Ol Prinsipol blong Wok blong Givhan, Febwari 2020

Givhan tru long wok blong Famli Histri

Droing i kam long Joshua Dennis; pikja long bakgraon mo foto i kam long Getty Images

Liahona, Febwari 2020

Blong helpem ol narawan wetem famli histri blong olgeta, i wan gudfala wei blong givhan. Taem yu konektem ol narawan wetem ol bubu blong olgeta tru long ol storian mo ol ditel, yu stap fulumap ol spes insaed long hat blong olgeta we samtaem oli neva save se oli bin gat bifo (luk long Malakae 4:5–6).

Nomata sapos i wan memba we i bon long Jos o wan we i neva harem abaot gospel blong Jisas Kraes we i bin kambak bakegen, evri pikinini blong God oli wantem blong save abaot wea ples oli kam long hem.

Oltaem i no tekem tumas blong givim wan gudfala filing we bae i save stap blong oltaem, olsem we i stap long ol storian ia.

Faenem Famli Samples long 9 Kilometa Antap long Graon

I no longtaem i pas, taem mi stap flae i gobak long haos, mi bin sidaon kolosap long Steve, mo hem i serem wetem mi sam pat blong stori blong hemwan. Hem i bin graduet long hae skul, mo i bin go long Y.S Ami olsem wan komunikesen speselis taem hem i gat 18 yia, mo i no long taem afta, hem i stat wok insaed long Waet Haos olsem wan we i givim sapot long saed blong komunikesen long Presiden blong Yunaeted Stet. Long 18 yia blong hem kasem 26, hem i bin wok blong tu(2) Y.S. Presiden. !Ol storian blong hem i gud tumas!

“Steve,” mi talem, “yu mas raetem ol storian ia daon blong ol laen blong yu! Oli nid blong gat ol storian ia we i kam stret long yu long lukluk blong yu.” Hem i agri.

Afta Spirit i talem long mi blong askem hem wanem hem i save abaot ol bubu blong hem. Steve i save plante stori long saed blong mama blong hem. Wan long ol stori ia i abaot wan taem we famli blong hem oli gat dina wetem Abraham Lincoln taem hem i stap kampen aot long taon long taem blong eleksen blong ol Y.S presiden long 1860.

Hem i save smol nomo long saed blong papa blong hem. Hem i wantem tumas blong save moa. Mi pulumaot fon blong mi, mo openem FamilySearch ap. “Steve, !yumi save faenem famli blong yu naoia nomo!”

Mi konek long Intanet insaed long plen. Mi putum fon blong mi long smol tre tebol we i stap long fored blong mi mekem se mitufala tugeta i save luk. Mitufala i lukaot long FamilyTree. I no longtaem nating, mitufala i stap luk mared setifiket blong bubuman blong hem we i mared long bubuwoman blong hem.

“!Olgeta ia nao!” hem i talem. “!Mi tingbaot famli nem blong hem nao!”

Spirit blong glad i kam insaed long mitufala tugeta. Mitufala i bin wok long profael blong ol bubu blong hem we hem i save smol nomo abaot olgeta blong ol nekis 45 minit. Hem i askem mi blong promesem hem blong mitufala i gohed long wok ia long Kolorado. Mitufala i paspasem ol kontak blong mitufala taem plen i stap lan.

Hemia, mifala i stap flae long samples 9 kilometa (9,145 mael) long ea, wetem wan masin we i smol olsem han blong mi, mo stap lukaotem wan man mo wan woman we tufala i bin mared 100 yia i pas long taem finis, we hem mo ol famli blong hem oli no bin save abaot. !I had blong bilivim! Be mifala i faenem olgeta. Ol famli oli joen. Ol stori oli kambak long tingting. Ol filing blong talem bigfala tangkyu from teknoloji mo ol tul ia, i bin stap long taem ia. Hemia i wan merikel wantaem.

Jonathan Petty, Kolorado, YSA

Wetem Niu Famli Raon long Hem

Maria i bin les aktiv moa long 20 yia. Sam manis i pas, mifala i bin spendem tu (2) aoa wetem hem long haos blong mifala, blong lukaotem famli blong hem insaed long ol rekod blong sensas mo ol nara rekod. Long wan taem, hem i krae mo talem, “!Mi bin lanem moa abaot famli blong mi long tu (2) aoa ia bitim we mi bin save long ful laef blong mi!”

Long en blong taem blong mifala tugeta, mifala i soem long hem, Relatives Around Me we hem i wan pat blong FamilyTree ap. I bin hapen se mi mo hasban blong mi i famli wetem Maria, be longwe smol. Hem i krae bakegen mo talem se hem i ting se hem i stap hemwan. Hem i neva save se hem i gat famli oli stap long eria ia. Samfala wik afta, Maria i mit wetem bisop blong mifala. Hem i stap wok naoia blong rere blong go long tempol, mo !hem i bin mitim plante “niu” kasen long wod blong mifala!

Carol Riner Everett, Not Karolina, YSA

Resipi blong Wok blong Givhan

Ashley, wan sista we mi stap givhan long hem, mo mi, mitufala tugeta i gat ol buk blong kuk we i kam long ol bubuwoman blong mitufala. Buk blong hem i kam long bubuwoman blong mama blong hem, mo blong mi hem i wan buk we mi putum tugeta, taem mi kasem Greenwood resipi bokis we i kam long bubuwoman blong mi afta we hem i ded.

Ashley mo mi mitufala i jusum wan resipi long ol buk blong kuk blong mitufala, mo kam tugeta long wan naet afta wok blong traem kukum ol kaekae ia. Hem i jusum wan resipi blong swit kaekae, mekem se mifala i mekem hemia faswan mo putum long oven. Mi jusum jip dip—wan kaekae we oli kakae long evri Greenwood famli pati. Gel blong Ashley, Alsaema, i helpem mitufala blong testem kaekae ia we mitufala i kukum. Be from se Ashley i no wantem blong ol pikinini blong hem oli flatem ol swit kakae, hem i givim sam long ol sista we hem i stap givhan long olgeta.

Samting we mi laekem abaot resipi naet blong mitufala hem i, taem mitufala i stap kuk mo bek, mitufala i stap tokabaot ol topik blong wok blong givhan—ol hadwok blong hem mo mi. Mo mitufala i tokbaot tu ol bubuwoman blong mifala mo ol mama blong mifala, we i wan gudfala samting tumas long mitufala tugeta.

Jenifer Greenwood, Yuta, YSA

Ol Stret Wei blong Help

Famli histri i save openem ol doa blong gat ol janis blong givhan long ol taem we i luk olsem se bae i no gat nara samting moa we bae i givim ol janis ia. Hemia samfala tingting we yu save traem.

Helpem olgeta blong rekodem mo aplodem ol storian blong famli histri, speseli olgeta we i go wetem ol foto.
Krietem wan jat we i olsem fan, o sam nara impoten pepa blong famli histri we yu save printim mo givim olsem wan presen.
Tijim olgeta ol wei blong gat histri blong olgetawan long wan jenol folem wei we oli laekem blong mekem. ?Voes jenol? ?Foto Jenol? ?Ol Storian Vidio? I gat plante wei blong olgeta we oli no laekem ol fomat blong standet jenol.
Go long tempol tugeta blong mekem ol odinens blong ol bubu. O askem blong mekem ol odinens blong ol nem blong famli blong olgeta sapos oli gat plante blong mekem.
Kam tugeta blong serem ol famli tradisen.
Tekem wan famli histri klas tugeta.

© 2020 Intellectual Reserve, Inc. All rights reserved. Oli printim long YSA. Oli letem long Inglis: 6/19. Oli letem translesen: 6 /19. Translesen blong Ministering Principles, February 2020. Bislama. 16995 852