

Hou rā te reira huru anira’a, tē fa’aitoitohia nei te mau ’āmuira’a iho ’ia fa’a’ohipa i te mau vāhi a te hau ’e a te mau ta’ata e vai ra. Mai te peu tē vai ra te mau vāhi fatuhia e te ’Ēkālesia i roto i te ’ōti’a o te titi tāpiri noa mai, i te hō’ē āteara’a tano noa, e mea ti’a ’ia fa’a’ohipahia te reira hou ’a tītau ai i te patura’a i te tahi atu ā vāhi.

Te mau mea i muri nei, e mau mea ta’a ’ē ïa nō te mau vāhi pūhapara’a fa’a’oa’oara’a.

Te mau vāhi pūhapara’a fa’a’oa’oara’a ’āpī

E hāponohia te mau tītaura’a moni a te ’Ēkālesia nō te ho’o mai ’aore rā nō te fa’ananea i te hō’ē pūhapara’a fa’a’oa’oara’a nā roto i te ti’a fa’atere nō te mau ’ohipa pae faufa’a. E tītauhia te moni ’a te ’āfata moni rahi a te ’Ēkālesia nā roto i te fa’anahora’a matahiti nō te pūhapara’a fa’a’oa’oara’a, i te taime noa e noa’a mai te mau mea i tītauhia ’e e pe’ehia te mau fa’aturera’a nō te fa’atupura’a i te reira. ’A fārerei atu i te fa’atere nō te mau vāhi patuhia nō te ha’amata i te fa’anahora’a anira’a.

Te mau titi ’aita e vāhi pūhapara’a fa’a’oa’oara’a tei fa’ata’ahia nō rātou

E fa’ata’a te Hitu ’Ahuru ārea (mai tei fa’ata’ahia e te peresidenira’a ārea) i te mau titi i te hō’ē pūhapara’a a te ’Ēkālesia i te ārea mai te au i te mau hina’aro o te titi ’e te pirira’a ’e te fa’a’ohipara’a i te reira huru vāhi. E feruri-ato’a-hia i te fa’a’ohipa i te mau pūhapara’a a te hō’ē ta’ata ’aore rā a te hau.

Nō te mau titi ’aita e pūhapara’a fa’a’oa’oara’a tei fa’ata’ahia nō rātou, e nehenehe rātou e tāpa’o i tō rātou i’oa i te hō’ē pūhapara’a ma te fa’a’ohipa i te fa’anahora’a i ni’a i te natirara ’e ma te pe’e i te tārena fa’atīti’ara’a nō te mau tāpa’ora’a i’oa, i piahia i ni’a i te tahua natirara.

Te ’aufaura’a i te mau ha’amaita’ira’a o te mau vāhi pūharara’a fa’a’oa’oara’a e vai ra

’Ua fa’ata’ahia te hō’ē fa’atere nō te mau vāhi patuhia i te pūhapara’a tāta’itahi ’e e hōpoi’a nāna te mau mea ato’a i ni’a i te pūhapara’a. Tei roto te ’aufaura’a i te pūhapara’a i te fa’anahora’a matahiti ’e tei roto ato’a te ’aufaura’a nō te mau tauira’a tauiha’a, te mau ha’amaita’ira’a, te mau terera’a ’ohipa ’e te ’atu’atura’a. E ’aufauhia te mau ha’amāu’ara’a nō te mau ’ohipa ’e te mau mātēria a te pūhapara’a e te pūhapara’a iho maoti te tino moni i anihia i te ta’ata e haere mai (hi’o Faufa’a moni nā te titi nō te mau pūhapara’a).

Te terera’a ’ohipa ’e te ’atu’atura’a

E hi’opo’ahia te mau pūhapara’a e piti a’e taime i te matahiti hō’ē, nō te hi’o i te ’atu’atura’a e rave ’e nō te hi’opo’a i te pārurura’a fifi tīa’i-’ore-hia. E mea ti’a ato’a i te mau pūhapara’a ’e te mau vāhi uru rā’au ’ia hi’opo’ahia i muri a’e i te mau tā’irira’a a te reva, mai te mata’i rahi, te ūa rahi ’aore rā te hiona.

I te Fenua Marite ’e Canada, e roa’a te mau rāve’a hi’opo’ara’a ’e te mau rāve’a ’atu’atura’a nā roto i te hāponora’a i te hō’ē anira’a i te fa’atere nō te mau vāhi patuhia ’o tē ’ohipa nā muri i te piha ’ohipa nō te mau faufa’a nātura o te Tuha’a fa’atere nō te mau fare purera’a.

E’ita te mau pūhapara’a fa’a’oa’oara’a tei tārahuhia e fa’arahihia ’e e ’atu’atu-rahi-hia, maoti rā ’ua ravehia te tahi fa’aaura’a tārahura’a tau maoro ’o tē nehenehe e fa’a’ite ē, e ha’amau’ara’a faufa’a mau te reira.

Te ho’ora’a ’aore rā te hōro’a-tārahu-ra’a i te mau pūhapara’a fa’a’oa’oara’a e vai ra

Tē mau peresidenira’a titi e hina’aro nei i te ho’o ’aore rā i te hōro’a tārahu i te hō’ē vāhi pūhapara’a fa’a’oa’oara’a, e niuniu ïa ’oia i te fa’atere nō te mau vāhi patuhia ’aore rā i te piha tōro’a a te ārea. ’Aita te mau titi e fa’ati’ahia ’ia fa’atupu i te tāu’ara’a parau ’e te ’āpo’ora’a ’oire ’aore rā te hō’ē ta’ata i tonohia mai nō te ho’ora’a ’e nō te hōro’a-tārahu-ra’a, ’aore rā nō te tu’ura’a i te hō’ē vāhi pūhapara’a fa’a’oa’oara’a.

Te fa’aterera’a

E mā’iti te Hitu ’Ahuru ārea (mai tei fa’ata’ahia e te peresidenira’a ārea) i te hō’ē peresideni titi ti’amana nō te hi’opo’a i te fa’aterera’a i te vāhi pūhapara’a. Tītauhia te peresideni titi ti’amana ’ia noho i roto i taua ārea i reira ho’i te pūhapara’a i te vaira’a.

Te ti’ara’a fa’atute ’ore

Tītauhia ’ia fa’aherehere i te ti’ara’a fa’atute ’ore nō te mau pūhapara’a fa’a’oa’oara’a. ’Eiaha te reira fenua e fa’a’ohipahia nō te mau ’ohipa tapiho’ora’a ’aore rā te mau ’ohipa poritita ’aore rā nō te ’āpī i te moni e hau atu i te mea e tītauhia nō te terera’a ’ohipa, nō te ’atu’atura’a, ’aore rā nō te mau tātā’ira’a. Mai te mea ’aita te fa’aterera’a hau tei reira te vāhi pūhapara’a fa’a’oa’oara’a e hōro’a mai i te ti’ara’a fa’atute ’ore, e ’aufauhia ïa te mau tute nā te pū fa’atere a te ’Ēkālesia.

Faufa’a moni nā te titi nō te mau pūhapara’a

I te Fenua Marite ’e i Canada, e fa’a’ohipa te ti’amana o te titi i te moni nō te pūhapara’a maoti te hō’ē fa’anahora’a fare moni ta’a ’ē a te ’Ēkālesia (CUBS) tei ha’amauhia nā roto i te piha ’ohipa nō te faufa’a moni i te pū fa’atere a te ’Ēkālesia. E’ita te mau ti’amana o te titi e ha’amau i te hō’ē ’āfata parau moni ’aore rā te hō’ē ’āfata moni pa’ari i te fare moni. E fa’a’ohipahia te fa’anahora’a moni CUBS nō te ’aufau i te mau ’ohipa nō te pūhapara’a, nō te mau fa’a’oa’oara’a ’e te mau mātēria. E mea ti’a ’ia tu’uhia te tino moni e anihia ’ia ’aufau, nā reira ato’a te moni ’āva’e, i roto i te ’āfata moni CUBS. I te mau ārea ta’a ’ē atu i te Fenua Marite ’e Canada, e fārerei atu te peresideni titi ti’amana i te feiā rave ’ohipa a te ārea e ha’apa’o i te faufa’a nō te mau arata’ira’a nō ni’a i te ha’amaura’a i te vaira’a moni.

Nā te ta’ata hi’opo’a o te titi e hi’opo’a i te terera’a ’ohipa o te pūhapara’a ma te fa’a’ohipa i te parau hi’opo’ara’a nō te pūhapara’a fa’a’oa’oara’a e vai nei i roto i te Vaira’a buka a te mau hi’opo’ara’a ārea.

E hi’opo’a māite te peresideni titi ti’amana i te reira ’e e ha’amana ’oia i te mau moni ’āpī ato’a ’e te mau ha’amau’ara’a ato’a. Mai te mea e ’āpī te hō’ē pūhapara’a i te moni nō roto mai i te rāve’a nātura, e fa’aara te ti’a a te titi i te fa’atere nō te mau vāhi patuhia ’o tē ’ohipa nā muri i te piha ’ohipa nō te mau faufa’a nātura o te Tuha’a fa’atere nō te mau fare purera’a (i te Fenua Marite ’e Canada) ’aore rā i te piha tōro’a nō te ārea (ta’a ’ē atu i te Fenua Marite ’e Canada). E tu’uhia te reira huru moni ato’a i roto i te ’āfata moni rahi a te ’Ēkālesia.

E nehenehe te mau melo o te ’Ēkālesia e ha’amāmā i te mau ha’amāu’ara’a nō te ’atu’atura’a, te tātā’ira’a, ’aore rā te ha’amaita’ira’a i te mau vāhi pūhapara’a fa’a’oa’oara’a maoti te hōro’ara’a i te rima tauturu, te mau mātēria ’aore rā te mau tauiha’a nō te mau tātā’ira’a na’ina’i noa. E ravehia te mau tauira’a tauiha’a to’a ’e te mau ha’amaita’ira’a nā te fa’atere nō te mau vāhi patuhia ma te fa’a’ohipa noa i te mau tāmuta tei ha’amanahia, ’e te moni tei ha’amanahia i roto i te fa’anahora’a matahiti. ’Aita te feiā fa’atere o te ’Ēkālesia e fa’a’ohipa i te mau ’imira’a moni nō te ’aufau i te mau ha’amāu’ara’a nō te mau ha’amaita’ira’a o te pūhapara’a fa’a’oa’oara’a (hi’o ’Aufaura’a i te mau ha’amaita’ira’a nō te mau pūhapara’a e vai ra).

Te pape inu

Nō ni’a i te mau fa’anahora’a pape inu i ni’a i te mau vāhi ato’a fatuhia e te ’Ēkālesia, nō roto mai i te mau ’āpo’o pape ānei ’aore rā te pape pīha’a (e ’ere nā te ’oire ’aore rā nā te hau) e hāmanihia ïa, e ’ōperehia, ’e e ’atu’atuhia mai te au i te mau fa’aturera’a mana ’e te mau ture ha’amanahia e te ’Ēkālesia. E hōpoi’a nā te fa’atere nō te mau vāhi patuhia ’ia hi’opo’ahia te pape mai te au i te mau fa’aturera’a nō te pape ’e te mau tītaura’a mana ’e te mau peu maita’i a’e.

Tauihaʼa ’e te mau pere’o’o

’Aita te Tuha’a fa’atere nō te mau fare purera’a ’e te ’Ēkālesia iho e fa’afāna’o ’aore rā e ’atu’atu i te mau tauiha’a ’aore rā te mau pere’o’o nō te mau pūhapara’a fa’a’oa’oara’a. Mai te mea e tītauhia te mau tauiha’a ta’a ’ē, nā te titi e amo i te ha’amāu’ara’a nō te tārahu mai i te reira, ’aore rā nā te mau melo o te titi e ’āfa’i mai i te reira, ’aore rā e ho’ohia mai te reira ma te fa’a’ohipa i te moni tātuha’a a te ’āmuira’a iho ’e te tino moni i anihia i te ta’ata e haere mai.

Te mau ta’ata ha’apa’o

Mai te mea tē vai ra te hina’aro nō te hō’ē ta’ata ha’apa’o, ’aore rā hau atu, e nehenehe te mau ti’a peresideni titi e pi’i i te mau misiōnare piha ’ohipa a te ’Ēkālesia nō te fa’a’ī i taua ti’ara’a ra. Nā tō rātou ’episekōpo iho e fa’ata’a i teie mau misiōnare piha ’ohipa a te ’Ēkālesia.

Nō te tahi atu ā ha’amāramaramara’a nō ni’a i te pi’ira’a i te mau misiōnare piha ’ohipa a te ’Ēkālesia, hi’o Buka arata’i rahi, 24.7.