Stap Givhan tru long Sakramen Miting

Sakramen miting i givim janis blong joen mo givhan long ol narawan.

Sakramen miting i wan taem blong kaekae long saed blong spirit mo tingting bak long yuwan long Sevya mo Atonmen blong Hem. Taem yumi tekpat long sakramen evri wik, yumi kam antap tugeta (luk Doktrin mo Ol Kavenan 84:110). Be sam long ol wod mo branj blong yumi oli karem wetem olgeta ol hevi harem nogud o oli no iven stap nomo.

Hemia i samfala janis blong olsem wanem yumi save yusum tabu taem ia blong givhan long ol narawan mo mekem jenis long laef blong olgeta.

Helpem mekem Sakramen Miting i Kam Moa Gud blong Olgeta we Yu Stap Givhan Long Olgeta.

Fas step blong lanem olsem wanem blong givhan i blong kam blong save wanwan long olgeta o ol famli mo ol nid blong olgeta. Maet i gat sam wei we yu save helpem mekem sakramen wosip eksperiens blong olgeta i moa gud taem yu stap lanem moa abaot olgeta.

Blong Mindy, wan yang mama blong tu twin pikinini, ol simpol hadwok blong ol givhan sista blong hem i mekem wan bigfala jenis long sakramen miting eksperiens blong hem evri wik.

“From ol taem blong wok blong man blong mi, mi tekem tufala twin gel blong mitufala i go long jos miwan nomo evri wik,” Mindy i eksplenem. “I had tumas blong traem blong go tru long ful sakramen miting wetem tu bisi yang pikinini, be ol givhan sista blong mi oli bin tekem long olgetawan blong helpem mi.

“Hem i sidaon wetem mifala mo helpem mi lukluk long ol gel blong mi evri wik. Blong gat hem long saed blong mi i minim plante tumas mo i karemaot wari long ol taem we ol pikinini oli stap kraekrae mo komplen tumas. Mi no ting se bae hem i kam blong save hamas ol aksen blong hem oli gat paoa long mi long taem ia blong laef blong mi. Hem i bin luk ol nid blong mi olsem wan yang, mama wetem fulap wari, mo hem i help mekem Jos wan ples blong pis mo glad blong mifala evriwan.”

Ol Aedia blong Helpem Olgeta Wetem Ol Spesel Nid

Ripot bak long ol lida blong kworom blong ol elda mo ol sista blong Rilif Sosaeti abaot nid blong ol memba.
Ol lida oli planem ol toktok blong sakramen miting blong help ansarem ol nid blong olgeta memba. Sapos olgeta we yu stap givhan long olgeta bae oli kasem blesing from wan stret mesej, serem tingting ia wetem ol lida blong yu.
Sapos yu save wan man wetem spesel nid o i nogud long sam kakae we i blokem olgeta blong stap glad wetem ol blesing blong sakramen, askem olgeta ol ditel mo wanem arenjmen i save hapen blong mekem eksperiens blong wosip blong olgeta i kam moa gud. Serem infomesen ia wetem ol lida blong yu.
Sapos wan man we yu stap givhan long hem o yu save abaot hem, i stap nomo long haos ful laef blong hem, nomata we i stap blong gud o blong wan smol taem nomo, askem bisop blong yu sapos oli save givim sakramen long olgeta long haos. Yu save tekem ol not long taem blong sakramen miting mo serem wetem olgeta long fon, tru long imel, o yuwan.
Sapos wan man we yu stap givhan long hem i gat ol yang pikinini, yu save helpem olgeta long taem blong sakramen miting.
Sapos olgeta we yu stap givhan long olgeta oli no stap kam oltaem long sakramen miting, traem blong andastanem olgeta mo tingting long sam wei we yu save help. Sapos oli nidim transpot, yu save askem blong draevem olgeta. Sapos oli filim se oli nogat sapot long ol famli blong olgeta, yu save invaetem olgeta blong sidaon wetem yu. Yu save mekem ol spesel invitesen blong helpem olgeta i fil welkam mo filim se oli wantem olgeta long sakramen miting.

Tingbaot, Ol Simpol Aksen I Save Go Wan Longfala Rod

Long saed blong Givhan, Sista Jean B. Bingham, Rilif Sosaeti Jeneral Presiden i tijim: “Samtaem yumi ting se yumi mas mekem wan bigfala samting blong ‘kaontem’ se yumi givim seves ia nao long ol neba blong yumi. Be yet, ol smol aksen blong givim seves i tajem bigwan ol narafala man—mo tu, yumiwan bakegen.”¹

Long wan smol wod long Beljium, Evita plante taem i stap translet blong ol visita we oli toktok Spanis mo ol memba long taem blong ol Jos miting. Wan taem oli introdiusum Evita long wan man we i kam long Dominiken Ripablik we i stap lanem abaot Jos. Hem i bin save sam Inglis, be Spanis i lanwis we hem i bon wetem. So Evita i bin agri blong translet kwaet nomo blong hem long sakramen miting mekem se hem i filim moa gud.

“Blong stap translet i save mekem sabat blong mi i samtaem fasfas, ” Evita i talem. “Be blong stap folem ol kwaet toktok blong Spirit mo askem ol narawan sapos oli nidim wan intepreta i givim mi wan filing blong glad mo wom blong save se mi save helpem olgeta filim Spirit mo glad long ol miting blong olgeta.”

Ol Aedia blong Help tru long ol Simpol Aksen

Toktok long ol lida blong yu blong luk huia i maet nidim smol ekstra seves long taem blong sakramen miting. O sapos yu save long wan man we i nidim, mekem sua se ol lida blong yu oli save abaot hem.
Sidaon kwaet nomo taem yu stap wet blong miting i stat. Hemia bae i helpem “ol narafala spirit we hat i brokbrok mo i harem nogud we oli stap raon long yumi”² we oli nidim pis we i save kam tru long fasin blong stap revren long wan tabu ples.
Long Sandei blong livim kaekae, tingbaot blong givim fasin blong livim kaekae mo ol prea blong yu from wan man we yu givhan long hem we maet i nidim wan ekstra kamfot.
Prea blong save sapos i gat wan man we i save kasem help from yu sidaon narasaed o kolosap long olgeta long taem blong sakramen miting o sapos i gat sam nara wei we yu save help.

Sakramen Miting I Save stap wan Welkam Ples blong Evriwan

Presiden Joseph Fielding Smith (1876-1972) i tijim, “Sakramen miting i miting we i moa tabu long evri miting blong Jos.”³ Long hemia, i impoten blong mekem sua se evriwan we oli atendem sakramen miting oli filim se oli welkam mo kasem kaekae long saed blong spirit—speseli ol niu memba o ol memba we oli no bin kam long taem lelebet.

Merania blong Niu Saot Wels, Ostrelia, i fren wetem wan woman we i stap lanem abaot Jos long wod blong hem. “Hem i bin kam wan long ol dia fren blong mi naoia,” Merania i talem. “Mi laekem blong sidaon wetem hem long sakramen miting evri wik, mo oltaem mi askem olsem wanem hem i stap mo sapos i gat eni samting mi save mekem blong helpem hem.” Afta wan smol taem, fren blong Merania i bin baptaes. Ol had wok blong ol wod memba, mo tu, wetem wan envaeromen we i welkamem man long sakramen miting, i plei wan bigfala pat long desisen blong hem.

Ol Tingting blong Givhan long ol Memba We Oli Stap Kambak o Ol Niu Memba

Taem we bae yu givim toktok long sakramen miting, yu save invaetem ol fren, famli, mo ol narawan blong kam harem mesej blong yu.
Yu save lukaotem mo welkamem olgeta we oli stap olgetawan o oli nidim help. Askem sapos yu save sidaon narasaed long olgeta o invaetem olgeta blong sidaon wetem yu.
Taem miting i en, yu save invaetem olgeta we yu stap givhan long olgeta mo ol narawan blong kam long ol jos aktiviti we oli stap kam, long tempol, o long wan sosol aktiviti.
Sapos wan man we yu stap givhan long hem i atendem sakramen miting be i no bin stap kam longtaem lelebet, yu save askem olgeta sapos oli gat eni kwestin abaot wanem oli bin tijim. Talem long olgeta se oli welkam oltaem blong kam luk yu sapos i gat wan toktok, stori, o pis blong doktrin we oli no andastanem. Yu save lukaotem ol ansa tugeta sapos i gat nid.

© 2020 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem translesen: 6 /19. Translesen blong Ministering Principles, June 2020. Bislama. 16988 852