Ol Givhan Prinsipol, Disemba 2018
Soem Se Yu Kea
I gat plante wei we yumi save soem se yumi kea, speseli long taem blong Krismes. Yumi save talemaot, tekstem, raetem, givim, serem, prea from, bekem, singsing long hem, haggem, pleplei long hem, planem, o klinim. I simpol, yu traem blong mekem.
Soem lav long ol narawan hem i moa impoten pat blong wok blong givhan. Rilif Sosaeti Jeneral Presiden Jean B. Bingham i talem: “Tru givhan i hapen wan afta wan wetem lav we i pusum yu blong mekem wok ia. Wetem lav we i pusum yumi, ol merikel bae oli hapen, mo bae yumi faenem ol wei blong karem ol sista mo brata we oli ‘lus’ oli kam pat fulwan long gospel blong Jisas Kraes.”1
Blong letem olgeta narawan oli save se yumi kea i wan impoten ki blong mekem rilesensip blong yu wetem narawan i kam antap. Be ol defren pipol oli kasem mesej long ol defren wei. ?Olsem wanem nao yumi save soem lav blong yumi long ol narawan long ol wei we bae oli save andastanem mo akseptem? Hemia i sam long ol wei blong soemaot se yumi kea, wetem sam aedia blong statem tingting blong yuwan.
Talemaot
Samtaem i nogat wan wei we i moa gud blong talem hao nao yu filim abaot wan man. Hemia i save minim se yu save talem long wan man se yu lavem hem, mo tu, hem i blong serem wanem nao yu laekem abaot olgeta o blong givim a gudfala tingting. Ol kaen wei ia nao i helpem blong mekem wan rilesensip i kam strong moa. (Luk long Efesas 4:29.)
-
Faenem wan wei blong letem wanwan man, woman blong save hamas yu laekem ol samting we hem i gud long hem.
-
Visitim, ringim, o sendem wan imel, wan teks, o wan kad blong talem long wanwan man, woman se yu stap tingabaot olgeta.
Visitim
Tekem sam taem blong toktok mo lisin long wan man hem i wan gudfala wei blong soem se hamas gud yu luk long olgeta. I nomata yu visit long haos, long jos, o eni ples, i gat fulap man we oli nidim wan man blong oli save toktok wetem. (Luk long Mosaea 4:26; D&K 20:47.)
-
Folem ol nid blong wanwan man, woman, putum wan taem blong visit. Tekem taem blong rili lisin mo andastanem ol situesen blong olgeta.
-
Taem we i had blong go visitim ol hom from se rod i longwe, ples i nogud tumas, o i gat ol narafala samting i hapen, tingting blong faenem wan taem tugeta afta ol Jos miting.
Givim Seves wetem Stamba Tingting
Tingting long wanem wanwan man, woman o famli oli nidim. Blong givim wan seves we i gat mining i talemaot se yu kea. I joenem tugeta ol gudfala presen we i taem wetem wan fasin blong gat tingting we i strong, “Ol smol wei blong givim seves i tajem bigwan ol narafala man—mo tu, yumiwan bakegen,” Sista Bingham i talem.2
-
Givim seves we i save helpem wanwan man, woman o ol famli, olsem lukaotem ol pikinini taem papa mo mama i go long tempol.
-
Lukaotem ol wei we i mekem ol samting i kam moa laet taem we laef i had, olsem klinim ol windo, wokabaot wetem dog, o help blong klinim yad.
Mekem Samting Tugeta
I gat wanwan man, woman we oli no save joen gud wetem ol storian. Blong sam pipol, kam tugeta i mekem se man i faenem ol samting we oli laekem blong mekem mo blong spendem taem tugeta mo mekem ol samting ia. Lod i talem strong long yumi se yumi “mas stap wetem mo mekem kam strong moa”(D&C 20:53) ol brata mo sista blong yumi.
-
Wokbaot tugeta, planem wan gem naet, o putum wan taem blong eksesaes tugeta.
-
Wok tugeta long wan komuniti o Jos projek.
Givim wan Presen
Samtaem, taem o janis blong wok tugeta i blong smol taem nomo. Long ol defren kalja, blong givim wan presen hem i wan saen se yu kea mo yu gat sore. Iven wan presen we yu givim wanwan taem we i simpol, i soem se yu kea mo yu intres blong mekem rilesensip blong yutufala i kam gud moa. (Luk long Ol Proveb 21:14.)
-
Tekem wan kakae we oli laekem i go long olgeta.
-
Serem wan sot toktok, skripja, o wan smol mesej yu save se bae i save helpem olgeta.
Wan Wok blong Lav
Taem yu kam blong save olgeta we yu givhan long ol, mo blong yu lukaotem insperesen, bae yu kam blong lanem moa hao blong soem lav blong yu, mo se yu kea long olgeta wanwan.
Kimberly Seyboldt blong Oregon, YSA, i talem wan stori blong lukaotem insperesen mo blong givim ol presen blong soem lav:
“Taem mi harem nogud, bae mi girap mo mekem sukini bred, samples long eit bred olsem. Spesel kaekae blong mi hem i kwaet prea we mi mekem taem mi stap bek blong save hu nao i nidim ol bred ia. Mi kam blong save gud ol ples we neiba blong mi stap long hem taem ol wom sukini bred ia i wan rod blong go insaed ong haos blong olgeta mo laef blong olgeta.
“Wan wom sama dei, mi stop long saed blong haos blong famli we i stap salem ol blakberi long narasaed blong rod. Mi no nidim moa blakberi, be yangfala, bunbun boe we i stap long stan blong salem blakberi i glad blong luk mi, i tingting se mi nekis kastoma blong hem. Mi pem sam blakberi, be semtaem mi givim wan presen long hem. Mi givim tu pis bred long hem. Hemi tanem hem i go long papa blong hem, blong papa i talem yes, afta hem i talem,‘Luk Papa, naoia yumi gat wan samting blong kakae tedei.’ Mi fulap wetem tangkyu long janis blong soem lav long wan simpol wei.”
Elda Jeffrey R. Holland blong Kworom blong Olgeta Aposol i talem strong “se evri man mo woman—mo ol bigfala yang man mo yang woman—bae [oli] … mekem moa dip komitmen blong kea long wanwan wetem bigfalalav blong Kraes i pusum olgeta long wok ia. … Bae yumi wok tugeta wetem Lod blong plantesen, mo givim long God mo Papa blong yumi evriwan wan han blong help wetem bigfala wok blong ansa long ol prea, provaedem kamfot, draemap ol krae, mo mekem olgeta we oli no strong, oli kam strong,”3
Jisas Kraes i Kea
Afta we Jisas Kraes i mekem Lasaros i girap long ded, “Jisas i krae.
“!Mo ol Jiu oli talem,Yes !Yufala i luk we Hem i lavem hem!” (Jon 11:25–26)
Profesi blong Samuel, man blong Leman, long Ol Man blong Nifae. Afta Hem i singaotem olgeta we i sik mo harem nogud, olgeta we leg i nogud, mo “hem i hilim olgeta” (luk long 3 Nifae 17:7-9).
Sevya i soem eksampol se hem i kea long yumi mo ol narawan. Hem i givim kamfot long yumi.
“Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.”
“Hemia nao loa ya we i hae moa long ol narafala loa, mo i nambawan blong folem.
“Mo narawan, we klosap i semmak, i talem se: ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’”1
?Hu i nidim kea blong yu? ?Hao nao yu soem se yu kea?
© 2018 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/17. Oli letem translesen: 6/17. Translesen blong Ministering Principles, December 2018. Bislama. 15056 852