Rongorongo Tabeua ake a Irekereke ma Bwain Taian Autinibootaki

Korobanna

A riai Autinibootaki ni kaota anuan te karinerine nakon Iesu Kristo are e na oti iai aia koaua membwa Ibukina. Korobanna ake a kaota tamnein Iesu Kristo a riai ni katekeaki n taabo n tataninga n te autinibootaki ni kaota oin te koaua aei. Taabo n tataninga a na akea iai bwaai n aron taabo ni katekean katanoata, taibora, ao kai n tautau ibukin tamnei. E kona ni katekeaki tamnein Iesu Kristo, ke tamnei ake a kaoti kanoan koroboki aika tabu, ao rongorongon te Ekaretia inanon taian ruu n nakonako ke umwa n reirei.

Ana rineaki tamnei ake a koreaki n te bai iroun te beretitenti n te titeiki ke te tia kairiiri temanna n te tabo man ana kataroka te Ekaretia ibukin tamnei ake a katauaki ibukin autinibootaki. E kona te manatia ibukin kateitei ni kaoti ke n tibwaa te boki ma korobanna aika koreaki aikai nakoia taan kairiiri ngkana iai kainnanoaia. Aki kariakaki korobanna ke korotamnei man taabo riki tabeua. Bubuti aika onoti a na riai ni karaoaki rinanon te manatia ibukin kateitei.

Aki kona korobanna ni katukaki inanon te tabo n taromauri ke irarikin te tabo ni bwabetito. Aki riai ni katekeaki tamnei aika kaaraki, atiibu ke bwaatua ni kauring, korobanna, ke bwaai ni kamataku inanon ke i tinanikun taian kateitei. E kona n aki rinanoaki kanoan te kainibaire aio nakon korobanna ake a karaoaki n te bai ake a kaman kaotaaki inanon ririki aika bati.

Mitiin ni Kaobi

Kabooan mitiin ni kaobi a karaoaki taekaia ni kaineti ma kainibaire man aobitin te aono, ake a boboto iaon kainnanon te iunite n te tabo. Te kurubu n tararua ibukin bwaai a tabena kabooan mitiin ni kaobi ibukin aobitin te titeiki ao tienta ibukin bwain autinibootaki.

Ngkana e kainnanoaki karaoakina mwakuri n katamaroa ke n onobwai, taan kairiri n te tabo anne a na reitaki nakon are tabena karaoakina ngkana iai beebwan karaoakina. Ke, taan kairiri n taabo a na reitaki nakon te kurubu n tararua ibukin bwaai, bwa e na karekea tain karaoana ma kabooana.

Bwaai n aron te bebwa ma te toner a na kabooaki iroun te iunite n te tabo anne, ao ni kabongana mwanen aia iunite.

Bwaai ni Katamaroa

A kona ni katekeaki bwaai ni katamaroa ibukin boong ni motirawa, bootaki ni mare, ao bootaki riki n aron aikai ma n te tai ae aki maan inanon ke i tinanikun taian kateitei. Bwaai ni katamaroa n aki warekaki taian uee a bon aki riai ni kabonganaaki inanon umwantabu n tain bootakin te toa. Aki kaungaaki bwaai ni katikiraoi inanon taabo n tataninga bwa e na bon ti tiku te karinerine iaon te Tia Kamaiu.

A riai bwaai ni katamaroa ni bebete aroia ao n aki bobuaka. A riai n aki kakai ura. A riai n iraki kaetieti ibukin te urarake ao kamanomano ao otenanti ni iraki nanoia.

Bwaai n Reitaki n Taai aika Karina

Taian uoote ma titeiki aki kona n kabooi ke n butimwaai anganano n tiateraite tareboon ke te rerio ma bwaina nako n taai aika karina kee n kanimwii inanon te autinibootaki. Taan Kairiri a kaungaaki bwa a na katebenakoia aomata ake iai oin aia bwai ni mwakuri aikane bwa a na ibuobuoki n kainnanon te uoote ma te titeiki.

Aia Bwaai ni Mwakuri Tamanuea

N tabetai, te tamanuea e aki kona n kabongana te kombiuta (te katoto teuana, akea ana kombiuta ae bon oin ana bwai ke e aki kona ni kabongana te kombiuta n ana aobiti te kiraaka n te autinibootaki). Ngkana ngaia anne, te beretitenti n te titeiki e na kariaia karekean te kombiuta ao n reitaki nakon te manatia ibukin kateitei ke bwaai. Taian titeiki a na karekea te bwai n rawe bwaana ibukiia tamanuea man mwanen(LUBA) te iunite n te tabo anne.

Te Roo

Taian membwa aki tiatinaki te kabwaka mwane ke te karinmwane ni kabonganaan te autinibootaki ke bwain te Ekaretia ibukin te bootaki ni mare, te mate, te bootaki n utu, aia bootaki mitinare, rei anene, ke tabeua riki n aron aikanne.

Buraeki

E kona ni katioaki buraekin te aba n ana tabo te Ekaretia ma a na riai n iraki kainibaire man te tabo. E kona naba ni katekeaki te buraeki inanon ana kateitei te Ekaretia n taai aika kakawaki. E aki riai ni kateaki te buraeki n taabo n nebonebo ibukin kaotan te nano n aba.

Reirei iaan Auti ao Taabo n Tararuaia Ataei

E ngae ngke te Ekaretia e kaungaa te reirei, autinibootaki aki kona n kabonganaaki ibukin te reirei ke ibukin tararuakiia ataei ke ibukin bootaki n reirei n te mweenga.

Irakin nanon te kaetieti aio e na kamanoa man totokoa ana tarau te Ekaretia n te taekiti.

Tiataraite ao Bwain te Witeo

Bwain ana tiateraite ao ana witeo te Ekaretia a na tii kamanenaaki ni bwaai aika aki karekemwane, baika irekereke ma mwakurin te Ekaretia are a kariaiakaki mairouia beretitentii n te titeiki ke bitiobiriki. Ni kabane bwaai ni mwakuri a na rokanaki raoi ngkana aki kamanenaaki. E na aki kamwaeaki man te kateitei ibukin kamanenaakina n te mweenga ke iroun te aomata.

Kabonganaan Te Bwaibwai ae Tibwauaki

Kabonganaakin bwain te Ekaretia ake a tibwauaki a kainnanoa te kariaiakaki, n ikotaki ma bwain te Ekareti, ana mataroa, ana riti, ana mwaake, ao ai te kariaiakaki are e karekea ni kabonganaan te tabo .

Kanikinaa

Ngkana iai ana titiraki te beretitenti n te titeiki iaon ana kanikinaa te Ekaretia, e kona n reitaki ma te manatia ibukin kateitei.

Bwaai ni Kanakotinoo

Te Ekaretia e katauraoi mitiin ni kanako tinoo n autinibotaki ake a kainnanoaki iai. Membwa n te Ekaretia a kona n kabonganai bwaai ni mwakuri aikai n kaitiaki kawain te autinibootaki. Taan kairiiri a na tii kariaia kabonganaakina irouia memba aika ikawai ao man kairoroia bwa a na bwaina te karaurau ao te taratara raoi inanon kabonganakina.

Ana tabo te Ekaretia ae Mwaawa

Ana tabo te Ekaretia ake a mwaawa a bon aki kona n kabonganaaki ke ni kaainaki n akean ana kariaia te Beretitenti n te Aono. N taai tabetai, ao a kona membwa n te tabo anne n kabonganai ana tabo ake a mwaawa ibukin te ununiki iai. Reitaki ma te manatia ibukin kateitei n te tabo anne ibukin titiraki ni kamataata ao karekean te kariaiakaki.