Ol Givhan Prinsipol, Ogis 2019

?Mi Save Helpem Jenisim Wan Man?

Yes Be ating wok blong yu i defren moa bitim wanem we yu save.

Liahona, Ogis 2019

Oli krietem yumi wetem inaf paoa blong jenis. Blong gro go kasem ful tabu paoa blong yumi i stamba tingting blong eksperiens blong yumi long wol ia. Wan long ol mein gol long wok blong givhan i blong helpem ol narafala man blong kam long Kraes mo mekem ol jenis we i nid blong mekem blong gobak stap wetem Hem. Be from ejensi blong olgeta, i stopem wok blong yumi blong helpem olgeta blong kam moa olsem Kraes.

Hemia seven lesen wetem paoa we i kam long Sevya long olsem wanem yumi save helpem ol narafala man blong oli traehad blong jenis mo kam moa olsem Hem.

No Fraet blong Invaetem Fasin blong Jenis

Sevya i no bin fraet blong invaetem ol narafala man blong lego ol olfala rod biaen mo folem ol tijing blong Hem. Hem i invaetem Pita mo Jemes blong lego ol wok blong tufala mo “kam olsem ol fisaman”(Mak 1:17). Hem i invaetem woman ia we i mekem adaltri blong “gohom mo yu nomo mekem sin bakegen” (Jon 8:2–11). Hem i invaetem rij yang man blong lego fasin blong hem blong tingbaot tumas ol samting blong wol mo folem Hem (Luk long Mak 10:17–22). Yumitu save stap stret mo gat lav taem yumi invaetem ol invaetem man blong mekem ol jenis mo folem Sevya.
Tingbaot Hem i Joes blong Olgeta blong Jenis

Kaen jenis we Sevya i invaetem man blong mekem i had. Sevya i bin tij mo invaet, be Hem i no bin fos. Yang rij man “Hem i gowe wetem harem nogud” (Matiu 19:22). Long Kapaneam, plante long ol disaepol blong Hem oli jusum blong “go bak,” mo Hem i talem mo askem ol twelef sapos bae olgeta tu i gowe (Luk long Jon 6:66–67). Sam long ol man blong folem Jon Baptaes oli bin jusum blong folem Sevya, Ol narawan oli no wantem (Luk long Jon 1:35–37; 10:40–42). Yumi save invaetem ol narafala man blong kam moa olsem Hem, be yumi no save mekem desisen blong jenis blong olgeta. Mo sapos oli no jusum yet blong jenis, yumi no mas givap—o filim se yumi no save mekem.
Prea from Paoa blong Jenis blong Ol Narafala man

Long taem we Hem i stap mekem Prea blong Nid blong Hem, Jisas i bin askem God se bae ol disaepol blong Hem oli stap longwe long ivel, be bae oli kam moa olsem Hem mo Papa, mo bae oli fulap wetem lav blong God (Luk long Jon 17:11, 21–23, 26). Mo wetem save ia se Pita i nidim paoa taem hem i traehad blong blong gro long wok blong hem, Sevya i bin prea from hem (Luk long Luk 22:32). Ol prea blong yumi from ol narafala man i save mekem wan jenis (Luk long Jemes 5:16).
Tijim Olgeta blong Dipen long Paoa blong Hem

Hem i tru long Sevya nomo we yumi save mekem tru jenis mo gro blong kasem tabu ples we yumi evriwan i gat. “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sapos mi mi no tekem hem i kam” (Jon 14:6) Hem i paoa blong Hem we i save mekem “ol samting ia we oli no strong long olgeta” (Ita 12:27). Hem i bin fet long paoa blong atonmen blong Sevya we Yang Alma i jenis (Luk long Alma 36:16–23). Yumi save tijim ol narafala man blong dipen long Sevya blong mekem se olgeta tu oli save gat paoa blong jenisim man insaed long laef blong olgeta.
Luk Ol Narafala man Olsem we Oli Save Kam

Lav mo fasin blong akseptem samting i save kam ol ejen we i gat bigfala paoa blong jenis. Woman ia long wel blong wota i bin stap wetem wan man we i no hasban blong hem. Ol disaepol blong Jisas oli “sapraes se Hem i toktok wetem woman ia” (Jon 4:27), be Jisas i kea moa abaot wanem we hem i save kam. Hem i tijim mo givim woman ia wan janis blong jenis mo hem i bin mekem. (Luk long Jon 4:4-42)

Taem yumi lukluk long ol narafala man olsem we oli bin stap be i no olsem we oli save kam, yumi save holembak olgeta. Be, yumi save fogivim olgeta mo fogetem ol mistek blong bifo. Yumi save biliv se ol narafala man oli save jenis. Yumi save lukluk i go bitim ol samting we oli no strong long hem mo poenemaot ol gudfala samting we ating olgeta i no save luk long olgetawan. ”Yumi gat responsabiliti ia blong luk wanwan man o woman i no olsem we oli stap be olsem we bae oli kam.”¹
Letem Olgeta Oli Go long Spid blong Olgeta Wanwan

Jenis i save tekem taem. Yumi evriwan i mas “gohed wetem fasin blong save wet longtaem kasem taem [yumi] kam stret gud evriwan (Doktrin mo Ol Kavenan 67:13). Jisas i gat fasin ia blong save wet longtaem wetem ol narafala man mo gohed blong tij iven olgeta we oli agensem Hem, testifae long wok blong Hem we Papa blong Hem i givim mo ansarem ol kwestin blong olgeta (Luk long Matiu 12:1–13; Jon 7:28–29). Yumi save gat fasin blong wet longtaem wetem ol narafala man mo leftemap tingting blong olgeta blong olgeta tu oli gat fasin blong save wet longtaem wetem olgetawan.
No Givap Sapos Oli Gobak long ol Samting we oli bin mekem Bifo.

Afta Kraes i ded, Pita mo sam long ol nara Aposol oli gobak long wanem we oli bin stap mekem bifo (Luk long John 21:3). Kraes i rimaenem Pita se hem i nidim blong “fidim sipsip blong [Hem] ” (Luk long Jon 21:15–17), mo Pita i gobak long wok blong givhan. I save isi nomo blong gobak long ol rod blong bifo. Yumi save gohed blong sapot wetem gudfala fasin blong leftemap tingting mo invitesen we i gat insperesen blong gohed blong folem Sevya mo traehad blong kam moa olsem Hem.

Stap Letem Ol Narawan blong Oli Jenis

Elda Jeffrey R. Holan blong Kworom blong olgeta Twelef Aposol i talem stori ia abaot fasin blong letem ol narafala man blong gro. “Oli bin talem long mi wan taem se wan yang man we blong plante yia, oli stap yusum hem long evri fani stori long skul. Hem i gat sam samting we hem i no strong long hem, mo i bin isi blong ol fren blong hem long skul oli jikim hem. Samtaem afta long laef blong hem, hem i bin muvaot. Hem i bin joenem ami mo gat sam eksperiens wetem sakses longwe hemia blong kasem wan edukesen mo speseli nao blong kamaot long laef blong hem blong bifo. Antap long evri samting, olsem plante long ol ami oli stap mekem, hem i faenemaot olsem wanem Jos i naes mo i bigwan mo hem i bin kam aktiv mo stap hapi insaed long hem.

“Afta, plante yia hem bin gobak long ples blong hem taem hem i bin yang. Plante long ol jeneresen blong hem oli bin muvaot be i no evriwan. Afta, taem we hem i gobak wetem sakses mo olsem wan niu man, semmak olfala tingting ia we i bin stap bifo i stil stap wet long hem blong i kambak. Blong ol man long taon blong hem, hem i stil olsem ‘hemia -mo-hemia blong bifo.’ …

“Smosmol afta ol traehad blong man ia blong lego wanem we i stap biaen mo holemtaet wanem we God i givim long hem i stap go daon sloslo kasem taem hem i ded long saed blong laef we hem i bin laef long hem long yang taem blong hem. … I nogud tumas, mo sori tumas se ol man we oli stap raonem hem … i olgeta we oli ting se laef bifo blong hem i moa interesting bitim fiuja blong hem. Oli bin karemaot long han blong hem wanem we Kraes i bin givim long hem. Mo hem i bin ded wetem harem nogud, nomata ol smol mistek blong hemwan. …

“Bae ol pipol oli sakem sin. Bae ol pipol oli gro Biliv se pipol i save jenis mo kam antap gud.”²