Ol Givhan Prinsipol

Stamba Tingting we Bae I Jenisim Givhan blong Yumi

Long saed blong plante long ol stamba tingting blong fasin blong givhan, ol traehad blong yumi i sud folem tingting ia blong yumi we i wantem blong helpem ol narawan blong oli kasem wan tru jenis tru long laef blong olgeta wanwan mo kam moa olsem Sevya.

Liahona, Jenuware 2019

Taem yumi lavem ol narawan olsem we Sevya i lavem olgeta, bae yumi wantem blong helpem olgeta, semmak olsem we Hem i bin mekem. Olsem Gudfala Man blong Lukaot long Sipsip, Hem nao i stamba eksampol blong wok blong givhan we i gat mining.

Taem yumi mekem givhan wok blong yumi i semmak long hemia blong Hem, i impoten blong rimemba se ol traehad blong Hem blong lavem, leftemap, givim seves, mo blesem narawan, gol biaen long hem i moa hae, i bitim blong jes stap lukluk long wan hariap nid. I tru, Hem i bin save evri dei blong olgeta mo Hem i bin gat lav mo sore long safaring blong olgeta. Mekem se Hem i hilim, i fogivim, mo i tijim olgeta. Be Hem i bin wantem mekem moa bitim blong stap kea nomo long tosta blong olgeta blong wan dei (luk long Jon 4:13–14). Hem i bin wantem blong olgeta raon long Hem, oli mas folem Hem (luk long Luk 18:22; Jon 21:22), oli save Hem (luk long Jon 10:14; Doktrin mo Ol Kavenan 132:22–24), mo oli kasem evri tabu paoa blong olgeta (luk long Matiu 5:48). Hemia i semmak tedei (luk long Doktrin mo Ol Kavenan 67:13).

I gat plante wei we yumi no save kaontem we yumi save blesem ol narafala man; be taem en blong gol blong givhan wok blong yumi i blong helpem ol narafala man blong oli kam blong save Sevya mo kam moa olsem Hem, bambae yumi wok from dei ia we bae yumi nomo nid blong tijim neiba blong yumi blong hem i save Lod, from se bae yumi evriwan i save Hem (luk long Jeremaea 31:34).

Lukluk blong Sevya I Go I Bitim Ol Hariap Nid

Sam pipol oli mekem plante samting blong tekem fren blong olgeta i kam long Jisas blong Jisas i hilim sik blong hem. Long en, Sevya i hilim man ia, be Hem i bin intres moa blong fogivim ol sin blong man ia (luk long Luk 5:18–26).
Taem ol pipol oli bin tekem woman we i mekem adaltri i kam long Sevya, wei ia blong Lod, blong i no jajem mo panisim hem, i sevem hem nomo long laef ia. Be Hem i bin wantem blong sevem woman ia, long saed blong spirit tu, mo Hem i talem long hem: “yu gohom mo yu nomo mekem sin bakegen” (luk long Jon 8:2–11).
Meri mo Mata i sendem toktok long Jisas, tufala i askem Hem blong kam hilim fren blong Hem, Lasaros. Jisas, we i bin hilim ol narafala pipol plante taem, i let blong kam, mekem se Lasaros i ded. Jisas i bin save wanem we famli ia i bin wantem, be taem Hem i bin mekem Lasaros i girap long ded, Hem i bin mekem testemoni blong olgeta i strong moa mo save se Hem i Hae tumas (luk long Jon 11:21–27).

?Wanem nara eksampol yu save ademap i go long lis ia?

?Wanem Nao Yumi Save Mekem?

Sapos stamba tingting blong yumi hem i blong helpem ol narawan blong oli kam moa olsem Sevya, bambae i jenisim wei we yumi stap givhan. Hemia sam samting we yumi save mekem blong lidim ol wok blong yumi blong stap givhan.

Aedia 1: Joenem Seves wetem Sevya

Evri traehad blong yumi oli gud tumas, be yumi save lukaotem ol janis blong mekem seves blong yumi i kam antap taem yumi joenem seves ia wetem Sevya. Eksampol. Sapos famli we yu stap givhan i sik, maet bae wan sospen sup bae i help, be simpol aksen blong lav we bae yu soem bae yu save dabdabolem wetem testemoni blong yu abaot lav we Sevya i gat long olgeta. Bae wan i save glad long wok we yu mekem long yad o garen blong olgeta. Be maet bae i gat moa mining sapos yu givim tingting blong oli kasem wan prishud blesing.

Elda Neil L. Andersen blong Kworom blong Olgeta Twelef Aposol i tijim: “Wan we i gat gud hat i save helpem wan blong fiksim wil blong trak, tekem fren i go long dokta, kakae wetem wan we i no hapi tumas, o smael mo talem halo mo mekem dei i gud.

“Be wan we i folem fasfala komanmen, bae i ademap samting long ol impoten aksen blong seves ia.”¹

Aedia 2: Lukluk I Go long Rod blong Kavenan Nomo

Taem hem i stap toktok long ol memba blong fas taem olsem Presiden blong Jos, Presiden Russell M. Nelson i talem: “Stap long rod blong kavenan.” Blong mekem mo kipim ol kavenan, “bambae i openem doa long evri blesing long saed blong spirit, mo blong kasem spesel janis ia we i stap.”²

Olsem ol Lata-dei Sent, yumi kasem baptaes, yumi kasem konfemesen, mo yumi kasem presen we i Tabu Spirit. Olgeta man we oli klin inaf, oli kasem prishud. Yumi stap go long tempol blong kasem endaomen, mo blong sil tugeta olsem ol famli blong oltaem. Olgeta odinens ia we i sevem man mo ol kavenan we oli kam wetem, yumi nid blong gat blong save kam olsem Hem, blong yumi save stap wetem Hem.

Yumi gat wan impoten pat blong plei blong stap helpem ol narawan folem rod ia taem yumi stap helpem olgeta blong kipim ol kavenan blong olgeta mo rere blong oli mekem ol fiuja kavenan.³ ?Olsem wanem nao yu save helpem ol famli we yu wok blong olgeta, blong oli kasem nekis odinens we oli nidim? Hemia i save minim blong mekem wan papa i rere blong baptaesem gel blong hem, blong eksplenem ol blesing blong nekis kavenan blong mekem, o serem ol wei blong gat wan eksperiens we i gat moa mining blong stap riniu ol kavenan blong yumi taem yumi tekem mo kakae sakramen.

Aedia 3: Invaetem mo Leftemap Tingting

Taem we i stret, kaonsel wetem olgeta we yu stap lukaot long olgeta, abaot jenis long laef blong olgeta mo ol traehad blong kam moa olsem Kraes. Letem olgeta oli save ol paoa we yu luk long olgeta, mo laekem long olgeta. Faenemaot weaples oli save kam antap gud long hem mo tokbaot olsem wanem yu save helpem olgeta. (Blong gat moa abaot kaonsel tugeta wetem olgeta we yu stap givhan long olgeta, luk long “Counsel about Their Needs,” Liahona, Sept. 2018, 6–9.)

No fraet blong invaetem olgeta blong folem Sevya mo letem Hem i helpem olgeta blong kasem tabu paoa blong olgeta. Invitesen ia i save jenisim laef taem i kam wetem tras we yu gat long olgeta, mo fet we yu gat long Kraes.

Sikis Wei we Yumi Save Helpem Ol Narawan blong Progres I Go long Kraes

Wanem i folem i ol tingting long wei blong sapotem wanwan long yumi blong kam antap long laef mo blong progres folem kavenan rod ia. (Luk long Prijim Gospel blong Mi, japta 11, blong kasem moa aedia.)

Serem. Stap tru mo tok stret taem yu stap serem olsem wanem Sevya i bin helpem yu taem yu bin traem blong go kolosap long Hem taem yu bin laef folem ol prinsipol blong gospel nomata we laef i bin stop blong smol taem.
Ol Blesing we Hem I Promesem. Ol pipol oli nidim wan risen blong jenis we i moa strong bitim ol risen blong no jenis. Taem yu eksplenem ol blesing we oli kam wetem wan aksen, i save givim wan strong paoa blong muv (luk long Doktrin mo Ol Kavenan 130:20-21).
Invaetem. Taem wan i laef folem wan prinsipol blong gospel, hemia i tekem wan testemoni i kam (luk long Jon 7:17) mo i lidim wan blong i jenisim laef wetem moa dip mining.⁴ Kolosap evri storian i save gat, insaed, wan simpol invitesen blong mekem wan samting we bae i helpem olgeta blong progres.
Mekem plan tugeta. ?Wanem nao i nid blong hapen blong oli gat sakses blong kipim komitmen blong olgeta blong jenis? ?Olsem wanem yu save help? ?I gat wan klia taem blong stap folem?
Sapotem. Taem hem i help, developem wan sapot netwok blong ol pipol we oli save helpem wan blong i gohed blong muv mo gat sakses. Yumi evriwan i nidim wan blong stap klapem han long yumi.
Folemap. Serem progres we i stap hapen. Stap lukluk nomo long plan we i stap, be stretem sapos i nid. Save wet longtaem, gogohed, mo leftemap tingting. Jenis i save tekem taem blong hapen.

Invitesen blong Tekem Aksen

Tingting long sam wei we bae yu wok blong givhan—ol bigwan mo ol smolwan—ol wei ia oli save helpem ol narawan oli jenisim laef wetem moa dip mining, mo kam moa olsem Sevya.

Serem Eksperiens blong Yu

Sendem long mifala ol eksperiens blong yufala taem yufala i bin givhan long ol narawan, o taem ol narawan oli bin givhan long yu. Go long liahona.lds.org mo klikim “Submit an Article or Feedback.”